മുഖ്യമന്ത്രിയുടെ വാര്‍ത്താ സമ്മേളനത്തില്‍ നിന്ന്
ഇന്ന് ലഭിച്ച ലബോറട്ടറി റിപ്പോര്‍ട്ടുകള്‍ അനുസരിച്ച് 506 പേര്‍ക്കാണ് കോവിഡ് സ്ഥിരീകരിച്ചത്. ഇന്ന് സംസ്ഥാനത്ത് 794 പേര്‍ക്ക് രോഗമുക്തി ഉണ്ടായി. (ഐസിഎംആര്‍ വെബ്പോര്‍ട്ടിലുമായി ബന്ധപ്പെട്ട് ചില സാങ്കേതിക ജോലികള്‍ നടക്കുന്നതിനാല്‍ ഉച്ചവരെയുള്ള ഫലമാണ് ഉള്‍പ്പെടുത്തിയിട്ടുള്ളത്. പിന്നീടുള്ളത് ജില്ലകള്‍ക്ക് ലഭ്യമാക്കും).

കോവിഡ്മൂലമുള്ള രണ്ട് മരണങ്ങള്‍ ഇന്ന് റിപ്പോര്‍ട്ട് ചെയ്തിട്ടുണ്ട്. കോഴിക്കോട് പള്ളിക്കണ്ടി സ്വദേശി ആലിക്കോയ (77), എറണാകുളം വാഴക്കുളം സ്വദേശി ബീപാത്തു (65) എന്നിവരാണ് മരണമടഞ്ഞത്. ഇവരുടെ നിര്യാണത്തില്‍ അനുശോചനം രേഖപ്പെടുത്തുന്നു.

ഇന്ന് 375 പേര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. അതില്‍ ഉറവിടമറിയാത്തത് 29.വിദേശത്തുനിന്ന് 31 പേര്‍. മറ്റു സംസ്ഥാനങ്ങളില്‍നിന്ന് 40 പേര്‍. ഹെല്‍ത്ത് വര്‍ക്കര്‍മാര്‍ 37.

പോസിറ്റീവായവരുടെ ജില്ല തിരിച്ചുള്ള കണക്ക്
തൃശൂര്‍ 83, തിരുവനന്തപുരം 70, പത്തനംതിട്ട 59, ആലപ്പുഴ 55, കോഴിക്കോട് 42, കണ്ണൂര്‍ 39, എറണാകുളം 34, മലപ്പുറം 32, കോട്ടയം 29, കാസര്‍കോട് 28, കൊല്ലം 22, ഇടുക്കി 6, പാലക്കാട് 4, വയനാട് 3.

നെഗറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 220, കൊല്ലം 83, പത്തനംതിട്ട 81, ആലപ്പുഴ 20, കോട്ടയം 49 ഇടുക്കി 31, എറണാകുളം 69, തൃശൂര്‍ 68, പാലക്കാട് 36, മലപ്പുറം 12, കോഴിക്കോട് 57, വയനാട് 17, കണ്ണൂര്‍ 47, കാസര്‍കോട് 4. കഴിഞ്ഞ 24 മണിക്കൂറിനകം 21,533 സാമ്പിളുകള്‍ പരിശോധിച്ചു.

ബലിപെരുന്നാള്‍
നാളെ ബലിപെരുന്നാളാണ് – ഈദുല്‍ അസ്ഹ. ത്യാഗത്തിന്‍റെ, സമര്‍പ്പണത്തിന്‍റെ, മനുഷ്യസ്നേഹത്തിന്‍റെ മഹത്തായ സന്ദേശമാണ് ഈദുല്‍ അസ്ഹ നമുക്കു നല്‍കുന്നത്. ഈ മഹത്തായ മൂല്യങ്ങള്‍ ജീവിതത്തില്‍ പകര്‍ത്തുന്നതിന് പ്രതിജ്ഞ പുതുക്കാനുള്ള അവസരമാകട്ടെ ഈ വര്‍ഷത്തെ ഈദ് ആഘോഷം. ലോകമെങ്ങുമുള്ള മലയാളികള്‍ക്ക് ഈദ് ആശംസ നേരുന്നു.

കോവിഡ് മഹാമാരി സൃഷ്ടിച്ച പ്രതിസന്ധികള്‍ക്കിടയിലാണ് ഇത്തവണ ജനങ്ങള്‍ ഈദ് ആഘോഷിക്കുന്നത്. പതിവ് ആഘോഷങ്ങള്‍ക്കുള്ള സാഹചര്യം ഇന്ന് ലോകത്തെവിടെയുമില്ല. വളരെ കുറച്ച് തീര്‍ത്ഥാടകരാണ് ഇത്തവണ ഹജ്ജ് കര്‍മം നിര്‍വഹിക്കുന്നത്. ഒഴിച്ചുകൂടാന്‍ പറ്റാത്ത കര്‍മങ്ങള്‍ മാത്രമാക്കി ഹജ്ജ് പരിമിതപ്പെടുത്തിയിരിക്കുകയാണ്.

ഇവിടെ പള്ളികളില്‍ പെരുന്നാള്‍ നമസ്കാരം അനുവദിച്ചിട്ടുണ്ടെങ്കിലും ആളുകളുടെ എണ്ണം പരമാവധി കുറച്ചും മറ്റു കോവിഡ് മാനദണ്ഡങ്ങള്‍ പാലിച്ചും നമസ്കാരം നിര്‍വഹിക്കണമെന്ന് നിര്‍ദേശിച്ചിട്ടുണ്ട്. എല്ലാവരും അതു പാലിക്കണമെന്ന് ഒരിക്കല്‍ക്കൂടി അഭ്യര്‍ത്ഥിക്കുന്നു. ഇന്നത്തെ സാഹചര്യത്തിന്‍റെ ഗുരുതരസ്വഭാവം കണക്കിലെടുത്ത് പള്ളികളില്‍ ഇത്തവണയും നമസ്കാരം വേണ്ടെന്നുവെച്ച കമ്മിറ്റികളുമുണ്ട്. അവരുടെ തീരുമാനത്തെ അഭിനന്ദിക്കുകയും ചെയ്യുന്നു.

അതിജീവനത്തിന്‍റെ 6 മാസങ്ങള്‍
കോവിഡിനൊപ്പം നമ്മള്‍ സഞ്ചരിക്കാന്‍ തുടങ്ങിയിട്ട് ആറു മാസമാവുകയാണ്. സര്‍ക്കാര്‍ അതിന്‍റെ എല്ലാ സംവിധാനങ്ങളെയും ഉപയോഗപ്പെടുത്തിയാണ് അപരിചിതമായ സാഹചര്യത്തെ മുറിച്ചുകടക്കാന്‍ ശ്രമിക്കുന്നത്. ജനങ്ങള്‍ ഇക്കാര്യത്തില്‍ കാട്ടുന്ന ജാഗ്രതയും പിന്തുണയും കോവിഡ് പ്രതിരോധ പ്രവര്‍ത്തനങ്ങള്‍ക്ക് ഊര്‍ജമേകിയിട്ടുണ്ട്.  കോവിഡ് പ്രതിരോധത്തില്‍ സര്‍ക്കാരിന് എന്ത് പങ്കാണ് ഉള്ളത് എന്ന ഒരു ചോദ്യം ഇന്നു കേട്ടു. കോവിഡ് പ്രതിരോധത്തിന്‍റെ നാള്‍വഴികള്‍ പരിശാധിച്ചാല്‍ അതിനുള്ള ഉത്തരം ഉണ്ടാകും.

ജനുവരി 30നാണ് കേരളത്തില്‍ രോഗം സ്ഥിരീകരിച്ചതെങ്കിലും നമ്മുടെ പ്രതിരോധ പ്രവര്‍ത്തനങ്ങള്‍ക്ക് അതിലേറെ പഴക്കമുണ്ട്. ജനുവരി രണ്ടാമത്തെ ആഴ്ച മുതല്‍ ചൈനയില്‍ ഒരു പ്രത്യേകതരം സാര്‍സ് വൈറസ് പടരുന്നുവെന്ന് അറിഞ്ഞപ്പോള്‍ തന്നെ ആരോഗ്യ വകുപ്പ് ഉണര്‍ന്ന് പ്രവര്‍ത്തിച്ചു തുടങ്ങിരുന്നു. അംഗീകരിക്കപ്പെട്ട പ്രോട്ടോക്കോള്‍ ഇല്ലാതിരുന്ന ഘട്ടത്തിലും പ്രോട്ടോക്കോളും പ്രവര്‍ത്തന രൂപരേഖയും നിര്‍ദേശങ്ങളും തയ്യാറാക്കി.

ജനുവരി 30, ഫെബ്രുവരി 2, 4 തീയതികളിലായി ആദ്യ ഘട്ടത്തില്‍ 3 കേസുകളാണ് ഉണ്ടായത്. ആ 3 കേസുകളില്‍ ആദ്യ ഘട്ടം ഒതുങ്ങുകയും ചെയ്തു. ആദ്യം സ്ഥിരീകരിക്കപ്പെട്ട രാജ്യങ്ങളില്‍ പടര്‍ന്നുപിടിക്കുമ്പോഴാണ് നാം വ്യാപനമില്ലാതെ ആദ്യഘട്ടം അതിജീവിച്ചത്. മാര്‍ച്ച് 8ന് വിദേശത്തുനിന്നും എത്തിയവരില്‍ നിന്ന് രോഗമുണ്ടായതോടെ കേരളത്തില്‍ രണ്ടാം ഘട്ടം ആരംഭിച്ചു.

ലോക്ക്ഡൗണ്‍ പ്രഖ്യാപിക്കപ്പെടുന്ന ഘട്ടത്തില്‍ മാര്‍ച്ച് 24ന് കേരളത്തില്‍ 105 പേരാണ് ചികിത്സയിലുണ്ടായിരുന്നത്. മേയ് 3ന് ചികിത്സയിലുള്ളവരുടെ എണ്ണം 95 ആയി കുറയുകയാണ് ചെയ്തത്. രണ്ടാം ഘട്ടം പിന്നിടുമ്പോള്‍ 496 പേര്‍ക്കാണ് ആകെ രോഗം ബാധിച്ചത്. അതില്‍ 165 പേര്‍ക്ക് മാത്രമാണ് സമ്പര്‍ക്കത്തിലൂടെ രോഗബാധയുണ്ടായത്.

അണ്‍ലോക്ക് പ്രക്രിയ ആരംഭിച്ചതോടെ കോവിഡിന്‍റെ മൂന്നാം ഘട്ടത്തിലേക്ക് കടന്നു. സംസ്ഥാന അതിര്‍ത്തി വഴിയും എയര്‍പോര്‍ട്ട്, സീപോര്‍ട്ട് വഴിയും ആളുകള്‍ കേരളത്തിലേക്ക് എത്തിത്തുടങ്ങിയ ഘട്ടമാണിത്. ഇതുവരെ പുറത്തുനിന്ന് 6,82,699 പേര്‍ വന്നിട്ടുണ്ട്. അതില്‍ 4,19,943 പേര്‍ മറ്റു സംസ്ഥാനങ്ങളില്‍നിന്നും 2,62,756 പേര്‍ വിദേശ രാജ്യങ്ങളില്‍നിന്നുമാണ്.

മൂന്നാംഘട്ടത്തില്‍ ഇന്നലെ (ജൂലൈ 29) വരെ 21,298 പേര്‍ക്കാണ് രോഗം ബാധിച്ചത്. അതിലാകട്ടെ 9099 പേര്‍ കേരളത്തിന് പുറത്തുനിന്നും വന്നവരാണ്. 12,199 പേര്‍ക്കാണ് സമ്പര്‍ക്കത്തിലൂടെ രോഗം ഉണ്ടായി. മൂന്നാംഘട്ടത്തില്‍ രോഗികളുടെ എണ്ണത്തില്‍ ഗണ്യമായ വര്‍ധനവ് നേരത്തെ പ്രതീക്ഷിച്ചതാണ്. എന്നാല്‍ രോഗവ്യാപന തോത് പ്രവചിക്കപ്പെട്ട രീതിയില്‍ കൂടാതെയാണ് ഇപ്പോഴും മറ്റ് സ്ഥലങ്ങളെ അപേക്ഷിച്ച് കേരളം പിടിച്ചുനില്‍ക്കുന്നത്.

ഈ ആറു മാസത്തിനിടയില്‍ സര്‍ക്കാര്‍ നടത്തിയ ചിട്ടയായ പ്രവര്‍ത്തനഫലമാണ് പലരും പ്രവചിച്ചതുപോലുള്ള അപകടത്തിലേക്ക് കേരളം പോവാതിരുന്നത്. ആരോഗ്യമേഖലയെ മാത്രം പരിശോധിച്ചാല്‍ സര്‍ക്കാര്‍ നടത്തിയ ഇടപടലുകള്‍ എത്രത്തോളമാണ് എന്ന് മനസ്സിലാകും. കോവിഡ് പ്രതിരോധത്തിനായി ഒറ്റ ദിവസം കൊണ്ട് 276 ഡോക്ടര്‍മാരെയാണ് നിയമിച്ചത്.

കാസര്‍കോട് മെഡിക്കല്‍ കോളേജ് പ്രവര്‍ത്തനസജ്ജമാക്കി. 273 തസ്തികകള്‍ സൃഷ്ടിച്ചു. 980 ഡോക്ടര്‍മാരെ താല്‍ക്കാലിക അടിസ്ഥാനത്തില്‍ നിയമിച്ചു. ഇതിനുപുറമെ 6700 താല്‍ക്കാലിക തസ്തികകളിലേക്ക് എന്‍എച്ച്എം വഴി നിയമനം നടത്തി. ഏറ്റവും താഴെത്തട്ടില്‍വരെ നമ്മുടെ ആരോഗ്യസംവിധാനത്തെ ശക്തിപ്പെടുത്തുകയായിരുന്നുലക്ഷ്യം.

കോവിഡ് പ്രതിരോധത്തിനു മാത്രമായി ആയിരത്തോളം ആംബുലന്‍സുകള്‍ സജ്ജമാക്കി. 50 മൊബൈല്‍ മെഡിക്കല്‍ യൂണിറ്റുകള്‍ വിവിധ മേഖലകളില്‍ പ്രവര്‍ത്തനം നടത്തുന്നു. ആശുപത്രികളെ കോവിഡ് ആശുപത്രികളാക്കി മാറ്റുകയും സൗകര്യങ്ങള്‍ സജ്ജമാക്കുകയും ചെയ്തു. 105ഉം 93ഉം വയസ്സുള്ള പ്രായമേറിയ രോഗികളെ വരെ ചികിത്സിച്ച് ഭേദമാക്കാന്‍ നമ്മുടെ ആരോഗ്യപ്രവര്‍ത്തകര്‍ക്ക് കഴിഞ്ഞിട്ടുണ്ട്.  വാര്‍ഡുതല സമിതികള്‍ തുടങ്ങി മുകളറ്റം വരെ നീളുന്ന നിരീക്ഷണ സംവിധാനങ്ങളാണ് സംസ്ഥാനത്തെ കോവിഡ് പ്രതിരോധ പ്രവര്‍ത്തനത്തിന്‍റെ കരുത്താകുന്നത്.

ഇടപെടലുകള്‍
ഒരാള്‍ പോലും പട്ടിണി കിടക്കരുത്. ഒരു ജീവിപോലും നമ്മുടെ കരുതലിന് പുറത്തായികൂടാ. ലോക്ഡൗണ്‍ ഘട്ടമായാലും അണ്‍ലോക്ക് ഘട്ടമായാലും സര്‍ക്കാരിന്‍റെ നിലപാട് ഇതായിരുന്നു. ലോക്ഡൗണ്‍ ഉണ്ടാക്കുന്ന അതിഗുരുതരമായ സാമ്പത്തിക സാഹചര്യമുണ്ട്. ആസാഹചര്യത്തെ മറികടക്കാനാണ് 20,000 കോടി രൂപയുടെ പാക്കേജാണ് സംസ്ഥാനം നടപ്പാക്കിയത്. 60 ലക്ഷം പേര്‍ക്ക് സാമൂഹ്യസുരക്ഷാ ക്ഷേമപെന്‍ഷനുകള്‍ കുടിശ്ശികയില്ലാതെ വിതരണം ചെയ്തു.

ക്ഷേമപെന്‍ഷന്‍ കിട്ടാത്ത പതിനഞ്ചു ലക്ഷത്തോളം കുടുംബങ്ങള്‍ക്ക് 1000 രൂപ വീതം ധനസഹായം വിതരണം ചെയ്തു. വിവിധ ക്ഷേമനിധികളിലെ അംഗങ്ങള്‍ക്ക് ധനസഹായം വേറെയും നല്‍കി. കുടുംബശ്രീ വഴി മുഖ്യമന്ത്രിയുടെ സഹായഹസ്തം വായ്പാ പദ്ധതിയില്‍ 2000 കോടി രൂപ വിതരണം ചെയ്യാനാണ് പദ്ധതി തയ്യാറാക്കിയത്. അതില്‍ 1,84,474, പേര്‍ക്കായി  1742.32 കോടി രൂപ ഇതിനകം വിതരണം ചെയ്തു.

പൊതുവിതരണ സംവിധാനം വഴി 85 ലക്ഷം കുടുംബങ്ങള്‍ക്ക് ഭക്ഷ്യധാന്യങ്ങള്‍ സൗജന്യമായി വിതരണം ചെയ്തു. ഇതോടൊപ്പം പലവ്യജ്ഞന കിറ്റുകളും സൗജന്യമായി നല്‍കി. അങ്കന്‍വാടികളില്‍ നിന്നും നല്‍കുന്ന പോഷകാഹാരം കുട്ടികള്‍ക്ക് വീടുകളില്‍ എത്തിച്ചു നല്‍കി. 26 ലക്ഷം വിദ്യാര്‍ത്ഥികള്‍ക്ക് സൗജന്യ ഭക്ഷ്യധാന്യ കിറ്റും വിതരണം ചെയ്തു. സമൂഹ അടുക്കള വഴി ലോക്ഡൗണ്‍ ഘട്ടത്തില്‍ ബുദ്ധിമുട്ട് അനുഭവിച്ചവര്‍ക്ക് സൗജന്യമായും അല്ലാതെയും ഭക്ഷണവിതരണം നടത്തി. കുടുംബശ്രീയുടെ ആഭിമുഖ്യത്തില്‍ കുറഞ്ഞ നിരക്കില്‍ ഭക്ഷണം നല്‍കുന്ന ജനകീയ ഭക്ഷണശാലകള്‍ ആരംഭിച്ചു.

ജനങ്ങള്‍ക്ക് അധികഭാരമില്ലാതെ ഈ കാലഘട്ടത്തെ മറികടക്കുന്നതിനു വേണ്ടിയുള്ള ക്രമീകരണങ്ങളും സര്‍ക്കാര്‍ ഒരുക്കിയിരുന്നു. ഐടി, വ്യവസായം, ചെറികിട വ്യവസായം, സര്‍ക്കാര്‍ കെട്ടിടങ്ങളില്‍ വാടകയ്ക്കുള്ള വ്യാപാരികള്‍ ഇങ്ങനെയുള്ളവര്‍ക്കെല്ലാം ആവശ്യമായ ഇളവകുള്‍ ഈ ഘട്ടങ്ങളില്‍ നല്‍കി. ഇത്തരം ഇടപെടലുകള്‍ അണ്‍ലോക്ക് ഘട്ടത്തിലും തുടരുകയാണ്. കാര്‍ഷിക മേഖലയില്‍ സുഭിക്ഷ കേരളം പദ്ധതി ആരംഭിച്ചത് തൊഴില്‍ മേഖലയിലും ഉല്‍പാദനമേഖലയിലുമുള്ള മാന്ദ്യത്തെ മറികടക്കുകയെന്ന ലക്ഷ്യത്തോടെയാണ്. കാര്‍ഷിക മേഖലയില്‍ വലിയ ഉണര്‍വ് സുഭിക്ഷ കേരളം പദ്ധതി സാധ്യമാക്കിയിട്ടുണ്ട്.

രണ്ടുമാസത്തെ ക്ഷേമപെന്‍ഷനും സാമൂഹ്യസുരക്ഷാ പെന്‍ഷനും ഇപ്പോള്‍ വിതരണം ചെയ്തുകൊണ്ടിരിക്കുകയാണ്. ഓണത്തിനു മുന്നോടിയായി സൗജന്യ ഭക്ഷണകിറ്റ് നല്‍കുന്ന പ്രവര്‍ത്തനങ്ങളും ആരംഭിച്ചിട്ടുണ്ട്. ഇങ്ങനെയെല്ലാം സാധ്യമായ എല്ലാ ഇടപെടലുകളും നടത്തിയ ആറു മാസങ്ങളാണ് നാം പിന്നിടുന്നത്. കോവിഡിനോടൊപ്പം തന്നെ ഇനിയും നാം സഞ്ചരിക്കേണ്ടിവരുമെന്നാണ് വിദഗ്ധര്‍ നല്‍കുന്ന മുന്നറിയിപ്പ്. അതിന് സജ്ജമാകുക എന്നതാണ് പ്രധാനം.

പൊതുസ്ഥിതി
തിരുവനന്തപുരത്ത് കോവിഡ് 19 പ്രതിരോധത്തിനായി ശക്തമായ നടപടികളാണ് ഒരുക്കിയിരിക്കുന്നത്. 23 സിഎഫ്എല്‍ടിസികളില്‍ 2500 കിടക്കകള്‍ ഒരുക്കിയിട്ടുണ്ട്. 1612 പേര്‍ ഇപ്പോള്‍ വിവിധ സിഎഫ്എല്‍ടിസികളിലായി കഴിയുന്നു. 888 കിടക്കകളോളം ഒഴിവുണ്ട്. ഇനിയും കൂടുതല്‍ സിഎഫ്എല്‍ടിസികള്‍ സജ്ജമാക്കാനുള്ള ശ്രമത്തിലാണ്.

അടുത്ത ഘട്ടത്തില്‍ തിരുവനന്തപുരം ജനറല്‍ ആശുപത്രിയെ പൂര്‍ണമായും കോവിഡ് ചികിത്സയ്ക്കായുള്ള കോവിഡ് ഹോസ്പിറ്റലാക്കും. ജനറല്‍ ആശുപത്രിയില്‍ ചികിത്സയിലുള്ള രോഗികള്‍ക്ക് നഗരത്തില്‍ തന്നെയുള്ള സര്‍ക്കാര്‍ ആശുപത്രികളിലും മെഡിക്കല്‍ കോളേജിലും ആവശ്യമായ ക്രമീകരണം ഏര്‍പ്പെടുത്തിയിട്ടുണ്ട്. ജനറല്‍ ആശുപത്രിയിലെ ഒമ്പതാം വാര്‍ഡിലെ രോഗികളെ എല്ലാ സുരക്ഷാ മാനദണ്ഡങ്ങളും പാലിച്ച് അവിടെത്തന്നെ ചികിത്സിക്കും. 769 ബെഡുകളാണ് ജനറല്‍ ആശുപത്രിയിലുള്ളത്. 25 ഐസിയു കിടക്കകളുമുണ്ട്.

തിരുവനന്തപുരം ജില്ലയിലെ കണ്ടെയിന്‍മെന്‍റ് സോണുകളില്‍ അവശ്യസാധനങ്ങള്‍ വില്‍ക്കുന്ന കടകള്‍ക്ക് രാവിലെ ഏഴുമണി മുതല്‍ വൈകിട്ട് നാലുവരെ പ്രവര്‍ത്തനാനുമതി നല്‍കിയിട്ടുണ്ട്. പുല്ലുവിള, പുതുക്കുറിച്ചി, അഞ്ചുതെങ്ങ്, പൊഴിയൂര്‍ എന്നീ ലാര്‍ജ് ക്ലസ്റ്ററുകളുടെ സമീപ മേഖലകളിലേക്ക് രോഗം പടരുന്നുണ്ട്.

കൊല്ലം ജില്ലയില്‍ കണ്ടയിന്‍മെന്‍റ് സോണുകളില്‍ ഇളവ് അനുവദിച്ച ഇടങ്ങളില്‍ കോവിഡ് മാനദണ്ഡങ്ങള്‍ പാലിച്ച് കശുവണ്ടി ഫാക്ടറികള്‍ തുറക്കാന്‍ തീരുമാനമായി. കുറഞ്ഞ എണ്ണം ജീവനക്കാരെ മാത്രമേ നിയോഗിക്കാവൂ.

മഴ ശക്തി പ്രാപിച്ചതോടെ എറണാകുളത്ത് ദുരിതാശ്വാസ ക്യാമ്പുകള്‍ പ്രവര്‍ത്തനം ആരംഭിച്ചിട്ടുണ്ട്. കോവിഡ് മാനദണ്ഡങ്ങള്‍ പാലിച്ചാണ് പ്രവര്‍ത്തനം.  നിരീക്ഷണത്തില്‍ കഴിയുന്ന ആളുകളെ പ്രത്യേക സ്ഥലങ്ങളിലാണ് താമസിപ്പിക്കുന്നത്.

മലപ്പുറം ജില്ലയിലെ കൊണ്ടോട്ടിയില്‍ 622 പേര്‍ക്ക് നടത്തിയ ആന്‍റിജന്‍ പരിശോധനയില്‍ 137 പേര്‍ക്കാണ് രോഗം സ്ഥിരീകരിച്ചു.

കോഴിക്കോട് ജില്ലയില്‍ രോഗവ്യാപനത്തിന്‍റെ പശ്ചാത്തലത്തില്‍ സ്വകാര്യ ആശുപത്രികളുടെ കീഴിലുള്ളത് ഉള്‍പ്പെടെ  അഞ്ച് കേന്ദ്രങ്ങളില്‍ കൂടി കോവിഡ് ചികിത്സാ സൗകര്യം ഒരുക്കാന്‍ തീരുമാനിച്ചിട്ടുണ്ട്. കോഴിക്കോട് ബീച്ച് ആശുപത്രി കോവിഡ് ആശുപത്രിയായി മാറ്റും.

മുതിര്‍ന്ന പൗരډാരെയും മാരക രോഗങ്ങളുള്ളവരേയും സംരക്ഷിക്കാന്‍ തദ്ദേശസ്വയംഭരണ സ്ഥാപനങ്ങള്‍ക്ക് കീഴില്‍ കരുതല്‍ കെയര്‍ സെന്‍ററുകള്‍ എന്ന പേരില്‍ പ്രത്യേക കര്‍മ്മ പദ്ധതി ആവിഷ്കരിച്ചു. ഓരോ തദ്ദേശസ്ഥാപനങ്ങള്‍ക്ക് കീഴിലും ഒരു കരുതല്‍ കെയര്‍ സെന്‍റര്‍ ഒരുക്കും.

വയനാട് ജില്ലയിലെ പേരിയ, പാല്‍ചുരം, പക്രംതളം (കുറ്റ്യാടി) ചുരങ്ങളില്‍ ചരക്കു വാഹനങ്ങള്‍ക്കും മെഡിക്കല്‍ ആവശ്യങ്ങളുമായി ബന്ധപ്പെട്ട വാഹനങ്ങള്‍ക്കു മാത്രമായി ഗതാഗതം പരമിതപ്പെടുത്തി. എവിടെയും 20ല്‍ കൂടുതല്‍ പേര്‍ പങ്കെടുക്കുന്ന വിവാഹ ചടങ്ങുകള്‍ പാടില്ല എന്ന നിര്‍ദ്ദേശം നല്‍കി. വിവാഹ ചടങ്ങുകള്‍ മൂന്ന് മണിക്കൂറില്‍ കൂടാന്‍ പാടില്ല.

വീട്ടില്‍ നിരീക്ഷണം
ചെറിയ രോഗലക്ഷണങ്ങളുള്ളവരെ ഹോം കെയര്‍ ഐസൊലേഷനിലാക്കാമെന്ന് ഐസിഎംആര്‍ ജൂലൈ രണ്ടിന് ഗൈഡ്ലൈന്‍ പുറത്തിറക്കിയിരുന്നു. ഇത് മറ്റ് പല സംസ്ഥാനങ്ങളും നടപ്പിലാക്കി. ആ ഗൈഡ്ലൈന്‍ അടിസ്ഥാനമാക്കി ഹോം കെയര്‍ ഐസൊലേഷന്‍ കേരളത്തിലും നടപ്പിലാക്കാമെന്ന് വിദഗ്ധ സമിതി ശുപാര്‍ശ ചെയ്തിട്ടുണ്ട്.

കോവിഡ് ബാധിച്ച ബഹുഭൂരിപക്ഷം ആളുകള്‍ക്കും രോഗലക്ഷണങ്ങള്‍ ഇല്ല. ഇവര്‍ക്ക് വലിയ ചികിത്സയും ആവശ്യമില്ല. ഇവര്‍ മറ്റുള്ളവരിലേക്ക് രോഗം പകര്‍ത്താതിരിക്കാനാണ് സിഎഫ്എല്‍ടിസികളില്‍ കിടത്തുന്നത്. വീട്ടില്‍ കഴിഞ്ഞെന്നു കരുതി പ്രത്യേക പ്രശ്നമൊന്നുമില്ല. ഒരു കാരണവശാലും മുറിവിട്ട് പുറത്തിറങ്ങരുത്; ഐസൊലേഷന്‍ വ്യവസ്ഥകള്‍ പൂര്‍ണമായും പാലിക്കാനാവണം.

രോഗലക്ഷണമില്ലാത്തവര്‍ക്കാണ് ഹോം കെയര്‍ ഐസൊലേഷന്‍ അനുവദിക്കുക. ടെലിഫോണിക് മോണിറ്ററിങ്, സ്വയം നിരീക്ഷിച്ച് രോഗലക്ഷണങ്ങള്‍ റിപ്പോര്‍ട്ട് ചെയ്യല്‍, ഫിങ്കര്‍ പള്‍സ് ഓക്സിമെട്രി റെക്കോര്‍ഡ് എന്നിവയാണ് ഹോം ഐസൊലേഷനില്‍ പ്രധാനം. ത്രിതല മോണിറ്ററിങ് സംവിധാനമാണ് ഏര്‍പ്പെടുത്തിയിരിക്കുന്നത്. ജെപിഎച്ച്എന്‍, ആശ വര്‍ക്കര്‍, വളണ്ടിയര്‍ എന്നിവരാരെങ്കിലും നിശ്ചിത ദിവസങ്ങളില്‍ അവരെ സന്ദര്‍ശിച്ച് വിലയിരുത്തും. വിദഗ്ധ ഡോക്ടര്‍മാരുടെ മേല്‍നോട്ടവുമുണ്ടാകും. ആരോഗ്യ നിലയില്‍ എന്തെങ്കിലും ബുദ്ധിമുട്ടുകള്‍ ഉണ്ടാകുന്നെങ്കില്‍ ആശുപത്രിയിലാക്കും.

സിഎഫ്എല്‍ടിസിയില്‍ ചികിത്സയിലുള്ള പലരും പറയുന്നത് ‘ഞങ്ങള്‍ വീട്ടില്‍ പൊയ്ക്കോളാം എന്തെങ്കിലും രോഗലക്ഷണങ്ങളുണ്ടെങ്കില്‍ അറിയിച്ചാല്‍ പോരേ’ എന്നാണ്.

പരീക്ഷണാടിസ്ഥാനത്തില്‍ ആരോഗ്യ പ്രവര്‍ത്തകര്‍ക്കാണ് ഹോം കെയര്‍ ഐസൊലേഷന്‍ നടപ്പിലാക്കുന്നത്. ആരോഗ്യ പ്രവര്‍ത്തകരുടെ അവബോധം ഗുണം ചെയ്യുമെന്നതിനാലാണ് ആദ്യം അവരെ തെരഞ്ഞെടുത്തത്. എന്നാല്‍ ആരെയും നിര്‍ബന്ധിച്ച് ഹോം ഐസൊലേഷനില്‍ വിടില്ല. താല്‍പര്യമുള്ള ആരോഗ്യ പ്രവര്‍ത്തകര്‍ സത്യവാങ്മൂലം നല്‍കണം.

കോവിഡ് പ്രതിരോധത്തിനായി പരീക്ഷിച്ച് വിജയിച്ചതാണ് ഹോം ക്വാറന്‍റൈന്‍. രോഗം മറ്റുള്ളവരിലേക്ക് പകരാതിരിക്കാന്‍ വീട്ടില്‍ ടോയിലറ്റ് ഉള്ള ഒരു മുറിയില്‍ ഒറ്റയ്ക്ക് കഴിയുന്ന രീതിയാണ് ഹോം ക്വാറന്‍റൈന്‍. ഇതിന് കഴിയാത്തവര്‍ക്ക് സര്‍ക്കാര്‍ കേന്ദ്രങ്ങളില്‍ ക്വാറന്‍റൈന്‍ സംവിധാനം ഒരുക്കിയിട്ടുണ്ട്. ബഹുഭൂരിപക്ഷത്തിനും പുറത്തിറങ്ങിയാല്‍ വീട്ടിലെ മറ്റുള്ളവര്‍ക്ക് രോഗം പകരുമെന്ന അവബോധം ഉണ്ട്. പ്രിയപ്പെട്ടവരെ രോഗത്തിലേക്ക് തള്ളി വിടാന്‍ ആരും തയ്യാറല്ലല്ലോ. വളരെ കുറച്ച് പേരാണ് ക്വാറന്‍റൈന്‍ നിര്‍ദേശങ്ങള്‍ ലംഘിച്ചിട്ടുള്ളത്. അവര്‍ക്കെതിരെ നിയമ നടപടികള്‍ സ്വീകരിച്ചിട്ടുണ്ട്.  

ഹോം ക്വാറന്‍റൈന്‍ നടപ്പിലാക്കിയപ്പോഴും അന്നും പ്രതിപക്ഷം സര്‍ക്കാരിനെ വിമര്‍ശിച്ചതാണ്. മിറ്റിഗേഷന്‍ മെത്തേഡ് നടപ്പിലാക്കണമെന്നാണ് അന്ന് പ്രതിപക്ഷ നേതാവ് പറഞ്ഞത്. അവസാനം കേരളം നടപ്പിലാക്കിയ ഹോം ക്വാറന്‍റൈന്‍ ലോകം തന്നെ അംഗീകരിക്കുന്ന കാഴ്ചയാണ് കണ്ടത്. മറ്റ് സംസ്ഥാനങ്ങളും ഹോം ക്വാറന്‍റൈനില്‍ കേരളത്തെ മാതൃകയാക്കുന്നുണ്ട്. ഇതിനിടയില്‍, ‘സ്വയം ചികിത്സിക്കുന്ന അവസ്ഥയിലേക്ക്’ രോഗികളെ തള്ളിവിടുന്നു എന്ന പരിഹാസം എങ്ങനെ വിശേഷിക്കപ്പെടേണ്ടതാണ് എന്ന് ജനങ്ങള്‍ തീരുമാനിക്കട്ടെ.

ഒരു കാര്യം കൂടി. സംസ്ഥാനത്ത് 29 കോവിഡ് ആശുപത്രികളിലായി 8715 ബെഡുകളും 25 മറ്റ് സര്‍ക്കാര്‍ ആശുപത്രികളിലായി 984 ബെഡുകളും, 103 സിഎഫ്എല്‍ടിസികളിലായി 14,894 ബെഡുകളും 19 സ്വകാര്യ ആശുപത്രികളിലായി 943 ബെഡുകളും ഉള്‍പ്പെടെ മൊത്തം 176 സ്ഥാപനങ്ങളിലായി 25,536 ബെഡുകള്‍ സജ്ജമാക്കിയിട്ടുണ്ട്. അതുകൊണ്ട് രോഗികളുടെ എണ്ണം വര്‍ധിച്ചാല്‍ ചികിത്സാസൗകര്യം ഉണ്ടാകില്ല എന്ന ആശങ്കയ്ക്ക് ഒരടിസ്ഥാനവുമില്ല.

പൊലീസ്
കോവിഡ് പ്രതിരോധ പ്രവര്‍ത്തനങ്ങള്‍ക്കായി വിജിലന്‍സ് ഉള്‍പ്പെടെയുള്ള പൊലീസിന്‍റെ എല്ലാ സ്പെഷ്യല്‍ യൂണിറ്റുകളിലേയും ഉദ്യോഗസ്ഥരെ നിയോഗിക്കും. ക്രമസമാധാന ചുമതലയുള്ള ഉദ്യോഗസ്ഥരെ കൂടാതെ എസ്പി, ഡിഐജി, ഐജി, എഡിജിപി തലത്തിലുള്ള ഉദ്യോഗസ്ഥന്‍മാര്‍ നേരിട്ടോ അല്ലാതെയോ പ്രതിരോധപ്രവര്‍ത്തനങ്ങളില്‍ പങ്കാളികളാകും.

ലോക്ക്ഡൗണ്‍ നിയന്ത്രണങ്ങള്‍ തീരുന്നതുവരെ ജാഥകളും യോഗങ്ങളും സംഘടിപ്പിക്കുന്നതിനുള്ള നിയന്ത്രണങ്ങള്‍ തുടരും.  

സംസ്ഥാനത്തിനകത്ത് കെഎസ്ആര്‍ടിസി ദീര്‍ഘദൂര യാത്രാ സര്‍വീസുകള്‍ പുനരാരംഭിക്കാന്‍ തീരുമാനിച്ചിട്ടുണ്ട്. കോവിഡ് മാനദണ്ഡങ്ങള്‍ പാലിച്ചായിരിക്കും സര്‍വീസ്

മാസ്ക് ധരിക്കാത്ത 5821 സംഭവങ്ങള്‍ സംസ്ഥാനത്ത് ഇന്ന് റിപ്പോര്‍ട്ട് ചെയ്തിട്ടുണ്ട്. ക്വാറന്‍റൈന്‍ ലംഘിച്ച ആറു പേര്‍ക്കെതിരെ ഇന്ന് കേസ് രജിസ്റ്റര്‍ ചെയ്തു.

കാലവര്‍ഷം
രണ്ടു ദിവസമായി വ്യാപകമായ മഴ ലഭിക്കുന്നു. കാലവര്‍ഷം ശക്തിപ്പെട്ടിട്ടുണ്ട്. മഴ പെയ്യുന്ന സ്ഥിതി ഉണ്ടായതോടെ താഴ്ന്ന പ്രദേശങ്ങളില്‍ വെള്ളക്കെട്ട് രൂപപ്പെടുന്ന സ്ഥിതിയുണ്ടായി.

കോട്ടയം, വൈക്കം, കുമരകം, ചേര്‍ത്തല, എറണാകുളം സൗത്ത്, കണ്ണൂര്‍, വെള്ളാനിക്കര, കൊച്ചി, കക്കയം എന്നീ മേഖലകളില്‍ 24 മണിക്കൂറില്‍ 150 മില്ലിമീറ്ററില്‍ അധികം മഴയാണ് രേഖപ്പെടുത്തിയത്.  ഇതാണ് വെള്ളക്കെട്ട് സൃഷ്ടിച്ചത്. ചിലയിടങ്ങളില്‍ മണ്ണിടിച്ചിലും ഉണ്ടായെങ്കിലും ആളുകളെ മാറ്റി താമസിപ്പിച്ചതുകൊണ്ട് അപകടങ്ങള്‍ കുറക്കാന്‍ സാധിച്ചു. ഇന്നും നാളെയും കൂടി കാലാവസ്ഥ വകുപ്പ് ചില ജില്ലകളില്‍ ഓറഞ്ച്, യെല്ലോ അലെര്‍ട്ടുകള്‍ പ്രഖ്യാപിച്ചിട്ടുണ്ട്.

ആഗസ്റ്റ് നാലോടു കൂടി ബംഗാള്‍ ഉള്‍ക്കടലില്‍ ഒരു ന്യൂനമര്‍ദം രൂപപ്പെടാനുള്ള നേരിയ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് സംസ്ഥാന ദുരന്ത നിവാരണ അതോറിറ്റിയെ അറിയിച്ചിട്ടുണ്ട്. മുന്‍ വര്‍ഷങ്ങളില്‍ ഇത്തരത്തില്‍ ബംഗാള്‍ ഉള്‍ക്കടലില്‍ ന്യൂനമര്‍ദങ്ങള്‍ രൂപം കൊണ്ടപ്പോഴാണ് കേരളത്തില്‍ അതിതീവ്രമഴ ഉണ്ടായത്.

അതിതീവ്രമഴ സാധ്യത നിലവില്‍ പ്രവചിക്കപ്പെട്ടിട്ടില്ലെങ്കിലും മുന്നറിയിപ്പിനെ ഗൗരവത്തില്‍ കണ്ട് തയ്യാറെടുപ്പ് നടപടികള്‍ സ്വീകരിച്ചു വരികയാണ്. ക്യാമ്പുകള്‍ക്ക് കെട്ടിടങ്ങള്‍ സജ്ജമാക്കിയിട്ടുണ്ട്. ന്യൂനമര്‍ദത്തിന്‍റെ രുപീകരണവും വികാസവും സംസ്ഥാന ദുരന്ത നിവാരണ അതോറിറ്റിയും കേന്ദ്ര കാലാവസ്ഥ വകുപ്പും സൂക്ഷമമായി നിരീക്ഷിച്ചു വരികയാണ്.

ഡിജിറ്റല്‍ വിദ്യാഭ്യാസ രീതി
കേരള സര്‍ക്കാര്‍ നടപ്പിലാക്കിയ ഡിജിറ്റല്‍ വിദ്യാഭ്യാസ രീതി ദേശീയ തലത്തില്‍ ശ്രദ്ധേയമായിരിക്കുന്നു. തീര്‍ച്ചയായും നമുക്ക് അഭിമാനിക്കാവുന്ന ഒരു നേട്ടമാണിത്. ഇന്ത്യയിലെ വിദൂര വിദ്യാഭ്യാസ മുന്നേറ്റങ്ങളെ (2020) സംബന്ധിച്ച് എംഎച്ച്ആര്‍ഡി പുറത്തിറക്കിയ റിപ്പോര്‍ട്ടിലാണ് കേരളത്തെ രാജ്യത്തിനേറ്റവും നല്ല മാതൃകയായി അവതരിപ്പിച്ചിരിക്കുന്നത്.

ഡിജിറ്റല്‍ ക്ലാസ് റൂം, ഐസിടി ലാബ്, ഓണ്‍ലൈന്‍ പ്രവേശനം, കമ്പ്യൂട്ടര്‍ അധിഷ്ഠിത പഠനം, സമൂഹ പങ്കാളിത്തം തുടങ്ങി എംഎച്ച്ആര്‍ഡി നിര്‍ദ്ദേശിച്ച 16 മാനദണ്ഡങ്ങളില്‍ 15ഉം കേരളം നേടിയിട്ടുണ്ട് എന്ന് റിപ്പോര്‍ട്ടില്‍ സൂചിപ്പിക്കുന്നു.

ട്രോളിങ്
കേരള തീരത്ത് ട്രോളിങ് നിരോധനം അവസാനിക്കുകയാണ്. കോവിഡ് 19ന്‍റെ പശ്ചാത്തലത്തില്‍ ആഗസ്ത് അഞ്ചുമുതല്‍ കോവിഡ് പ്രോട്ടോകോള്‍ പാലിച്ചുകൊണ്ട് നിയന്ത്രിത മത്സ്യബന്ധനം അനുവദിക്കും. എല്ലാ ബോട്ടുകളും രജിസ്ട്രേഷന്‍ നമ്പരിന്‍റെ അടിസ്ഥാനത്തില്‍ ഒന്നിടവിട്ട ദിവസങ്ങളില്‍ മത്സ്യബന്ധനത്തില്‍ ഏര്‍പ്പെടാവുന്നതാണ്. കണ്ടെയിന്‍മെന്‍റ് സോണിലും മത്സ്യബന്ധനം നടത്താവുന്നതാണ്. എന്നാല്‍, അങ്ങനെ ലഭ്യമാകുന്ന മത്സ്യം അതാത് സോണില്‍ വിറ്റുതീര്‍ക്കണം. കണ്ടെയിന്‍മെന്‍റ് സോണില്‍നിന്ന് മത്സ്യവില്‍പനയ്ക്കായി പുറത്തേക്ക് പോകാന്‍ പാടില്ല. അധികമുള്ള മത്സ്യം സഹകരണ സംഘങ്ങള്‍ മുഖേന മാര്‍ക്കറ്റില്‍ എത്തിക്കും.

മത്സ്യബന്ധനത്തിനു പുറപ്പെടുന്ന സ്ഥലത്തുതന്നെ നിര്‍ബന്ധമായും തിരിച്ചെത്തണം. മത്സ്യലേലം പൂര്‍ണമായും ഒഴിവാക്കണം. ഹാര്‍ബറുകളില്‍ ഹാര്‍ബര്‍ മാനേജ്മെന്‍റ് സൊസൈറ്റികളും ലാന്‍ഡിങ് സെന്‍ററുകളില്‍ മത്സ്യത്തൊഴിലാളി പ്രതിനിധികളെയും ബന്ധപ്പെട്ട ഉദ്യോഗസ്ഥരെയും ഉള്‍പ്പെടുത്തി പ്രാദേശികമായി രൂപീകരിക്കുന്ന ജനകീയ കമ്മിറ്റികളായിരിക്കും മത്സ്യത്തിന്‍റെ വില നിശ്ചയിക്കുന്നതും മത്സ്യബന്ധന പ്രവര്‍ത്തനങ്ങളും വിപണനവും നിയന്ത്രിക്കുന്നതും.

ഫയാസിന് അഭിനന്ദനം
എത്ര വലിയ പ്രശ്നങ്ങള്‍ക്കു നടുവിലും തളരാതെ മുന്നോട്ടുപോകാന്‍ ഒരു സമൂഹത്തിന്‍റെ ഇന്ധനമായി മാറേണ്ടത് ശുഭാപ്തിവിശ്വാസമാണ്. പ്രതീക്ഷകള്‍ ഉയര്‍ത്തിപ്പിടിക്കുകയും നിശ്ചയദാര്‍ഢ്യത്തോടെ വെല്ലുവിളികളെ മറികടക്കുകയും ചെയ്യേണ്ട ഈ ഘട്ടത്തില്‍ നമ്മളെല്ലാവരും പരസ്പരം പ്രചോദിപ്പിച്ചേ തീരൂ.

ആ ഉത്തരവാദിത്വം നമ്മുടെ കുഞ്ഞുങ്ങളേറ്റെടുത്ത് കാണുമ്പോള്‍ ഉണ്ടാകുന്ന സന്തോഷം അനിര്‍വചനീയമാണ്. നാലാം ക്ലാസില്‍ പഠിക്കുന്ന മുഹമ്മദ് ഫയാസ് എന്ന കൊച്ചുമിടുക്കന്‍റെ വാക്കുകള്‍ നമ്മളൊന്നാകെ സ്വീകരിച്ച് ഹൃദയത്തോടു ചേര്‍ത്തതും മറ്റൊന്നും കൊണ്ടുമല്ല. പരാജയങ്ങള്‍ക്ക് മുന്നില്‍ കാലിടറാതെ, പ്രതീക്ഷ കൈവിടാതെ മുന്നോട്ടു പോകാന്‍ ഓര്‍മിപ്പിക്കുന്ന ആ കുഞ്ഞിന്‍റെ നിഷ്ക്ളങ്കമായ വാക്കുകള്‍ ഒരു സമൂഹത്തിന്‍റെ തന്നെ മുദ്രാവാക്യമായി മാറി.

ഫയാസ് തന്‍റെ ചിന്തകളെ വാക്കുകളില്‍ ഒതുക്കാതെ പ്രവൃത്തികളിലൂടെ മാതൃക തീര്‍ക്കുക കൂടി ചെയ്തിരിക്കുന്നു. തനിക്ക് ലഭിച്ച സമ്മാനത്തുകയില്‍ നിന്നൊരു വിഹിതം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കിയിരിക്കുന്നു. ഇന്ന് മലപ്പുറം കലക്ടര്‍ അത് ഏറ്റുവാങ്ങിയിട്ടുമുണ്ട്. ബാക്കി തുക ഒരു നിര്‍ദ്ധന കുടുംബത്തിലെ പെണ്‍കുട്ടിയുടെ വിവാഹത്തിനായി നീക്കിവെയ്ക്കുകയും ചെയ്തു.

ഏവരും പിന്തുടരേണ്ട ഉദാത്തമായ സാമൂഹികബോധമാണ് ഒരു കൊച്ചുകുട്ടി നമുക്ക് പകര്‍ന്നു തന്നത്. ആ പ്രതീക്ഷയും ദയാവായ്പുമാണ് നമ്മെ നയിക്കേണ്ടത്. ഫയാസിനേയും അവനു പിന്തുണ നല്‍കിയ രക്ഷിതാക്കളേയും ഹൃദയപൂര്‍വം അഭിനന്ദിക്കുന്നു.

സഹായം
കാസര്‍കോട് ജില്ലയിലെ ഇളംമ്പച്ചി ഗവണ്‍മെന്‍റ് ഹയര്‍സെക്കന്‍ററി സ്കൂള്‍ പിടിഎയും പൂര്‍വ്വവിദ്യാര്‍ത്ഥികളും ചേര്‍ന്ന് 33 കുട്ടികള്‍ക്ക് ടി.വി വിതരണം ചെയ്തു.

കുലശേഖരപുരം ഗവണ്‍മെന്‍റ് ഹയര്‍ സെക്കന്‍ററി സ്കൂള്‍ നാഷണല്‍ സര്‍വ്വീസ് സ്കീം യൂണിറ്റ്, കോവിഡ് ട്രീറ്റ്മെന്‍റ് സെന്‍ററുകള്‍ക്ക് ജീവന്‍ രക്ഷാമരുന്നുകള്‍ സൂക്ഷിക്കുന്നതിനായി അഞ്ചു റഫ്രിഡ്ജറേറ്ററുകള്‍ കൈമാറി.

ദുരിതാശ്വാസം
കിടങ്ങൂര്‍ സര്‍വ്വീസ് സഹകരണ ബാങ്ക് 14,93,919 രൂപ.

മഹിളാ അസോസിയേഷന്‍ മട്ടന്നൂര്‍ ഏരിയാ കമ്മിറ്റി രൂചിക്കൂട്ട് ചലഞ്ചിലൂടെ സ്വരൂപിച്ച 1,20,000 രൂപ.

ചെറുവത്തൂര്‍ തുരുത്തിയിലെ സിപിഐഎം കാവുംചിറ, ഓര്‍ക്കുളം ബ്രാഞ്ചുകളും എകെജി ക്ലബ്ബും ചേര്‍ന്ന് 61,400 രൂപ.

ആലത്തൂരിലെ അത്തിപ്പൊറ്റ വായനശാലയുടെ നേതൃത്വത്തില്‍ പാലട പ്രഥമന്‍ ചലഞ്ചിലൂടെ ശേഖരിച്ച 55,555 രൂപ.

മഹിളാ അസോസിയേഷന്‍ കല്യാട് വില്ലേജ് കമ്മിറ്റി ബിരിയാണി ചലഞ്ചിലൂടെ സമാഹരിച്ച 40,000 രൂപ.

തൃക്കരിപ്പൂര്‍ ഉദിനൂരിലെ നടക്കാവ് വി.വി. ബാബുരാജ് 50,000 രൂപ.

കര്‍ഷക തൊഴിലാളി യൂണിയന്‍ പെരളം നോര്‍ത്ത് വില്ലേജ് കമ്മറ്റി 30,000 രൂപ

ചെന്താര തുരുത്തിമുക്ക് ബിരിയാണി ചലഞ്ചിലൂടെ സമാഹരിച്ച 33,670 രൂപ.

നീലേശ്വരം പള്ളിക്കരയിലെ കെഎസ്ആര്‍ടിസിയില്‍ നിന്ന് വിരമിച്ച കെ. ലക്ഷ്മണന്‍ പെന്‍ഷന്‍ തുക 25,800 രൂപ.

വെസ്റ്റ് എളേരി വരക്കാട് സ്ട്രൈക്കേഴ്സ് ക്ലബ്ബ് 25,450 രൂപ.

കയ്യൂര്‍ ആലന്തട്ട പുതിയടത്തറ ദേവസ്ഥാനം 25,000 രൂപ.

പിലിക്കോട് ചന്തേര ചെമ്പിലോട്ട് ക്ഷേത്രം, മാണിയാട്ട് ഊരു കമ്മറ്റി 25000 രൂപ.

കരിവെള്ളൂര്‍, കുണിയന്‍ സൂര്യോദയ ആര്‍ട്സ് ആന്‍ഡ് സ്പോര്‍ട്സ് ക്ലബ് 15,000

മുഖ്യമന്ത്രിയുടെ വാര്‍ത്താ സമ്മേളനത്തില്‍ നിന്ന്

1167 പേര്‍ക്കാണ് ഇന്ന് കോവിഡ് സ്ഥിരീകരിച്ചത്. ഇന്ന് സംസ്ഥാനത്ത് 679 പേര്‍ക്ക് രോഗമുക്തി ഉണ്ടായി. ഇന്ന് 888 പേര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. അതില്‍ ഉറവിടമറിയാത്തത് 55. വിദേശത്തുനിന്ന് 122 പേര്‍. മറ്റു സംസ്ഥാനങ്ങളില്‍നിന്ന് 96 പേര്‍. ആരോഗ്യപ്രവര്‍ത്തകര്‍ 33.

ഇന്ന് നാലു മരണം റിപ്പോര്‍ട്ട് ചെയ്തു. എറണാകുളം സ്വദേശി അബൂബക്കര്‍ (72), കാസര്‍കോട് സ്വദേശി അബ്ദുള്‍ റഹ്മാന്‍ (70), ആലപ്പുഴയിലെ സൈനുദ്ദീന്‍ 65, തിരുവനന്തപുരത്തെ സെല്‍വമണി (65) എന്നിവരാണ് മരണമടഞ്ഞത്. ഇവരുടെ നിര്യാണത്തില്‍ അനുശോചനം രേഖപ്പെടുത്തുന്നു.

തിരുവനന്തപുരം, കോട്ടയം, മലപ്പുറം, തൃശൂര്‍ ജില്ലകളില്‍ പുതുതായി രോഗം സ്ഥിരീകരിച്ചവരുടെ എണ്ണം ഇന്ന് നൂറിനു മുകളിലാണ്.

പോസിറ്റീവായവരുടെ ജില്ല തിരിച്ചുള്ള കണക്ക്

തിരുവനന്തപുരം 222, കോട്ടയം 118, മലപ്പുറം 112, തൃശൂര്‍ 109, കൊല്ലം 95, പാലക്കാട് 86, ആലപ്പുഴ 84, എറണാകുളം 70, കോഴിക്കോട് 67, പത്തനംതിട്ട 63, വയനാട് 53, കണ്ണൂര്‍ 43, കാസര്‍കോട് 38, ഇടുക്കി 7.

നെഗറ്റീവായവരുടെ ജില്ല തിരിച്ചുള്ള കണക്ക്

തിരുവനന്തപുരം 170, കൊല്ലം 70, പത്തനംതിട്ട 28, ആലപ്പുഴ 80, കോട്ടയം 20, ഇടുക്കി 27, എറണാകുളം 83, തൃശൂര്‍ 45, പാലക്കാട് 40, മലപ്പുറം 34, കോഴിക്കോട് 13, വയനാട് 18, കണ്ണൂര്‍ 15, കാസര്‍കോട് 36.
കഴിഞ്ഞ 24 മണിക്കൂറിനകം 19,140 സാമ്പിളുകള്‍ പരിശോധിച്ചു. ഇപ്പോള്‍ ചികിത്സയിലുള്ളവര്‍ 10,093. ഇന്ന് 1167 പേരെ ആശുപത്രിയില്‍ പ്രവേശിപ്പിച്ചു.              

ഇതുവരെ രോഗം സ്ഥിരീകരിച്ചവരുടെ എണ്ണം 20,896 ആണ്. ഇതുവരെ ആകെ 3,62,210 സാമ്പിളുകളാണ് പരിശോധനയ്ക്കായി അയച്ചത്. ഇതില്‍ 6596 സാമ്പിളുകളുടെ ഫലം വരാനുണ്ട്. 1,50,716 പേരാണ് നിരീക്ഷണത്തിലുള്ളത്. ഇതുകൂടാതെ സെന്‍റിനല്‍ സര്‍വൈലന്‍സിന്‍റെ ഭാഗമായി മുന്‍ഗണനാ ഗ്രൂപ്പുകളില്‍ നിന്ന് 1,16,418 സാമ്പിളുകള്‍ ശേഖരിച്ചതില്‍ 1,13,073 സാമ്പിളുകള്‍ നെഗറ്റീവ് ആയി. സംസ്ഥാനത്ത് ഹോട്ട്സ്പോട്ടുകളുടെ എണ്ണം 486.

തിരുവനന്തപുരത്തിന്‍റെ കാര്യം പ്രത്യേകം പറയേണ്ടതുണ്ട്. കോവിഡ് 19 വലിയ രീതിയില്‍ തന്നെ തലസ്ഥാനത്ത് പടര്‍ന്നിട്ടുണ്ട്. ഇന്ന് മേനംകുളം കിന്‍ഫ്ര പാര്‍ക്കില്‍ 300 പേര്‍ക്ക് പരിശോധന നടത്തിയതില്‍ 88 പേര്‍ക്ക് രോഗം സ്ഥിരീകരിച്ചു എന്നാണ് ഒടുവില്‍ ലഭിച്ച ഒരു വിവരം. രാജ്യത്തിന്‍റെ പൊതുസ്ഥിതി എടുത്താല്‍ 12 പേരെ ടെസ്റ്റ് ചെയ്യുമ്പോഴാണ് ഒരാള്‍ പോസിറ്റീവായി മാറുന്നത്. കേരളത്തിലിത് 36ല്‍ ഒന്ന് എന്ന കണക്കിലാണ്. തിരുവനന്തപുരം ജില്ലയില്‍ 18 പേരെ ടെസ്റ്റ് ചെയ്യുമ്പോള്‍ ഒരാള്‍ പോസിറ്റീവാണെന്നു കാണുന്നു.

രോഗബാധിതരെയാകെ കണ്ടെത്താനുള്ള സര്‍വൈലന്‍സ് മെക്കാനിസമാണ് നടത്തുന്നത്. ക്ലസ്റ്റര്‍ രൂപപ്പെട്ടത് ആദ്യമായി ശ്രദ്ധയില്‍പ്പെട്ടത് ഈ മാസം അഞ്ചിന് പൂന്തുറയിലാണ്. ബീമാപള്ളി, പുല്ലുവിള മേഖലകളില്‍ 15-ാം തീയതിയോടു കൂടിയാണ് ക്ലസ്റ്ററുകള്‍ രൂപപ്പെട്ടത്. ലോകാരോഗ്യ സംഘടന വിവക്ഷിച്ചിരിക്കുന്ന മാര്‍ഗരേഖകള്‍ക്കനുസൃതമായാണ് രോഗനിയന്ത്രണ പ്രവര്‍ത്തനങ്ങള്‍ നടപ്പിലാക്കുന്നത്.

വലിയതുറ, അഞ്ചുതെങ്ങ്, ചിറയിന്‍കീഴ്, കുളത്തൂര്‍ (നെയ്യാറ്റിന്‍കര), പനവൂര്‍, കടയ്ക്കാവൂര്‍, കുന്നത്തുകാല്‍, പെരുമാതുറ, പുതുക്കുറിച്ചി തുടങ്ങിയ തീരദേശ മേഖലകളില്‍ തുടര്‍ന്ന് ക്ലസ്റ്ററുകള്‍ രൂപപ്പെട്ടു. പൂന്തുറയിലും പുല്ലുവിളയിലും അനുവര്‍ത്തിച്ച പ്രവര്‍ത്തന പദ്ധതിയില്‍ ആവശ്യമായ മാറ്റങ്ങള്‍ വരുത്തി പ്രദേശത്തിന് അനുയോജ്യമായ രീതിയില്‍ രോഗനിയന്ത്രണ നിര്‍വ്യാപന പ്രവര്‍ത്തികള്‍ ഈ മേഖലകളില്‍ നടപ്പാക്കുകയാണ്.

തീരദേശത്തിനു പുറമേ പാറശ്ശാല, കുന്നത്തുകാല്‍, പട്ടം, പെരുങ്കിടവിള, ബാലരാമപുരം, കാട്ടാക്കട പ്രദേശങ്ങളിലും രോഗബാധ അധികരിച്ച് കാണുന്നുണ്ട്. ഈ പ്രദേശങ്ങള്‍ക്ക് ഓരോന്നിനും അനുയോജ്യമായ രോഗനിര്‍ണ്ണയ നിര്‍വ്യാപന ബോധവല്‍കരണ പ്രവര്‍ത്തനങ്ങള്‍ നടപ്പിലാക്കി വരുന്നുണ്ട്.

ഇതുവരെ 39,809 റുട്ടീന്‍ ആര്‍ടിപിസിആര്‍ ടെസ്റ്റുകളാണ് തിരുവനന്തപുരം ജില്ലയില്‍ ചെയ്തിട്ടുള്ളത്. ഇതിനുപുറമേ സാമൂഹികവ്യാപനം ഉണ്ടോ എന്നറിയുവാനായി 6983 പൂള്‍ഡ് സെന്‍റിനല്‍ സാമ്പിളുകളും ചെയ്തിട്ടുണ്ട്.  ഇന്നലെ 789 റുട്ടീന്‍ സാമ്പിളുകളും നൂറോളം പൂള്‍ഡ് സെന്‍റിനല്‍ നാമ്പിളുകളുമാണ് ചെയ്തത്.  ലോകാരോഗ്യ സംഘടന നിര്‍ദ്ദേശിച്ചിട്ടുള്ള റാപ്പിഡ് ആന്‍റിജന്‍ ടെസ്റ്റ് ഈ മാസം നാലു മുതലാണ് ജില്ലയില്‍ ആരംഭിച്ചത്. ഇതുവരെ 24,823 ടെസ്റ്റുകള്‍ ചെയ്തിട്ടുണ്ട്. 1882 സാമ്പിളുകളാണ് ഇന്നലെ പരിശോധിച്ചത്. പുല്ലുവിള ഉള്‍പ്പെടുന്ന കടലോര മേഖലയില്‍ ഇന്ന് 1150 ആന്‍റിജന്‍ ടെസ്റ്റാണ് നടത്തിയത്.

കോട്ടയം ജില്ലയില്‍ ഏറ്റുമാനൂര്‍ മേഖലയില്‍ രോഗബാധിതരുടെ എണ്ണം വര്‍ധിക്കുകയാണ്. ഇന്നലെ ഏറ്റുമാനൂര്‍ പച്ചക്കറി മാര്‍ക്കറ്റില്‍ ആന്‍റിജന്‍ പരിശോധനയ്ക്ക് വിധേയരായ 67 പേരില്‍ 45 പേര്‍ക്കും രോഗം സ്ഥിരീകരിച്ചിരുന്നു. ഇവിടുത്തെ രോഗബാധിതരില്‍ ഭൂരിഭാഗം പേര്‍ക്കും ലക്ഷണങ്ങളില്ലാത്തതും സാഹചര്യത്തിന്‍റെ ഗൗരവം വര്‍ധിപ്പിക്കുന്നു. ഏറ്റുമാനൂര്‍ മുന്‍സിപ്പാലിറ്റിയില്‍ നിലവില്‍ കണ്ടെയ്ന്‍മെന്‍റ് സോണുകളായ 4, 27 വാര്‍ഡുകള്‍ ഒഴികെയുള്ള എല്ലാ വാര്‍ഡുകളും കാണക്കാരി, മാഞ്ഞൂര്‍, അയര്‍ക്കുന്നം, അതിരമ്പുഴ ഗ്രാമപഞ്ചായത്തുകളിലെ എല്ലാ വാര്‍ഡുകളും ഉള്‍പ്പെടുത്തി പ്രത്യേക ക്ലസ്റ്റര്‍ പ്രഖ്യാപിച്ചിട്ടുണ്ട്.

എറണാകുളം ജില്ലയിലെ ആലുവ, കീഴ്മാട് പ്രദേശത്തു രോഗ വ്യാപനം തുടരുകയാണ്. ചെല്ലാനം ക്ലസ്റ്ററിലെ കേസുകള്‍ കുറഞ്ഞിട്ടുണ്ട്.

പട്ടാമ്പി ക്ലസ്റ്ററില്‍ നിന്ന് തൃശൂരില്‍ സമ്പര്‍ക്ക രോഗബാധിതരാകുന്നവരുടെ എണ്ണം വര്‍ധിച്ചു. പാലക്കാട് ജില്ലയില്‍ പട്ടാമ്പിയിലും സമീപപ്രദേശങ്ങളിലും ഇതുവരെ ആകെ 3703 പേരിലാണ് പരിശോധന നടത്തിയത്. ഇന്നലെ വരെ 271 പേര്‍ക്ക് രോഗം കണ്ടെത്തി. പട്ടാമ്പിയില്‍ റാപ്പിഡ് റെസ്പോണ്‍സ് ടീം ഇതുവരെ 7000 വീടുകളിലാണ് സര്‍വേ നടത്തിയത്. 122 പേര്‍ക്ക് ലക്ഷണം കണ്ടെത്തുകയും ആന്‍റിജന്‍ പരിശോധന നടത്തുകയും ചെയ്തു. ഇതില്‍ 10 പേര്‍ക്ക് രോഗം സ്ഥിരീകരിച്ചിട്ടുണ്ട്.

മലപ്പുറം ജില്ലയില്‍ ഏറ്റവും കൂടുതല്‍ രോഗം സ്ഥിരീകരിക്കുന്നത് കൊണ്ടോട്ടിയിലാണ്.

കോഴിക്കോട് മെഡിക്കല്‍ കോളേജ് ആശുപത്രിയില്‍ കഴിഞ്ഞ ദിവസം മൂന്ന് ആരോഗ്യ പ്രവര്‍ത്തകര്‍ക്ക് രോഗം സ്ഥിരീകരിച്ചതോടെ മുഴുവന്‍ ആരോഗ്യ പ്രവര്‍ത്തകര്‍ക്കും ടെസ്റ്റ് നടത്താന്‍ തീരുമാനിച്ചു. ജില്ലയില്‍ കഴിഞ്ഞ ദിവസം 12 അതിഥി തൊഴിലാളികള്‍ക്ക് രോഗം സ്ഥിരീകരിച്ചിരുന്നു. തിരികെ വരുന്ന അതിഥി തൊഴിലാളികളുടെ വിവരങ്ങള്‍ ജില്ലാ ലേബര്‍ ഓഫീസില്‍ അറിയിക്കണമെന്ന് നിര്‍ദ്ദേശം നല്‍കിയിട്ടുണ്ട്.

വിവാഹ ചടങ്ങുകളിലും മരണാനന്തര ചടങ്ങുകളിലും പങ്കെടുക്കുന്നവരുടെ എണ്ണം കര്‍ശനമായി കുറയ്ക്കുന്നതിന് സംവിധാനം ഏര്‍പ്പെടുത്തി. ഇരുപതിലധികം പേര്‍ ചടങ്ങുകളില്‍ പങ്കെടുക്കാന്‍ പാടില്ല. വാര്‍ഡ് ആര്‍ആര്‍ടികളുടെ സാക്ഷ്യപത്രത്തിന്‍റെ അടിസ്ഥാനത്തില്‍ മാത്രമേ വിവാഹം, മരണം എന്നിവയുടെ സര്‍ട്ടിഫിക്കറ്റ് തദ്ദേശ സ്ഥാപനങ്ങള്‍ നല്‍കുകയുള്ളൂ. ചെക്യാട് പഞ്ചായത്തില്‍ വിവാഹ ചടങ്ങില്‍ പങ്കെടുത്ത മുപ്പതിലധികം പേര്‍ക്ക് കോവിഡ് സ്ഥിരീകരിച്ചതോടെയാണ് നിയന്ത്രണം കര്‍ക്കശമാക്കിയത്.

വയനാട് ജില്ലയില്‍ തവിഞ്ഞാല്‍ പഞ്ചായത്തിലെ വാളാട് ആശങ്കാജനകമായ സാഹചര്യമാണുള്ളത്. ഒരു മരണാനന്തര ചടങ്ങില്‍ പങ്കെടുത്ത ഒരു കുടുംബത്തിലെ എട്ടു പേര്‍ക്ക് ഇന്നലെ കോവിഡ് സ്ഥിരീകരിച്ചിരുന്നു. തുടര്‍ന്ന് 98 പേരുടെ സാമ്പിളെടുത്ത് പരിശോധിച്ചതില്‍ 43 പേര്‍ കൂടി പോസിറ്റീവായി. പഞ്ചായത്ത് ഇന്നലെ കണ്ടെയ്ന്‍മെന്‍റ് സോണായി പ്രഖ്യാപിച്ചിട്ടുണ്ട്.

കോഴിക്കോട് മെഡിക്കല്‍ കോളേജില്‍ മരിച്ച വാളാട് സ്വദേശിയുടെ മരണാനന്തര ചടങ്ങിനു ശേഷം അടുത്ത ദിവസങ്ങളില്‍ നാട്ടില്‍ രണ്ട് വിവാഹ ചടങ്ങുകള്‍ കൂടി നടക്കുകയും നിരവധി പേര്‍ പങ്കെടുക്കുകയും ചെയ്തതാണ് വ്യാപനം കൂടാന്‍ ഇടയാക്കിയത്. ഈ ചടങ്ങുകളില്‍ പങ്കെടുത്ത എല്ലാവരോടും ആരോഗ്യ വകുപ്പില്‍ റിപ്പോര്‍ട്ട് ചെയ്യാന്‍ നിര്‍ദ്ദേശം നല്‍കി.

ലാര്‍ജ് ക്ലസ്റ്ററിലേക്കു നീങ്ങുന്ന ബത്തേരിയിലും കൂടുതല്‍ രോഗബാധ റിപ്പോര്‍ട്ട് ചെയ്തിട്ടുണ്ട്. സമ്പര്‍ക്ക വ്യാപനത്തിന് കാരണമായ മൊത്ത വ്യാപാര സ്ഥാപനത്തിന്‍റെ ലൈസന്‍സ് റദ്ദാക്കി. അയല്‍ സംസ്ഥാനങ്ങളില്‍ നിന്ന് തുടര്‍ച്ചയായി ചരക്കു ലോറികള്‍ വരുന്ന സ്ഥാപനമാണിത്.

കണ്ണൂര്‍ ജില്ലയില്‍ കൊവിഡ് പ്രതിരോധ നടപടികള്‍ ശക്തിപ്പെടുത്തുന്നതിന്‍റെ ഭാഗമായി സന്നദ്ധ സംഘടനകള്‍, ക്ലബുകള്‍, വായനശാലകള്‍, റസിഡന്‍സ് അസോസിയേഷനുകള്‍, മറ്റ് കൂട്ടായ്മകള്‍ എന്നിവയുടെ പ്രവര്‍ത്തനങ്ങളുമായി ബന്ധപ്പെട്ട് പുതിയ മാര്‍ഗനിര്‍ദ്ദേശങ്ങള്‍ പുറപ്പെടുവിച്ചു. ആളുകള്‍ കൂടുന്ന എല്ലാ പരിപാടികളും ഒഴിവാക്കാനാണ് നിര്‍ദ്ദേശം നല്‍കിയിരിക്കുന്നത്.

കണ്ണൂരില്‍ ആശുപത്രികളില്‍ കോവിഡ് ഇതര ചികിത്സക്കു എത്തുന്നവരില്‍ നിന്ന് കോവിഡ് പകരുന്ന സാഹചര്യം ഉണ്ടായിട്ടുണ്ട്. ഇതിനാല്‍ കോവിഡ് ഇതര ചികിത്സ നടത്തുന്ന എല്ലാ സര്‍ക്കാര്‍, സ്വകാര്യ ആശുപത്രികളും ആവശ്യമായ സുരക്ഷാ മുന്‍കരുതല്‍ സ്വീകരിക്കാന്‍ നിര്‍ദേശം നല്‍കി. കണ്ണൂര്‍ ഗവണ്‍മെന്‍റ് മെഡിക്കല്‍ കോളേജില്‍ കഴിഞ്ഞദിവസങ്ങളിലായി 47 ആരോഗ്യ പ്രവര്‍ത്തകര്‍ക്ക് കോവിഡ് ബാധയുണ്ടായി. അവിടെ ആവശ്യമായ സുരക്ഷ നടപടികള്‍ കൈക്കൊണ്ടിട്ടുണ്ട്.

ലാബ് ടെക്നിഷ്യന് കോവിഡ് പോസിറ്റീവ് ആയതിനെ തുടര്‍ന്ന് രാമന്തളി പിഎച്ച്സി അടച്ചു. പഞ്ചായത്ത് പ്രസിഡന്‍റ്, സെക്രട്ടറി, സ്റ്റാന്‍റിങ് കമ്മിറ്റി ചെയര്‍മാന്‍ എന്നിവര്‍ അടക്കമുള്ളവര്‍ നിരീക്ഷണത്തിലായി. ഇവര്‍ പിഎച്ച്സിയില്‍ ഫസ്റ്റ്ലൈന്‍ ട്രീറ്റ്മെന്‍റ് സെന്‍റര്‍ ക്രമീകരണവുമായി ബന്ധപ്പെട്ടു നടന്ന യോഗത്തില്‍ പങ്കെടുത്തിരുന്നു.

ശ്രീകണ്ഠപുരം നഗരസഭയിലെ ഒരു ജീവനക്കാരന് പോസിറ്റീവ് ആയതിനെ തുടര്‍ന്ന് നഗരസഭ ഓഫീസ് അടച്ചു. ചെയര്‍മാനും സെക്രട്ടറിയും മുഴുവന്‍ കൗണ്‍സിലര്‍മാരും ജീവനക്കാരും നിരീക്ഷണത്തില്‍ പോയി. ഇത് ഇവിടെ പറയുന്നത് ജനപ്രതിനിധികള്‍ പ്രതിരോധ പ്രവര്‍ത്തനത്തില്‍ ഏര്‍പ്പെടുമ്പോള്‍ ഒരശ്രദ്ധയും കാണിക്കരുത് എന്ന് ആവര്‍ത്തിച്ച് ഓര്‍മിപ്പിക്കുന്നതിനാണ്.

കാസര്‍കോട് ജില്ലയില്‍ പുതുതായി രൂപംകൊണ്ട ചെമ്മനാട് മാരേജ് ക്ലസ്റ്റര്‍ അടക്കം ജില്ലയില്‍ 10 ക്ലസ്റ്റ്റുകളാണ് ഇപ്പോള്‍ ഉള്ളത്. ഈ ക്ലസ്റ്ററുകളില്‍ ഇതുവരെ നടത്തിയ 2408 പരിശോധനകളില്‍ 350 പേരുടെ പരിശോധനഫലം പോസറ്റീവാണ്. ഈ 10 ക്ലസ്റ്ററുകളില്‍ ചെങ്കള മാരേജ് ക്ലസ്റ്റര്‍, ചെമ്മനാട് മാരേജ് ക്ലസ്റ്റര്‍ എന്നിവയും ഉള്‍പ്പെടുന്നു. ഈ രണ്ട് മാരേജ് ക്ലസ്റ്ററുകളില്‍ മാത്രം 51 പേര്‍ക്കാണ് രോഗം സ്ഥിരീകരിച്ചത്. വിവാഹച്ചടങ്ങുകളാണ് രോഗവിതരണ കേന്ദ്രങ്ങളാകുന്നത്.

പരിശോധനകള്‍

പരിശോധനകളുടെ എണ്ണം ഗണ്യമായി വര്‍ധിച്ചിട്ടുണ്ട്. പരിശോധനകളുടെ എണ്ണം കുറയുന്നു, പരിശോധനാ ഫലം വരാന്‍ വൈകുന്നു എന്ന് ചില ആക്ഷേപങ്ങള്‍ നിങ്ങള്‍ തന്നെ നേരത്തെ ഉന്നയിച്ചിരുന്നല്ലൊ. ഇത് വിശദമായി പരിശോധിച്ചു. ആരോഗ്യ പ്രവര്‍ത്തകര്‍ രാപ്പകലില്ലാതെ സേവനമനുഷ്ഠിച്ച് പരിശോധനകള്‍ ഊര്‍ജിതാമാക്കുകയാണ്. മുമ്പ് 2000 പരിശോധകള്‍ നടന്നപ്പോഴും ഇപ്പോള്‍ 20,000 ആയി ഉയര്‍ത്തിയപ്പോഴും പരിശോധന കുറവാണ് എന്നു പറയുന്നതില്‍ അസാംഗത്യമുണ്ട്.

തിരുവനന്തപുരത്തെ ക്ലസ്റ്റര്‍ മേഖലയില്‍ ഇന്നലെ (27-06-2020) മാത്രം നടത്തിയ ടെസ്റ്റുകളുടെ എണ്ണം നേരത്തേ സൂചിപ്പിച്ചിരുന്നല്ലൊ. കേസിന്‍റെ തീവ്രതയനുസരിച്ച് ഓരോ സ്ഥലത്തിന്‍റേയും പരിശോധനകളുടെ എണ്ണം നിശ്ചയിക്കുക. 35 ടീമുകളാണ് തിരുവനന്തപുരത്തെ ക്ലസ്റ്റര്‍ പ്രദേശങ്ങളില്‍ സേവനമനുഷ്ഠിക്കുന്നത്.

ഓരോ ടീമിനും പ്രതിദിനം 50 ആന്‍റിജന്‍ കിറ്റുകളും സെന്‍റിനല്‍ സര്‍വയലന്‍സ് നടത്തുന്ന ടീമിന് 300 ആന്‍റിജന്‍ കിറ്റുകളാണ് നല്‍കിയിരിക്കുന്നത്. ഓരോ ആളേയും സാമ്പിള്‍ പരിശോധിച്ച് രേഖപ്പെടുത്താന്‍ അര മണിക്കൂറോളം എടുക്കും. അതനുസരിച്ച് അവസാനമെടുക്കുന്നയാളുടെ പരിശോധനഫലം വരാന്‍ കുറച്ച് വൈകും.

പരിശോധനാഫലം വൈകുന്നുണ്ടോ?

ആര്‍ടിപിസിആര്‍ പരിശോധകള്‍ക്ക് സ്ഥലങ്ങളിലെ സാമ്പിളുകള്‍ ഒരു ലാബില്‍ വരുമ്പോള്‍ തരംതിരിച്ച് ലേബല്‍ ഒട്ടിച്ച് രജിസ്റ്റര്‍ ചെയ്ത് കമ്പ്യൂട്ടറില്‍ എന്‍റര്‍ ചെയ്താണ് പരിശോധനാ പ്രക്രിയയിലേക്ക് കടക്കുന്നത്. ഒരു ആര്‍ടിപിസിആര്‍ പരിശോധനയ്ക്ക് കുറഞ്ഞത് 6 മണിക്കൂര്‍ വേണം. പരിശോധന ഐസിഎംആറിന്‍റെ ഗൈഡ്ലൈന്‍ അനുസരിച്ച് മാത്രമേ നടത്താന്‍ കഴിയൂ.

ഏതെങ്കിലും ഫലത്തില്‍ സംശയം തോന്നിയാല്‍ വീണ്ടും ആ സാമ്പിള്‍ പരിശോധിക്കും. അതിന് വീണ്ടും അത്രയും സമയം എടുക്കും. റിപ്പീറ്റ് പരിശോധന ചിലപ്പോള്‍ അന്നുതന്നെ ചെയ്യാന്‍ കഴിയില്ല. വീണ്ടും സംശയം വന്നാല്‍ ആലപ്പുഴ എന്‍ഐവിയിലയച്ച് വ്യക്തത വരുത്തും.

ഫലം ആരോഗ്യ വകുപ്പിന്‍റെ മോണിറ്ററിങ് പോര്‍ട്ടലിലാണ് അപ് ലോഡ് ചെയ്യുന്നത്. പോസിറ്റീവായാല്‍ അതത് ജില്ലകളിലെ ജില്ലാ മെഡിക്കല്‍ ഓഫീസര്‍മാര്‍ക്കും ജില്ലാ സര്‍വയലന്‍സ് ഓഫീസര്‍ക്കും ഈ ഫലം നേരിട്ട് കാണാം. ഇതനുസരിച്ച് അവര്‍ തുടര്‍നടപടി സ്വീകരിക്കുന്നു. 14 ജില്ലകളിലേയും ഫലം സ്റ്റേറ്റ് കണ്‍ട്രോള്‍ റൂമില്‍ എത്തും. അതാണ് സംസ്ഥാനത്തെ ആകെ കണക്കായി വരുന്നത്. നെഗറ്റീവായാല്‍ ജില്ലാ കണ്‍ട്രേള്‍ റൂമിലേക്കും സംസ്ഥാന കണ്‍ട്രോള്‍ റൂമിലേക്കുമാണ് അയയ്ക്കുക.

ശ്വാസതടസമുള്ളവര്‍, ഗര്‍ഭിണികള്‍, ഗുരുതര രോഗമുള്ളവര്‍, എയര്‍പോര്‍ട്ട് ജീവനക്കാര്‍  എന്നീ വിഭാഗക്കാര്‍ക്ക് മുന്‍ഗണ നല്‍കി എമര്‍ജന്‍സിയായി പരിശോധനാ ഫലം നല്‍കാറുണ്ട്. 24 മണിക്കൂറും പ്രവര്‍ത്തിക്കുന്നതാണ് മിക്ക ലാബുകളും. ഇന്നലെ മാത്രം 7012 ആര്‍ടിപിസിആര്‍ റുട്ടീന്‍ സാമ്പിളുകളാണ് പരിശോധിച്ചത്. പിപിഇ കിറ്റ് ധരിച്ച് ഏറെ പ്രയാസമനുഭവിച്ചാണ് ജീവനക്കാര്‍ ഇത്രയും പരിശോധന നടത്തുന്നത്. തെറ്റായ പ്രചാരണം അവരുടെ മനോവീര്യം തകര്‍ക്കാനിടയാക്കും. പരിശോധനാ ലാബുകളുടെ എണ്ണവും പരിശോധനകളും പരമാവധി കൂട്ടാനാണ് സര്‍ക്കാര്‍ ശ്രമിക്കുന്നത്.

മൃതദേഹങ്ങള്‍

ഒരു മൃതദേഹം സംസ്കരിക്കുന്നതിനെ ചൊല്ലി ഉണ്ടായ സംഘര്‍ഷത്തെക്കുറിച്ച് കഴിഞ്ഞദിവസം പറഞ്ഞു. ഇന്ന് തീര്‍ത്തും വ്യത്യസ്തമായ ഒരനുഭവമാണ് പറയാനുള്ളത്. ആലപ്പുഴ ജില്ലയില്‍ കൊവിഡ് ബാധിച്ച് മരണമടഞ്ഞവരെ അവരുടെ തന്നെ ഇടവക സെമിത്തേരികളില്‍ ദഹിപ്പിച്ച് സംസ്കരിക്കാന്‍ കത്തോലിക്കാ സഭ ആലപ്പുഴ രൂപത തീരുമാനിച്ചതാണത്. നിലവിലെ സാഹചര്യത്തില്‍, ദഹിപ്പിക്കല്‍ വഴി സംസ്കരിക്കാനും ചിതാഭസ്മം സെമിത്തേരിയില്‍ അടക്കം ചെയ്യാനും തീരുമാനിച്ചതായാണ് ബിഷപ്പ് ഡോ. ജെയിംസ് ആനാപറമ്പില്‍ ജില്ലാ കലക്ടറെ അറിയിച്ചത്.

കോവിഡ് മാനദണ്ഡങ്ങള്‍ അനുസരിച്ച് മൃതദേഹങ്ങള്‍ ദഹിപ്പിക്കുന്നതിന് ജില്ലാ ഭരണസംവിധാനവും ആരോഗ്യപ്രവര്‍ത്തകരും അതത് ഇടവകകള്‍ക്ക്  എല്ലാ സഹായങ്ങളും നല്‍കും. ആലപ്പുഴ രൂപതയുടെത് മാതൃകാപരമായ പ്രവൃത്തിയാണ്. ഇത്തരത്തിലുള്ള ആദ്യ സംസ്കാരം കാട്ടൂര്‍ സെന്‍റ് മൈക്കിള്‍സ് പള്ളിയില്‍ നടക്കുന്നുണ്ട്.

വയനാട് ജില്ലയില്‍ വെള്ളമുണ്ട പഞ്ചായത്തിലെ വാരാമ്പറ്റ മഹല്ല് കമ്മിറ്റി കാണിച്ച മാതൃകയും ശ്രദ്ധേയമാണ്. ബാംഗ്ലൂരില്‍ നിന്ന് തലശ്ശേരിയിലേക്കുള്ള യാത്രാമദ്ധ്യേ ബത്തേരിയില്‍ മരണപ്പെട്ട വ്യക്തിയുടെ മൃതദേഹം കൊണ്ടുപോകാന്‍ തടസ്സമുള്ളതിനാല്‍ വാരാമ്പറ്റ പള്ളി ഖബര്‍സ്ഥാനത്ത് മറവു ചെയ്യാന്‍ മഹല്ല് കമ്മിറ്റി സമ്മതിക്കുകയായിരുന്നു. കമ്മിറ്റി ഭാരവാഹികളും ജനപ്രതിനിധികളും സന്നദ്ധ പ്രവര്‍ത്തകരും ഒത്തൊരുമയോടെയാണ് കോവിഡ് സ്ഥിരീകരിച്ച വ്യക്തിയുടെ മൃതദേഹം മറവു ചെയ്യാന്‍ മുന്നില്‍ നിന്നത്.

കോവിഡ് മരണങ്ങള്‍

മാധ്യമങ്ങള്‍ കുറേയേറെ ‘കോവിഡ് മരണം’ റിപ്പോര്‍ട്ട് ചെയ്യുന്നു. അത് കണക്കില്‍ വരുന്നില്ല എന്നൊരു പ്രചാരണം നടക്കുന്നുണ്ട്. ഇതില്‍ വ്യക്ത വരേണ്ടേത് എല്ലാ മരണങ്ങളും കോവിഡ് മരണങ്ങളല്ല എന്നതാണ് വസ്തുത.

കോവിഡ് 19 പോസിറ്റീവായ ആള്‍ മരണമടഞ്ഞാലും എല്ലാ മരണവും കോവിഡ് മരണമായി കണക്കാക്കില്ല. ഡബ്ല്യുഎച്ച്ഒയുടെ അംഗീകാരമുള്ള ഇന്‍റര്‍നാഷണല്‍ ഗൈഡ്ലൈന്‍സ് ഫോര്‍ സര്‍ട്ടിഫിക്കേഷന്‍ ആന്‍റ് ക്ലാസിഫിക്കേഷന്‍ (കോഡിങ്) ഓഫ് കോവിഡ്-19 ആസ് കോസ് ഓഫ് ഡെത്ത് എന്ന ഇന്‍റര്‍നാഷണല്‍ ഗൈഡ് ലൈന്‍ അനുസരിച്ചാണ് കോവിഡ് മരണം സ്ഥിരീകരിക്കുന്നത്.

ഇതനുസരിച്ച് കോവിഡ് രോഗം മൂര്‍ച്ഛിച്ച് അതുമൂലം അവയവങ്ങളെ ബാധിച്ച് ഗുരുതരാവസ്ഥയിലെത്തി മരണമടയുന്നതിനെ അത്തരം കേസുകള്‍ മാത്രമേ കോവിഡ് മരണത്തിന്‍റെ വിഭാഗത്തില്‍ ഉള്‍പ്പെടുത്താന്‍ കഴിയൂ. ഉദാഹരണത്തിന് കോവിഡ് ബാധിച്ച ഒരാള്‍ മുങ്ങിമരിക്കുകയോ ആത്മഹത്യ ചെയ്യുകയോ ആക്സിഡന്‍റിലൂടെ മരണമടയുകയോ ചെയ്താല്‍ അത് കോവിഡ് മരണത്തില്‍ ഉള്‍പ്പെടുത്തില്ല.

മാത്രമല്ല ഗുരുതരമായ അസുഖങ്ങളുള്ള ഒരാള്‍ ആ അസുഖം മൂര്‍ച്ഛിച്ച് മരണമടയുന്നുവെങ്കില്‍ പോസിറ്റീവാണെങ്കില്‍ പോലും കോവിഡ് മരണത്തില്‍ ഉള്‍പ്പെടുത്തില്ല. ഇക്കാര്യത്തില്‍ ആരോഗ്യ വകുപ്പിന്‍റെ വിദഗ്ധ സംഘമാണ് അന്തിമ തീരുമാനം എടുക്കുന്നത്.

പൊലീസ്

സമ്പര്‍ക്കവ്യാപനം ഒഴിവാക്കുന്നതിന് ശരീരിക അകലം പാലിക്കല്‍, മാസ്ക് ധരിക്കല്‍, അനാവശ്യമായി പുറത്തിറങ്ങാതിരിക്കല്‍ മുതലായ ആരോഗ്യ സുരക്ഷാമാനദണ്ഡങ്ങള്‍ കര്‍ശനമായി പാലിക്കേണ്ടത് അത്യാവശ്യമാണ്. ഇത്  നടപ്പാക്കുന്നതിന് പോലീസിനെ ചുമതലപ്പെടുത്തി സര്‍ക്കാര്‍ ഉത്തരവ് പുറപ്പെടുവിച്ചിട്ടുണ്ട്. ഈ ഉത്തരവിലെ നിര്‍ദ്ദേശങ്ങള്‍ കര്‍ശനമായി തന്നെ നടപ്പാക്കും.  

ബക്രീദ് ദിനത്തില്‍ പരമാവധി 100 പേര്‍ക്കാണ് മുസ്ലിം പള്ളികളില്‍ പ്രാര്‍ത്ഥന നടത്താന്‍ അനുമതിയുള്ളത്. നൂറു പേരെ ഉള്‍ക്കൊള്ളാന്‍ പള്ളികളില്‍ സ്ഥലം ഉണ്ടെങ്കില്‍ മാത്രമേ അതിന് അനുമതി നല്‍കൂ. ചെറിയ പള്ളികളില്‍ സ്ഥലസൗകര്യമനുസരിച്ച് കുറച്ചുപേര്‍ക്കു മാത്രമേ ആരാധന നടത്താന്‍ അനുവാദം നല്‍കുകയുള്ളൂ.

കോവിഡ് രോഗബാധ സംബന്ധിച്ച് ജനങ്ങളില്‍ ആശയക്കുഴപ്പം പകരുന്ന തരത്തില്‍ തെറ്റായ വിവരങ്ങള്‍ സാമൂഹിക മാധ്യമങ്ങളിലൂടെ പ്രചരിപ്പിക്കുന്നുണ്ട്. ഈ സാഹചര്യത്തില്‍ എല്ലാത്തരം സാമൂഹിക മാധ്യമ അക്കൗണ്ടുകളും 24 മണിക്കൂറും കേരള പൊലീസിന്‍റെ ഹൈടെക് ക്രൈം എന്‍ക്വയറി സെല്ലിന്‍റെയും സൈബര്‍ഡോമിന്‍റെയും നിരീക്ഷണത്തിലായിരിക്കും. വ്യാജവാര്‍ത്തകള്‍ നിര്‍മിക്കുകയും പ്രചരിപ്പിക്കുകയും ചെയ്യുന്നവര്‍ക്കെതിരെ ഇന്ത്യന്‍ ശിക്ഷാനിയമം, ഐടി ആക്ട്, കേരള പകര്‍ച്ചവ്യാധി ഓര്‍ഡിനന്‍സ് എന്നിവയനുസരിച്ച് നടപടി സ്വീകരിക്കും.

മാസ്ക് ധരിക്കാത്ത 5026 സംഭവങ്ങള്‍ സംസ്ഥാനത്ത് ഇന്ന് റിപ്പോര്‍ട്ട് ചെയ്തിട്ടുണ്ട്. ക്വാറന്‍റൈന്‍ ലംഘിച്ച ഏഴു പേര്‍ക്കെതിരെ കേസ് രജിസ്റ്റര്‍ ചെയ്തു.

സംരംഭകത്വ വികസന പദ്ധതി

കോവിഡ് മാഹാമാരി സംസ്ഥാനത്തെ സമ്പദ് വ്യവസ്ഥയില്‍ വലിയ ആഘാതമാണ് ഉണ്ടാക്കിയിരിക്കുന്നത്. ഇതുമൂലം ചെറുകിട സംരംഭകരിലും സ്റ്റാര്‍ട്ടപ്പുകളിലും കനത്ത പ്രതിസന്ധി രൂപപ്പെട്ടു.

വ്യാപാര മേഖലയിലെ അടച്ചുപൂട്ടല്‍, വിതരണ ശൃംഖലയിലെ തടസ്സങ്ങള്‍ ഇതെല്ലാം കാരണം തദ്ദേശീയ ഉല്‍പാദനം വര്‍ദ്ധിപ്പിക്കേണ്ട ആവശ്യകത ഉയര്‍ന്നു വന്നിട്ടുണ്ട്. പല മേഖലകളില്‍ ജോലി നഷ്ടമായവര്‍ക്കും, വിവിധ രാജ്യങ്ങളില്‍നിന്നും സംസ്ഥാനങ്ങളില്‍ നിന്നും തിരിച്ചുവരുന്നവര്‍ക്കു വേണ്ടി പുതിയ അവസരങ്ങള്‍ സൃഷ്ടിക്കേണ്ടതുമുണ്ട്.

മൂലധനത്തിന്‍റെ അഭാവവും വായ്പാ ലഭ്യതയുമാണ് സ്റ്റാര്‍ട്ടപ്പുകളും ചെറുകിട സംരംഭകരും അഭിമുഖീകരിക്കുന്ന പ്രധാന പ്രശ്നം. അതിന് പരിഹാരം എന്നനിലയില്‍  സര്‍ക്കാര്‍ ഒരു പുതിയ പദ്ധതി ആവിഷ്കരിക്കുന്നു.

‘മുഖ്യമന്ത്രിയുടെ സംരംഭകത്വ വികസന പദ്ധതി’ എന്ന പേരിലാണ് ഈ പദ്ധതി ആരംഭിക്കുന്നത്. പ്രതിവര്‍ഷം 2000 സംരംഭകരെ കണ്ടെത്തി, 1000 പുതിയ സംരംഭങ്ങള്‍ എന്ന കണക്കില്‍ അടുത്ത അഞ്ച് വര്‍ഷം കൊണ്ട് 5000 പുതിയ ചെറുകിട ഇടത്തരം യൂണിറ്റുകള്‍ തുടങ്ങുവാനാണ് ഈ പദ്ധതി കൊണ്ടുദ്ദേശിക്കുന്നത്.

കേരളാ ഫിനാന്‍ഷ്യല്‍ കോര്‍പ്പറേഷന്‍ വഴിയാണ് പദ്ധതി നടപ്പിലാക്കുക. തെരഞ്ഞെടുക്കപ്പെടുന്നവര്‍ക്ക് 5 ദിവസത്തെ സംരംഭകത്വ പരിശീലനവും മാര്‍ഗനിര്‍ദ്ദേശങ്ങളും അതോടൊപ്പം ലഭ്യമാക്കും. പ്രോജക്ട് കോസ്റ്റിന്‍റെ 90 ശതമാനം വരെ, പരമാവധി 50 ലക്ഷം രൂപയാണ് വായ്പയായി നല്‍കുക. 10 ശതമാനം പലിശ നിരക്കിലാണ് കെഎഫ്സി വായ്പ അനുവദിക്കുക. 3 ശതമാനം പലിശ സര്‍ക്കാര്‍ വഹിക്കും. ഫലത്തില്‍ 7 ശതമാനം ആയിരിക്കും പലിശ.

ഇതിനുപുറമേ നിലവിലെ സ്റ്റാര്‍ട്ടപ്പുകളെ അടച്ചുപൂട്ടല്‍ ഭീഷണിയില്‍ നിന്നും രക്ഷപ്പെടുത്തുവാന്‍ കെഎഫ്സി വഴി മൂന്ന് പുതിയ പദ്ധതികള്‍ കൂടി തുടങ്ങുകയാണ്.

1. പ്രവര്‍ത്തന മൂലധന വായ്പ: സ്റ്റാര്‍ട്ടപ്പ് കമ്പനികള്‍ക്ക് ലഭിച്ചിട്ടുള്ള പര്‍ച്ചേയ്സ് ഓര്‍ഡര്‍ അനുസരിച്ച് 10 കോടി രൂപ വരെ പ്രവര്‍ത്തന മൂലധന വായ്പ അനുവദിക്കും.

2. സീഡ് വായ്പ: സാമൂഹിക പ്രസക്തിയുള്ള ഉല്‍പന്നമോ, സേവനമോ നല്‍കുന്ന സ്റ്റാര്‍ട്ടപ്പുകള്‍ക്ക് ഒരു കോടി വരെ വായ്പ നല്‍കും.

3. ഐടി രംഗത്തിനുള്ള മൂലധനം: സെബി അക്രെഡിറ്റേഷനുളള വെഞ്ച്വര്‍ ക്യാപ്പിറ്റല്‍ ഫണ്ടിന്‍റെ പരിശോധന കഴിഞ്ഞുള്ള ഐടി കമ്പനികള്‍ക്ക് 10 കോടി രൂപ വരെ ലഭിക്കും.

ഈ മൂന്ന് പദ്ധതികള്‍ക്കും 2 ശതമാനം സര്‍ക്കാര്‍ സബ്സിഡി ലഭ്യമാക്കും. അതിലും ഫലത്തില്‍ 7 ശതമാനം ആയിരിക്കും പലിശ.

ലൈഫില്‍ അപേക്ഷിക്കാന്‍ അവസരം

ലൈഫ് ഭവന നിര്‍മ്മാണ പദ്ധതിയില്‍ ആദ്യഘട്ടത്തില്‍ പട്ടികയില്‍ ഉള്‍പ്പെടാതെ പോയ ഭവനരഹിതര്‍ക്കും ഭൂരഹിതര്‍ക്കും അപേക്ഷിക്കാന്‍ അവസരം ഒന്നു കൂടി വേണമെന്ന ആവശ്യം ഉയര്‍ന്നിരുന്നു. അവര്‍ക്ക് ആഗസ്റ്റ് ഒന്നു മുതല്‍ പതിനാലുവരെ അപേക്ഷകള്‍ സമര്‍പ്പിക്കാന്‍ അവസരം ലഭിക്കും.

ഗുണഭോക്തൃ പട്ടികയില്‍ ഉള്‍പ്പെടാതെ പോയ അര്‍ഹരായ ഗുണഭോക്താക്കളെ ഉള്‍പ്പെടുത്തുന്നതിനായി മാര്‍ഗരേഖ പുറപ്പെടുവിച്ചിട്ടുണ്ട്. ഓണ്‍ലൈന്‍ മുഖേനയാണ് അപേക്ഷിക്കേണ്ടത്. തദ്ദേശഭരണ സ്ഥാപനങ്ങളില്‍ സജ്ജീകരിക്കുന്ന ഹെല്‍പ്പ്ഡെസ്ക്കുകള്‍ വഴിയോ സ്വന്തമായോ അപേക്ഷ സമര്‍പ്പിക്കാം.

ഒരു റേഷന്‍ കാര്‍ഡില്‍ ഉള്‍പ്പെട്ടവരെ ഒറ്റ കുടുംബമായിട്ടാണ് പരിഗണിക്കുക. 2020 ജൂലൈ ഒന്നിനു മുന്‍പ് റേഷന്‍ കാര്‍ഡ് ഉള്ളതും കാര്‍ഡില്‍ പേരുള്ള ഒരാള്‍ക്ക് പോലും ഭവനം ഇല്ലാത്തവരുമായ ഭൂമിയുള്ള ഭവനരഹിതര്‍, ഭൂരഹിത ഭവനരഹിതര്‍ എന്നിവര്‍ക്ക് അപേക്ഷിക്കാം.

അപേക്ഷിക്കുന്നവരുടെ വാര്‍ഷിക വരുമാനം മൂന്നു ലക്ഷത്തില്‍ താഴെയാകണം. പട്ടികജാതി, പട്ടികവര്‍ഗ, മത്സ്യത്തൊഴിലാളി വിഭാഗങ്ങള്‍ക്ക് നിബന്ധനകളില്‍ ഇളവുകള്‍ ഉണ്ട്. അപേക്ഷകള്‍ സൂക്ഷ്മ പരിശോധന നടത്തി കരട് പട്ടിക പ്രസിദ്ധീകരിക്കും. ഗ്രാമപഞ്ചായത്തുതലത്തിലുള്ള പരാതികള്‍ ബ്ലോക്ക് പഞ്ചായത്ത് സെക്രട്ടറിക്കും നഗരസഭകളിലെ പരാതികള്‍ അതത് നഗരസഭാ സെക്രട്ടറിമാര്‍ക്കുമാണ് സമര്‍പ്പിക്കേണ്ടത്. പട്ടിക സംബന്ധിച്ച രണ്ടാം അപ്പീലുകള്‍ അതത് ജില്ലാ കളക്ടര്‍മാര്‍ പരിശോധിക്കും.

സെപ്തംബര്‍ ഇരുപത്തിയാറിനകം തദ്ദേശസ്ഥാപനതല അംഗീകാരവും ഗ്രാമസഭാ അംഗീകാരവും വാങ്ങി പട്ടിക അന്തിമമാക്കുന്നതിനുള്ള സമയക്രമമാണ് നിശ്ചയിച്ചിരിക്കുന്നത്. ലൈഫ് പദ്ധതിയുടെ ഒന്നും രണ്ടും ഘട്ടങ്ങളിലായി രണ്ടുലക്ഷത്തി ഇരുപതിനായിരത്തില്‍പ്പരം വീടുകള്‍ പൂര്‍ത്തീകരിച്ച് ഗുണഭോക്താക്കള്‍ക്ക് കൈമാറിയിട്ടുണ്ട്. മൂന്നാം ഘട്ടത്തില്‍ ഒരു ലക്ഷത്തിലധികം ആളുകള്‍ക്കാണ് ഭവനമൊരുങ്ങുന്നത്. അതു കൂടാതെയാണ് വിട്ടുപോയ അര്‍ഹരെ കണ്ടെത്താന്‍ സര്‍ക്കാര്‍ ഇപ്പോള്‍ തീരുമാനിച്ചത്.

കേരളത്തിന് രണ്ടാംസ്ഥാനം

അമേരിക്കയിലെ സ്റ്റാന്‍ഫോര്‍ഡ് യൂണിവേഴ്സിറ്റിയിലെ ഇന്‍സ്റ്റിറ്റ്യൂട്ട് ഫോര്‍ കമ്പ്യൂട്ടേഷണല്‍ ആന്‍റ് മാത്തമാറ്റിക്കല്‍ എഞ്ചിനീയറിങ് നടത്തിയ പഠനത്തില്‍ കോവിഡ്-19 റിപ്പോര്‍ട്ടിങ് ഏറ്റവും മികച്ച രീതിയില്‍ ചെയ്യുന്ന ഇന്ത്യന്‍ സംസ്ഥാനങ്ങളുടെ ലിസ്റ്റില്‍ കേരളത്തിന് രണ്ടാം സ്ഥാനം നല്‍കിയിട്ടുണ്ട്. ഡാറ്റയുടെ ലഭ്യത, അതിന്‍റെ പ്രാപ്യത, ഉപയോഗക്ഷമത, സ്വകാര്യത എന്നീ നാലു പ്രധാന സവിശേഷതകള്‍ ആണ് സ്റ്റാന്‍ഫോര്‍ഡ് യൂണിവേഴ്സിറ്റി പഠനവിധേയമാക്കിയത്.

അതിന്‍റെ ഭാഗമായി കോവിഡ്-19 ഡാറ്റ റിപ്പോര്‍ട്ടിങ് സ്കോര്‍ തയ്യാറാക്കുകയും ചെയ്തു. ആദ്യത്തെ മൂന്നു റാങ്കുകളില്‍ വന്ന സംസ്ഥാനങ്ങളില്‍ ഡാറ്റയുടെ ടെക്സ്ച്വല്‍ സമ്മറിയും ട്രെന്‍ഡ് ഗ്രാഫിക്സും ഒരേ സമയം നല്‍കിയ സംസ്ഥാനമാണ് കേരളം എന്ന് പഠനം ചൂണ്ടിക്കാണിക്കുന്നു.

സഹായം

കാര്യവട്ടം ഗ്രീന്‍ ഫീള്‍ഡ് സ്റ്റേഡിയത്തില്‍ ആരംഭിച്ച കൊവിഡ് ചികിത്സ കേന്ദ്രത്തിലേക്ക് ജിടെക് 200 കിടക്കകള്‍ സഹായിച്ചു.

പിണറായിയിലെ എകെജി സ്മാരക ഹയര്‍ സെക്കന്‍ററി സ്കൂള്‍ 1987-88 എസ്എസ്എല്‍സി ബാച്ച് ഓണ്‍ലൈന്‍ പഠന ആവശ്യങ്ങള്‍ക്കായി സ്കൂളിലേക്ക് 5 ടിവി. സ്കൂളില്‍ ആരംഭിക്കുന്ന സിഎഫ്എല്‍ടിസിയിലേക്ക് 5 കട്ടില്‍.

റഹ്മ എഡ്യൂക്കേഷന്‍ ആന്‍റ് ചാരിറ്റബിള്‍ ട്രസ്റ്റ്, വളപട്ടണം സിഎഫ്എല്‍ടിസികളിലേക്ക് 1 ലക്ഷം രൂപയുടെ സാധനങ്ങള്‍ കൈമാറി.

ഏറ്റുമാനൂര്‍ നിയോജക മണ്ഡലത്തില്‍ ഓണ്‍ലൈന്‍ പഠന സൗകര്യമില്ലാത്തവര്‍ക്കായി എംഎല്‍എ സുരേഷ് കുറുപ്പിന്‍റെ നേതൃത്വത്തില്‍ 209 ടിവി വിതരണം ചെയ്തു. വരും ദിവസങ്ങളില്‍ 31 ടിവി കൂടി വിതരണം ചെയ്യുമെന്ന് അറിയിച്ചിട്ടുണ്ട്.

പയ്യോളി വൊക്കേഷണല്‍ ഹയര്‍സെക്കന്‍ററി സ്കൂള്‍ പിടിഎ കമ്മിറ്റി 50 വിദ്യാര്‍ത്ഥികള്‍ക്ക് ടിവി വിതരണം ചെയ്തു.

എല്‍ഐസി എംപ്ലോയീസ് കോട്ടയം ഡിവിഷന്‍ വനിത സബ് കമ്മിറ്റി ഓണ്‍ലൈന്‍ പഠന ആവശ്യങ്ങള്‍ക്കായി 37 ടിവികള്‍ വിവിധ തദ്ദേശ സ്വയംഭരണ സ്ഥാപനങ്ങള്‍ക്ക് കൈമാറി.

ദുരിതാശ്വാസം

അമ്പലപ്പുഴ സൗത്ത് പഞ്ചായത്ത് 10 ലക്ഷം രൂപ.

കേരളത്തിലെ കേന്ദ്ര ഗവണ്‍മെന്‍റ് പെന്‍ഷന്‍കാരുടെ സംഘടനയായ സിജിപിഎ കേരള 7,20,000 രൂപ.

തൃശൂര്‍ ചേരുരിലെ ആര്‍സനല്‍ കേരള സപ്പോര്‍ട്ടേര്‍സ് ക്ലബ്ബ് 1 ലക്ഷം രൂപ.

ഇരവിപേരൂര്‍ ശങ്കരമംഗലം കുടുംബയോഗം 1 ലക്ഷം രൂപ.

എസ്എഫ്ഐ അമ്പലപ്പുഴ ഏരിയ കമ്മിറ്റി 1 ലക്ഷം രൂപ.

മലപ്പുറം, പടപ്പറമ്പിലുള്ള കാജ മുഈനുദ്ദീന്‍ സംഗീത അക്കാദമി വലിയ പെരുന്നാളിനോടനുബന്ധിച്ചുള്ള ഉള്ഹിയത്തിന് വേണ്ടി മാറ്റിവെച്ച 1 ലക്ഷം രൂപ.

ചായ്യോത്ത് ദാമോദരന്‍ മാസ്റ്ററും ഭാര്യ വസന്ത ടീച്ചറും, പെന്‍ഷന്‍ തുക 50,000 രൂപ.

ചെറുവത്തൂര്‍ പുതിയകണ്ടം, എ.വി. കുഞ്ഞമ്പു സ്മാരക ആര്‍ട്ട്സ് ആന്‍റ് സ്പോര്‍ട്ട്സ് ക്ലബ് 30,005 രൂപ.

ആധാരം എഴുത്ത് അസോസിയേഷന്‍ കാസര്‍കോട് ജില്ലാ കമ്മിറ്റി 25,000 രൂപ.

എഴുത്തുകാരന്‍ പി.പി.കെ പൊതുവാള്‍ അദ്ദേഹത്തിന് ലഭിച്ച കേരള സാഹിത്യ അക്കാദമി അവാര്‍ഡ് തുക 25,000 രൂപ

കേരള പ്രവാസിസംഘം കയ്യൂര്‍ കുക്കോട് യൂണിറ്റ് 25,000 രൂപ.

ജനാധിപത്യ മഹിളാ അസോസിയേഷന്‍ കാങ്കോല്‍ വെസ്റ്റ് വില്ലേജ് കമ്മിറ്റി, ബിരിയാണി ചാലഞ്ചിലൂടെ സമാഹരിച്ച 50,000 രൂപ.

പരിയാരം കള്‍ച്ചറല്‍ സെന്‍റര്‍, ബിരിയാണി ഫെസ്റ്റിലുടെ സമാഹരിച്ച 30,000 രൂപ.

തൃശൂര്‍, മുരിപ്പാട് പി.പി. പോള്‍ 28,562 രൂപ.

തൃശൂര്‍, മുപ്ലിയം സലീഷ് 25,000 രൂപ.

പാതിരിയാട് ഹൈസ്കൂളിലെ മുന്‍ അധ്യാപകന്‍ ശ്രീധരന്‍, ഭാര്യ ശ്യാമള ടീച്ചര്‍, മകന്‍ ജോഷിത്ത് എന്നിവര്‍ 25,000 രൂപ

അണ്ടല്ലൂര്‍ പീപ്പ്ള്‍സ് സ്പോര്‍ട്സ് ആന്‍റ് ആര്‍ട്സ് ക്ലബ് ബിരിയാണി ചാലഞ്ചിലൂടെ സമാഹരിച്ച 25,000 രൂപ.

സിപിഐ തൃക്കരിപ്പൂര്‍ ലോക്കല്‍ കമ്മിറ്റി ബിരിയാണി ചലഞ്ചിലൂടെ സമാഹരിച്ച 25,000 രൂപ.

കൊക്കാട് നാരായണന്‍ സ്മാരക ഗ്രന്ഥാലയം ആന്‍റ് സ്പോര്‍ട്സ് ക്ലബ് 25,000 രൂപ

പടന്ന വടക്കേപ്പുറം സഞ്ചയ് ഗാന്ധി സ്മാരക ആര്‍ട്ട്സ് ആന്‍റ് സ്പോര്‍ട്ട്സ് ക്ലബ് 10,000 രൂപ.

നവകേരള ഗ്രന്ഥാലയം ചെറുപഴശ്ശി ബിരിയാണി ഫെസ്റ്റിലൂടെ സമാഹരിച്ച 20,000 രൂപ.

കീഴല്ലൂര്‍ ശ്രീ വാണിയന്‍കണ്ടി മന്ദപ്പന്‍ ക്ഷേത്രം ട്രസ്റ്റി അജയകുമാര്‍ 15,000 രൂപ.

മുഖ്യമന്ത്രിയുടെ വാര്‍ത്താ സമ്മേളനത്തില്‍ നിന്ന്
702 പേര്‍ക്കാണ് ഇന്ന് കോവിഡ് സ്ഥിരീകരിച്ചത്. ഇന്ന് സംസ്ഥാനത്ത് 745 പേര്‍ക്ക് രോഗമുക്തി ഉണ്ടായി. ഇതുവരെ രോഗം സ്ഥിരീകരിച്ചവരുടെ എണ്ണം 19,727 ആണ്. ഇതുവരെ രോഗമുക്തി നേടിയത് 10,049. ഇന്ന് 483 പേര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. അതില്‍ ഉറവിടമറിയാത്തത് 35. വിദേശത്തുനിന്ന് 75 പേര്‍. മറ്റു സംസ്ഥാനങ്ങളില്‍നിന്ന് 91 പേര്‍. ഹെല്‍ത്ത് വര്‍ക്കര്‍മാര്‍ 43.

ഇന്ന് രണ്ടു മരണം റിപ്പോര്‍ട്ട് ചെയ്തു. കോഴിക്കോട് സ്വദേശി മുഹമ്മദ് (61), കോട്ടയം സ്വദേശി ഔസേപ്പ് ജോര്‍ജ് (85) എന്നിവരാണ് മരിച്ചത്. ഇവരുടെ നിര്യാണത്തില്‍ അനുശോചനം രേഖപ്പെടുത്തുന്നു.

പോസിറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 161, മലപ്പുറം 86, ഇടുക്കി 70, കോഴിക്കോട് 68, കോട്ടയം 59, പാലക്കാട് 41, തൃശൂര്‍ 40, കണ്ണൂര്‍ 38, കാസര്‍കോട് 38, ആലപ്പുഴ 30, കൊല്ലം 22, പത്തനംതിട്ട 17, വയനാട് 17, എറണാകുളം 15.

നെഗറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 65, കൊല്ലം 57, പത്തനംതിട്ട 49, ആലപ്പുഴ 150, കോട്ടയം 13, ഇടുക്കി 25, എറണാകുളം 69, തൃശൂര്‍ 45, പാലക്കാട് 9, മലപ്പുറം 88, കോഴിക്കോട് 41, വയനാട് 49, കണ്ണൂര്‍ 32, കാസര്‍കോട് 53.

കഴിഞ്ഞ 24 മണിക്കൂറിനകം 18,417 സാമ്പിളുകള്‍ പരിശോധിച്ചു. 1,55,148 പേരാണ് നിരീക്ഷണത്തിലുള്ളത്. 9397 പേര്‍ ആശുപത്രികളില്‍. ഇന്നു മാത്രം 1237 പേരെ ആശുപത്രിയില്‍ പ്രവേശിപ്പിച്ചു. ഇപ്പോള്‍ ചികിത്സയിലുള്ളവര്‍ 9609 പേരാണ്.

ഇതുവരെ ആകെ 3,54,480 സാമ്പിളുകളാണ് പരിശോധനയ്ക്കായി അയച്ചത്. ഇതില്‍ 3842 സാമ്പിളുകളുടെ ഫലം വരാനുണ്ട്. ഇതുകൂടാതെ സെന്‍റിനല്‍ സര്‍വൈലന്‍സിന്‍റെ ഭാഗമായി മുന്‍ഗണനാ ഗ്രൂപ്പുകളില്‍ നിന്ന് 1,14,832 സാമ്പിളുകള്‍ ശേഖരിച്ചതില്‍ 1,11,105 സാമ്പിളുകള്‍ നെഗറ്റീവ് ആയി. സംസ്ഥാനത്തെ ഹോട്ട്സ്പോട്ടുകളുടെ എണ്ണം 495 ആണ്.

സംസ്ഥാനത്ത് ഇപ്പോള്‍ 101 സിഎഫ്എല്‍ടിസികള്‍ പ്രവര്‍ത്തിക്കുന്നുണ്ട്. അവയില്‍ 12,801 കിടക്കകളാണുള്ളത്. 45 ശതമാനം കിടക്കകളില്‍ ഇപ്പോള്‍ ആളുണ്ട്. രണ്ടാം ഘട്ടത്തില്‍ 229 സിഎഫ്എല്‍ടിസികളാണ് കൂട്ടിച്ചേര്‍ക്കുന്നത്. 30,598 കിടക്കകളാണ് ഇവിടെ തയ്യാറാക്കിയിട്ടുള്ളത്. മൂന്നാംഘട്ടത്തിലേക്ക് 36,400 കിടക്കകളുള്ള 480 സിഎഫ്എല്‍ടിസികള്‍ കണ്ടെത്തിയിട്ടുണ്ട്.

മെഡിക്കല്‍ ഓഫീസറുടെ നേതൃത്വത്തില്‍ സഹ ടീം ലീഡറും ഒരു സ്റ്റാഫ് നഴ്സും രണ്ട് ലാബ് ടെസ്നീഷ്യډാരും രണ്ട് ഫാര്‍മസിസ്റ്റുകളും അടങ്ങുന്നതാണ് പ്രാഥമികതലത്തിലുള്ള സിഎഫ്എല്‍ടിസി സംവിധാനം. ആളുകളുടെ എണ്ണം ആവശ്യാനുസരണം വര്‍ധിപ്പിക്കും. കോവിഡ് ബ്രിഗേഡിലേക്ക് 1679 പേര്‍ക്ക് പരിശീലനം നല്‍കിയിട്ടുണ്ട്. മറ്റുള്ളവര്‍ക്ക് പരിശീലനം ഉടനെ ആരംഭിക്കും.

ഭീഷണി ഉയര്‍ത്തിയിരുന്ന പല ക്ലസ്റ്ററുകളിലും രോഗവ്യാപന തോത് കൂടിവരികയാണ്. ക്ലസ്റ്ററുകളുടെ എണ്ണവും വര്‍ധിക്കുന്നുണ്ട്. പുതിയ സാഹചര്യത്തിന്‍റെ ഗൗരവം ഉള്‍ക്കൊണ്ട് വിവിധ തലങ്ങളില്‍ ചര്‍ച്ചകള്‍ നടത്തിയിരുന്നു. സര്‍വകക്ഷിയോഗം വിളിച്ച് രാഷ്ട്രീയ പാര്‍ടി നേതൃത്വങ്ങളുമായി സംസാരിച്ചു. ആരോഗ്യവിദഗ്ധരുമായി പ്രത്യേക ചര്‍ച്ച നടത്തി. പത്രാധിപډാരുടെ യോഗം വിളിച്ചു. നിയന്ത്രണങ്ങള്‍ കൂടുതല്‍ ശക്തമാക്കണമെന്ന പൊതു അഭിപ്രായമാണ് എല്ലാവര്‍ക്കുമുള്ളത്. നിയന്ത്രണ ലംഘനങ്ങളുണ്ടാകുന്ന സാഹചര്യത്തില്‍ പൊലീസിന്‍റെ ഇടപെടല്‍ ഇനിയും ശക്തിപ്പെടുത്തണമെന്നാണ് കാണുന്നത്.

സമൂഹത്തില്‍ മാതൃക കാണിക്കേണ്ടവര്‍ തന്നെ രോഗവ്യാപനത്തിന് കാരണക്കാരാകുന്നത് ഒട്ടും ആശാസ്യമായ പ്രവണതയല്ല. നിരുത്തരവാദപരമായ പെരുമാറ്റത്തിലൂടെ രോഗവ്യാപനത്തിന് കാരണക്കാരാകുന്നവര്‍ക്കെതിരെ നിയമനടപടി സ്വീകരിക്കും. ഇതുവരെയുള്ള അനുഭവത്തിന്‍റെ വെളിച്ചത്തില്‍ സര്‍ക്കാര്‍ ഏജന്‍സികള്‍ വെവ്വേറെയും കൂട്ടായും ഇടപെടേണ്ട കാര്യങ്ങളില്‍ വ്യക്തത വരുത്തും. അതിനനുസരിച്ച് ഉദ്യോഗസ്ഥര്‍ക്ക് നിര്‍ദേശം നല്‍കും.

ഇനിയുള്ള നാളുകളില്‍ രോഗവ്യാപനം ഇനിയും വര്‍ധിക്കുമെന്നു തന്നെയാണ് കാണുന്നത്. അതിനെ നേരിടാനുള്ള നടപടികളാണ് സിഎഫ്എല്‍ടിസികള്‍ ഒരുക്കുന്നതിലൂടെയും കൂടുതല്‍ മനുഷ്യവിഭവശേഷി കണ്ടെത്തുന്നതിലൂടെയും ചെയ്യുന്നത്. ആരോഗ്യ സര്‍വകലാശാലയുടെ കോഴ്സുകളില്‍നിന്ന് പഠിച്ചിറങ്ങിയ വിദ്യാര്‍ത്ഥികളെ സിഎഫ്എല്‍ടിസികളില്‍ നിയോഗിക്കാം. ഇങ്ങനെ നിയോഗിക്കപ്പെടുന്നവര്‍ക്ക് താമസസൗകര്യവും മറ്റും തദ്ദേശസ്വയംഭരണ സ്ഥാപനങ്ങള്‍ ഒരുക്കും. ആരോഗ്യവകുപ്പ് സര്‍വകലാശാലയുമായി ചേര്‍ന്ന് പഠനം കഴിഞ്ഞവരെ വിന്യസിക്കുന്നതിന്‍റെ വിശദാംശങ്ങള്‍ തയ്യാറാക്കണമെന്ന് നിര്‍ദേശിച്ചിട്ടുണ്ട്.

പരിശോധനാ ഫലങ്ങള്‍ ചിലയിടങ്ങളില്‍ വൈകുന്നു എന്ന പരാതിയുണ്ട്. അത്തരം പരാതികളില്‍ ഉടന്‍ പരിഹാരം കാണണമെന്നും ടെസ്റ്റ് റിസള്‍ട്ട് 24 മണിക്കൂറിനുള്ളില്‍ നല്‍കണമെന്നും നിര്‍ദേശം നല്‍കി. മരണമടഞ്ഞവരുടെ പരിശോധനാഫലം എത്രയുംവേഗം നല്‍കണമെന്നും ആവര്‍ത്തിച്ച് നിര്‍ദേശം നല്‍കിയിട്ടുണ്ട്.

ക്ലസ്റ്ററുകള്‍, ക്ലസ്റ്ററുകള്‍ രൂപപ്പെടാന്‍ സാധ്യതയുള്ള മേഖലകള്‍ എന്നിവയെക്കുറിച്ച് കൂടുതല്‍ പഠനം നടത്തും. അതിന് എപ്പിഡമിയോളജിസ്റ്റുകളെ നിയോഗിക്കും.

കോവിഡ് പ്രതിരോധം വരുന്ന ഏതാനും നാളുകളോ ആഴ്ചകളോ മാസങ്ങളോ കൊണ്ട് അവസാനിക്കുന്നതല്ല. അതുകൊണ്ടു തന്നെ അതിനായി ദീര്‍ഘകാല പദ്ധതി രൂപപ്പെടുത്തും.

തിരുവനന്തപുരത്ത് ഗുരുതര സാഹചര്യം നിലനില്‍ക്കുന്നതുകൊണ്ട് ലോക്ക്ഡൗണ്‍ തുടരുകയാണ്. അതില്‍ ഇളവു വേണ്ടതുണ്ടോ എന്നും മറ്റും പരിശോധിക്കാന്‍ ചീഫ് സെക്രട്ടറിയുടെ നേതൃത്വത്തില്‍ ഒരു സമിതിയെ നിയോഗിച്ചിട്ടുണ്ട്. സമിതിയുടെ റിപ്പോര്‍ട്ടിന്‍റെ അടിസ്ഥാനത്തിലായിരിക്കും തീരുമാനമെടുക്കുക.

തിരുവനന്തപുരം ജില്ലയില്‍ 2723 പേരാണ് ഇപ്പോള്‍ ചികിത്സയിലുള്ളത്. ഇതില്‍ 11 പേര്‍ ഐസിയുവിലും ഒരാള്‍ വെന്‍റിലേറ്ററിലുമാണ്. ജില്ലയിലെ ഏഴ് ലാര്‍ജ് ക്ലസ്റ്ററുകളില്‍ പുല്ലുവിള, പുതുക്കുറിച്ചി, അഞ്ചുതെങ്ങ് എന്നിവയുടെ സമീപ മേഖലകളിലേക്ക് രോഗം പകരുന്ന സാഹചര്യം നിലവിലുണ്ട്. പാറശാല, പൊഴിയൂര്‍ എന്നീ ലിമിറ്റഡ് കമ്യൂണിറ്റി ക്ലസ്റ്ററുകള്‍ ലാര്‍ജ് കമ്യൂണിറ്റി ക്ലസ്റ്ററാകാനുള്ള സാധ്യത കണക്കിലെടുത്ത് ഇവിടങ്ങളിലും പ്രതിരോധ പ്രവര്‍ത്തനങ്ങള്‍ ശക്തമാക്കിയിട്ടുണ്ട്.

കൊല്ലം ജില്ലയില്‍ വികേന്ദ്രീകൃത രീതിയില്‍ നാല് കൊറോണ കണ്‍ട്രോള്‍ യൂണിറ്റുകള്‍ മേഖലാടിസ്ഥാനത്തില്‍ ആരംഭിച്ചു. മദ്യപാന ആസക്തിയുള്ളതും മാനസിക അസ്വാസ്ഥ്യമുള്ളതുമായ കോവിഡ് രോഗികളെ ചികിത്സിക്കാന്‍ സജ്ജീകരണം ഏര്‍പ്പെടുത്തി.

പത്തനംതിട്ട ജില്ലയില്‍ അടൂര്‍ ഇന്‍സ്റ്റിറ്റിയൂഷണല്‍ ക്ലസ്റ്ററില്‍ നിന്നും പുറത്തേക്ക് രോഗബാധിതരുടെ എണ്ണം വര്‍ധിക്കുന്നുണ്ട്. കഴിഞ്ഞ ദിവസം ജില്ലയില്‍ രണ്ടു പൊലീസ് ഉദ്യോഗസ്ഥര്‍ക്കും, അടൂര്‍ ജനറല്‍ ആശുപത്രിയിലെ ഫാര്‍മസിസ്റ്റിനും പത്തനംതിട്ട കെഎസ്ആര്‍ടിസി ഡിപ്പോയിലെ ഡ്രൈവര്‍ക്കും ഇലന്തൂര്‍ ഗ്രാമപഞ്ചായത്തിലെ ഉദ്യോഗസ്ഥനും കോവിഡ് സ്ഥിരീകരിച്ചു.

ആലപ്പുഴ ജില്ലയില്‍ ചെട്ടികാട്, ആലപ്പുഴ സൗത്ത് പൊലീസ് സ്റ്റേഷന്‍ എന്നീ ക്ളസ്റ്ററുകളില്‍ കൂടുതല്‍ കേസുകള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.

കോട്ടയം മെഡിക്കല്‍ കോളേജ് ആശുപത്രിയിലെ ഗൈനക്കോളജി വിഭാഗത്തില്‍ ചികിത്സ തേടിയെത്തിയ ഗര്‍ഭിണികള്‍ ഉള്‍പ്പെടെ 12 പേര്‍ക്ക് ഇതുവരെ രോഗം സ്ഥിരീകരിച്ചിട്ടുണ്ട്.

എറണാകുളം ജില്ലയില്‍ ആലുവ ക്ലസ്റ്ററിന് സമീപമുള്ള മഞ്ഞപ്ര, നെടുമ്പാശേരി, ശ്രീമൂലനഗരം, പള്ളിപ്പുറം പ്രദേശങ്ങളിലും സമ്പര്‍ക്കത്തിലൂടെ രോഗം സ്ഥിരീകരിക്കുന്നുണ്ട്. ഫോര്‍ട്ട് കൊച്ചിയിലും കൂടുതല്‍ കേസുകള്‍ റിപ്പോര്‍ട്ട് ചെയ്യുന്നുണ്ട്.

കളമശ്ശേരി മെഡിക്കല്‍ കോളേജില്‍ കോവിഡ് രോഗികള്‍ക്കായുള്ള പ്രത്യേക ഐസിയു പ്രവര്‍ത്തനം ആരംഭിച്ചു. യന്ത്ര സഹായത്തോടെ പ്രവര്‍ത്തിക്കുന്ന വെന്‍റിലേറ്റര്‍ പിന്തുണയുള്ള 40 ബെഡുകളാണ് ഐസിയുവില്‍ ക്രമീകരിച്ചിട്ടുള്ളത്. ഇതോടെ മെഡിക്കല്‍ കോളേജിലെ ആകെ വെന്‍റിലേറ്ററുകളുടെ എണ്ണം 75 ആയി.

പാലക്കാട് ജില്ലയില്‍ പട്ടാമ്പി നഗരസഭയിലും താലൂക്കില്‍ ഉള്‍പ്പെടുന്ന 15 ഗ്രാമപഞ്ചായത്തുകളിലും ഒറ്റപ്പാലം ബ്ലോക്കിലെ നെല്ലായ ഗ്രാമ പഞ്ചായത്തിലും മൊത്തത്തില്‍ ലോക് ഡൗണ്‍ പ്രഖ്യാപിച്ചിട്ടുണ്ട്. കൂടാതെ 19 പഞ്ചായത്തുകളിലായി 40 വാര്‍ഡുകളും നിയന്ത്രണ മേഖല പ്രഖ്യാപിച്ചിട്ടുണ്ട്.

മലപ്പുറം ജില്ലയില്‍ കൊണ്ടോട്ടി ലാര്‍ജ് കമ്യൂണിറ്റി ക്ലസ്റ്ററായി മാറിക്കൊണ്ടിരിക്കുകയാണ്. കൊണ്ടോട്ടി മത്സ്യമാര്‍ക്കറ്റുമായി ബന്ധം പുലര്‍ത്തിയവരും അവരുടെ കുടുംബാംഗങ്ങള്‍ക്കും രോഗം സ്ഥിരീകരിക്കുന്നുണ്ട്. സമീപ പഞ്ചായത്തുകളായ കുഴിമണ്ണ, പുളിക്കല്‍, ചെറുകാവ്, പള്ളിക്കല്‍, വാഴയൂര്‍ ഇവിടങ്ങളിലേക്കും രോഗം വ്യാപിക്കുന്നത് കൂടുതല്‍ ആശങ്കയുണര്‍ത്തുന്നു.

കോഴിക്കോട് ജില്ലയില്‍ 11 ക്ലസ്റ്ററുകളാണ് നിലവിലുള്ളത്. വീടുകളില്‍ റൂം ക്വാറന്‍റീനില്‍ കഴിയുന്നവരില്‍ നിന്ന് മറ്റുള്ളവരിലേക്ക് രോഗം പകരുന്ന സംഭവങ്ങള്‍ കൂടുതല്‍ റിപ്പോര്‍ട്ട് ചെയ്യപ്പെടുന്നുണ്ട്. ഒരേ വീട്ടിലെ തന്നെ നാലും അഞ്ചും പേരിലേക്ക് രോഗം പടരുന്നു. ഇതിന്‍റെ ഫലമായി കുടുംബത്തെ എഫ്എല്‍ടിസികളിലേക്കോ ആശുപത്രികളിലേക്കോ മറ്റേണ്ടിവരുന്നു. ഇത്തരം സന്ദര്‍ഭങ്ങളില്‍ വീട്ടിലുള്ള പ്രായമായവരാണ് ഏറ്റവും കൂടുതല്‍ പ്രയാസമനുഭവിക്കേണ്ടിവരുന്നത്. അങ്ങനെയുളളവര്‍ക്ക് വേണ്ടി ഓരോ തദ്ദേശ സ്വയം ഭരണ സ്ഥാപനങ്ങളും കോവിഡ് കെയര്‍ സെന്‍ററുകള്‍ ഒരുക്കണമെന്ന് നിര്‍ദ്ദേശിച്ചിട്ടുണ്ട്.

ബീച്ച് ആശുപത്രി കോവിഡ് സ്പെഷ്യല്‍ ഹോസ്പിറ്റലാക്കി മാറ്റാനുളള പ്രവര്‍ത്തനം ഉടന്‍ പൂര്‍ത്തിയാകും. മറ്റു ഗുരുതരരോഗങ്ങളുടെ ചികിത്സക്കും കോവിഡ് കേസുകള്‍ക്കും മാത്രമായി മെഡിക്കല്‍ കോളേജ് ആശുപത്രി പ്രയോജനപ്പെടുത്തും.

വയനാട് ജില്ലയിലെ സുല്‍ത്താന്‍ ബത്തേരി ലാര്‍ജ് കമ്യൂണിറ്റി ക്ലസറ്ററാവാനുള്ള സാധ്യത നിലനില്‍ക്കുകയാണ്. ഇവിടെ ഒരു വലിയ വ്യാപാര സ്ഥാപനത്തിലെ 15 പേര്‍ക്കാണ് കോവിഡ് സ്ഥിരീകരിച്ചത്. ഈ സ്ഥാപന ജീവനക്കാരുമായുള്ള സമ്പര്‍ക്കത്തില്‍ 300ലധികം പേര്‍ വരുമെന്നാണ് കണക്കു കൂട്ടുന്നത്. ഇവരെയെല്ലാം കണ്ടെത്തി അടിയന്തരമായി പരിശോധന നടത്തി വരികയാണിപ്പോള്‍. വാളാട് ഒരു കുടുംബത്തിലെ ഏഴ് പേര്‍ക്കാണ് കോവിഡ് സ്ഥിരീകരിച്ചത്. ഇവിടെ സമ്പര്‍ക്കത്തിലുള്ള 110 പേരുടെ സാമ്പിള്‍ പരിശോധന നടത്തുന്നുണ്ട്.

കണ്ണൂര്‍ ഗവണ്‍മെന്‍റ് മെഡിക്കല്‍ കോളേജിലെ ആരോഗ്യ പ്രവര്‍ത്തകര്‍ക്ക് കോവിഡ് ബാധിച്ചു. അതിനെ തുടര്‍ന്ന് കോവിഡ് ഇതര രോഗങ്ങളുടെ ചികിത്സക്ക് ക്രമീകരണം ഏര്‍പ്പെടുത്തി. ഒപി പരമാവധി നിയന്ത്രിക്കും. എല്ലാ ഒപിയിലും ടെലിമെഡിസിന്‍ സംവിധാനത്തിനുള്ള ക്രമീകരണം ഉണ്ടാക്കും. 44 പേര്‍ക്ക് പരിശോധനയില്‍ പോസിറ്റീവ് ആയി. 200 പേരെ ഇവിടെ പരിശോധിച്ചു. ഹൈ റിസ്ക് പ്രൈമറി കോണ്‍ടാക്ടില്‍ പെട്ട 180 പേര്‍ ക്വാറന്‍റൈനില്‍ പോയി. ആശുപത്രിയിലെ അണുനശീകരണം ബുധനാഴ്ചയോടെ പൂര്‍ത്തിയാകും. ആരോഗ്യ പ്രവര്‍ത്തകര്‍ക്ക് കര്‍ശന സുരക്ഷ സംവിധാനങ്ങള്‍ ഏര്‍പ്പെടുത്തിയിട്ടുണ്ട്.

തലശേരിയില്‍ കണ്‍ട്രോള്‍ റൂം എസ്ഐക്ക് കൊവിഡ് പോസിറ്റീവ് ആയി. സര്‍വൈലന്‍സ് പരിശോധനയിലാണ് രോഗം കണ്ടെത്തിയത്. ഇതേത്തുടര്‍ന്ന് ഇദ്ദേഹവുമായി സമ്പര്‍ക്കത്തിലായ 30 പേര്‍ നിരീക്ഷണത്തില്‍ പോയി.

കാസര്‍കോട് ജില്ലയുടെ മഞ്ചേശ്വരം, കാസര്‍കോട് താലൂക്കുകളിലെ ഭൂരിഭാഗം പഞ്ചായത്തുകളിലും സ്ഥിതി രൂക്ഷമാവുകയാണ്. ഉറവിടമറിയാത്ത കേസുകളും വര്‍ധിച്ചു. കോവിഡ് മാനദണ്ഡങ്ങള്‍ ലംഘിച്ച് സംഘടിപ്പിച്ച ചടങ്ങുകളില്‍ കൂട്ടംകൂടി പങ്കെടുത്തവരില്‍നിന്നും നിരവധിപേര്‍ക്ക് സമ്പര്‍ക്കം വഴി രോഗം ബാധിക്കുന്ന അവസ്ഥയുണ്ട്. ചെങ്കള പഞ്ചായത്തില്‍ ഒരു വിവാഹചടങ്ങില്‍ പങ്കെടുത്തവരില്‍ 43 പേര്‍ക്കാണ് സമ്പര്‍ക്കത്തിലൂടെ കഴിഞ്ഞ ദിവസം രോഗം സ്ഥിരീകരിച്ചത്. പലരും രോഗലക്ഷണങ്ങള്‍ പ്രകടിപ്പിക്കാത്തതുകൊണ്ട്, ഇവരില്‍ നിന്നും നിരവധി പേര്‍ക്കാണ് സമ്പര്‍ക്കം വഴി രോഗം ബാധിക്കുന്നത്.

കോവിഡ് വ്യാപനം നിയന്ത്രണത്തിന്‍റെ കാര്യത്തില്‍ സംസ്ഥാനം നിരവധി മാതൃകകള്‍ ആവിഷ്കരിച്ചിട്ടുണ്ട്. കോണ്ടാക്ട് ട്രെയിസിങ്, ഗാര്‍ഹിക സമ്പര്‍ക്ക വിലക്ക്. സംരക്ഷണ സമ്പര്‍ക്ക് വിലക്ക് തുടങ്ങിയ നടപടികള്‍ ഏറ്റവും വിജയിച്ച സംസ്ഥാനമാണ് നമ്മുടേത്. ഇക്കാര്യത്തിലുള്ള നമ്മുടെ രീതികള്‍ മറ്റ് സംസ്ഥാനങ്ങളും പിന്തുടരുന്നു. കോവിഡ് ആശുപത്രികളില്‍ ഐസിയു, വെന്‍റിലേറ്റര്‍ സംവിധാനം ഇങ്ങനെ ആധുനിക ചികിത്സയാണ് നല്‍കുന്നത്. അതുകൊണ്ടാണ് സംസ്ഥാനത്ത് മരണനിരക്ക് കുറഞ്ഞിരിക്കുന്നത്.

ജൂലൈ 26 (ഇന്നലെ) വരെയുള്ള കണക്കു പ്രകാരം കോവിഡ് 19 ബാധിച്ച് സംസ്ഥാനത്ത് ഇതുവരെ മരണമടഞ്ഞത് 61 പേരാണ്. 21 പേര്‍ സ്ത്രീകള്‍. 40 പേര്‍ പുരുഷന്മാരും. ഏറ്റവും കൂടുതല്‍ മരണങ്ങളുണ്ടായത് തിരുവനന്തപുരം ജില്ലയിലാണ് 11. കൊല്ലത്ത് 4, പത്തനംതിട്ടയില്‍ 1, ആലപ്പുഴയില്‍ 4, ഇടുക്കിയില്‍ 2, എറണാകുളത്ത് 7, തൃശൂര്‍ 7, പാലക്കാട് 1, മലപ്പുറം 6, കോഴിക്കോട് 6, വയനാട് 1, കണ്ണൂര്‍ 7, കാസര്‍കോട് 4 എന്നിങ്ങനെയാണ് ജില്ല തിരിച്ചുള്ള മരണപ്പെട്ടവരുടെ കണക്ക്.

മരിച്ചവരില്‍ 20 പേര്‍ 60നും 70നും ഇടയില്‍ പ്രായമുള്ളവര്‍. 18 പേര്‍ 70നും 80നും ഇടയില്‍ പ്രായമുള്ളവരും. 80 വയസ്സിനു മുകളില്‍ ഉണ്ടായിരുന്നവര്‍ 3 പേരാണ്. 9 പേര്‍ 50നും 60നും ഇടയില്‍ പ്രായമുള്ളവരാണ്. പത്തു വയസ്സിനു താഴെ പ്രായമുള്ളവരില്‍ 1 മരണം. മരണമടഞ്ഞ 39 പേര്‍ സമ്പര്‍ക്കം മുഖേന രോഗം ബാധിച്ചവരാണ്. 22 പേര്‍ പുറമേനിന്നു വന്നത്.

കോവിഡ് ഒരു ആരോഗ്യ പ്രശ്നം മാത്രമല്ല സാമൂഹ്യ സാമ്പത്തിക പ്രശ്നം കൂടിയാണ്. പല രാജ്യങ്ങളിലും നമ്മുടെ രാജ്യത്തിനകത്തും പൊതുജനാരോഗ്യ സംവിധാനം ദുര്‍ബലമായത് കൊണ്ട് ചികിത്സക്കായി ജനങ്ങള്‍ സ്വകാര്യ മേഖലയെ ആശ്രയിക്കേണ്ടിവരുന്നു.

സ്വകാര്യ മേഖല ഈടാക്കുന്ന അമിത ചികിത്സാ ഫീസിനെ സംബന്ധിച്ചുള്ള പരാതികള്‍ വന്നു കൊണ്ടിരിക്കയാണ്. രോഗികളും ബന്ധുക്കളും വലിയ സാമ്പത്തിക ബാധ്യതയാണ് നേരിടേണ്ടുന്നത്. നമ്മുടെ സംസ്ഥാനത്ത് സര്‍ക്കാര്‍ ആശുപത്രികളില്‍ പൂര്‍ണ്ണമായും സൗജന്യ ചികിത്സയാണ് നല്‍കി വരുന്നത്. കോവീഡ് ആശൂപത്രികളിലും കോവിഡ് ഫസ്റ്റ് ലൈന്‍ ട്രീറ്റ് മെന്‍റ് സെന്‍ററുകളിലും രോഗികള്‍ക്ക് സൗജന്യ ഭക്ഷണവും നല്‍കുന്നു.

സ്വകാര്യ ആശുപത്രികള്‍ കോവിഡ് ചികിത്സക്ക് സര്‍ക്കാരുമായി സഹകരിക്കുന്നുണ്ട്. ഇപ്പോള്‍ പ്രവര്‍ത്തിക്കാത്ത 44 ആശുപത്രികളും ഭാഗികമായി പ്രവര്‍ത്തിക്കുന്ന 42 ആശുപത്രികളും സ്വകാര്യമേഖലയില്‍ കണ്ടെത്തിയിട്ടുണ്ട്. ഇത്തരം ആശുപത്രികള്‍ ഏറ്റെടുത്ത് കോവിഡ് പ്രതിരോധ സംവിധാനത്തിന്‍റെ ഭാഗമായി മാറ്റുന്നതാണ്. കാരുണ്യ സുരക്ഷ പദ്ധതിയുടെ ഭാഗമായി കോവിഡ് കാലത്ത് കൂടുതല്‍ ആശുപത്രികള്‍ സര്‍ക്കാരുമായി കൈ കോര്‍ത്തുവരികയാണ്. കാസ്പ് ഗുണഭോക്താക്കള്‍ക്കും സര്‍ക്കാര്‍ റഫര്‍ ചെയ്യുന്ന കോവിഡ് രോഗികള്‍ക്കും എം-പാനല്‍ ചെയ്ത സ്വകാര്യ ആശുപത്രികളില്‍ നിന്നും സൗജന്യ ചികിത്സ ലഭിക്കും. കോവിഡ് ചികിത്സക്ക് മാത്രമായി താല്‍ക്കാലിക എം-പാനല്‍മെന്‍റ് സൗകര്യം ആരംഭിച്ചിട്ടുണ്ട്. കഴിഞ്ഞ ദിവസം സ്വകാര്യ ആശുപത്രികളിലെ ചികിത്സാ നിരക്ക് നിശ്ചയിച്ച് പ്രഖ്യാപിച്ചു.

ജനറല്‍ വാര്‍ഡില്‍ 2300 രൂപ, ഐസിയുവില്‍ 6500 രൂപ, വെന്‍റിലേറ്റര്‍ ഐസിയുവില്‍ 11,500 രൂപ. ഇതാണ് നിശ്ചയിച്ചിട്ടുള്ളത്. ശ്രദ്ധിക്കേണ്ടത് രാജ്യത്തെ ഏറ്റവും കുറഞ്ഞ നിരക്കാണിത്. മറ്റ് സംസ്ഥാനങ്ങളില്‍ പലതിലും സര്‍ക്കാര്‍ നിശ്ചയിച്ച് നിരക്കിലും വളരെ കൂടുതല്‍ പല സ്വകാര്യ ആശുപത്രികളും ഈടാക്കി രോഗികളെ കഷ്ടപ്പെടുത്തുന്നുണ്ട്. കേരളത്തില്‍ സര്‍ക്കാരുമായി പൂര്‍ണ്ണമായി സ്വകാര്യ മേഖല സഹകരിക്കുകയാണ്.

കോവിഡ് രോഗം ഒരു മരണകാരണമാകുമ്പോള്‍ അകാരണമായ ഭയം ജനങ്ങള്‍ കാണിക്കുന്നുണ്ട്. രോഗകാരണങ്ങള്‍ക്കെതിരായ പ്രവര്‍ത്തനത്തിനാണ് നാം ഊന്നല്‍ നല്‍കേണ്ടത്. മരണപ്പെട്ട വ്യക്തിയോട് അനാദരവ് കാണിക്കുന്നത് സംസ്കാരമുള്ള സമൂഹത്തിനു ചേര്‍ന്ന നടപടിയല്ല.

കോവിഡ് രോഗ വ്യാപനവുമായി ബന്ധപ്പെട്ട് മാനസിക-സാമൂഹിക പിന്തുണ നല്‍കുന്നതിനായി ഫെബ്രുവരി ആദ്യം തന്നെ സര്‍ക്കാര്‍ സൈക്കോ സോഷ്യല്‍ സപ്പോര്‍ട്ട് ടീം രൂപീകരിച്ചിരുന്നു. ഓഖി സമയത്തും പ്രളയത്തിലും നടത്തിയിട്ടുള്ള മാനസികാരോഗ്യ ദുരന്തനിവാരണ പ്രവര്‍ത്തനങ്ങള്‍ളുടെ തുടര്‍ച്ചായി ആരോഗ്യ വകുപ്പിന്‍റെ മാനസികാരോഗ്യ പരിപാടിയുടെ കീഴിലാണ് എല്ലാ ജില്ലകളിലും ഇത് രൂപീകരിച്ചിട്ടുള്ളത്.

സൈക്യാട്രിസ്റ്റ്കള്‍, സൈക്യാട്രിക് സോഷ്യല്‍ വര്‍ക്കര്‍മാര്‍, ക്ലിനിക്കല്‍ സൈക്കോളജിസ്റ്റുകള്‍, കൗണ്‍സിലര്‍മാര്‍ എന്നിവര്‍ ഉള്‍പ്പെട്ട 1145 മാനസികാരോഗ്യ പ്രവര്‍ത്തകര്‍ ജില്ലാ അടിസ്ഥാനത്തില്‍ എല്ലാ ജില്ലകളിലും പ്രവര്‍ത്തിക്കുന്നു. ഇവര്‍ ക്വാറന്‍റൈന്‍/ ഐസോലെഷനില്‍ കഴിയുന്ന എല്ലാ വ്യക്തികള്‍ക്കും സൈക്കോ സോഷ്യല്‍ സപ്പോര്‍ട്ട് കോളുകള്‍ നല്‍കുന്നു. മാനസിക സമ്മര്‍ദം, ഉല്‍കണ്ഠ, വിഷാദം, ഉറക്കക്കുറവ്, എന്നിവയ്ക്ക് വിദഗ്ധ സേവനം ലഭ്യമാക്കുന്നു. സ്ടിഗ്മ, സാമൂഹിക ആവശ്യങ്ങള്‍ എന്നിവയ്ക്ക് അതാത് പഞ്ചായത്ത്/ഐസിഡിഎസ് മുഖാന്തരം സഹായം നല്‍കുന്നു. ഇതുവരെ ക്വാറന്‍റൈന്‍/ഐസോലെഷനില്‍ കഴിഞ്ഞ 7,66,766 പേര്‍ക്ക് ഈ രീതിയില്‍ സേവനം നല്‍കിയിട്ടുണ്ട്.

ലോക്ക്ഡൗണ്‍ സമയത്ത് മനോരോഗ ചികിത്സയില്‍ ഇരിക്കുന്നവര്‍, ഭിന്നശേഷി കുട്ടികള്‍, അതിഥി തൊഴിലാളികള്‍, ഒറ്റയ്ക്ക് കഴിയുന്ന വയോജനങ്ങള്‍ എന്നിങ്ങനെ 3,48,860 പേര്‍ക്ക് സൈക്കോ സോഷ്യല്‍ സപ്പോര്‍ട്ട് കോളുകള്‍ നല്‍കിയിട്ടുണ്ട്.

കൊറോണ രോഗനിയന്ത്രണത്തില്‍ പ്രവര്‍ത്തിക്കുന്നവരുടെ മാനസിക സമ്മര്‍ദ്ദം ലഘൂകരിക്കുന്നതിനും ടെലി കൗണ്‍സിലിങ് നല്‍കുന്നു. ഇതുവരെ 36,011 ആരോഗ്യ പ്രവര്‍ത്തകര്‍ക്ക് ഈ രീതിയില്‍ സേവനം നല്‍കിയിട്ടുണ്ട്.

സ്കൂള്‍ കുട്ടികളുടെ മാനസിക സാമൂഹിക പ്രശ്നങ്ങള്‍ പരിഹരിക്കുവാനും സൈക്കോ സോഷ്യല്‍ സപ്പോര്‍ട്ട്/കൗണ്‍സിലിങ് കോളുകള്‍ നല്‍കുന്നു. 1,28,186 കുട്ടികളോട് സംസാരിക്കുകയും 16,869 കുട്ടികള്‍ക്ക് കൗണ്‍സിലിങ് നല്‍കുകയും ചെയ്തു. ഇതുവരെ എല്ലാ വിഭാഗത്തിനുമായി 17,13,795 സൈക്കോ സോഷ്യല്‍ സപ്പോര്‍ട്ട്/കൌണ്‍സിലിംഗ് കോളുകള്‍ സംസ്ഥാനമൊട്ടാകെ നല്‍കി കഴിഞ്ഞിട്ടുണ്ട്.

കോവിഡ് വ്യാപനവുമായി ബന്ധപ്പെട്ട് പല ജില്ലകളിലും ആത്മഹത്യകള്‍ റിപ്പോര്‍ട്ട് ചെയ്തതിനാല്‍ സംസ്ഥാനമൊട്ടാകെ ആത്മഹത്യ പ്രതിരോധ ക്യാമ്പയിന്‍ ‘ജീവരക്ഷ’ എന്ന പേരില്‍ ആരംഭിക്കുവാന്‍ തീരുമാനിച്ചിട്ടുണ്ട്.

ഒരു ദുരിതകാലത്താണ് കൂടെ ആരൊക്കെ ഉണ്ട് എന്ന് നാം മനസിലാക്കുന്നത്. സ്നേഹത്തിന്‍റെയും കരുതലിന്‍റേയും എത്രയെത്ര അനുഭവങ്ങള്‍ നാം ഈ കാലയളവില്‍ കണ്ടു. ജാതിയും മതവും ഭാഷയും ദേശവും ഒന്നും നമുക്ക് ഇതിന് തടസമായില്ല. കഴിഞ്ഞ ദിവസവും അത്തരം ഒരു സംഭവം ശ്രദ്ധയില്‍പ്പെട്ടു. കാസര്‍കോട് ജില്ലയിലെ പാണത്തൂരിലെ വീട്ടില്‍ ക്വാറന്‍റീനില്‍ കഴിയവെ പാമ്പു കടിയേറ്റ കുട്ടിയെ രക്ഷപ്പെടുത്തിയ സംഭവം പലരുടേയും മനസിലുണ്ടാകും.

പൊതുപ്രവര്‍ത്തകനായ ജിനില്‍ മറ്റൊന്നും നോക്കാതെ ആ കുട്ടിയുടെ ജീവനാണ് വലുതെന്ന് ഉറപ്പിച്ച് നടത്തിയ ഇടപെടല്‍ മാതൃകാപരമായിരുന്നു.

അച്ഛനും അമ്മയും ചികിത്സയില്‍ ആയപ്പോള്‍ വിഷമിച്ചു പോയ പിഞ്ചു കുഞ്ഞിനെ സംരക്ഷിക്കാന്‍ തയ്യാറായ കൊച്ചിയിലെ ഡോ. മേരി അനിതയെ പോലുള്ളവരുടെ ഇടപെടലും നമുക്ക് മുന്നിലുണ്ട്.

ദുരിതം അനുഭവിക്കുന്നവരുടെ പ്രശ്നങ്ങള്‍ കണ്ടറിഞ്ഞ് പിപിഇ കിറ്റും ധരിച്ച് പ്രവര്‍ത്തനം നടത്തുന്ന ജനപ്രതിനിധികളും യുവജന സംഘടനാ പ്രവര്‍ത്തകരുമൊക്കെ ഉള്ള നാടാണ് നമ്മുടേത്. ഇന്നലെയുണ്ടായ ഒരു സംഭവം അതിന്‍റെ എല്ലാം ശോഭ കെടുത്തുന്ന തരത്തിലായി.

കോവിഡ് കാരണം മരിച്ച ആളുടെ മൃതദേഹം ദഹിപ്പിക്കുമ്പോള്‍ രോഗം പകരുമോ?

കോവിഡ് വൈറസുകള്‍ ഒരാളില്‍ നിന്നും മറ്റൊരാളിലേയ്ക്ക് പകരുന്നത് രോഗബാധയുള്ളയാള്‍ ചുമക്കുമ്പോഴോ തുമ്മുമ്പോഴോ സംസാരിക്കുമ്പോഴോ പുറത്തേയ്ക്ക് തെറിക്കുന്ന ശരീരസ്രവത്തിന്‍റെ കണങ്ങളിലൂടെയാണ്. മൃതദേഹത്തില്‍ നിന്നും രോഗം പകരാനുള്ള സാധ്യത വളരെ കുറവാണ്. ഏതാണ്ടില്ല എന്നു തന്നെ പറയാം.

മൃതദേഹത്തെ തൊടുമ്പോഴോ ചുംബിക്കുമ്പോഴോ മറ്റോ സംഭവിക്കാവുന്ന രോഗബാധയുടെ വളരെ നേരിയ സാധ്യത മാത്രമാണുള്ളത്. കേന്ദ്ര സര്‍ക്കാര്‍ പുറത്തിറക്കിയ കോവിഡ് 19 പ്രോട്ടോക്കോള്‍ പുറത്തിറക്കിയിട്ടുണ്ട്. അതില്‍ മൃതദേഹത്തെ കൈകാര്യം ചെയ്യുന്നതിലും സംസ്കരിക്കുന്നതിലും പാലിക്കേണ്ട ശാസ്ത്രീയമായ രീതികള്‍ നിഷ്കര്‍ഷിക്കുന്നുണ്ട്. അതുപ്രകാരമാണ് ആരോഗ്യപ്രവര്‍ത്തകര്‍ ഇത്തരം സാഹചര്യങ്ങളെ കൈകാര്യം ചെയ്യുന്നത്. ശവമടക്കുകയോ ദഹിപ്പിക്കുകയോ ചെയ്യേണ്ട സന്ദര്‍ഭത്തില്‍ ഈ പ്രോട്ടോക്കോള്‍ കൃത്യമായി പാലിക്കുന്നു.

വൈദ്യുത ശ്മശാനങ്ങളില്‍ ദഹിപ്പിക്കുന്നത് 800 ഡിഗ്രി സെല്‍ഷ്യസ് വരെ വരുന്ന വളരെ ഉയര്‍ന്ന താപനിലയില്‍ ആയതിനാല്‍ വൈറസുകള്‍ വായു വഴി പകരുന്നതിന് യാതൊരു സാധ്യതയുമില്ല. യുക്തിയ്ക്ക് ഒരു തരത്തിലും നിരക്കാത്തതാണ് ഇത്തരം ആശങ്കകള്‍. യഥാര്‍ഥത്തിലുള്ള പ്രശ്നം ഇത്തരം സന്ദര്‍ഭങ്ങളില്‍ ഉണ്ടാകുന്ന ആള്‍ക്കൂട്ടമാണ്. അവിടെ കൂടുന്നവരില്‍ രോഗവ്യാപനം ഉണ്ടാകാം.

ഇതു സാധൂകരിക്കുന്ന നിരവധി സംഭവങ്ങള്‍ ഇതിനോടകം ഉണ്ടായിക്കഴിഞ്ഞു. അക്കാര്യമാണ് നാം ശ്രദ്ധിക്കേണ്ടത്. അവിടെയാണ് ആരോഗ്യവകുപ്പിന്‍റെ നിര്‍ദ്ദേശങ്ങള്‍ പിന്തുടരേണ്ടത്. അല്ലാതെ, ആരെങ്കിലും ഉണ്ടാക്കുന്ന തെറ്റിദ്ധാരണയുടെ പുറത്ത് മൃതദേഹങ്ങളുടെ സംസ്കാരം തടയാന്‍ വേണ്ടി കൂട്ടം കൂടുകയല്ല വേണ്ടത്. അങ്ങനെ കൂട്ടം കൂടുന്നതാണ് അപകടം. അതിനു നേതൃത്വം കൊടുക്കാന്‍ ജനപ്രതിനിധി പോലും ഉണ്ടായി എന്നത് അപമാനകരമാണ്. ആ കേസില്‍ ശക്തമായ ഇടപെടാന്‍ പൊലീസിന് നിര്‍ദേശം നല്‍കിയിട്ടുണ്ട്.

കോവിഡ് വ്യാപനത്തിന്‍റെ പശ്ചാത്തലത്തില്‍ എല്ലാ ജില്ലകളിലെയും പൊലീസ് ഉദ്യോഗസ്ഥര്‍ക്ക് കോവിഡ് ആന്‍റിബോഡി ടെസ്റ്റ് നടത്തും. എച്ച്എല്‍എല്‍ ലൈഫ് കെയര്‍ ലിമിറ്റഡ് എന്ന കേന്ദ്ര സര്‍ക്കാര്‍ സ്ഥാപനത്തിന്‍റെ സാങ്കേതിക സഹായത്തോടെ കേരള പൊലീസ് ഹൗസിങ് സഹകരണ സംഘത്തിന്‍റെ നേതൃത്വത്തിലാണ് ടെസ്റ്റ് നടത്തുക. ഇതിനായി 14 ജില്ലകളിലും ലാബ് സൗകര്യം ഏര്‍പ്പെടുത്തും.

ടെസ്റ്റിനുവേണ്ട ചെലവ് കേരള പൊലീസ് സഹകരണ സംഘവും കേരള പൊലീസ് വെല്‍ഫെയര്‍ ബ്യൂറോയും തുല്യമായി വീതിക്കും. ടെസ്റ്റിന് മേല്‍നോട്ടം വഹിക്കുന്നതിന് എല്ലാ ജില്ലകളിലും സമിതിക്ക് രൂപം നല്‍കിയിട്ടുണ്ട്.

മാസ്ക് ധരിക്കാത്ത 4975 സംഭവങ്ങള്‍ സംസ്ഥാനത്ത് ഇന്ന് റിപ്പോര്‍ട്ട് ചെയ്തിട്ടുണ്ട്. ക്വാറന്‍റൈന്‍ ലംഘിച്ച അഞ്ചു പേര്‍ക്കെതിരെ ഇന്ന് കേസ് രജിസ്റ്റര്‍ ചെയ്തു.

മന്ത്രിസഭായോഗ തീരുമാനങ്ങള്‍
താല്‍കാലിക റവന്യൂ പിരിച്ചെടുക്കല്‍ നിയമ ഭേദഗതി

താല്‍ക്കാലിക റവന്യൂ പിരിച്ചെടുക്കുന്നതിനുള്ള നിയമ ഭേദഗതി മന്ത്രി സഭ തീരുമാനിച്ചിട്ടുണ്ട്. കാലാവധി 2020 ഏപ്രില്‍ ഒന്നു മുതല്‍ 180 ദിവസമായി ദീര്‍ഘിപ്പിക്കുന്നതിന് താല്‍ക്കാലിക റവന്യൂ പിരിച്ചെടുക്കല്‍ നിയമത്തില്‍ ഭേദഗതി വരുത്തുന്നതിന് ഗവര്‍ണറോട് ശുപാര്‍ശ ചെയ്യാനാണ് മന്ത്രിസഭ തീരുമാനിച്ചിട്ടുള്ളത്.

1985ലെ താല്‍ക്കാലിക റവന്യൂ പിരിച്ചെടുക്കല്‍ നിയമപ്രകാരം 120 ദിവസമാണ് റവന്യൂ പിരിക്കാന്‍ സര്‍ക്കാരിന് അധികാരമുള്ളത്. ഈ കാലാവധിയ്ക്കകം ബില്ലുകള്‍ നിയമസഭ പാസാക്കിയില്ലെങ്കില്‍ അവ കാലഹരണപ്പെട്ടുപോകും. കേരള ധനകാര്യ ബില്‍ പാസാക്കുന്നതിന് ജൂലൈ 27ന് നിയമസഭ ചേരാന്‍ തീരുമാനിച്ചിരുന്നുവെങ്കിലും കോവിഡ് വ്യാപനത്തിന്‍റെ പശ്ചാത്തലത്തില്‍ സമ്മേളനം മാറ്റിവെച്ചിരിക്കുകയാണ്. ഈ സാഹചര്യത്തിലാണ് കാലാവധി 120 ദിവസത്തില്‍ നിന്ന് 180 ദിവസമാക്കുന്നതിന് ഓര്‍ഡിനന്‍സ് കൊണ്ടുവരുന്നത്.

കേരള ധനഉത്തരവാദിത്വ നിയമത്തില്‍ ഭേദഗതി
രാജ്യത്തെ പ്രതികൂല സാമ്പത്തിക സ്ഥിതി കണക്കിലെടുത്ത് 2019-20 വര്‍ഷം 1471 കോടി രൂപ അധിക വായ്പ എടുക്കാന്‍ കേന്ദ്രസര്‍ക്കാര്‍ അനുമതി നല്‍കിയിട്ടുണ്ട്. ഈ സാഹചര്യത്തില്‍ കേരള ധനഉത്തരവാദിത്വ നിയമത്തില്‍ ഭേദഗതി വരുത്തുന്നതിന് ഓര്‍ഡിനന്‍സ് പുറപ്പെടുവിക്കാന്‍ ഗവര്‍ണറോട് ശുപാര്‍ശ ചെയ്യാന്‍ തീരുമാനിച്ചു. ഈ നിയമത്തില്‍ ഭേദഗതി വരുത്തണമെന്ന വ്യവസ്ഥയോടെയാണ് ഒറ്റത്തവണയായി അധിക വായ്പ എടുക്കുന്നതിന് കേന്ദ്രസര്‍ക്കാര്‍ അനുമതി നല്‍കിയത്.

കോവിഡിന്‍റെ പശ്ചാത്തലത്തില്‍ നിയമസഭ ചേരാന്‍ കഴിയാത്ത സാഹചര്യത്തിലാണ് ഓര്‍ഡിനന്‍സ് പുറപ്പെടുവിക്കുന്നത്. ധനഉത്തരവാദിത്വ നിയമപ്രകാരം സംസ്ഥാനത്തിന്‍റെ ധന കമ്മി മൊത്തം ആഭ്യന്തര ഉല്‍പാദനത്തിന്‍റെ 3 ശതമാനമായി നിലനിര്‍ത്തണം. അതുകൊണ്ടാണ് ഒറ്റത്തവണയായി അധികവായ്പ എടുക്കുന്നതിന് നിയമഭേദഗതി വേണ്ടിവന്നത്.

അസമിന് രണ്ട് കോടി രൂപ
വെള്ളപ്പൊക്കത്തില്‍ ദുരിതമനുഭവിക്കുന്ന അസമിലെ ജനങ്ങളോട് മന്ത്രിസഭായോഗം ഐക്യദാര്‍ഢ്യം പ്രകടിപ്പിച്ചു. ജനങ്ങളെ സഹായിക്കുന്നതിന് മുഖ്യമന്ത്രിയുടെ ദുരിതാശ്വാസനിധിയില്‍ നിന്ന് രണ്ടു കോടി രൂപ അസം സര്‍ക്കാരിന് നല്‍കാനും തീരുമാനിച്ചു.

തോട്ടം തൊഴിലാളി ക്ഷേമനിധിയിലേക്ക് തൊഴിലാളികളും തൊഴില്‍ ഉടമകളും അടയ്ക്കേണ്ട അംശദായം 20 രൂപയില്‍ നിന്ന് 30 രൂപയായും സ്വയം തൊഴില്‍ ചെയ്യുന്നവര്‍ അടയ്ക്കേണ്ട അംശദായം 40 രൂപയില്‍ നിന്ന് 60 രൂപയായും വര്‍ധിപ്പിക്കുന്നതിന് ഓര്‍ഡിനന്‍സ് പുറപ്പെടുവിക്കാന്‍ ഗവര്‍ണറോട് ശുപാര്‍ശ ചെയ്യാന്‍ തീരുമാനിച്ചു. ഇതു സംബന്ധിച്ച നിയമഭേദഗതിയുടെ കരട് മന്ത്രിസഭ അംഗീകരിച്ചു.

സഹായം
ഡിവൈഎഫ്ഐ സംസ്ഥാന കമ്മിറ്റി ആഹ്വാനം ചെയ്ത ടിവി ചലഞ്ചിന്‍റെ ഭാഗമായി സംസ്ഥാനത്തുടനീളം 11,500 ടെലിവിഷനുകള്‍, 110 ടാബ്ലറ്റ് കമ്പ്യൂട്ടറുകള്‍, 194 മൊബൈലുകള്‍ എന്നിവ കൈമാറി.

സിഐടിയു തിരുവനന്തപുരം ജില്ലാ കമ്മിറ്റി ഓണ്‍ലൈന്‍ പഠന ആവശ്യങ്ങള്‍ക്കായി 125 വീടുകളില്‍ ടിവി സെറ്റ് വിതരണം ചെയ്തു.

തിരുവനന്തപുരം ക്രൈസ്റ്റ് നഗര്‍ സ്കൂളിലെ 1988 എസ്എസ്എല്‍സി ബാച്ച് കൊവിഡ് പ്രതിരോധ പ്രവര്‍ത്തനങ്ങളിലേര്‍പ്പെടുന്നവര്‍ക്കായി 800 ഫെയ്സ് ഷീള്‍ഡ്, 2000 മാസ്ക്ക് എന്നിവ കൈമാറി.

ദുരിതാശ്വാസം
തലശ്ശേരി ക്രൈസ്റ്റ് കോളേജ് 4,10,338 രൂപ

കൊടക്കാട് ആശ്വാസ് പാലിയോറ്റിവ് സൊസൈറ്റിയും ഡിവൈഎഫ്ഐ മേഖലാ കമ്മറ്റികളും ചേര്‍ന്ന് 1,50,790 രൂപ.

കള്ളുഷാപ്പ് ലൈസന്‍സ് അസോസിയേഷന്‍, കാസര്‍കോട് ജില്ല ഒരു ലക്ഷം.

തലശേരിയില്‍ പഴക്കച്ചവടം നടത്തുന്ന വി.പി. ഷംസു 1 ലക്ഷം രൂപ.

മത്സ്യഫെഡ് തശൂര്‍ ജില്ലാ മനേജരായി ജൂലൈ 31ന് വിരമിക്കുന്ന പി. ഗീത ഉണ്ണികൃഷ്ണന്‍ 1 ലക്ഷം രൂപ.

പയ്യന്നൂര്‍ വെള്ളൂരിലെ ഹോമിയോ ഡോക്ടര്‍ ദമ്പതികള്‍, ഡോക്ടര്‍ രാജേഷ്കുമാര്‍ ഡോക്ടര്‍ സ്മിത രാജേഷ് 1 ലക്ഷം രൂപ.

എന്‍ആര്‍ഇജി വര്‍ക്കേഴ്സ് യൂണിയന്‍ മടിക്കെ പഞ്ചായത്ത് 86,800 രൂപ.

ചെഗുവേര സംസ്കാര വേദി തേഞ്ഞിപാലം 61,300 രൂപ.

ചിത്രകാരനും ഷാര്‍ജയിലെ ജ്വല്ലറി ഡിസൈനറുമായ എം.ആര്‍. സന്തോഷ് 51,000 രൂപ.

കണ്ണൂര്‍ ജില്ലാ ഖാദി വര്‍ക്കേര്‍സ് യൂണിയന്‍ ഖാദി തൊഴിലാളികളില്‍ നിന്നും സമാഹരിച്ച 50,000 രൂപ.

ഹരിപ്പാട് ജയഭാരത് ലൈബ്രററി പ്രവര്‍ത്തകര്‍ ബിരിയാണി ചലഞ്ച് വഴി സമാഹരിച്ച 51,000 രൂപ.

പെരളശ്ശേരിയിലെ ചെറുമാവിലായി സഖാക്കള്‍ ബരിയാണി ചാലഞ്ചിലൂടെ സമാഹരിച്ച 50,000 രൂപ.

ഇലക്ട്രിക്കല്‍ വയര്‍മെന്‍ ആന്‍റ് സൂപ്പര്‍വൈസേര്‍സ് അസോസിയേഷന്‍ ഓഫ് കേരള (സിഐടിയു) തൃശൂര്‍ ജില്ലാ കമ്മിറ്റി 50,000 രൂപ.

പെരളശ്ശേരി എകെജി സ്മാരക സഹകരണ ആശുപത്രിയിലെ ഡോക്ടര്‍ കെ പ്രദീപ്കുമാര്‍ 50,000 രൂപ നല്‍കി.

മാങ്ങാട്ടിടം മൂന്നാം പീടിക സ്വദേശി ദിനേശന്‍ പത്തലായി 50,000 രൂപ.

തൃശൂര്‍ അന്നമനട പഞ്ചായത്തിലെ കേരള പ്രവാസി സംഘം 50,001 രൂപ.

കണ്ണൂര്‍ കോളയാട് ഗ്രാമപഞ്ചായത്ത് ജീവനക്കാരന്‍ പ്രദീശന്‍ 41,110 രൂപ.

ജനാധിപത്യ മഹിളാ അസോസിയേഷന്‍ കരിവെള്ളൂര്‍ നോര്‍ത്ത് വില്ലേജ് കമ്മിറ്റി 35,500 രൂപ.

പടന്ന ഓരി എകെജി ക്ലബ്ബ്, യങ് മെന്‍സ് ക്ലബ്ബ്, വള്ളത്തോള്‍ സ്മാരക വായനശാല എന്നിവര്‍ ചേര്‍ന്ന് 60,130 രൂപ.

പിലിക്കോട് ചന്തേര ഗവ. എയുപി സ്കൂള്‍ പിടിഎ കമ്മറ്റി 50,580 രൂപ.

കെഎസ്കെടിയു ചെറുവത്തൂര്‍ ഏരിയാ കമ്മറ്റി 35,000 രൂപ

ഡിവൈഎഫ്ഐ പള്ളിക്കുനി, മത്തിപ്പറമ്പ് യൂണിറ്റുകള്‍ ബിരിയാണി ചാലഞ്ചിലൂടെ സമാഹരിച്ച 35,000 രൂപ

വലിയപറമ്പ് ഇടയിലക്കാട് കൂട്ടുകൃഷി പുരുഷ സ്വയംസഹായ സംഘം 32,790 രൂപ.

കയ്യൂര്‍ രക്തസാക്ഷി സ്മാരക ആര്‍ട്സ് ആന്‍റ് സ്പോര്‍ട്സ് ക്ലബ്ബ് 25,540 രൂപ.

ചീമേനി കരക്കാട് റെഡ്സ്റ്റാര്‍ ആര്‍ട്സ് ആന്‍റ് സ്പോര്‍ട്സ് ക്ലബ്ബ് 23,640 രൂപ.

മുഖ്യമന്ത്രിയുടെ വാര്‍ത്താ സമ്മേളനത്തില്‍ നിന്ന്
ഇന്ന് സംസ്ഥാനത്ത് 968 പേര്‍ക്ക് രോഗമുക്തി ഉണ്ടായി. 885 പേര്‍ക്കാണ് ഇന്ന് കോവിഡ് സ്ഥിരീകരിച്ചത്. ഇതുവരെ രോഗം സ്ഥിരീകരിച്ചവരുടെ എണ്ണം 16,995 ആണ്. ഇന്ന് 724 പേര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. അതില്‍ ഉറവിടമറിയാത്തത് 56. വിദേശത്തുനിന്ന് 64 പേര്‍. മറ്റു സംസ്ഥാനങ്ങളില്‍നിന്ന് 68 പേര്‍. ആരോഗ്യപ്രവര്‍ത്തകര്‍ 24.

ഇന്ന് നാല് മരണങ്ങള്‍ റിപ്പോര്‍ട്ട് ചെയ്തു. തിരുവനന്തപുരം ചിറയിന്‍കീഴ് സ്വദേശി മുരുകന്‍ (46), കാസര്‍കോട് അനങ്കൂര്‍ സ്വദേശി ഖയറുന്നീസ (48), കാസര്‍കോട് ചിറ്റാരി സ്വദേശി മാധവന്‍ (68), ആലപ്പുഴ കലവൂര്‍ സ്വദേശി മറിയാമ്മ (85) എന്നിവരാണ് മരണമടഞ്ഞത്. ഇവരുടെ നിര്യാണത്തില്‍ അനുശോചനം രേഖപ്പെടുത്തുന്നു.

പോസിറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 167, കൊല്ലം 133, കാസര്‍കോട് 106, കോഴിക്കോട് 82, എറണാകുളം 69, മലപ്പുറം 58, പാലക്കാട് 58, കോട്ടയം 50, ആലപ്പുഴ 44, തൃശൂര്‍ 33, ഇടുക്കി 29, പത്തനംതിട്ട 23, കണ്ണൂര്‍ 18, വയനാട് 15.

നെഗറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 101, കൊല്ലം 54, പത്തനംതിട 81, ആലപ്പുഴ 49, കോട്ടയം 74, ഇടുക്കി 96, എറണാകുളം 151, തൃശൂര്‍ 12, പാലക്കാട് 63, മലപ്പുറം 24, കോഴിക്കോട് 66, വയനാട് 21, കണ്ണൂര്‍ 108, കാസര്‍കോട് 68.

കഴിഞ്ഞ 24 മണിക്കൂറിനകം 25,160 സാമ്പിളുകള്‍ പരിശോധിച്ചു. 1,56,767 പേരാണ് നിരീക്ഷണത്തിലുള്ളത്. 9,297 പേര്‍ ആശുപത്രികളില്‍. ഇന്നു മാത്രം 1,346 പേരെ ആശുപത്രിയില്‍ പ്രവേശിപ്പിച്ചു. ഇപ്പോള്‍ ചികിത്സയിലുള്ളവര്‍ 9,371.

ഇതുവരെ ആകെ 3,38,038 സാമ്പിളുകളാണ് പരിശോധനയ്ക്കായി അയച്ചത്. ഇതില്‍ 9,185 സാമ്പിളുകളുടെ ഫലം വരാനുണ്ട്. ഇതുകൂടാതെ സെന്‍റിനല്‍ സര്‍വൈലന്‍സിന്‍റെ ഭാഗമായി മുന്‍ഗണനാ ഗ്രൂപ്പുകളില്‍ നിന്ന് 1,09,635 സാമ്പിളുകള്‍ ശേഖരിച്ചതില്‍ 1,05,433 സാമ്പിളുകള്‍ നെഗറ്റീവ് ആയി. സംസ്ഥാനത്തെ ഹോട്ട്സ്പോട്ടുകളുടെ എണ്ണം 453 ആയി.

ഇന്ന് പുതുതായി രോഗം ബാധിച്ചവരുടെ എണ്ണം ആയിരത്തില്‍ താണിട്ടുണ്ട്. പക്ഷേ, സംസ്ഥാനത്തിന്‍റെ വിവിധ ഭാഗങ്ങളിലെ സാഹചര്യം കൂടുതല്‍ ജാഗ്രത ആവശ്യപ്പെടുന്നതാണ്.

തിരുവനന്തപുരം ജില്ലയില്‍ പൂന്തുറ, പുല്ലുവിള, പുതുക്കുറിച്ചി, അഞ്ചുതെങ്ങ്, ബീമാപ്പള്ളി എന്നിവിങ്ങനെ അഞ്ച് ലാര്‍ജ് ക്ലസ്റ്ററുകളാണ് നിലവിലുള്ളത്. ഇവിടങ്ങളില്‍ രോഗം കുറയുന്ന പ്രവണത കാണുന്നില്ല. പുല്ലുവിള, പുതുക്കുറിച്ചി, അഞ്ചുതെങ്ങ് ക്ലസ്റ്ററുകളുടെ സമീപ മേഖലകളിലേക്ക് രോഗം പടരുന്ന സാഹചര്യം നിലവിലുണ്ട്.

ജില്ലയില്‍ 17 എഫ്എല്‍ടിസികളിലായി 2,103 കിടക്കകള്‍ സജ്ജമായിട്ടുണ്ട്. 18 എഫ്എല്‍ടിസികള്‍ ഉടന്‍ സജ്ജമാകും. ഇവിടെ 1,817 കിടക്കകള്‍ ഉണ്ടാകും. പുല്ലുവിളയില്‍ കഴിഞ്ഞ പത്തുദിവസത്തിനിടെ 671 കോവിഡ് പരിശോധനകള്‍ നടത്തിയതില്‍ 288 എണ്ണം പോസിറ്റീവായി.

42.92 ശതമാനമാണ് ടെസ്റ്റ് പോസിറ്റീവിറ്റി റേറ്റ്.

പുല്ലുവിളയിലും പൂന്തുറയിലും കഴിഞ്ഞ നാലുദിവസം നടത്തിയ കോവിഡ് പരിശോധന വിവരങ്ങള്‍ ഇങ്ങനെയാണ്.

പൂന്തുറ
ജൂലൈ 20 – 54 സാമ്പിളുകള്‍ ശേഖരിച്ചതില്‍ 18 പോസിറ്റീവായി.
ജൂലൈ 21 – 64 സാമ്പിളുകള്‍ ശേഖരിച്ചതില്‍ 15 പോസിറ്റീവായി.
ജൂലൈ 22 – 55 സാമ്പിളുകള്‍ ശേഖരിച്ചതില്‍ 22 പോസിറ്റീവായി.
ജൂലൈ 23 – 49 സാമ്പിളുകള്‍ ശേഖരിച്ചതില്‍ 14 പോസിറ്റീവായി.

പുല്ലുവിള
ജൂലൈ 20 – 50 സാമ്പിളില്‍ 11 പോസിറ്റീവായി.
ജൂലൈ 21 – 46 സാമ്പിളില്‍ 22 പോസിറ്റീവായി.
ജൂലൈ 22 – 48 സാമ്പിളില്‍ 22 പോസിറ്റീവായി.
ജൂലൈ 23 – 36 സാമ്പിളില്‍  8 പോസിറ്റീവായി.

രോഗവ്യാപനത്തോത് കുറയുന്നുണ്ട്. എങ്കിലും നിയന്ത്രണങ്ങളില്‍ ഇളവുവരുത്തുന്നില്ല.

കൊല്ലം ജില്ലയിലെ 33 കോവിഡ് പ്രാഥമിക ചികിത്സ കേന്ദ്രങ്ങളിലായി 4,850 കിടക്കകള്‍ സജ്ജീകരിച്ചു. 3,624 കിടക്കകള്‍ ഉള്ള 31 കേന്ദ്രങ്ങള്‍ ഒരാഴ്ചയ്ക്കുള്ളില്‍ തയ്യാറാവും. അതോടെ 64 കോവിഡ് പ്രാഥമിക ചികിത്സാ കേന്ദ്രങ്ങളിലായി ആകെ കിടക്കകളുടെ എണ്ണം 8,474 ആവും.

പത്തനംതിട്ട ജില്ലയിലെ കുമ്പഴ ലാര്‍ജ് കമ്യൂണിറ്റി ക്ലസ്റ്ററില്‍ സമ്പര്‍ക്കംമൂലം ഇതുവരെ 205 പേര്‍ക്ക് കോവിഡ് സ്ഥിരീകരിച്ചു. ഈ ക്ലസ്റ്ററില്‍ കഴിഞ്ഞ മൂന്നു ദിവസങ്ങളിലായി വലിയ രീതിയിലുള്ള രോഗവ്യാപനം ദൃശ്യമല്ല.

തിരുവല്ല തുകലശേരിയിലെ ഹോളി സ്പിരിറ്റ് കോണ്‍വെന്‍റില്‍ സമ്പര്‍ക്കം മൂലം ഇതുവരെ 44 പേര്‍ക്കാണ് കോവിഡ് സ്ഥിരീകരിച്ചത്. ജില്ലയില്‍ 75 സിഎഫ്എല്‍ടിസികളിലായി 7,364 ബെഡുകളാണ് സജ്ജമാക്കുന്നത്. നിലവില്‍ പ്രവര്‍ത്തിക്കുന്ന അഞ്ച് സിഎഫ്എല്‍ടിസികളിലായി 624 ബെഡുകളാണ് ഉള്ളത്.

ആലപ്പുഴ ജില്ലയില്‍ കോവിഡ് കേസുകള്‍ കൂടുതലായി കണ്ടിരുന്ന കുറത്തികാട്, കായംകുളം, ചേര്‍ത്തല താലൂക്ക് ആശുപത്രി, ഐടിബിപി എന്നിവിടങ്ങളില്‍ കേസുകള്‍ കുറഞ്ഞുവരുന്നുണ്ട്. തീരപ്രദേശത്തെ ക്ളസ്റ്ററുകള്‍ സജീവമായി നിലനില്‍ക്കുന്നു. സമ്പര്‍ക്ക പട്ടികയിലെ 105 പേര്‍ക്ക് ടെസ്റ്റ് നടത്തിയപ്പോള്‍ കടക്കരപ്പളളിയില്‍ 18 പേര്‍ക്കും ചെട്ടികാട് സമ്പര്‍ക്കപട്ടികയിലെ 465 പേരില്‍ 29 പേര്‍ക്കും കോവിഡ് സ്ഥിരീകരിച്ചു. ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകള്‍ക്കായി 29 കെട്ടിടങ്ങളിലായി 3,140 ബെഡുകള്‍ സജ്ജീകരിച്ചിട്ടുണ്ട്.

കോട്ടയത്ത് ജീവനക്കാരന് കോവിഡ് സ്ഥിരീകരിച്ചതിനെത്തുടര്‍ന്ന് ക്വാറന്‍റയിനില്‍ പ്രവേശിച്ച കളക്ടര്‍ ഉള്‍പ്പെടെയുള്ള ഉദ്യോഗസ്ഥര്‍ വര്‍ക്ക് ഫ്രം ഹോം സംവിധാനത്തില്‍ ചുമതലകള്‍ നിര്‍വഹിക്കുകയാണ്. ചങ്ങനാശേരിക്കും പായിപ്പാടിനും പുറമെ പാറത്തോട്, പള്ളിക്കത്തോട് എന്നിവയാണ് നിലവിലുള്ള കോവിഡ് ക്ലസ്റ്ററുകള്‍. സിഎഫ്എല്‍ടിസികള്‍ക്കായി ഇതുവരെ 55 സ്ഥാപനങ്ങള്‍ ഏറ്റെടുത്തു. ഇതില്‍ വിപുല സൗകര്യങ്ങളുള്ള 33 കേന്ദ്രങ്ങളില്‍ മാത്രം 4,255 പേരെ താമസിപ്പിക്കാനാകും.

ഇടുക്കി ജില്ലയില്‍ ലാര്‍ജ് കമ്യൂണിറ്റി ക്ലസ്റ്റര്‍ ഇല്ല. സമ്പര്‍ക്കംമൂലമുള്ള രോഗബാധ കൂടിയ സ്ഥലങ്ങള്‍ കൊന്നത്തടി, രാജാക്കാട് എന്നിവയാണ്. ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകള്‍ക്കായി അഞ്ചു താലൂക്കുകളിലായി 5,606 പേര്‍ക്കുള്ള സൗകര്യമാണ് ഒരുക്കുന്നത്. 3,114 പേര്‍ക്കുള്ള സൗകര്യം പൂര്‍ത്തിയായി.

എറണാകുളം ജില്ലയില്‍ വൃദ്ധജനരോഗീപരിപാലന കേന്ദ്രങ്ങള്‍, കോണ്‍വെന്‍റുകള്‍ എന്നിവിടങ്ങളില്‍ രോഗവ്യാപനമുണ്ടായത് ഗൗരവത്തോടെ കാണേണ്ട സാഹചര്യമാണുള്ളത്. തൃക്കാക്കരയിലെ ഒരു കെയര്‍ ഹോമിലെ 135 അന്തേവാസികളുടെ ആന്‍റിജന്‍ പരിശോധന നടത്തിയതില്‍ 40 പേരുടെ റിസല്‍ട്ടും പോസീറ്റീവാണ്. കെയര്‍ഹോമുകളിലേക്ക് സന്ദര്‍ശകരെ അനുവദിക്കില്ല. പുറമേക്കുള്ള കെയര്‍ ഹോം അധികൃതരുടെ സഞ്ചാരവും പരിമിതപ്പെടുത്തും.

പോസീറ്റീവായവരുടെ എണ്ണം കൂടുതലുള്ള കെയര്‍ഹോമുകളില്‍ തന്നെ ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകള്‍ സജ്ജമാക്കും. 24 മണിക്കൂറും ഡോക്ടറുടെ സേവനവും ആംബുലന്‍സ് സൗകര്യവും ഉണ്ടാകും. രോഗനിലയില്‍ വ്യത്യാസം കണ്ടാല്‍ കോവിഡ് ആശുപത്രിയിലേക്ക് മാറ്റും. ലഭ്യമായ മൊത്തം ചികിത്സാ സൗകര്യത്തില്‍ 39 ശതമാനം കിടക്കകളാണ് ഇപ്പോള്‍ വിനിയോഗിച്ചിട്ടുള്ളത്. 47 ശതമാനം ഐസിയു സൗകര്യവും  26 ശതമാനം വെന്‍റിലേറ്ററുകളും ഉപയോഗിക്കുന്നുണ്ട്.

പ്രധാന ക്ലസ്റ്റര്‍ ആയ ആലുവയില്‍ രോഗവ്യാപനം ശക്തമായി തുടരുകയാണ്.  സമീപ പഞ്ചായത്തുകളിലും കൂടുതല്‍ കേസുകള്‍ കഴിഞ്ഞ ദിവസങ്ങളില്‍ റിപ്പോര്‍ട്ട് ചെയ്തു. കൊച്ചി കോര്‍പറേഷനിലെ ചില പ്രദേശങ്ങളിലും സമ്പര്‍ക്കം മൂലം രോഗം റിപ്പോര്‍ട്ട് ചെയ്തിരുന്നു.

ആകെ 109 എഫ്എല്‍ടിസികളിലായി 5,897 പൊസിറ്റീവ് കേസുകള്‍ അഡ്മിറ്റ് ചെയ്യാന്‍ സൗകര്യമുണ്ട്. 24 കേന്ദ്രങ്ങളില്‍ ഡോക്ടര്‍മാര്‍ ഉള്‍പ്പടെയുള്ള ജീവനക്കാരെ നിയമിച്ചു. 21 സ്വകാര്യ ആശുപത്രികള്‍ കോവിഡ് ചികിത്സക്കുള്ള സന്നദ്ധത അറിയിച്ചിട്ടുണ്ട്. കോവിഡ് ആശുപത്രികളിലെ ഐസിയുകളില്‍ ഇന്‍റന്‍സിവിസ്റ്റുകളുടെ സേവനം കൂടുതലായി ആവശ്യമായി വരുന്നുണ്ട്. സ്വകാര്യ ആശുപത്രികള്‍ കൂടി സഹകരിച്ചാലേ ഇതിന് പരിഹാരമുണ്ടാകൂ.

തൃശൂരില്‍ സമ്പര്‍ക്ക വ്യാപനം കൂടുകയാണ്. ആദ്യം രോഗം സ്ഥിരീകരിച്ച ജില്ലയില്‍ ആകെ രോഗികളുടെ എണ്ണം 1000 കടന്നു. 40 തദ്ദേശ സ്ഥാപന പ്രദേശങ്ങള്‍ കണ്ടെയ്ന്‍മെന്‍റ് സോണ്‍ ആണ്. ഇരിങ്ങാലക്കുട നഗരസഭയില്‍ നിന്ന് മുരിയാട് പഞ്ചായത്തിലേക്ക് വ്യാപിക്കുന്നുണ്ട്. നാളെ വൈകിട്ട് മുതല്‍ ഇവിടെ ട്രിപ്പിള്‍ ലോക് ഡൗണ്‍ പ്രഖ്യാപിച്ചിട്ടുണ്ട്. 30 സിഎഫ്എല്‍ടിസികള്‍ തയ്യാറായി. ഇതില്‍ 6,033 ബെഡുകള്‍ ഒരുക്കിയിട്ടുണ്ട്.

പാലക്കാട് പട്ടാമ്പിയിലെ രോഗബാധ കൂടുതലായി കണ്ടെത്തിയ സാഹചര്യത്തില്‍  നടത്തിയ പരിശോധനയില്‍ 38 പേര്‍ക്ക് രോഗം സ്ഥിരീകരിച്ചു.

മലപ്പുറം ജില്ലയില്‍ മൂന്ന് കമ്യൂണിറ്റി ക്ലസ്റ്ററുകളാണ് നിലവിലുള്ളത്. കൊണ്ടോട്ടി, നിലമ്പൂര്‍, പൊന്നാനി നഗരസഭയിലെ എല്ലാ വാര്‍ഡുകളുമാണ് കമ്യൂണിറ്റി ക്ലസ്റ്ററായി തുടരുന്നത്. ലാര്‍ജ് ക്ലസ്റ്ററായിരുന്ന പൊന്നാനി താലൂക്കിലെ പൊന്നാനി നഗരസഭ ഒഴികെയുള്ള പ്രദേശങ്ങളില്‍ രോഗവ്യാപനം കുറഞ്ഞതിനാല്‍ നിയന്ത്രണങ്ങള്‍ ഒഴിവാക്കിയിട്ടുണ്ട്. മറ്റൊരു ക്ലസ്റ്ററായിരുന്ന താനൂര്‍ നഗരസഭാ പരിധിയിലെ നിയന്ത്രണങ്ങളും ഒഴിവാക്കി. ജില്ലയില്‍ 59 കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകളാണ് ഒരുങ്ങുന്നത്. 5,793 പേരെ കിടത്തി ചികിത്സിക്കാനുള്ള സൗകര്യം ഉണ്ടാകും.

വയനാട് ജില്ലയില്‍ ലാര്‍ജ് കമ്യൂണിറ്റി ക്ലസ്റ്റര്‍ ഉണ്ടായിട്ടില്ല. ലിമിറ്റഡ് കമ്യൂണിറ്റി ക്ലസ്റ്ററായി തൊണ്ടര്‍നാട് പ്രദേശം തുടരുന്നു. കണ്ടെയ്ന്‍മെന്‍റ് സോണുകളായി തുടരുന്നത് 12 തദ്ദേശ സ്ഥാപനങ്ങളിലെ 87 വാര്‍ഡുകളാണ്.

ജില്ലയില്‍ 20 എഫ്എല്‍ടിസികളിലായി 2,630 കിടക്കകള്‍ സജ്ജീകരിച്ച് കഴിഞ്ഞു. 5,660 ബെഡുകളുടെ സൗകര്യത്തില്‍ 52 കേന്ദ്രങ്ങള്‍ എഫ്എല്‍ടിസികളാക്കുന്നതിന് കണ്ടെത്തിയിട്ടുണ്ട്.

കോഴിക്കോട് ജില്ലയില്‍ നഗര-ഗ്രാമ വ്യത്യാസമില്ലാതെ രോഗവ്യാപന ഭീതി നിലനില്‍ക്കുന്നുണ്ട്. 50 ഇടങ്ങളിലായി ഒരുക്കിയ എഫ്എല്‍ടിസികളില്‍ 4,870 ബെഡുകള്‍ സജ്ജീകരിച്ചിട്ടുണ്ട്. ജില്ലയില്‍ തൂണേരിയാണ് ലാര്‍ജ് കമ്യൂണിറ്റി ക്ലസ്റ്റര്‍. ചെക്യാട് ഗ്രാമപഞ്ചായത്തിലെ രോഗം സ്ഥിരീകരിച്ച ഡോക്ടറുടെ വിവാഹ ചടങ്ങില്‍ പങ്കെടുത്തവരും ഈ വ്യക്തിയുമായി ഇടപഴകിയവരും ക്വാറന്‍റൈനില്‍ പ്രവേശിക്കണമെന്ന് നിര്‍ദ്ദേശിച്ചിട്ടുണ്ട്.

ചോറോട് ഗ്രാമപഞ്ചായത്തിലെ 8ാം വാര്‍ഡില്‍ രോഗം സ്ഥിരീകരിച്ച വ്യക്തിയുടെ വീട്ടില്‍ ജډദിനാഘോഷം നടന്നത് ജൂലൈ 15നാണ്. കൊവിഡ് സമ്പര്‍ക്ക ഭീതി നിലനില്‍ക്കുന്ന സാഹചര്യത്തിലാണ് ചടങ്ങ് നടന്നത്. ഇതും ആശങ്കയ്ക്ക് കാരണമായിട്ടുണ്ട്.

കണ്ണൂരില്‍ ഫസ്റ്റ്ലൈന്‍ ചികിത്സ കേന്ദ്രങ്ങളില്‍ ആകെ 7,178 കിടക്കകള്‍ സജ്ജമാക്കി. ഇതില്‍ 2,500 കിടക്കകള്‍ കോവിഡ് ചികിത്സ കേന്ദ്രങ്ങളോട് അനുബന്ധിച്ചാണ്. ബാക്കി 4,678ല്‍ പഞ്ചായത്തുകളില്‍ 2,632, മുന്‍സിപ്പാലിറ്റി 1,296, കോര്‍പറേഷന്‍ 750. എന്നിങ്ങനെ യാണ് കിടക്കകള്‍ ഒരുക്കിയിട്ടുള്ളത്.

കാസര്‍കോട് ജില്ലയില്‍ ആറ് കമ്യൂണിറ്റി ക്ലസറുകളാണ്. കാസര്‍കോട് മാര്‍ക്കറ്റ് ലാര്‍ജ് കമ്യൂണിറ്റി ക്ലസ്റ്റര്‍ ആയി മാറിയിട്ടുണ്ട്. ഹൊസങ്കടിയിലെ പ്രിയദര്‍ശിനി ലാബിനെ കമ്യൂണിറ്റി ക്ലസ്റ്ററില്‍ നിന്നും ഒഴിവാക്കിയിട്ടുണ്ട്.

ഇന്ത്യയിലാദ്യമായി കോവിഡ് 19 റിപ്പോര്‍ട്ട് ചെയ്തത് കേരളത്തിലാണെങ്കിലും കൃത്യനിഷ്ഠയോടെ നടത്തിയ ഇടപെടലുകള്‍ വൈറസിന്‍റെ വ്യാപനം കുറയ്ക്കുവാനും മരണനിരക്ക് കുറക്കുവാനും സഹായിച്ചു. ആദ്യ രണ്ട് ഘട്ടത്തിലും രോഗപ്പകര്‍ച്ച ഫലപ്രദമായി തടയാന്‍ കഴിഞ്ഞു. മൂന്നാംഘട്ടത്തിലെ രോഗപ്പകര്‍ച്ച എല്ലാവരും പ്രതീക്ഷിച്ചതാണ്.

ഫ്ളാറ്റനിങ് ദ കര്‍വ്
ലോകത്തിന് മുന്നില്‍ രോഗ പകര്‍ച്ചയുടെ ഉയര്‍ച്ചയും മരണനിരക്കും കുറയ്ക്കാന്‍ കഴിഞ്ഞതാണ് കേരളത്തിന്‍റെ നേട്ടം. മരണനിരക്ക് മറ്റുപല രാജ്യങ്ങളിലും 4 ശതമാനം മുതല്‍ 10 ശതമാനം വരെ ഉയര്‍ന്നപ്പോള്‍ കേരളത്തില്‍ 0.31 ശതമാനമായി പിടിച്ചുനിര്‍ത്താന്‍ കഴിഞ്ഞത് യാദൃച്ഛികമായ അനുഭവമല്ല. കഠിന പ്രയത്നത്തിന്‍റെ ഗുണഫലമാണ് അത്. ഇന്നലെ വരെ 16,110 പേര്‍ക്ക് രോഗം ബാധിച്ചപ്പോള്‍ മരണ സംഖ്യ 50 മാത്രമാണ്.

ലാബുകള്‍
വേണ്ടത്ര പരിശോധനകള്‍ നടത്തുന്നില്ല എന്നാണ് ചിലരുടെ ആക്ഷേപം. കോവിഡ് പരിശോധനകള്‍ വര്‍ധിപ്പിക്കാനായി വലിയ സൗകര്യങ്ങളാണ് ഒരുക്കിയത്. തുടക്കത്തില്‍ എന്‍ഐവി ആലപ്പുഴയില്‍ മാത്രമുണ്ടായിരുന്ന പരിശോധനാ സംവിധാനം വിപുലീകരിച്ചു. 15 സര്‍ക്കാര്‍ ലാബുകളിലും 8 സ്വകാര്യ ലാബുകളിലുമുള്‍പ്പെടെ 25 സ്ഥലങ്ങളിലാണ് ആര്‍ടിപിസിആര്‍ പരിശോധിക്കാനുള്ള സംവിധാനങ്ങളുള്ളത്.

ട്രൂ നാറ്റ് പരിശോധന 19 സര്‍ക്കാര്‍ ലാബിലും 15 സ്വകാര്യ ലാബിലും സിബി നാറ്റ് പരിശോധന 6 സര്‍ക്കാര്‍ ലാബിലും 9 സ്വകാര്യ ലാബിലും നടക്കുന്നു. എയര്‍പോര്‍ട്ടിലേയും ക്ലസ്റ്ററുകളിലേയും ആന്‍റിജന്‍ പരിശോധനയ്ക്കായി 10 ലാബുകളുമുണ്ട്. നിലവില്‍ 84 ലാബുകളില്‍ കോവിഡിന്‍റെ വിവിധ പരിശോധനകള്‍ നടത്താനാകും. 8 സര്‍ക്കാര്‍ ലാബുകളില്‍ കൂടി പരിശോധിക്കാനുള്ള നടപടികള്‍ പൂര്‍ത്തിയായി വരികയാണ്. അക്രഡിറ്റേഷന്‍ ഉള്ള സ്വകാര്യ ലാബുകള്‍ക്ക് പരിശോധനയ്ക്കുള്ള അനുമതി നല്‍കുന്നുമുണ്ട്.

തുടക്കത്തില്‍ 100നു താഴെ മാത്രമായിരുന്നു പ്രതിദിന പരിശോധന. അത് രോഗവ്യാപന തോതനുസരിച്ച് 25,000ല്‍ കൂടുതലെത്തിക്കാന്‍ കഴിഞ്ഞു. പരിശോധനയുടെ കാര്യത്തില്‍ ഇന്ത്യയില്‍ മൂന്നാം സ്ഥാനമാണ് കേരളത്തിനുള്ളത്. കഴിഞ്ഞ 24 മണിക്കൂറിനിടെ 25,160 സാമ്പിളുകളാണ് പരിശോധിച്ചത്.

റുട്ടീന്‍ സാമ്പിള്‍, എയര്‍പോര്‍ട്ട് സര്‍വയിലന്‍സ്, പൂള്‍ഡ് സെന്‍റിനല്‍, സിബി നാറ്റ്, ട്രൂനാറ്റ്, സിഎല്‍ഐഎ, ആന്‍റിജെന്‍ അസ്സെ എന്നിവ ഉള്‍പ്പെടെ ഇതുവരെ ആകെ 6,35,272 സാമ്പിളുകളാണ് പരിശോധനയ്ക്കായി അയച്ചത്.  ടെസ്റ്റ് പരിശോധയുടെ കാര്യത്തില്‍ ടെസ്റ്റ് പെര്‍ മില്യണ്‍ ബൈ കേസ് പെര്‍ മില്യന്‍ എന്ന ശാസ്ത്രീയ മാര്‍ഗം നോക്കുമ്പോള്‍ കേരളം മൂന്നാം സ്ഥാനത്താണ്. ടെസ്റ്റ് പോസിറ്റീവിറ്റി 2.6 ശതമാനം മാത്രമാണ് സംസ്ഥാനത്തുള്ളത്. പരിശോധനകള്‍ വെച്ച് 5 ശതമാനത്തിന് താഴെ കേസുകളാണെങ്കില്‍ നിയന്ത്രണ വിധേയമാണെന്നാണ് ഡബ്ല്യുഎച്ച്ഒ പറയുന്നത്.

30 ദിവസത്തേയ്ക്ക് ആവശ്യമായ കിറ്റുകള്‍ കെഎംഎസ്സിഎല്‍ മുഖേന ലഭ്യമാക്കിയിട്ടുണ്ട്. കുറവ് വരുന്ന മുറയ്ക്ക് അവ ശേഖരിക്കാനുമുള്ള നിര്‍ദേശവും നല്‍കിയിട്ടുണ്ട്. അതിനാല്‍ പരിശോധന കുറയുന്നു എന്ന ആശങ്കയ്ക്ക് ഒരടിസ്ഥാനവുമില്ല.

സിഎഫ്എല്‍ടിസി
രോഗികള്‍ കൂടുന്ന അവസ്ഥയിലാണ് എല്ലാ ജില്ലകളിലും കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകള്‍ സ്ഥാപിക്കുന്നത്. കോവിഡ് വ്യാപനത്തെ നേരിടുന്നതിന് പ്രത്യേകമായി തയ്യാറാക്കുന്ന ജനകീയ ആരോഗ്യ പരിപാലന കേന്ദ്രങ്ങളാണ് കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകള്‍.

ടെസ്റ്റ് റിസള്‍ട്ട് പോസിറ്റീവ് ആയ കേസുകളില്‍ കോവിഡ് രോഗലക്ഷണങ്ങള്‍ പ്രകടമായി ഇല്ലാത്തവരേയും നേരിയ രോഗ ലക്ഷണങ്ങള്‍ ഉള്ളവരെയുമാണ് ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളില്‍ കിടത്തി ചികിത്സിക്കുന്നത്. ഇതിലൂടെ ആശുപത്രികളിലെ തിരക്ക് കുറയ്ക്കാനും മികച്ച ചികിത്സ ലഭ്യമാക്കാനും സാധിക്കുന്നു.

മൂന്ന് സ്റ്റേജുകളായാണ് സിഎഫ്എല്‍ടിസികള്‍ തയ്യാറാക്കുന്നത്. ഒന്നാം ഘട്ടത്തില്‍ 86 സിഎഫ്എല്‍ടിസികളും 11,284 കിടക്കകളും രണ്ടാം ഘട്ടത്തില്‍ 253 സിഎഫ്എല്‍ടിസികളും 30,598 കിടക്കകളും മൂന്നാംഘട്ടത്തില്‍ 480 സിഎഫ്എല്‍ടിസികളിലായി 36,400 കിടക്കകളും സജ്ജമാണ്. ദിവസം തോറും പുതിയ കേന്ദ്രങ്ങള്‍ കണ്ടെത്തുന്നുണ്ട്.

പൂള്‍ ഒന്ന്, പൂള്‍ രണ്ട്, പൂള്‍ മൂന്ന് എന്നിവ അടിസ്ഥാനമാക്കിയാണ് ജീവനക്കാരെ സജ്ജമാക്കിയത്. പൂള്‍ ഒന്നില്‍ 30,000ത്തോളം ജീവനക്കാരെ തെരഞ്ഞെടുത്ത് അതാത് ജില്ലകള്‍ക്ക് നല്‍കിയിട്ടുണ്ട്. ജില്ല കളക്ടറും ജില്ല മെഡിക്കല്‍ ഓഫീസറും ചേര്‍ന്ന് അവരെ ആവശ്യമായ സിഎഫ്എല്‍ടിസികളില്‍ നിയമിക്കും. പൂള്‍ രണ്ടിലും മൂന്നിലും കൂടി ആവശ്യമാണെങ്കില്‍ 50,000ത്തോളം ജീവനക്കാരെ കണ്ടെത്തിയിട്ടുണ്ട്. അതനുസരിച്ചുള്ള ആസൂത്രണം ആരോഗ്യ വകുപ്പില്‍ നടക്കുന്നുണ്ട്.

സ്വകാര്യ ആശുപത്രികളുടെ പങ്കാളിത്തം
കേസുകള്‍ വര്‍ധിച്ച് സന്നിഗ്ധ ഘട്ടം വന്നാല്‍ ഒപ്പം നിര്‍ത്താനായി സ്വകാര്യ ആശുപത്രികളുമായും ആശുപത്രി സംഘടനകളുമായും ചര്‍ച്ച നടത്തി. ഇതുകൂടാതെ ചികിത്സാ ചെലവ് സംബന്ധിച്ചും ധാരണയായിട്ടുണ്ട്. 1129 സ്വകാര്യ ആശുപത്രികളുമായി ബന്ധപ്പെട്ടിരുന്നു. ആദ്യ ഘട്ടത്തില്‍ 200ഓളം ആശുപത്രികള്‍ സഹകരിക്കാന്‍ മുന്നോട്ടുവന്നിട്ടുണ്ട്. ആവശ്യമെങ്കില്‍ സിഎഫ്എല്‍ടിസികളിലും ഇവരുടെ സേവനം ഉപയോഗിക്കും. ജില്ലാതലത്തില്‍ കലക്ടറുടെ നേതൃത്വത്തില്‍ സ്വകാര്യ ആശുപത്രി പ്രതിനിധികള്‍ ഉള്‍പ്പെട്ട ഇംപ്ലിമെന്‍റേഷന്‍ കമ്മിറ്റി ഇതുസംബന്ധിച്ച് ചര്‍ച്ച നടത്തി തീരുമാനം എടുത്തിട്ടുണ്ട്.

ശക്തമായ പ്രതിരോധം
ദീര്‍ഘവീക്ഷത്തോടെയുമുള്ള ഇടപെടലുകളും ഉദ്യോഗസ്ഥരുടേയും ജീവനക്കാരുടേയും അര്‍പ്പണ മനോഭാവവും ജനങ്ങളുടെ ഉത്തരവാദിത്തത്തോടുകൂടിയുള്ള പെരുമാറ്റവും കൂടിയാണ് ഈ പ്രതിസന്ധി മറികടക്കാന്‍ നമ്മെ പ്രാപ്തമാക്കുന്നത്. തിരുവനന്തപുരത്ത് രണ്ട് പ്രദേശങ്ങളില്‍ സമൂഹ വ്യാപനമുണ്ടായെങ്കിലും പിടച്ചുനിര്‍ത്താന്‍ കഴിഞ്ഞു.

ക്ലസ്റ്റര്‍ കെയറിലൂടെ ശക്തമായ പ്രവര്‍ത്തനങ്ങളാണ് നടത്തുന്നത്. ഫീല്‍ഡ് നിരീക്ഷണം, ചെക്ക് പോസ്റ്റ് നിരീക്ഷണം, റോഡ്, റെയില്‍ നിരീക്ഷണം, വിമാനത്താവള നിരീക്ഷണം എന്നിവ ശക്തിപ്പെടുത്തി. സെന്‍റിനല്‍ സര്‍വയലന്‍സ് ഊര്‍ജിതപ്പെടുത്തുകയും ആന്‍റിജന്‍ പരിശോധന വ്യാപകമാക്കുകയും ചെയ്തു. കേസ് വ്യാപനത്തിന്‍റെ ഭൂമിശാസ്ത്രപരമായ മാപ്പിങ്ങും അതനുസരിച്ച് പകര്‍ച്ചവ്യാധി നിയന്ത്രിക്കുന്നതിന് ആവശ്യമായ ഇടപെടലും നടത്തുന്നുണ്ട്.

പ്രൈമറി കോണ്‍ടാക്ട്, സെക്കന്‍ററി കോണ്‍ടാക്ട് എന്നിവ തരംതിരിച്ച് കോണ്‍ടാക്റ്റ് ട്രെയ്സിങ് വിപുലമാക്കി. കണ്ടെയ്ന്‍മെന്‍റ് സോണ്‍ പ്രവര്‍ത്തനങ്ങള്‍ നിരന്തരം വിലയിരുത്തുകയും ആവശ്യമായ നടപടികള്‍ സ്വീകരിക്കുകയും ചെയ്യുന്നു. കണ്ടൈന്‍മെന്‍റ് സോണ്‍ പ്രദേശത്തെ എല്ലാ ആളുകളെയും ക്വാറന്‍റൈന്‍ ചെയ്യുന്നു.

സൂപ്പര്‍ സ്പ്രെഡ് ഒഴിവാക്കാന്‍ ആക്ഷന്‍പ്ലാന്‍
സമ്പര്‍ക്ക രോഗികളുടെ എണ്ണം കൂടിയ പശ്ചാത്തലത്തില്‍ സൂപ്പര്‍ സ്പ്രെഡ് ഒഴിവാക്കാന്‍ ആക്ഷന്‍ പ്ലാന്‍ നടപ്പാക്കുകയാണ്. സൂപ്പര്‍ സ്പ്രെഡിലേക്ക് പോയ പ്രദേശങ്ങളില്‍ പ്രത്യേകം ക്ലസ്റ്ററായി തിരിച്ച് കര്‍ശന നടപടികള്‍ സ്വീകരിക്കുന്നു. രോഗവ്യാപനം കൂടിയ പ്രദേശങ്ങളില്‍ പരിശോധനകള്‍ വ്യാപിപ്പിച്ചു. എത്രയും വേഗം രോഗബാധിതരെ കണ്ടെത്തുകയും സമ്പര്‍ക്കത്തിലുള്ളവരെ ക്വാറന്‍റൈനിലാക്കുകയാണ്. അതിര്‍ത്തികടന്ന് വരുന്നവര്‍ക്കായി ആശുപത്രികളില്‍ പ്രത്യേകം ഒപി തുടങ്ങുകയും കിടത്തി ചികിത്സയ്ക്കുള്ള സൗകര്യമൊരുക്കുകയും ചെയ്തിട്ടുണ്ട്. ഇക്കാര്യത്തില്‍ കൂടുതല്‍ കര്‍ക്കശമായ നടപടികളിലേക്ക് നീങ്ങും.

ഒരു കാര്യം കൂടി ഇവിടെ സ്ഥാപിക്കേണ്ടതുണ്ട്. ഇന്ന് മലയാളത്തിലെ ഒരു പ്രമുഖ പത്രത്തില്‍ വന്ന വാര്‍ത്തയുടെ തലക്കെട്ടാണ് ‘കുട്ടികളെ ആരു നോക്കും?’ എന്നാണ്. പരിശോധനയ്ക്ക് പോകാന്‍ വീട്ടമ്മമാര്‍ ഉള്‍പ്പെടെയുള്ളവര്‍ മടിക്കുന്നതിന്‍റെ കാരണമായി ആ മാധ്യമം പറയുന്നത് അവര്‍ക്ക് രോഗമുണ്ടെന്ന് സ്ഥിരീകരിച്ചാല്‍ വീട്ടില്‍ കുട്ടികളും വയോജനങ്ങളും തനിച്ചാകുമെന്നാണ്. രോഗബാധ ഉണ്ടാകാതിരിക്കാനായി നമ്മള്‍ റിവേഴ്സ് ക്വാറന്‍റൈനില്‍  പാര്‍പ്പിക്കാന്‍ തീരുമാനിച്ച വിഭാഗമാണ് കുട്ടികളും വയോജനങ്ങളും. വയോജനങ്ങളില്‍ രോഗം മാരകമായിത്തീരും എന്നു നമുക്കൊക്കെ അറിയാം. അതുകൊണ്ടുതന്നെ വീടുകളിലുള്ള പ്രായമായവരെ കരുതി അതീവ ജാഗ്രത എല്ലാവരും പുലര്‍ത്തിയേ തീരൂ. എന്നാല്‍ ഈ വാര്‍ത്ത വായിച്ചാല്‍ തോന്നുക, ആളുകള്‍ക്ക് ടെസ്റ്റ് നടത്തി, അവരെ നിര്‍ബന്ധിച്ച് ട്രീറ്റ്മെന്‍റ് സെന്‍ററുകളിലോട്ട് മാറ്റി, വീട്ടിലെ കുട്ടികളേയും മുതിര്‍ന്നവരേയും സര്‍ക്കാര്‍ മനപ്പൂര്‍വ്വം ബുദ്ധിമുട്ടിക്കുന്നു എന്നാണ്.  

ഈ വാര്‍ത്ത വായിക്കുന്ന സാധാരണക്കാരായ ആളുകള്‍ക്ക് ടെസ്റ്റിനോട് സഹകരിക്കാന്‍ വിമുഖതയല്ലേ ഉണ്ടാവുക? അങ്ങനെ ആളുകള്‍ ടെസ്റ്റ് നടത്തുന്നതിനോട് നിസ്സഹകരിക്കുകയും രോഗവ്യാപനം കൂടുകയും ചെയ്യുന്ന സാഹചര്യമാണോ നമുക്ക് വേണ്ടത്. തെറ്റായ രീതി ആരെങ്കിലും സ്വീകരിച്ചാല്‍ തെറ്റാണ് എന്ന് പറഞ്ഞ് ബോധവല്‍ക്കരിക്കുകയല്ലേ ശരിയായ മാധ്യമധര്‍മം.

കേരളത്തില്‍ ഇതിനോടകം എത്രായിരം ആളുകള്‍ ക്വാറന്‍റൈനില്‍ പോയി. എത്ര പേരുടെ ചികിത്സ നടന്നു. വീട്ടില്‍ കുഞ്ഞുങ്ങളെ നോക്കാന്‍ ആരുമില്ലാതെ ഒറ്റയ്ക്കാക്കി രക്ഷിതാക്കള്‍ക്ക് പോകേണ്ടി വന്ന എത്ര സംഭവമുണ്ടായി എന്നു നിങ്ങള്‍ തന്നെ പറയൂ.

നമുക്ക് കുടുംബങ്ങളും സാമൂഹ്യജീവിതവും ഉള്ളത് അത്തരം സാഹചര്യത്തില്‍ താങ്ങാകാനാണ്. ഇനി ഏതെങ്കിലും കേസില്‍ അങ്ങനെ ഒരു സഹായം ആര്‍ക്കെങ്കിലും ലഭിച്ചില്ലെങ്കില്‍, അതു സര്‍ക്കാര്‍ സംവിധാനങ്ങളെ അറിയിച്ചാല്‍ ഉചിതമായ നടപടികള്‍ സ്വീകരിച്ച് വേണ്ട പിന്തുണ ഉറപ്പു വരുത്തുന്നതായിരിക്കും. അല്ലാതെ, വീട്ടിലെ രണ്ടു പേര്‍ ട്രീറ്റ്മെന്‍റ് സെന്‍ററില്‍ പോയാല്‍, ബാക്കിയുള്ളവര്‍ പട്ടിണി കിടക്കുന്ന സാഹചര്യം ഉണ്ടാക്കാന്‍ ഈ സര്‍ക്കാര്‍ തയ്യാറായിട്ടില്ലല്ലോ. എല്ലാ പിന്തുണയും നല്‍കുകയല്ലേ ചെയ്തിട്ടുള്ളത്.  

അതുകൊണ്ട്, ഈ രീതിയില്‍ ഭീതി വളരുന്നതിനും പ്രതിരോധ പ്രവര്‍ത്തനങ്ങളോട് വിമുഖത കാണിക്കുന്നതിനും ഇടയാകുന്ന വാര്‍ത്തകള്‍ നല്‍കാന്‍ തയ്യാറാകരുത്. സര്‍ക്കാരിനെ വിമര്‍ശിക്കുന്നതില്‍ യാതൊരു തകരാറുമില്ല. പക്ഷേ, അതു വസ്തുനിഷ്ഠവും നിര്‍മാണാത്മകവും ആയിരിക്കണം. കോവിഡ് പ്രതിരോധത്തെ ദുര്‍ബലപ്പെടുത്തുന്ന രീതിയില്‍ ആകരുതെന്ന അഭ്യര്‍ത്ഥന നിങ്ങള്‍ മാനിക്കുമെന്ന് പ്രതീക്ഷിക്കുന്നു.
കര്‍ഷകര്‍ക്ക് സഹായപദ്ധതി

കോവിഡ് പ്രതിസന്ധിയുടെ പശ്ചാത്തലത്തില്‍ കര്‍ഷകര്‍ക്ക് കൈത്താങ്ങായി ജീവനോപാധി സഹായ പദ്ധതികള്‍ ആവിഷ്കരിച്ചിട്ടുണ്ട്. ഭക്ഷ്യസുഭിക്ഷാ പദ്ധതിയില്‍ ഉള്‍പ്പെടുത്തിയാണ് നടപ്പിലാക്കുന്നത്. 77 കോടി രൂപയാണ് പദ്ധതി ചിലവ്. ആലപ്പുഴ, പത്തനംതിട്ട, ഇടുക്കി, വയനാട്, എറണാകുളം, തൃശൂര്‍, കോട്ടയം എന്നീ ജില്ലകളിലെ 5000 കര്‍ഷകര്‍ക്ക് രണ്ടു പശുക്കളെ വാങ്ങുന്നതിനായി 60,000 രൂപ വീതം സബ്സിഡി നല്‍കും.

സംസ്ഥാനത്തെ 3500 കര്‍ഷകര്‍ക്ക് കിടാരി വളര്‍ത്തലിനായി 15000 രൂപ വീതം സബ്സിഡിയും, കാറ്റില്‍ ഷെഡ് നിര്‍മാണത്തിനായി 5000 കര്‍ഷകര്‍ക്ക് 25000 രൂപ വീതം സബ്സിഡിയും വിതരണം ചെയ്യും. 6000 കര്‍ഷകര്‍ക്ക് 6650 രൂപ വീതം കാലിത്തീറ്റ സബ്സിഡിയും ആടു വളര്‍ത്തലിനായി 1800 പേര്‍ക്ക് 25000 രൂപ വീതവും സബ്സിഡി നല്‍കും.

സമ്പര്‍ക്കരോഗികളുടെ എണ്ണം വര്‍ധിക്കുന്ന സാഹചര്യത്തില്‍ ആരോഗ്യപ്രവര്‍ത്തകരോടൊപ്പം കോണ്‍ടാക്റ്റ് ട്രെയിസിങ്ങിനായി പൊലീസ് ഉദ്യോഗസ്ഥരെക്കൂടി നിയോഗിക്കാന്‍ തീരുമാനിച്ചിട്ടുണ്ട്.

മാസ്ക് ധരിക്കാത്ത 5500 സംഭവങ്ങള്‍ സംസ്ഥാനത്ത് ഇന്ന് റിപ്പോര്‍ട്ട് ചെയ്തിട്ടുണ്ട്. ക്വാറന്‍റൈന്‍ ലംഘിച്ച എട്ടു പേര്‍ക്കെതിരെ ഇന്ന് കേസ് രജിസ്റ്റര്‍ ചെയ്തു.

ബലിപെരുന്നാളിനോടനുബന്ധിച്ച് ബലികര്‍മം അനുഷ്ഠിക്കുന്നവര്‍ കോവിഡ് ഹെല്‍ത്ത് പ്രോട്ടോകോള്‍ പാലിക്കണമെന്ന് ഒരുവട്ടം കൂടി ഓര്‍മിപ്പിക്കുന്നു.

സഹായം
മലങ്കര ഓര്‍ത്തഡോക്സ് സുറിയാനി സഭ തങ്ങളുടെ ഉടമസ്ഥതയിലുള്ള സെമിനാരികള്‍, എഞ്ചിനിയറിങ്ങ് കോളേജുകള്‍, ധ്യാനകേന്ദ്രങ്ങള്‍, ഹോസ്റ്റലുകള്‍, ആശുപത്രികള്‍, ഹാളുകള്‍ എന്നിവ ഉള്‍പ്പെടെ 12 സ്ഥാപനങ്ങള്‍ കൊവിഡ് പ്രതിരോധ പ്രവര്‍ത്തനങ്ങള്‍ക്കായി വിട്ടുനല്‍കിയിട്ടുണ്ട്.

രാജീവ് ഗാന്ധി ഗുഡ്വില്‍ ചാരിറ്റബിള്‍ ട്രസ്റ്റ് ഓണ്‍ലൈന്‍ പഠന സൗകര്യത്തില്‍ ബുദ്ധിമുട്ടനുഭവിക്കുന്ന 76 വിദ്യാര്‍ത്ഥികള്‍ക്ക് ടി.വി. വിതരണം ചെയ്തതായി അറിയിച്ചു.

ടി.ബി.എസ് ചാരിറ്റബിള്‍ ട്രസ്റ്റ് കോഴിക്കോട് ജില്ലയിലെ ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളിലേക്ക് 1,05,814 രൂപയുടെ സാധനങ്ങള്‍ കൈമാറി. കിടക്ക, തലയിണ, കിടക്ക വിരി മുതലായ സാധനങ്ങളാണ് കൈമാറിയത്.

ദുരിതാശ്വാസം
സി.പി.ഐ.എം തലശ്ശേരി ന്യൂബസ് സ്റ്റാന്‍റ് ബ്രാഞ്ച് 50,000 രൂപ

യുവശക്തി ആര്‍ട്സ് ആന്‍റ് സ്പോര്‍ട്സ് ക്ലബ്ബ് അമ്പലമെട്ട, മക്രേരി ബിരിയാണി ചലഞ്ചിലൂടെ സമാഹരിച്ച 43,242 രൂപ

സി.പി.ഐ.എം എ.കെ.ജി നഗര്‍ ബ്രാഞ്ച്, പാനൂര്‍ ഏരിയ ബിരിയാണി ചലഞ്ചിലൂടെ സമാഹരിച്ച 29,500 രൂപ

മുഖ്യമന്ത്രിയുടെ വാര്‍ത്താ സമ്മേളനത്തില്‍ നിന്ന്

രോഗബാധിതരുടെ എണ്ണം വീണ്ടും വര്‍ധിച്ചിരിക്കുന്നു. 1078 പേര്‍ക്കാണ് ഇന്ന് കോവിഡ് സ്ഥിരീകരിച്ചത്. അഞ്ച് മരണങ്ങളുണ്ടായി. ഇതുവരെ രോഗം സ്ഥിരീകരിച്ചവരുടെ എണ്ണം 16,110 ആണ്. ഇന്ന് 798 പേര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. അതില്‍ ഉറവിടമറിയാത്തത് 65. വിദേശത്തുനിന്ന് 104 പേര്‍. മറ്റു സംസ്ഥാനങ്ങളില്‍നിന്ന് 115 പേര്‍.

കോഴിക്കോട് കല്ലായി സ്വദേശി കോയോട്ടി (57), മൂവാറ്റുപുഴ വടക്കത്താനത്തെ ലക്ഷ്മി കുഞ്ഞന്‍പിള്ള (79), പാറശാല നഞ്ചംകുഴിയിലെ രവീന്ദ്രന്‍ (73), കൊല്ലം കെ.എസ് പുരത്തെ റഹിയാനത്ത് (58), കണ്ണൂര്‍ വിളക്കോട്ടൂരിലെ സദാനന്ദന്‍ (60) എന്നിവരാണ് മരണമടഞ്ഞത്. ഇതില്‍ റഹിയാനത്ത് ഒഴികെ മറ്റുള്ളവര്‍ കോവിഡ് ഇതര രോഗങ്ങള്‍ക്ക് ചികിത്സയിലായിരുന്നു.

ഇന്ന് 432 പേര്‍ രോഗമുക്തി നേടി.

പോസിറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 222, കൊല്ലം 106, എറണാകുളം 100, മലപ്പുറം 89, തൃശൂര്‍ 83, ആലപ്പുഴ 82, കോട്ടയം 80, കോഴിക്കോട് 67, ഇടുക്കി 63, കണ്ണൂര്‍ 51, പാലക്കാട് 51, കാസര്‍കോട് 47, പത്തനംതിട്ട 27, വയനാട് 10.

നെഗറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 60, കൊല്ലം 31, ആലപ്പുഴ 39, കോട്ടയം 25, ഇടുക്കി 22, എറണാകുളം 95, തൃശൂര്‍ 21, പാലക്കാട് 45, മലപ്പുറം 30, കോഴിക്കോട് 16, വയനാട് 5, കണ്ണൂര്‍ 7, കാസര്‍കോട് 36.
കഴിഞ്ഞ 24 മണിക്കൂറിനകം 22,433 സാമ്പിളുകള്‍ പരിശോധിച്ചു. 1,58,117 പേരാണ് നിരീക്ഷണത്തിലുള്ളത്. 9354 പേര്‍ ആശുപത്രികളില്‍. ഇന്നു മാത്രം 1070 പേരെ ആശുപത്രിയില്‍ പ്രവേശിപ്പിച്ചു. ഇപ്പോള്‍ ചികിത്സയിലുള്ളവര്‍ 9458.

ഇതുവരെ ആകെ 3,28,940 സാമ്പിളുകളാണ് പരിശോധനയ്ക്കായി അയച്ചത്. ഇതില്‍ 9159 സാമ്പിളുകളുടെ ഫലം വരാനുണ്ട്. ഇതുകൂടാതെ സെന്‍റിനല്‍ സര്‍വൈലന്‍സിന്‍റെ ഭാഗമായി മുന്‍ഗണനാ ഗ്രൂപ്പുകളില്‍ നിന്ന് 1,07,066 സാമ്പിളുകള്‍ ശേഖരിച്ചതില്‍ 1,02,687 സാമ്പിളുകള്‍ നെഗറ്റീവ് ആയി. സംസ്ഥാനത്തെ ഹോട്ട്സ്പോട്ടുകളുടെ എണ്ണം 428 ആയി.

തിരുവനന്തപുരം ജില്ലയില്‍ കോവിഡ് രോഗികളുടെ എണ്ണം ദിനംപ്രതി വര്‍ധിക്കുകയാണ്. ഇന്ന് സ്ഥിരീകരിച്ച 222 പേരില്‍ 190 പേര്‍ക്കും സമ്പര്‍ക്കത്തിലൂടെയാണ് രോഗബാധയുണ്ടായത്. ഉറവിടമറിയാത്ത 16 പേരുമുണ്ട്. ജില്ലയില്‍ കൂടുതല്‍ ആരോഗ്യ പ്രവര്‍ത്തകരെയും ആയുഷ് വകുപ്പില്‍ നിന്നുള്‍പ്പടെയുള്ള ജീവനക്കാരെയും നിയോഗിക്കും.

നഗരസഭാ കൗണ്‍സിലര്‍മാര്‍ ഉള്‍പ്പടെയുള്ള ജനപ്രതിനിധികള്‍ക്ക് കോവിഡ് സ്ഥിരീകരിച്ചിട്ടുണ്ട്. എംഎല്‍എ ഉള്‍പ്പടെ ചില ജനപ്രതിനിധികള്‍ നിരീക്ഷണത്തില്‍ പോകേണ്ടിവന്നിട്ടുമുണ്ട്. പൊതുവില്‍ വേണ്ട കരുതലിനെ സൂചിപ്പിക്കുന്ന അനുഭവമാണിത്. കഴിഞ്ഞ ദിവസങ്ങളില്‍ ചാല മാര്‍ക്കറ്റിലെ തൊഴിലാളികള്‍ക്ക് കോവിഡ് സ്ഥിരീകരിച്ചതും ഗൗരവമായി കണ്ട് മാര്‍ക്കറ്റുകളും മറ്റു വ്യാപാര സ്ഥാപനങ്ങളും കേന്ദ്രീകരിച്ച് കൂടുതല്‍ പരിശോധനകള്‍ നടത്തുകയാണ്.

കൊല്ലം ജില്ലയിലെ 106 പേര്‍ക്ക് സ്ഥിരീകരിച്ചതില്‍ പുറത്തുനിന്നു വന്നത് രണ്ടുപേര്‍ മാത്രമാണ്. 94 പേര്‍ക്ക് സമ്പര്‍ക്കംമൂലം. ഉറവിടമറിയാത്തത് 9. രോഗവ്യാപന സാധ്യതയുള്ള കിഴക്കന്‍ മേഖല, തൊഴിലാളികള്‍ കൂട്ടമായി താമസിക്കുന്ന ഇടങ്ങള്‍ എന്നിവിടങ്ങളിലും ക്ലസ്റ്ററുകള്‍ രൂപീകരിച്ച് പ്രതിരോധം ശക്തമാക്കും.

ചങ്ങനാശേരി മാര്‍ക്കറ്റില്‍ വ്യാപാരികളായ പത്തനംതിട്ട ജില്ലയിലെ തിരുവല്ല നിവാസികളായ നാലുപേര്‍ക്ക് കഴിഞ്ഞ ദിവസം നടത്തിയ റാപ്പിഡ് ആന്‍റിജന്‍ ടെസ്റ്റില്‍ പോസിറ്റീവ് റിസള്‍ട്ട് ലഭിച്ചിരുന്നു. ഇതേത്തുടര്‍ന്ന് തിരുവല്ല നഗരസഭാപരിധി കണ്ടെയ്ന്‍മെന്‍റ് സോണായി പ്രഖ്യാപിച്ചു.

ആലപ്പുഴയില്‍ 82 പേര്‍ക്ക് രോഗം സ്ഥിരീകരിച്ചതില്‍ 40 സമ്പര്‍ക്കംമൂലമാണ്. വണ്ടാനം ഗവണ്‍മെന്‍റ് ടിഡി മെഡിക്കല്‍ കോളേജില്‍ ചികിത്സയിലായിരുന്ന രോഗിക്ക് കോവിഡ് സ്ഥിരീകരിച്ചതിനെത്തുടര്‍ന്ന് മെഡിക്കല്‍ കോളേജിലെ ഒമ്പത് ഡോക്ടര്‍മാറും 15 മറ്റു ജീവനക്കാരും ക്വാറന്‍റീനില്‍ പോകേണ്ടി വന്നു. ചേര്‍ത്തല താലൂക്കിലെ തീരപ്രദേശത്ത് വ്യാപകമായി ആന്‍റിജന്‍ ടെസ്റ്റ് നടത്തിവരുന്നു. ഇതില്‍ നെഗറ്റിവ് ആയ 65 വയസ്സിനു മുകളിലുള്ളവരെ പ്രത്യേകമായി മാറ്റിപ്പാര്‍പ്പിക്കാന്‍ തീരുമാനിച്ചു. ഇവര്‍ക്ക് റിവേഴ്സ് ക്വാറന്‍റീന്‍ സൗകര്യം ഒരുക്കാനായി ചേര്‍ത്തല എസ്എന്‍ കോളേജും സെന്‍റ് മൈക്കിള്‍സ് കോളേജും സജ്ജീകരിക്കുന്നുണ്ട്.

ആലപ്പുഴ ജില്ലയില്‍ മൈക്രോ ഫിനാന്‍സ്, ധനകാര്യ സ്ഥാപനങ്ങള്‍, ചിട്ടികമ്പനികള്‍ തുടങ്ങിയവയുടെ പണപ്പിരിവ് വിലക്കി. കടല്‍തീരപ്രദേശത്തെ മത്സ്യബന്ധനത്തിനും വിപണനത്തിനുമുള്ള നിരോധനം ജൂലൈ 29 രാത്രി 12 മണി വരെ നീട്ടി.

കോട്ടയം ജില്ലയില്‍ പാറത്തോട് ഗ്രാമപഞ്ചായത്തിലും കാഞ്ഞിരപ്പള്ളി, തിരുവാര്‍പ്പ്, കുമരകം മാര്‍ക്കറ്റുകളിലും ആന്‍റിജന്‍ പരിശോധന നടന്നുവരുന്നു. ഇതുവരെ അഞ്ചു സിഎഫ്എല്‍ടിസികളിലായി 267 പേരെ പ്രവേശിപ്പിച്ചു.

എറണാകുളം ജില്ലയില്‍ 100 പേരുടെ റിസള്‍ട്ട് ഇന്ന് പോസിറ്റീവായതില്‍ 94 പേര്‍ക്കും രോഗബാധയുണ്ടായത് സമ്പര്‍ക്കംമൂലമാണ്. രോഗവ്യാപനം രൂക്ഷമായ ആലുവ കീഴ്മാട് ക്ലസ്റ്ററില്‍ സമ്പൂര്‍ണ ലോക്ക്ഡൗണ്‍ ഏര്‍പ്പെടുത്തി. മൂന്ന് കോണ്‍വെന്‍റുകളില്‍ രോഗം സ്ഥിരീകരിച്ച സാഹചര്യത്തില്‍ ആശ്രമങ്ങള്‍, മഠങ്ങള്‍, പ്രായമായ ആളുകള്‍ താമസിക്കുന്ന ഇടങ്ങള്‍ തുടങ്ങിയ സ്ഥലങ്ങളില്‍ കര്‍ശന നിയന്ത്രണങ്ങള്‍ നിര്‍ദേശിച്ചിട്ടുണ്ട്. സന്ദര്‍ശകര്‍ക്ക് കര്‍ശന നിയന്ത്രണം വേണം. കീഴ്മാട്, അയ്യമ്പിള്ളി, തൃക്കാക്കര കോണ്‍വെന്‍റുകളില്‍ രോഗ വ്യാപനം കണ്ടെത്തുന്നതിനായി പരിശോധന നടത്തി. ഇത്തരം കേന്ദ്രങ്ങള്‍ ക്ലോസ്ഡ് ക്ലസ്റ്ററാക്കിയാണ് പ്രതിരോധ നടപടികള്‍ ആവിഷ്കരിക്കുന്നത്.

തീരമേഖലയായ ചെല്ലാനം ക്ലസ്റ്ററിനോട് ചേര്‍ന്ന് കിടക്കുന്ന മട്ടാഞ്ചേരി, ഫോര്‍ട്ടുകൊച്ചി പ്രദേശത്തെ കോര്‍പ്പറേഷന്‍ ഡിവിഷനുകളില്‍ രോഗവ്യാപനത്തിന്‍റെ സൂചനകളുണ്ട്. ഈ ഡിവിഷനുകള്‍ കണ്ടെയ്ന്‍മെന്‍റ് സോണുകളായി പ്രഖ്യാപിച്ചിട്ടുണ്ട്.

തൃശൂരില്‍ കഴിഞ്ഞ ദിവസങ്ങളില്‍ നടത്തിയ 1118 ആന്‍റിജന്‍ പരിശോധനകളില്‍ 20 പോസിറ്റീവ് കേസുകള്‍ റിപ്പോര്‍ട്ട് ചെയ്തിട്ടുണ്ട്. 5 തദ്ദേശസ്ഥാപന പ്രദേശങ്ങള്‍ കൂടി കണ്ടെയ്ന്‍മെന്‍റ് സോണ്‍ ആയി. 33 തദ്ദേശസ്ഥാപനങ്ങളില്‍ കണ്ടെയ്ന്‍മെന്‍റ് സോണുകള്‍ നിലവിലുണ്ട്. മറ്റു സംസ്ഥാനങ്ങളില്‍ നിന്നും ജില്ലകളില്‍ നിന്നും മത്സ്യ വിപണനത്തിനായി ആളുകള്‍ തൃശൂര്‍ ജില്ലയില്‍ പ്രവേശിക്കുന്നത് നിരോധിച്ചു.

പാലക്കാട് ജില്ലയില്‍ പട്ടാമ്പിയിലും പരിസര പ്രദേശങ്ങളിലുമുള്ള 23 പേര്‍ക്കും ഒറ്റപ്പാലത്തും പെരുമാട്ടിയിലും രണ്ടു പേര്‍ക്കു വീതവും ആന്‍റിജന്‍ ടെസ്റ്റിലൂടെ രോഗം സ്ഥിരീകരിച്ചു.

മലപ്പുറത്ത് കൊണ്ടോട്ടി, നിലമ്പൂര്‍ എന്നിവിടങ്ങളിലെ മത്സ്യ മാര്‍ക്കറ്റിലുടെ കൂടുതല്‍ പേര്‍ക്ക് ഇന്നലെയും രോഗവ്യാപനമുണ്ടായിട്ടുണ്ട്. കോവിഡ് സംബന്ധമായ വ്യാജ വാര്‍ത്തകള്‍ പ്രചരിപ്പിച്ച രണ്ടു പേര്‍ക്കെതിരെ ഇന്നലെ കേസെടുത്തിട്ടുണ്ട്.

കോഴിക്കോട് കോര്‍പ്പറേഷനിലെ 20 വാര്‍ഡുകള്‍ കണ്ടെയ്ന്‍മെന്‍റ് സോണുകളാണ്. വടകര മുന്‍സിപ്പാലിറ്റിയും പുറമേരി, ഏറാമല, എടച്ചേരി, നാദാപുരം, തൂണേരി, മണിയൂര്‍, വില്യാപ്പള്ളി, ചെക്യാട്, ആയഞ്ചേരി, വാണിമേല്‍, അഴിയൂര്‍, പെരുമണ്ണ പഞ്ചായത്തുകളും കണ്ടെയ്ന്‍മെന്‍റ് സോണുകളാക്കി രോഗപ്രതിരോധ പ്രവര്‍ത്തനങ്ങള്‍ ഊര്‍ജ്ജിതമായി നടന്നുവരികയാണ്.  

കോഴിക്കോട് സെന്‍ട്രല്‍ മാര്‍ക്കറ്റ് അടച്ചിട്ടു. സമ്പര്‍ക്ക വ്യാപനം തടയുന്നതിനായി ബേപ്പൂര്‍ ഹാര്‍ബര്‍ മൂന്നു ദിവസത്തേക്ക് അടച്ചു. പാളയം പച്ചക്കറി മാര്‍ക്കറ്റിലേക്കുള്ള പ്രവേശനത്തിന് നിയന്ത്രണം ഏര്‍പ്പെടുത്തി.  

കണ്ണൂര്‍ ജില്ലയില്‍ ആറ് ക്ലസ്റ്ററുകള്‍ നിലവിലുണ്ട്. നേരത്തേയുണ്ടായിരുന്ന സിഐഎസ്എഫ് ക്യാമ്പ്, ഡിഎസ്സി സെന്‍റര്‍, കൂത്തുപറമ്പ് ഫയര്‍ ആന്‍റ് റെസ്ക്യൂ സ്റ്റേഷന്‍ എന്നിവയ്ക്കു പുറമെ ഏഴ് ആരോഗ്യ പ്രവര്‍ത്തകര്‍ക്ക് രോഗബാധയുണ്ടായ കണ്ണൂര്‍ ഗവ. മെഡിക്കല്‍ കോളേജ്, കടവത്തൂര്‍ യുപി സ്കൂളിലെ അഞ്ച് അധ്യാപകര്‍ക്ക് രോഗബാധയുണ്ടായ തൃപ്പങ്ങോട്ടൂര്‍, ഒരു കുടുംബത്തിലെ അംഗങ്ങള്‍ക്ക് സമ്പര്‍ക്കത്തിലൂടെ രോഗബാധയുണ്ടായ കുന്നോത്തുപറമ്പ് എന്നിവയും ക്ലസ്റ്ററുകളായി പ്രഖ്യാപിച്ചിട്ടുണ്ട്.

കാസര്‍കോട് ജില്ലയുടെ വടക്കന്‍ മേഖലകളില്‍ സമ്പര്‍ക്ക കേസുകള്‍ വര്‍ധിച്ചുവരികയുമാണ്. കാസര്‍കോട് മാര്‍ക്കറ്റ് ,ചെര്‍ക്കള  ഫ്യൂണറല്‍, മംഗല്‍പാടി വാര്‍ഡ് മൂന്ന്, കുമ്പള മാര്‍ക്കറ്റ്, ഹൊസങ്കടി ലാബ് എന്നിവയാണ് ജില്ലയില്‍ രുപം കൊണ്ട ക്ലസ്റ്ററുകള്‍.

പൊതു ചടങ്ങുകള്‍, വിവാഹങ്ങള്‍, മരണാനന്തര ചടങ്ങുകള്‍ എന്നിവയില്‍ നിഷ്കര്‍ഷിച്ച ആളുകളുടെ എണ്ണം സംബന്ധിച്ച മാനദണ്ഡങ്ങള്‍ ലംഘിക്കപ്പെട്ടത് സമ്പര്‍ക്ക കേസുകളുടെ ക്ലസ്റ്ററുകള്‍ രൂപപ്പെടാന്‍ കാരണമായിട്ടുണ്ട്. മരണവീട്ടില്‍ ഒത്തുകൂടിയവര്‍ക്കിടയില്‍ കോവിഡ് വ്യാപനം ഉണ്ടായി.
അതിര്‍ത്തിയിലെ ഊടുവഴികളിലൂടെ ഇപ്പോഴും ആള്‍ക്കാര്‍ കര്‍ണ്ണാടകയിലേക്കും തിരിച്ചും യാത്ര നടത്തുന്നു എന്നത് ജില്ലയുടെ ആരോഗ്യ സുസ്ഥിതിക്കുയര്‍ത്തുന്ന ഭീഷണി വലുതാണ്. ഇത്തരത്തില്‍ യാത്ര ചെയ്തെത്തിയവരില്‍ രോഗബാധ റിപ്പോര്‍ട്ട് ചെയ്യപ്പെടുകയും അവരില്‍ നിന്ന് കുടുംബങ്ങളിലേക്കും നാട്ടുകാരിലേക്കും രോഗം പടരുകയും ചെയ്തിട്ടുണ്ട്.

ജില്ലയില്‍ 28 തദ്ദേശ സ്വയംഭരണ സ്ഥാപനങ്ങളിലായി 127 കണ്ടെയ്ന്‍റ്മെന്‍റ് സോണുകളാണുള്ളത്. രോഗം കാര്യമായി ബാധിക്കാത്ത പഞ്ചായത്തുകളില്‍ (ഉദുമ, കിനാനൂര്‍ കരിന്തളം) പോലും ഉറവിടം അറിയാത്ത കേസുകള്‍ റിപ്പോര്‍ട്ട് ചെയ്യുന്നത് രോഗവ്യാപന സാധ്യതയിലേക്ക് വിരല്‍ ചൂണ്ടുന്നു.

കഴിഞ്ഞ രണ്ടാഴ്ചയ്ക്കിടെ റിപ്പോര്‍ട്ട് ചെയ്യപ്പെട്ട 65 ശതമാനം കേസുകളും തിരുവനന്തപുരം, മലപ്പുറം, ആലപ്പുഴ, പാലക്കാട്, എറണാകുളം, കൊല്ലം ജില്ലകളിലാണ്. കോവിഡ് വ്യാപനത്തിന്‍റെ തുടക്കഘട്ടത്തില്‍ കാസര്‍കോട് ജില്ലയിലുണ്ടായ സ്ഥിതി മറ്റു പല ജില്ലകളിലേക്കും വ്യാപിക്കുന്നു എന്നാണ് ഇതിനര്‍ത്ഥം. നിലവില്‍ ആക്ടീവായ പകുതി കേസുകളും തിരുവനന്തപുരം, മലപ്പുറം, ആലപ്പുഴ, എറണാകുളം ജില്ലകളിലാണ്.

ലോക്ക്ഡൗണ്‍ പ്രഖ്യാപിച്ച് തുടക്കത്തില്‍ രോഗവ്യാപനം നിയന്ത്രിക്കാന്‍ നമുക്കു കഴിഞ്ഞു. എന്നാല്‍, പുറത്തുനിന്ന് ധാരാളം ആളുകള്‍ വന്നുതുടങ്ങിയതോടെ സ്ഥിതിയില്‍ മാറ്റം വന്നു. ബ്രേക്ക് ദ ചെയിന്‍ കാമ്പയിനിലൂടെ ശാരീരിക അകലം പാലിക്കലും മറ്റു സുരക്ഷാമാര്‍ഗങ്ങളും നല്ല രീതിയിലാണ് നടപ്പാക്കിയത്. അതിനും ഇപ്പോള്‍ കുറവു വന്നിരിക്കുന്നു.

ജനപ്രതിനിധികള്‍ക്ക് രോഗം ബാധിക്കുന്നത് ഗൗരവമായി തന്നെ കാണേണ്ടതുണ്ട്. അവര്‍ കര്‍മനിരതരായി രംഗത്തുണ്ടാകേണ്ട ഘട്ടമാണിത്. എന്നാല്‍, സുരക്ഷാ മുന്‍കരുതലില്‍ വീഴ്ചയുണ്ടാകാന്‍ പാടില്ല. ചില ഉത്തരവാദപ്പെട്ട ജനപ്രതിനിധികള്‍ പൊതു ചടങ്ങുകളിലും മറ്റും വേണ്ട അകലം പാലിക്കാതെ പങ്കെടുക്കുന്നുണ്ട്. ഒരാള്‍ ഒരു കുട്ടിയുടെ മുഖത്ത് തൊട്ടുനില്‍ക്കുന്ന ഒരു ചിത്രം കഴിഞ്ഞദിവസം കണ്ടു. റിവേഴ്സ് ക്വാറന്‍റൈനില്‍ കഴിയേണ്ട വയോജനങ്ങളുടെ തൊട്ടടുത്തിരുന്ന് കുശലം പറയുന്ന മറ്റൊരു ദൃശ്യവും കണ്ടു. ഇതൊക്കെ പിന്നീടാകാം എന്നു വെക്കണം. നേരിട്ടു വീടുകളില്‍ ചെന്ന് ചടങ്ങുകളില്‍ പങ്കെടുത്തും മറ്റും സൗഹൃദം പുതുക്കേണ്ട ഘട്ടമല്ല ഇത്. ഇതെല്ലാം ഏറ്റവും ഗൗരവമായി ചിന്തിക്കേണ്ടതും ഇടപെടേണ്ടതും പൊതുപ്രവര്‍ത്തകരാണ്. അവരാണ് മാതൃക കാണിക്കേണ്ടത്.
രോഗവ്യാപനത്തിന്‍റെ സവിശേഷമായ ഘട്ടത്തിലാണ് നാമിപ്പോളുള്ളത്. ആദ്യ ഘട്ടത്തില്‍ രോഗം മറ്റാരിലേക്കും പടരാതെ രോഗികളെ ചികിത്സിച്ചു സുഖപ്പെടുത്താന്‍ നമുക്കു സാധിച്ചു. അത് ജനുവരി അവസാനത്തിലും ഫെബ്രുവരി ആരംഭത്തിലുമായി ഏതാനും ദിവസങ്ങള്‍ മാത്രമേ നീണ്ടിരുന്നുള്ളു. രണ്ടാം ഘട്ടത്തില്‍ രോഗം പടിപടിയായി ഉയര്‍ന്നെങ്കിലും അത് ക്രമാനുഗതമായി കുറച്ചുകൊണ്ടുവരാനും പൂര്‍ണ്ണമായി ഇല്ലാതായി എന്നു പറയാവുന്ന വിധത്തില്‍ തന്നെ രോഗത്തെ അതിജീവിക്കാനും സാധിച്ചു. അത് മാര്‍ച്ച് മുതല്‍ മെയ് വരെയുള്ള രണ്ടുമാസക്കാലം നീണ്ടുനിന്നു.

അതിനുശേഷമുള്ള ഈ മൂന്നാം ഘട്ടത്തില്‍  രോഗവ്യാപനത്തിന്‍റെ തോതുതന്നെ ദിനംപ്രതി വര്‍ധിച്ചുവരികയാണ്. കഴിഞ്ഞ രണ്ടര മാസത്തോളമായുള്ള കണക്കുകള്‍ വിലയിരുത്തിയാല്‍ ഇതു വ്യക്തമാകും. എന്നാല്‍, ഈ ഘട്ടത്തെയും അതിജീവിക്കാന്‍ നമുക്കു കഴിയും.

ഈയൊരു ഘട്ടത്തില്‍ സര്‍ക്കാരെന്നോ പൊതുസമൂഹമെന്നോ, ഭരണപക്ഷമെന്നോ പ്രതിപക്ഷമെന്നോ ഉദ്യോഗസ്ഥരെന്നോ പൊതുജനങ്ങളെന്നോ ഉള്ള വ്യത്യാസമില്ലാതെ നാമെല്ലാവരും ഒന്നിച്ചു നിന്ന്, ഒറ്റക്കെട്ടായി രോഗപ്രതിരോധ നടപടികളുമായി മുന്നോട്ടു പോവുകയാണു വേണ്ടത്. ഇതില്‍ പരമപ്രധാനമായിട്ടുള്ളത് കൊവിഡ് പ്രോട്ടോക്കോള്‍ കൃത്യമായി പാലിക്കുക എന്നതാണ്. അതിലൊരു വിട്ടുവീഴ്ചയുമുണ്ടായിക്കൂടാ. മാസ്ക്ക് ധരിക്കുമെന്നും ശാരീരിക അകലം പാലിക്കുമെന്നും കൈ കഴുകല്‍ ശീലമാക്കുമെന്നും നാമോരോരുത്തരും ദൃഢപ്രതിജ്ഞയെടുക്കണം. കൊവിഡ് പ്രോട്ടോക്കോള്‍ പ്രാബല്യത്തില്‍ വരുത്തിയിരിക്കുന്നത് ജീവനും ജീവനോപാധികളും സംരക്ഷിക്കാനാണ്.

അടുത്ത ചിലയാഴ്ചകള്‍ അതീവ പ്രധാനമാണ്. ഇപ്പോള്‍ നാം കാണിക്കുന്ന ജാഗ്രതയുടെ തോതനുസരിച്ചിരിക്കും ഇനിയുള്ള സ്ഥിതിഗതികള്‍ ഉരുത്തിരിയുക. അതായത് നാം തന്നെയാണ് നമ്മുടെ ഭാവി ഏതു തരത്തിലായിരിക്കുമെന്ന് നിശ്ചയിക്കുക. അത്യാവശ്യത്തിനു മാത്രം പുറത്തിറങ്ങുക എന്നത് ഒരു നിഷ്ഠയാക്കണം. സന്നദ്ധ സേവനം ചെയ്യാന്‍ കഴിയുന്നവരെല്ലാം സമൂഹത്തിന്‍റെയാകെ ആരോഗ്യം ഉറപ്പുവരുത്താനായി മുന്നിട്ടിറങ്ങണം.

അതിജീവനത്തിന്‍റെ ജനകീയ മാതൃക തന്നെ നാം ലോകത്തിനു മുമ്പായവതരിപ്പിച്ചിട്ടുണ്ട്. കൊവിഡിനെതിരായ അതിജീവനം നാം രചിക്കേണ്ടതും ആ ജനകീയ മാതൃകയിലൂന്നിയാണ്. അതില്‍ പങ്കാളികളാകണമെന്നും ക്രിയാത്മകമായ ഇടപെടല്‍ നടത്തണമെന്നും നിങ്ങളോരോരുത്തരോടും അഭ്യര്‍ത്ഥിക്കുന്നു.

മറ്റൊരു പ്രധാന കാര്യം കോവിഡുമായി ബന്ധപ്പെട്ട് ചിലര്‍ നടത്തുന്ന നിരീക്ഷണങ്ങള്‍ ഉണ്ടാക്കുന്ന പ്രശ്നമാണ്. മാധ്യമങ്ങളിലാകട്ടെ സോഷ്യല്‍ മീഡിയയാകട്ടെ, നിരീക്ഷകരെന്ന ലേബലില്‍ വരുന്ന പലരും കോവിഡ് 19മായി ബന്ധപ്പെട്ട് നടത്തുന്ന അഭിപ്രായ പ്രകടനങ്ങള്‍ ജനങ്ങള്‍ക്കിടയില്‍ തെറ്റിദ്ധാരണകള്‍ സൃഷ്ടിക്കുന്നുണ്ട്.

കോവിഡ് 19 ശാസ്ത്രീയമായി പഠിക്കേണ്ട ഒരു വിഷയമാണ്. ശാസ്ത്രീയമായ മാര്‍ഗങ്ങളിലൂടെ നമ്മള്‍ മറി കടക്കേണ്ട ഒരു പ്രതിസന്ധി കൂടിയാണ്. ആ മേഖലയില്‍ വിദഗ്ധ വിദ്യാഭ്യാസവും അനുഭവ സമ്പത്തുമുള്ള വ്യക്തികളാണ് ഇപ്പോള്‍ ഈ പോരാട്ടത്തെ നയിക്കുന്നത്. എന്നാല്‍, ചാനല്‍ ചര്‍ച്ചകളിലും മറ്റും നിരീക്ഷകരായി വരുന്ന, ഈ മേഖലയില്‍ ഒരു വൈദഗ്ധ്യവും ഇല്ലാത്ത പലരും അശാസ്ത്രീയവും അബദ്ധജടിലവുമായ നിരീക്ഷണങ്ങള്‍ ആധികാരികമായി പ്രസ്താവിക്കുമ്പോള്‍ അതു ബാധിക്കുന്നത് പ്രതിരോധ പ്രവര്‍ത്തനങ്ങളെയാണ്.

ഒന്നുകില്‍ അവര്‍ അതിശയോക്തി കലര്‍ത്തി ഈ അവസ്ഥയെ പെരുപ്പിച്ചു കാണിക്കുന്നു. അല്ലെങ്കില്‍, പ്രശ്നത്തെ ന്യൂനീകരിക്കുന്നു. ഇതു രണ്ടായാലും അപകടമാണ്. അതുകൊണ്ട്, അത്തരം ആളുകള്‍ ധാര്‍മികത മുന്‍നിര്‍ത്തി അവരവര്‍ക്ക് ഗ്രാഹ്യമില്ലാത്ത കാര്യങ്ങളില്‍ അനാവശ്യമായി ഇടപെട്ട് ജനങ്ങളെ തെറ്റിദ്ധരിപ്പിക്കരുത്. അതുപോലെ അത്തരം വാദങ്ങള്‍ക്ക് ഇടം നല്‍കുന്ന മാധ്യമങ്ങളും ഇക്കാര്യത്തില്‍ ശ്രദ്ധ പുലര്‍ത്തണമെന്ന് അഭ്യര്‍ഥിക്കുന്നു.

ഈ വാദങ്ങളുടെ ശാസ്ത്രീയത പരിശോധിക്കാന്‍ പര്യാപ്തരായ ആളുകളെക്കൂടെ ഉള്‍ക്കൊള്ളിച്ചുകൊണ്ടാകണം ചര്‍ച്ചകള്‍ നടത്തേണ്ടത്. പ്രതിരോധ പ്രവര്‍ത്തനങ്ങളെ പിന്നോട്ടടിക്കുന്ന ഇടപെടലുകള്‍ സൃഷ്ടിക്കുന്ന ആഘാതം വലുതായിരിക്കും. അതു താങ്ങാനാവുന്ന ഒരു സാമൂഹ്യ സാഹചര്യമല്ല ഇതെന്ന് എല്ലാരുമോര്‍ക്കണം.

മുസ്ലിം മതനേതാക്കളുടെ യോഗം
ബലിപെരുന്നാള്‍ അടുത്ത സാഹചര്യത്തില്‍ മുസ്ലിം മതനേതാക്കളുമായി ഇന്ന് വീഡിയോ കോണ്‍ഫറന്‍സു വഴി ചര്‍ച്ച നടത്തിയിരുന്നു. കോവിഡ് മഹാമാരിയുടെ ഭീഷണി ഗുരുതരമായി വരുന്ന സാഹചര്യം കണക്കിലെടുത്താണ് അവരുമായി ചര്‍ച്ച നടത്തിയത്.

കോവിഡ് വ്യാപനത്തിന്‍റെ പശ്ചാത്തലത്തില്‍ സര്‍ക്കാര്‍ നടത്തുന്ന പ്രവര്‍ത്തനങ്ങള്‍ക്ക് അവരുടെ പിന്തുണ അഭ്യര്‍ത്ഥിച്ചു. എല്ലാവരും അനുകൂലമായാണ് പ്രതികരിച്ചത്. ബലിപെരുന്നാള്‍ ആഘോഷങ്ങള്‍ കോവിഡ് പ്രോട്ടോക്കോള്‍ പാലിച്ച് നടത്താമെന്ന നിര്‍ദേശം യോഗത്തില്‍ പങ്കെടുത്തവര്‍ മുന്നോട്ടുവെച്ചു. ബലിപെരുന്നാളിന്‍റെ ഭാഗമായ ചടങ്ങുകള്‍ പ്രോട്ടോക്കോള്‍ പാലിച്ചു മാത്രമേ നടത്തകയുള്ളുവെന്ന് അവര്‍ ഉറപ്പുനല്‍കിയിട്ടുണ്ട്. നമ്മുടെ ആരോഗ്യത്തിനും ആരോഗ്യസംവിധാനങ്ങള്‍ക്കും മുന്‍ഗണന നല്‍കി ആവശ്യമായ ക്രമീകരണങ്ങള്‍ ഒരുക്കാമെന്ന ഉറപ്പും യോഗത്തില്‍ പങ്കെടുത്തവര്‍ നല്‍കുകയുണ്ടായി.

പരമാവധി ആഘോഷങ്ങള്‍ ചുരുക്കി നിര്‍ബന്ധിതമായ ചടങ്ങുകള്‍ മാത്രം നിര്‍വഹിക്കുക എന്ന ധാരണയാണ് പൊതുവെ ഉണ്ടായിരിക്കുന്നത്. പെരുന്നാള്‍ നമസ്കാരത്തിന് പള്ളികളില്‍ മാത്രം സൗകര്യമേര്‍പ്പെടുത്താമെന്നാണ് ഉയര്‍ന്നുവന്ന അഭിപ്രായം. പൊതുസ്ഥലങ്ങളില്‍ ഈദ്ഗാഹ് ഉണ്ടായിരിക്കുന്നതല്ല. സാമൂഹിക അകലം പാലിക്കുന്നുവെന്ന് ഉറപ്പുവരുത്തും. പരമാവധി 100 പേര്‍. അതിലധികമാളുകള്‍ പാടില്ലെന്നും യോഗത്തില്‍ നിര്‍ദേശം ഉയര്‍ന്നു. ബലികര്‍മ്മവുമായി ബന്ധപ്പെട്ട് ഇടപെടുന്നവര്‍ക്കും ജോലി ചെയ്യുന്നവര്‍ക്കും കോവിഡ് ടെസ്റ്റ് നടത്താനും ധാരണയായിട്ടുണ്ട്.

ടൗണിലെ പള്ളികളില്‍ അപരിചിതരും മറ്റും എത്തുന്നത് ഒഴിവാക്കാനുള്ള ശ്രദ്ധയും ഉണ്ടാകും. നേരത്തെ തുറക്കാതിരുന്ന പള്ളികളില്‍ അതേ നില തുടരുമെന്നാണ് അറിയിച്ചിരിക്കുന്നത്. ശ്രേഷ്ഠപരമെന്നു കരുതുന്ന മതപരമായ ചടങ്ങുകള്‍ സമൂഹത്തിന്‍റെ നډയെ കരുതി ക്രമീകരിക്കാന്‍ ഉയര്‍ന്ന മനസ്സ് കാട്ടിയ എല്ലാവരോടും നന്ദി അറിയിക്കട്ടെ. കോവിഡിന്‍റെ പശ്ചാലത്തില്‍ റമദാന്‍ കാലത്തും ഉയര്‍ത്തിപിടിച്ച നډയുടെ സന്ദേശം ബലിപെരുന്നാള്‍ ഘട്ടത്തിലും പ്രാവര്‍ത്തികമാക്കാന്‍ തയ്യാറാകുന്നത് മാതൃകാപരമാണ്.

കാന്തപുരം എ.പി. അബൂബക്കര്‍ മുസലിയാര്‍, സെയ്ദ് ഖലീലുള്‍ ബുഹാരി, പ്രൊഫ. ആലിക്കുട്ടി മുസലിയാര്‍, കടയ്ക്കല്‍ അബ്ദുള്‍ അസീസ് മൗലവി, തൊടിയൂര്‍ മുഹമ്മദ് കുഞ്ഞ് മുസലിയാര്‍, ടി.പി. അബ്ദുള്ള കോയ മദനി, ഡോ. ഹുസൈന്‍ മടവൂര്‍, എം.ഐ. അബ്ദുള്‍ അസീസ്, ടി.കെ. അഷറഫ്, ഡോ. ഇ.കെ. അഹമ്മദ്കുട്ടി, ആരിഫ് ഹാജി, പ്രൊഫ. പി.ഒ.ജെ. ലബ്ബ, സി.പി. കുഞ്ഞുമുഹമ്മദ്, ഇ.പി. അഷ്റഫ് ബാഖവി, മരുത അബ്ദുള്‍ അസീസ് മൗലവി തുടങ്ങിയവര്‍ യോഗത്തില്‍ പങ്കെടുത്തു.

എല്ലാ ഗ്രാമീണ വീടുകളിലും ഗാര്‍ഹിക കുടിവെള്ള കണക്ഷന്‍
സംസ്ഥാനത്തെ ഗ്രാമീണ മേഖലയിലുള്ള എല്ലാ വീടുകളിലും പൈപ്പിലൂടെ ഗുണനിലവാരമുള്ള കുടിവെള്ളം എത്തിക്കുന്നതിനായുള്ള ജലജീവന്‍ മിഷന്‍ വഴി ഈ വര്‍ഷം 21 ലക്ഷം കണക്ഷന്‍ നല്‍കും. കേന്ദ്ര-സംസ്ഥാന സര്‍ക്കാരുകള്‍ സംയുക്തമായാണ് പദ്ധതി നടപ്പിലാക്കുന്നത്.

സംസ്ഥാനത്ത് 67.40 ലക്ഷം ഗ്രാമീണ വീടുകളുണ്ട്. ഇതില്‍ 18.30 ലക്ഷം വീടുകള്‍ക്ക് നിലവില്‍ ശുദ്ധജല കണക്ഷന്‍ ഉണ്ട്. ബാക്കിയുള്ള 49.11 ലക്ഷം വീടുകളില്‍ 2024ഓടു കൂടി  കുടിവെള്ള കണക്ഷന്‍ നല്‍കാനാണ് ജലജീവന്‍ മിഷന്‍ ലക്ഷ്യമിടുന്നത്.

ജലജീവന്‍ മിഷന്‍ പദ്ധതി വഴി ഗ്രാമീണ മേഖലയിലുള്ള എല്ലാ വീടുകള്‍ക്കുമായി സുസ്ഥിര ജലലഭ്യതയുള്ള ദീര്‍ഘകാല കുടിവെള്ള പദ്ധതികള്‍ക്ക് രൂപം നല്‍കി നടപ്പിലാക്കുകയാണ്.

പഞ്ചായത്തുതലത്തിലാണ് പദ്ധതി നിര്‍വഹണം. ഗ്രാമപഞ്ചായത്തും ബന്ധപ്പെട്ട സ്റ്റാന്‍റിങ് കമ്മിറ്റിയുമായിരിക്കും പദ്ധതി നടത്തിപ്പിന് നേതൃത്വം നല്‍കുന്നത്. ലൈഫ് മിഷന്‍ മാതൃകയില്‍ എംഎല്‍എ ഫണ്ട് ഈ പദ്ധതിക്കായി ചെലവഴിക്കാന്‍ കഴിയും.

പദ്ധതി നടപ്പിലാക്കാനും എല്ലാ ഗ്രാമീണ വീടുകള്‍ക്കും കുടിവെള്ള കണക്ഷന്‍ എന്ന വികസനലക്ഷ്യം സാധ്യമാക്കാനുമായി സംസ്ഥാനത്തെ എല്ലാ പഞ്ചായത്തുകളും മുന്നോട്ടുവരേണ്ടതാണ്. ഇന്നു വരെ 332 പഞ്ചായത്ത് ഭരണ സമിതികള്‍ തീരുമാനം എടുത്തിട്ടുണ്ട്. ഈ പദ്ധതി പൂര്‍ത്തീകരിക്കുന്നതോടെ സംസ്ഥാനത്തെ ഗ്രാമീണ മേഖലയിലെ കുടിവെള്ള പ്രശ്നങ്ങള്‍ക്ക് പൂര്‍ണമായും പരിഹാരമുണ്ടാകുമെന്നാണ് സര്‍ക്കാര്‍ പ്രതീക്ഷിക്കുന്നത്.

പ്രവേശനം
2020-21 അധ്യയനവര്‍ഷത്തെ ഒന്നാംവര്‍ഷ ഹയര്‍സെക്കന്‍ഡറി/വൊക്കേഷണല്‍ ഹയര്‍സെക്കന്‍ഡറി പ്രവേശന നടപടികള്‍ 2020 ജൂലൈ 29 മുതല്‍ ആരംഭിക്കും. ഇത് ജൂലൈ 24 എന്നാണ് നേരത്തേ അറിയിച്ചിരുന്നത്. കോവിഡ് 19ന്‍റെ പശ്ചാത്തലത്തില്‍ പൂര്‍ണമായും ഓണ്‍ലൈന്‍ സംവിധാനത്തിലാണ് പ്രവേശന നടപടികള്‍. അപേക്ഷകര്‍ക്ക് സ്വന്തമായി ഓണ്‍ലൈനായി അപേക്ഷ സമര്‍പ്പിക്കാം. അപേക്ഷകള്‍ ആഗസ്ത് 14 വരെ സ്വീകരിക്കും.

സ്കൂളുകളില്‍ അധ്യാപകരെയും അനധ്യാപകരെയും ഉള്‍പ്പെടുത്തി അപേക്ഷകള്‍ ഓണ്‍ലൈനായി സമര്‍പ്പിക്കുന്നതിനുള്ള സജ്ജീകരണത്തോടെയുള്ള ഹെല്‍പ്പ്ഡെസ്ക്കുകള്‍ പ്രവര്‍ത്തിക്കും. ജൂലൈ 29 മുതല്‍ പ്രവേശന നടപടികള്‍ അവസാനിക്കുന്നതുവരെ ഇതു തുടരും. സ്വന്തമായി അപേക്ഷ സമര്‍പ്പിക്കുവാന്‍ കഴിയാത്തവര്‍ക്ക് താമസസ്ഥലത്തിനു സമീപത്തുള്ള സ്കൂളില്‍ പ്രവര്‍ത്തിക്കുന്ന സഹായകേന്ദ്രങ്ങളിലൂടെ അപേക്ഷകള്‍ ഓണ്‍ലൈനായി സമര്‍പ്പിക്കാം.

സംശയങ്ങള്‍ ദൂരീകരിക്കാന്‍ ജില്ലാ തലത്തിലും മേഖലാ തലത്തിലും സംസ്ഥാന തലത്തിലും ഹെല്‍പ്പ് ഡെസ്ക്കുകള്‍ ഉണ്ടായിരിക്കും.

മന്ത്രിസഭായോഗ തീരുമാനങ്ങള്‍
ജൂലൈ 27ന് ചേരാന്‍ നിശ്ചയിച്ച നിയമസഭയുടെ പ്രത്യേക സമ്മേളനം കോവിഡ് മഹാമാരിയുടെ സ്ഥിതി കൂടുതല്‍ രൂക്ഷമായിവരുന്ന സാഹചര്യത്തില്‍ മാറ്റിവെക്കാന്‍ ഗവര്‍ണറോട് ശുപാര്‍ശ ചെയ്യാന്‍ ഇന്ന് ചേര്‍ന്ന മന്ത്രിസഭായോഗം തീരുമാനിച്ചു.

2020-21ലെ ധനകാര്യ ബില്‍ പാസാക്കുന്നതിനാണ് പ്രത്യേക സമ്മേളനം വിളിക്കാന്‍ നേരത്തെ ഗവര്‍ണറോട് ശുപാര്‍ശ ചെയ്തിരുന്നത്. ഇന്നത്തെ സാഹചര്യത്തില്‍ കോവിഡ് പ്രോട്ടോക്കോള്‍ പാലിച്ചുകൊണ്ട് നിയമസഭ ചേരുന്നതിന് പ്രായോഗിക ബുദ്ധിമുട്ടുകളുണ്ട്. പല നിയമസഭാംഗങ്ങളും പ്രായം കൂടിയവരാണ് എന്നതു കൂടി കണക്കിലെടുത്താണ് സമ്മേളനം മാറ്റിവെക്കുന്നതിന് ഗവര്‍ണറോട് ശുപാര്‍ശ ചെയ്യാന്‍ തീരുമാനിച്ചത്.

ഷീ ലോഡ്ജുകള്‍
വിവിധ ആവശ്യങ്ങള്‍ക്ക് യാത്ര ചെയ്യുന്ന സ്ത്രീകള്‍ക്ക് വിശ്രമത്തിനും രാത്രിയില്‍ സുരക്ഷിത താമസത്തിനും സംസ്ഥാനത്ത് ഷീ ലോഡ്ജുകള്‍ സ്ഥാപിക്കാന്‍ തീരുമാനിച്ചു.

തദ്ദേശസ്വയംഭരണ സ്ഥാപനങ്ങളുടെ ഉടമസ്ഥതയിലായിരിക്കും ഷീ ലോഡ്ജുകള്‍ സ്ഥാപിക്കുക. അതിന്‍റെ നടത്തിപ്പ് കുടുംബശ്രീയെയോ മറ്റ് ഏജന്‍സികളെയോ ഏല്‍പ്പിക്കും. ഷീ ലോഡ്ജുകള്‍ക്ക് ആവശ്യമായ കെട്ടിടം നിര്‍മിക്കുന്നതിനും നിലവിലുള്ള കെട്ടിടങ്ങള്‍ അറ്റകുറ്റപ്പണി നടത്തി ഉപയോഗിക്കുന്നതിനും തദ്ദേശഭരണസ്ഥാപനങ്ങള്‍ക്ക് തുക വകയിരുത്താവുന്നതാണ്. ഷീ ലോഡ്ജുകളുടെ നടത്തിപ്പ് തദ്ദേശസ്വയംഭരണസ്ഥാപനങ്ങളും ബന്ധപ്പെട്ട ഏജന്‍സിയും തമ്മില്‍ ഉണ്ടാക്കുന്ന കരാറിന്‍റെ അടിസ്ഥാനത്തിലായിരിക്കും.

ഷീ ലോഡ്ജുകളില്‍ കുറഞ്ഞത് എട്ട് കിടക്കയെങ്കിലും ഉണ്ടാകണം. ഡോര്‍മിറ്ററികളോ പ്രത്യേക മുറികളോ ആകാം. ശുചിമുറികള്‍ വൃത്തിയുള്ളതായിരിക്കണം. വൃത്തിയുള്ള അടുക്കള, ശുദ്ധജലം, ടിവി, ഫ്രിഡ്ജ്, വൈഫൈ മുതലായ സൗകര്യങ്ങള്‍ ഉണ്ടായിരിക്കണം. എല്ലാ സ്ഥലവും കവര്‍ ചെയ്യുന്ന സിസിടിവി ക്യാമറകള്‍ സ്ഥാപിക്കണം.

ജില്ലാതലത്തില്‍ ഷീ ലോഡ്ജിന്‍റെ നടത്തിപ്പിന് ജില്ലാ കലക്ടര്‍, ജില്ലാ പഞ്ചായത്ത് പ്രസിഡന്‍റ്, തദ്ദേശസ്ഥാപന സെക്രട്ടറി, കുടുംബശ്രീ ജില്ലാമിഷന്‍ കോര്‍ഡിനേറ്റര്‍ എന്നിവരടങ്ങുന്ന സമിതി രൂപീകരിക്കും.

നിലമ്പൂര്‍ താലൂക്കിലെ കവളപ്പാറയില്‍ 2019ലെ ഉരുള്‍പൊട്ടലില്‍ ഭൂമിയും വീടും നഷ്ടപ്പെട്ട 67 പേര്‍ക്ക് ഭൂമി വാങ്ങുന്നതിന് മുഖ്യമന്ത്രിയുടെ ദുരിതാശ്വാസനിധിയില്‍ നിന്ന് 4.02 കോടി രൂപ അനുവദിക്കാന്‍ തീരുമാനിച്ചു. ഒരു ഗുണഭോക്താവിന് ആറുലക്ഷം രൂപ ലഭിക്കും.

ആകെയുള്ള 94 ഗുണഭോക്താക്കള്‍ക്കും വീടു നിര്‍മാണത്തിന് 3.76 കോടി രൂപ അനുവദിക്കാനും തീരുമാനിച്ചു. ഓരോ ഗുണഭോക്താവിനും നാലുലക്ഷം രൂപയാണ് വീടു നിര്‍മാണത്തിന് അനുവദിക്കുക. ഇതില്‍ 3,04,900 രൂപ മുഖ്യമന്ത്രിയുടെ ദുരിതാശ്വാസനിധിയില്‍ നിന്നും  95,100 രൂപ സംസ്ഥാന ദുരന്തപ്രതികരണ നിധിയില്‍ നിന്നുമാണ് ലഭ്യമാക്കുക.

ഔദ്യോഗിക കൃത്യനിര്‍വഹണത്തിനിടെ 2015-ല്‍ മണല്‍ മാഫിയയുടെ ആക്രമണത്തില്‍ ഗുരുതരമായി പരുക്കേറ്റതിനെ തുടര്‍ന്ന് 2018-ല്‍ സര്‍വീസില്‍ നിന്ന് വിരമിക്കേണ്ടിവന്ന സബ് ഇന്‍സ്പെക്ടര്‍ കെ.എം. രാജന്‍റെ മകന്‍ കെ.എം. സന്ദീപിന് മാനുഷിക പരിഗണനയുടെ അടിസ്ഥാനത്തില്‍ വിഷയം അസാധാരണ കേസായി പരിഗണിച്ച് സര്‍ക്കാര്‍ സര്‍വീസില്‍ ജോലി നല്‍കാന്‍ തീരുമാനിച്ചു. കണ്ണൂര്‍ പരിയാരം പോലീസ് സ്റ്റേഷനില്‍ സബ് ഇന്‍സ്പെക്ടറായി ജോലി ചെയ്യുമ്പോഴാണ് രാജന് നേരെ ആക്രമണമുണ്ടായത്. അദ്ദേഹം ഇപ്പോഴും കിടപ്പിലാണ്.

ഇന്ത്യന്‍ ഇന്‍ഫര്‍മേഷന്‍ സര്‍വീസിലെ എസ്. സുബ്രഹ്മണ്യനെ (2001 ബാച്ച്) സോയില്‍ സര്‍വെ ആന്‍ഡ് സോയില്‍ കണ്‍സര്‍വേഷന്‍ വകുപ്പ് ഡയറക്ടറായി ഡെപ്യൂട്ടേഷന്‍ വ്യവസ്ഥയില്‍ നിയമിക്കാന്‍ തീരുമാനിച്ചു.

കോവിഡ് ബ്രിഗേഡ്
കോവിഡ് 19 പ്രതിരോധ പ്രവര്‍ത്തനങ്ങളെ ശാക്തീകരിക്കുന്നതിനായി കൂടുതല്‍ ആളുകളുടെ സേവനം ആവശ്യമുണ്ട്. സംയോജിതമായ പ്രവര്‍ത്തനത്തിനുള്ള കര്‍മപദ്ധതിയാണ് തയ്യാറാക്കുന്നത്. ആരോഗ്യവകുപ്പിലെ ജീവനക്കാര്‍ക്കു പുറമെ നാഷണല്‍ ഹെല്‍ത്ത് മിഷനിലുള്‍പ്പെടെ കരാര്‍ അടിസ്ഥാനത്തില്‍ കൂടുതല്‍ ആരോഗ്യ പ്രവര്‍ത്തകരെ ഇതിനായി നിയോഗിക്കും. അവര്‍ക്ക് ഇന്‍ഷുറന്‍സ് പരിരക്ഷ നല്‍കും. അതിനുപുറമെ അവര്‍ക്ക് ലഭിക്കുന്ന വേതനം കാലാനുസൃതമായി നിശ്ചയിക്കും. ആനുപതികമായ വര്‍ധനവ് ഉണ്ടാകും.

കോവിഡ് ബ്രിഗേഡില്‍ ഉള്‍പ്പെടുന്ന എല്ലാ കരാര്‍ ജീവനക്കാര്‍ക്കും പ്രത്യേക ആരോഗ്യ പരിരക്ഷ നല്‍കുന്നുണ്ട്. ഡോക്ടര്‍മാര്‍ മുതല്‍ വളണ്ടിയര്‍മാര്‍ വരെ ഉള്‍പ്പെടുന്ന സേന എന്ന നിലയിലാണ് കോവിഡ് ബ്രിഗേഡിനെ കാണേണ്ടത്. അവര്‍ക്ക് പ്രവര്‍ത്തനത്തിനിടെ രോഗം ബാധിച്ചാല്‍ സൗജന്യ ചികിത്സ നല്‍കും.

പഞ്ചായത്തുകളിലെ ശുചീകരണ തൊഴിലാളികള്‍ക്ക് പഞ്ചായത്തുകള്‍ തന്നെ താമസസൗകര്യം നല്‍കും. സിഎഫ്എല്‍ടിസികളില്‍ സ്രവം പരിശോധിക്കാനുള്ള ഉപകരണം സ്ഥാപിക്കും. കോവിഡ് പ്രതിരോധ പ്രവര്‍ത്തനത്തില്‍ ഏര്‍പ്പെടുത്ത വിദ്യാര്‍ത്ഥികള്‍ക്ക് അനുമോദന സര്‍ട്ടിഫിക്കറ്റ് നല്‍കും.

നിലവില്‍ ഈ പ്രവര്‍ത്തനങ്ങളില്‍ ഏര്‍പ്പെടുന്നവര്‍ക്കു നല്‍കുന്ന പ്രതിഫലം വര്‍ധിപ്പിക്കും.  ഗ്രേഡ് 4 കാറ്റഗറിയിലുള്ളവര്‍ക്ക് ഇപ്പോള്‍ നല്‍കുന്ന 450 രൂപ പ്രതിദിന പ്രതിഫലം 1000 രൂപയാക്കി വര്‍ധിപ്പിക്കും.

കോവിഡ് ബ്രിഗേഡ് എന്ന നിലയിലുള്ള സംവിധാനമാണ് സിഎഫ്എല്‍ടിസി പ്രവര്‍ത്തനങ്ങള്‍ക്ക് നേതൃത്വം നല്‍കുക. ഈ കോവിഡ് ബ്രിഗേഡില്‍ കൂടുതല്‍ ആളുകളുടെ സഹായവും പങ്കാളിത്തവും ഉണ്ടാകണമെന്ന് അഭ്യര്‍ത്ഥിക്കുന്നു.

ദുരിതാശ്വാസനിധി
സിപിഐ കണ്ണൂര്‍ ജില്ലാ കൗണ്‍സില്‍ 4,10,000  രൂപ.

കെഎസ്കെടിയു കണ്ണൂര്‍ ജില്ലാ കമ്മിറ്റി 3 ലക്ഷം രൂപ.

അങ്കണവാടി വര്‍ക്കേഴ്സ് ആന്‍റ് ഹെല്‍പ്പേഴ്സ് അസോസിയേഷന്‍ (സിഐടിയു) നീലേശ്വരം, പരപ്പ ബ്ലോക്കുകളിലെ അംഗങ്ങളില്‍ നിന്ന് സമാഹരിച്ച 1,73,350 രൂപ.

സിപിഐ എം പോളയത്തോട് ലോക്കല്‍ കമ്മിറ്റി 1,01,111 രൂപ.

കമലേശ്വരം വെല്‍ഫയര്‍ കോ-ഓപ്പറേറ്റീവ് സൊസൈറ്റി തിരുവനന്തപുരം 1 ലക്ഷം രൂപ.

നെല്ലൂരിലെ ബ്രദേഴ്സ് കോണ്‍ക്രീറ്റ് പ്രോഡക്റ്റ്സ് ഉടമ പി രാമദാസന്‍ 1 ലക്ഷം രൂപ.

മൊറാഴ കൂവ്വപ്രത്ത് ശ്രീ പൂതിയ ഭഗവതി ക്ഷേത്രം 1,01050 രൂപ

ഉദിനൂര്‍ എയുപി സ്കൂള്‍ അധ്യാപകന്‍ പി.പി. കുഞ്ഞികൃഷ്ണന്‍ മാസ്റ്റര്‍ 76,380 രൂപ.

ചായോത്ത് ശ്രീധരന്‍ മാസ്റ്റര്‍, ഭാര്യ സുമതി ടീച്ചര്‍ എന്നിവര്‍ പെന്‍ഷന്‍ തുകയായ 60,000 രൂപ

സിപിഐ എം പയ്യാക്കോട് ബ്രാഞ്ച് 51,292 രൂപ

കോഴിക്കോട് ജില്ലയിലെ വിലാതപുരത്തെ യുവാക്കളുടെ കൂട്ടായ്മയായ ‘ചെന്താര വിലാതപുരം’ ബിരിയാണി ചലഞ്ചിലൂടെ  സ്വരൂപിച്ച 50,000 രൂപ.

ചെറുവത്തൂര്‍ ശ്രീ മട്ലായി ശിവക്ഷേത്രം 50,000 രൂപ.

ഉദിനൂരിലെ നവദമ്പതികളായ പി അനുപ്, രേഷ്മ എന്നിവര്‍വിവാഹചെലവിനായി കരുതിവച്ച തുകയില്‍ നിന്ന് 50,000 രൂപ.

കയ്യൂര്‍ ശ്രീ ആലിന്‍ കീഴില്‍ ഭഗവതി ക്ഷേത്രവും മുണ്ട്യ വിഷ്ണുമൂര്‍ത്തി ക്ഷേത്രവും ചേര്‍ന്ന് 41,111 രൂപ.

മലബാര്‍ ദേവസ്വം എപ്ലോയീസ് യൂണിയന്‍ (സിഐടിയു) മയ്യില്‍ ഏരിയയിലെ 22ഓളം ക്ഷേത്രങ്ങളിലെ ജീവനക്കാരില്‍ നിന്ന് സമാഹരിച്ച 33,600 രൂപ.

യങ് ബ്രദേഴ്സ് ക്ലബ്ബ് ചുഴലി ബിരിയാണി ചലഞ്ചിലൂടെ സമാഹരിച്ച 32,640 രൂപ.

സിപിഐ എം നോര്‍ത്ത് കോട്ടച്ചേരി ബ്രാഞ്ച് ബിരിയാണി ഫെസ്റ്റിലൂടെ സമാഹരിച്ച 26,870 രൂപ.

കൊടക്കാട് വെള്ളച്ചാല്‍ മുസ്ലീം ജമാ അത്ത് കമ്മിറ്റി 25,000 രൂപ.

കാടങ്കോട് ജിഎഫ്എച്ച്എസ് സ്കൂളില്‍ വിഎച്ച്എസ്ഇ വിഭാഗം വിദ്യാര്‍ത്ഥികള്‍ക്ക് ലഭിച്ച അവാര്‍ഡ് തുക 25,000 രൂപ.

പിഎസ്സി എല്‍ഡേഴ്സ് ഫോറം  തിരുവനന്തപുരം 25,000 രൂപ.

ശ്രീ നെല്ലിക്കാത്തുരുത്തി കഴകം നിലമംഗലത്ത് ഭഗവതി ക്ഷേത്രം 25,000 രൂപ.

എഐവൈഎഫ് ബ്ലാത്തൂര്‍ യുണിറ്റ് 14,256 രൂപ.

മുഖ്യമന്ത്രിയുടെ വാര്‍ത്താ സമ്മേളനത്തില്‍ നിന്ന്
സംസ്ഥാനത്ത് ഒരുദിവസം കോവിഡ് സ്ഥിരീകരിക്കുന്നവരുടെ എണ്ണം ആയിരം കടന്നിരിക്കുന്നു. 1038 പേര്‍ക്കാണ് ഇന്ന് കോവിഡ് സ്ഥിരീകരിച്ചത്. ഇതുവരെ രോഗം സ്ഥിരീകരിച്ചവരുടെ എണ്ണം 15,032 ആണ്. ഇന്ന് 785 പേര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. അതില്‍ 57 പേരുടെ ഉറവിടം വ്യക്തമായിട്ടില്ല. വിദേശത്തുനിന്ന് 87 പേര്‍. മറ്റു സംസ്ഥാനങ്ങളില്‍നിന്ന് 109 പേര്‍.

ഇന്ന് കോവിഡ്മൂലം ഒരു മരണമുണ്ടായി. ഇടുക്കി ജില്ലയിലെ നാരായണന്‍ (75) ആണ് മരണമടഞ്ഞത്. അദ്ദേഹത്തിന്‍റെ നിര്യാണത്തില്‍ അനുശോചനം രേഖപ്പെടുത്തുന്നു.

ഇന്ന് 272 പേര്‍ രോഗമുക്തി നേടി.

പോസിറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 226, കൊല്ലം 133, ആലപ്പുഴ 120, കാസര്‍കോട് 101, എറണാകുളം 92, മലപ്പുറം 61, തൃശൂര്‍ 56, കോട്ടയം 51, പത്തനംതിട്ട 49,  ഇടുക്കി 43, കണ്ണൂര്‍ 43, പാലക്കാട് 34, കോഴിക്കോട് 25, വയനാട് 4.

നെഗറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 9, കൊല്ലം 13, പത്തനംതിട്ട 38, ആലപ്പുഴ 19, കോട്ടയം 12, ഇടുക്കി 1, എറണാകുളം 18, തൃശൂര്‍ 33, പാലക്കാട് 15, മലപ്പുറം 52, കോഴിക്കോട് 14, വയനാട് 4, കാസര്‍കോട് 43.

കഴിഞ്ഞ 24 മണിക്കൂറിനകം 20,847 സാമ്പിളുകള്‍ പരിശോധിച്ചു. 1,59,777 പേരാണ് നിരീക്ഷണത്തിലുള്ളത്. 9031 പേര്‍ ആശുപത്രികളില്‍. ഇന്നു മാത്രം 1164 പേരെ ആശുപത്രിയില്‍ പ്രവേശിപ്പിച്ചു. ഇപ്പോള്‍ ചികിത്സയിലുള്ളവര്‍ 8818.

ഇതുവരെ ആകെ 3,18,644 സാമ്പിളുകളാണ് പരിശോധനയ്ക്കായി അയച്ചത്. ഇതില്‍ 8320 സാമ്പിളുകളുടെ ഫലം വരാനുണ്ട്. ഇതുകൂടാതെ സെന്‍റിനല്‍ സര്‍വൈലന്‍സിന്‍റെ ഭാഗമായി മുന്‍ഗണനാ ഗ്രൂപ്പുകളില്‍ നിന്ന് 1,03,951 സാമ്പിളുകള്‍ ശേഖരിച്ചതില്‍ 99,499 സാമ്പിളുകള്‍ നെഗറ്റീവ് ആയി. സംസ്ഥാനത്തെ ഹോട്ട്സ്പോട്ടുകളുടെ എണ്ണം 397 ആയി.

സംസ്ഥാനത്ത് പുതുതായി രോഗം ബാധിച്ചവരുടെ എണ്ണം ആയിരം കടന്ന സാഹചര്യത്തില്‍ നിലവില്‍ ഇവിടെയുള്ള അവസ്ഥയും സൗകര്യങ്ങളും ഇവിടെ പറയേണ്ടതുണ്ട്. ഇപ്പോള്‍ ചികിത്സയിലുള്ള 8056 പേരില്‍ 53 പേര്‍ ഐസിയുവിലാണ്. 9 പേര്‍ വെന്‍റിലേറ്ററിലും. ഇന്ത്യയില്‍ കേസ് പെര്‍ മില്യന്‍ 864.4 ആണ്. കേരളത്തില്‍ 419.1 ഫെറ്റാലിറ്റി റേറ്റ് ഇന്ത്യയുടേത് 2.41 ആണ്. കേരളത്തിന്‍റേത് 0.31 സംസ്ഥാനത്ത് ഇതുവരെ 86,959 പേരെ പ്രൈമറി കോണ്‍ടാക്ടുകളായി കണ്ടെത്തിയിട്ടുണ്ട്. സെക്കന്‍ററി കോണ്‍ടാക്ടുകളായി 37,937 പേരെയാണ് കണ്ടെത്തിയത്.

ആകെയുള്ള പോസിറ്റീവ് കേസുകളില്‍ ഇപ്പോഴത്തെ കണക്കനുസരിച്ച് 65.16 ശതമാനം അതത് പ്രദേശങ്ങളില്‍ നിന്നുതന്നെ (ലോക്കലി അക്വയേര്‍ഡ്) വൈറസ് ബാധയുണ്ടായതാണ്. അതില്‍ തിരുവനന്തപുരത്താണ് ഏറ്റവും കൂടുതല്‍ 94.4 ശതമാനം.

കോവിഡ് ചികിത്സയ്ക്കായി മാത്രമുള്ള ആശുപത്രി കിടക്കകള്‍ക്കു പുറമെ 15,975 കിടക്കകള്‍ ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളില്‍ തയ്യാറായിട്ടുണ്ട്. അവയില്‍ 4535 പേരാണ് ഇപ്പോള്‍ ചികിത്സയിലുള്ളത്.

ആരോഗ്യപ്രവര്‍ത്തകര്‍ക്കായുള്ള 3.42 ലക്ഷം എന്‍ 95 മാസ്കുകളും 3.86 ലക്ഷം പിപിഇ കിറ്റുകളും 16.1 ലക്ഷം ത്രീലെയര്‍ മാസ്കുകളും 40.3 ലക്ഷം ഗ്ലൗസുകളും സ്റ്റോക്കുണ്ട്.

80 വെന്‍റിലേറ്ററുകള്‍ കഴിഞ്ഞ ദിവസങ്ങളില്‍ വാങ്ങിയിട്ടുണ്ട്. 270 ഐസിയു വെന്‍റിലേറ്ററുകള്‍ കേന്ദ്ര ഗവണ്‍മെന്‍റില്‍നിന്നു ലഭ്യമായി. രണ്ടാഴ്ചയ്ക്കകം 50 വെന്‍റിലേറ്ററുകള്‍ കൂടി കേന്ദ്ര ഗവണ്‍മെന്‍റില്‍നിന്നും പ്രതീക്ഷിക്കുന്നു.

6007 വെന്‍റിലേറ്ററുകള്‍ക്ക് രാപ്പകല്‍ പ്രവര്‍ത്തിക്കാന്‍ പാകത്തിലുള്ള ഓക്സിജന്‍ സ്റ്റോക്ക് ചെയ്തിട്ടുണ്ട്. ഏഴ് മെഡിക്കല്‍ കോളേജുകളിലും ലിക്വിഡ് ഓക്സിജന്‍ സൗകര്യം ലഭ്യമാണ്.

947 ആംബുലന്‍സുകള്‍ കോവിഡ് കാര്യങ്ങള്‍ക്കു മാത്രമായി സജ്ജമാണ്.

ഇ-സഞ്ജീവിനി ടെലിമെഡിസിന്‍ സംവിധാനം എല്ലാ ജില്ലകളിലും പ്രവര്‍ത്തിക്കുന്നുണ്ട്.

50 മൊബൈല്‍ മെഡിക്കല്‍ യൂണിറ്റുകള്‍ ഇപ്പോള്‍ പ്രവര്‍ത്തിക്കുന്നുണ്ട്. 19 എണ്ണം സ്ഥാപിക്കാനുള്ള പ്രവര്‍ത്തനം നടന്നുവരുന്നു. നിലവിലുള്ള സാഹചര്യം നേരിടാന്‍ നാം സജ്ജരാണ്.

തിരുവനന്തപുരം ജില്ലയില്‍ അതീവ ഗുരുതരമായ സാഹചര്യം തുടരുകയാണ്. ഇന്ന് പോസിറ്റീവായ 226 കേസുകളില്‍ 190 പേര്‍ക്ക് രോഗബാധയുണ്ടായത് സമ്പര്‍ക്കത്തിലൂടെയാണ്. 15 പേരുടെ ഉറവിടം വ്യക്തമല്ല. 18 ആരോഗ്യപ്രവര്‍ത്തകര്‍ക്കും രോഗം ബാധിച്ചു. ലോക്ക്ഡൗണ്‍ തുടരുന്ന കാര്യത്തില്‍ ജില്ലയിലെ ക്രിട്ടിക്കല്‍ കണ്ടെയിന്‍മെന്‍റ് സോണുകളിലെ കച്ചവടക്കാര്‍ക്ക് തിങ്കള്‍, ബുധന്‍, വെള്ളി ദിവസങ്ങളില്‍ മൊത്തവിതരണക്കാരില്‍ നിന്നും സ്റ്റോക്ക് സ്വീകരിക്കാന്‍ അനുമതി നല്‍കി. രാവിലെ ഏഴുമണി മുതല്‍ ഉച്ചയ്ക്ക് ഒരുമണിവരെ മൊത്തവിതരണക്കാര്‍ക്ക് വാഹനങ്ങളുമായി ക്രിട്ടിക്കല്‍ കണ്ടെയിന്‍മെന്‍റ് സോണിനുള്ളില്‍ പൊലീസ് അനുമതിയോടെ പ്രവേശിക്കാനാകും. പാറശാല അടക്കമുള്ള അതിര്‍ത്തിപ്രദേശങ്ങളില്‍ കോവിഡ് രോഗികളുടെ എണ്ണം വര്‍ധിക്കുന്നുണ്ട്.

കൊല്ലത്ത് 133 പേര്‍ക്ക് രോഗം സ്ഥിരീകരിച്ചതില്‍ 116ഉം സമ്പര്‍ക്കത്തിലൂടെയാണ്. ഉറവിടമറിയാത്ത അഞ്ചുപേരുമുണ്ട്. നിയന്ത്രണങ്ങള്‍ ശക്തിപ്പെടുത്താനാണ് തീരുമാനം. തീരമേഖലയില്‍ വിനോദങ്ങള്‍ക്കും കാറ്റുകൊള്ളാനും പ്രദേശവാസികളെ കൂട്ടം ചേരാന്‍ അനുവദിക്കുന്നതല്ല.  

പത്തനംതിട്ട ജില്ലയില്‍ 49 പേര്‍ക്ക് രോഗം സ്ഥിരീകരിച്ചതില്‍ 32 സമ്പര്‍ക്കം. അടൂര്‍ ജനറല്‍ ആശുപത്രിയില്‍ ഡോക്ടര്‍ക്കും മൂന്ന് ആരോഗ്യ പ്രവര്‍ത്തകര്‍ക്കും ചികില്‍സയിലിരുന്ന അഞ്ച് രോഗികള്‍ക്കും കോവിഡ് സ്ഥിരീകരിച്ചതിനെത്തുടര്‍ന്ന് ആശുപത്രിയിലെ മുഴുവന്‍ ജീവനക്കാര്‍ക്കും ആന്‍റിജന്‍ ടെസ്റ്റ് നടത്തി.

ആലപ്പുഴയില്‍ കണ്ടൈന്‍മെന്‍റ് സോണുകളിലെ അവശ്യവസ്തുക്കള്‍ വില്‍ക്കുന്ന കടകളുടെ പ്രവര്‍ത്തനസമയം രാവിലെ 7 മുതല്‍ ഉച്ചയ്ക്ക് രണ്ടുമണി വരെ ദീര്‍ഘിപ്പിച്ചിട്ടുണ്ട്. വണ്ടാനം ടിഡി മെഡിക്കല്‍ കോളേജ് പ്ലാസ്മ തെറാപ്പിയില്‍ സ്വയം പര്യാപ്തത നേടി. കോവിഡ് ചികിത്സക്കായി ആശുപത്രിയുടെ ബ്ലഡ് ബാങ്കിലുള്ള അഫേര്‍സിസ് മെഷീന്‍ വഴി കോവിഡ് കോണ്‍വാലെന്‍റ് പ്ലാസ്മ ഇന്നലെ ശേഖരിച്ചു.

കോട്ടയത്ത് രോഗം സ്ഥിരീകരിച്ച 51 പേരില്‍ 40 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. മെഡിക്കല്‍ കോളേജ് ആശുപത്രിയില്‍ ഗൈനക്കോളജി വിഭാഗത്തില്‍ അഞ്ചു സ്ത്രീകള്‍ക്ക് രോഗം സ്ഥിരീകരിച്ചിട്ടുണ്ട്. ഇതില്‍ രണ്ടു പേര്‍ ഗര്‍ഭിണികളാണ്. ഇവര്‍ക്ക് ചികിത്സ ലഭ്യമാക്കുന്നതിനും സമ്പര്‍ക്ക പട്ടികയിലുള്ള എല്ലാവരെയും കണ്ടെത്തി ക്വാറന്‍റൈന്‍ ചെയ്യുന്നതിനും വാര്‍ഡുകള്‍ അണുവിമുക്തമാക്കുന്നതിനും നടപടി സ്വീകരിച്ചു.

ഇടുക്കി ജില്ലയില്‍ ഇന്ന് വണ്ണപ്പുറം, വാഴത്തോപ്പ്, രാജാക്കാട് എന്നിവിടങ്ങളിലാണ് കൂടുതല്‍ സമ്പര്‍ക്ക രോഗങ്ങള്‍ കണ്ടെത്തിയത്. ഇന്ന് 43 പേര്‍ക്ക് വൈറസ് ബാധയുണ്ടായതില്‍ 26 പേര്‍ക്കാണ് സമ്പര്‍ക്കംമൂലം രോഗം വന്നത്.

എറണാകുളത്ത് 93 പേര്‍ക്ക് ഇന്ന് രോഗം സ്ഥിരീകരിച്ചതില്‍ 66 പേര്‍ക്കും സമ്പര്‍ക്കംമൂലമായിരുന്നു. 15 പേരുടെ ഉറവിടം വ്യക്തമല്ല. ആലുവ മേഖലയിലെ പടരുന്ന കോവിഡ് വൈറസ് വ്യാപനം അപകട സാധ്യത കൂടിയതായാണ് ആരോഗ്യ വിഭാഗം കണ്ടെത്തിയിട്ടുള്ളത്. അതിനാല്‍ കൂടുതല്‍ ജാഗ്രത അനിവാര്യമാണ്. ആലുവയില്‍ രോഗവ്യാപനം ഗുരുതരമായ സാഹചര്യത്തില്‍ സമീപ പഞ്ചായത്തുകളായ ചൂര്‍ണിക്കര, എടത്തല, ചെങ്ങമനാട്, കരുമാലൂര്‍, കടുങ്ങല്ലൂര്‍, ആലങ്ങാട് പഞ്ചായത്തുകള്‍ കൂടി ഉള്‍പ്പെടുത്തി ഒറ്റ കസ്റ്ററാക്കി പ്രതിരോധ നടപടികള്‍ ഊര്‍ജിതമാക്കും. ആലുവ ക്ലസ്റ്ററില്‍ കര്‍ഫ്യൂ പ്രഖ്യാപിക്കും. രാവിലെ 7മുതല്‍ 9 വരെ മൊത്തവിതരണവും 10 മുതല്‍ 2 വരെ ചില്ലറ വില്‍പനയും അനുവദിക്കും.

ചെല്ലാനം മേഖലയില്‍ രോഗവ്യാപനം കുറഞ്ഞിട്ടുണ്ട്. പ്രദേശത്തെ എഫ്എല്‍ടിസിയില്‍ കോവിഡ് പരിശോധന ആരംഭിച്ചു.

കോവിഡ് രോഗ സമ്പര്‍ക്കത്തിന്‍റെ പേരില്‍ ജില്ലയില്‍ അടച്ചിട്ടിരിക്കുന്ന എല്ലാ സ്വകാര്യ ആശുപത്രികളും അണുനാശനം നടത്തി നാളെ പൂര്‍ണതോതില്‍ പ്രവര്‍ത്തനം പുനരാരംഭിക്കും. കോവിഡ് പരിശോധന സംവിധാനമുള്ള സ്വകാര്യ ആശുപത്രികളില്‍ ഗുരുതര അവസ്ഥയിലുള്ള കോവിഡ് രോഗികള്‍ക്ക് സ്വകാര്യ ആശുപത്രികളില്‍ തന്നെ ചികിത്സ ഉറപ്പാക്കണം.

തൃശൂര്‍ ജില്ലയില്‍ പുതിയ ക്ലസ്റ്ററുകള്‍ രൂപപ്പെടുകയും സമ്പര്‍ക്ക വ്യാപന കേസുകള്‍ കൂടുകയും ചെയ്തതോടെ ജില്ലയില്‍ കണ്ടെയ്ന്‍മെന്‍റ് സോണുകളുടെ എണ്ണവും വര്‍ധിപ്പിച്ചു. മൂന്നു തദ്ദേശസ്ഥാപന പ്രദേശങ്ങള്‍ കൂടി പുതുതായി കണ്ടെയ്ന്‍മെന്‍റ് സോണ്‍ ആയി പ്രഖ്യാപിച്ചു.

പാലക്കാട് പട്ടാമ്പിയിലെ മത്സ്യമാര്‍ക്കറ്റില്‍ ഒരു തൊഴിലാളിക്ക് രോഗം സ്ഥിരീകരിച്ചതിനെ തുടര്‍ന്ന് മൂന്നു ദിവസങ്ങളിലായി മാര്‍ക്കറ്റുമായി ബന്ധപ്പെട്ടവരിലും പോസിറ്റീവായ വ്യക്തികളുടെ സമ്പര്‍ക്ക പട്ടികയില്‍ ഉള്‍പ്പെട്ടവരിലും പരിശോധന നടത്തിയിരുന്നു. ജൂലൈ 20ന് പട്ടാമ്പിയില്‍ നടത്തിയ 565 ആന്‍റിജന്‍ ടെസ്റ്റില്‍ പട്ടാമ്പിയിലും സമീപ പ്രദേശങ്ങളിലുമുള്ള 36 പേര്‍ക്കാണ് രോഗം സ്ഥിരീകരിച്ചത്.

മലപ്പുറം ജില്ലയില്‍ സമൂഹവ്യാപന സാധ്യത കണക്കിലെടുത്തു കൊണ്ടോട്ടി,  നിലമ്പൂര്‍ നഗരസഭാ പരിധിയിലെ മുഴുവന്‍ വാര്‍ഡുകളും കണ്ടെയ്ന്‍മെന്‍റ് സോണില്‍ ഉള്‍പ്പെടുത്തി.

വയനാട് ജില്ലയില്‍ പുല്‍പ്പള്ളി പഞ്ചായത്തിലെ ഒരു ജനപ്രതിനിധിക്ക് രോഗം സ്ഥിരീകരിച്ച സാഹചര്യത്തില്‍ അവിടെയും തൊട്ടടുത്ത പഞ്ചായത്തായ മുളളന്‍കൊല്ലിയിലും കനത്ത ജാഗ്രത തുടരുകയാണ്. ഇദ്ദേഹവുമായി സമ്പര്‍ക്കമുണ്ടായിരുന്ന പഞ്ചായത്ത് പ്രസിഡന്‍റ് അടക്കമുളള മൂന്നംഗങ്ങളുടെ പരിശോധനഫലം നെഗറ്റീവാണ്. എന്നാല്‍, പൊതുപ്രവര്‍ത്തകനായതിനാല്‍ പ്രാഥമിക സമ്പര്‍ക്കപട്ടികയില്‍ കൂടുതല്‍ ആളുകള്‍ ഉള്‍പ്പെടാനുളള സാധ്യതയുണ്ട്.

കണ്ണൂര്‍ ജില്ലയിലെ കടകള്‍, മാളുകള്‍ ഉള്‍പ്പെടെയുള്ള എല്ലാ വ്യാപാര സ്ഥാപനങ്ങളും വൈകുന്നേരം 5 മണി വരെ മാത്രമേ പ്രവര്‍ത്തിക്കാന്‍ അനുവദിക്കു. വിദേശങ്ങളില്‍ നിന്നും, ഇതര സംസ്ഥാനങ്ങളില്‍  നിന്നും ഇതര ജില്ലകളിലെ ഹോട്ട്സ്പോട്ടുകളില്‍ നിന്നും ജില്ലയില്‍ എത്തിച്ചേരുന്നവരെ വാര്‍ഡ് തല ജാഗ്രതാ സമിതി പ്രത്യേകം നിരീക്ഷണ വിധേയമാക്കും.

ഷോര്‍ട്ട് വിസിറ്റ് പാസ് വഴി എത്തിച്ചേരുന്നവര്‍ പലയിടങ്ങളിലായി യാത്ര ചെയ്യുന്നതായി ശ്രദ്ധയില്‍പ്പെട്ടിട്ടുണ്ട്. ഇത്തരം സന്ദര്‍ശകര്‍ കാര്യ നിര്‍വഹണം നടത്തി മറ്റ് ഇടങ്ങളുമായി ബന്ധപ്പെടാതെ യഥാസമയം തിരിച്ചുപോകുന്നുണ്ടെന്ന് തദ്ദേശസ്വയം ഭരണസ്ഥാപന സെക്രട്ടറിമാരും പൊലീസും ഉറപ്പുവരുത്തേണ്ടതാണ്.

കാസര്‍കോട് ഇന്ന് രോഗം സ്ഥിരീകരിച്ച 101 പേരില്‍ 85 സമ്പര്‍ക്കം. ജൂലൈ 30, 31 തീയതികളില്‍ നടക്കുന്ന കര്‍ണ്ണാടക മെഡിക്കല്‍ പ്രവേശന പരീക്ഷയെഴുതുന്ന വിദ്യാര്‍ഥികള്‍ക്ക് ജില്ലയുടെ വിവിധ ഭാഗങ്ങളില്‍ നിന്ന് തലപ്പാടി വരെ പോകാന്‍ പ്രത്യേകം കെഎസ്ആര്‍ടിസി ബസ് അനുവദിക്കും. അവിടെ നിന്ന് കര്‍ണ്ണാടക സര്‍ക്കാര്‍ ഒരുക്കുന്ന വാഹനത്തില്‍ പരീക്ഷ കേന്ദ്രങ്ങളിലേക്ക് പോകാനാവും. ഇവര്‍ മറ്റ് പൊതുഗതാഗത മാര്‍ഗങ്ങള്‍ ഉപയോഗിക്കരുത്. പരീക്ഷ കഴിഞ്ഞ് തിരിച്ചെത്തിയ ശേഷം വിദ്യാര്‍ഥികളും കുടുംബാംഗങ്ങളും ഏഴു ദിവസം റൂം ക്വാറന്‍റൈനില്‍ കഴിയേണ്ടതാണ്. ഇവര്‍ അഞ്ചാം ദിവസം ആന്‍റിജന്‍ ടെസ്റ്റിന് വിധേയമാകണം.

മാധ്യമങ്ങള്‍
കോവിഡ് പ്രതിരോധത്തില്‍ സംസ്ഥാനത്തിന് പിടിച്ചുനില്‍ക്കാന്‍ കഴിയുന്നതില്‍ നമ്മുടെ മാധ്യമങ്ങളുടെ സംഭാവന എടുത്തുപറയേണ്ടതു തന്നെയാണ്. ബോധവല്‍ക്കരണ പ്രവര്‍ത്തനത്തിലും രോഗവിവരങ്ങള്‍ ജനങ്ങളിലെത്തിക്കുന്നതിനും പ്രതിരോധത്തിന് മുന്‍കൈയെടുക്കുന്നതിലും മാധ്യമങ്ങള്‍ കാണിച്ച ശ്രദ്ധയും ചെലവിട്ട ഊര്‍ജവും വളരെ വലുതാണ്.

പക്ഷേ, സമീപ നാളുകളില്‍ ചില ഇടങ്ങളിലെങ്കിലും അത് ചോര്‍ന്നുപോകുന്നുണ്ടോ എന്ന സംശയം വരുന്നുണ്ട്. ഉദാഹരണത്തിന് ഇന്ന് ഒരു വാര്‍ത്താചാനല്‍ ആവര്‍ത്തിച്ച് കാണിച്ച ഒരു ബ്രേക്കിങ് ന്യൂസ് ‘കേരളത്തില്‍ കോവിഡ് മരണം കൂടുന്നു’ എന്നായിരുന്നു. മരിക്കുന്നവരുടെ എണ്ണം ഓരോ ദിവസവും വര്‍ധിക്കുന്നുണ്ട്. എന്നാല്‍, സ്ഫോടനാത്മകമായ രീതിയില്‍ മരണസംഖ്യ ഇവിടെ ഇല്ല. നമ്മുടെ അയല്‍സംസ്ഥാനങ്ങളിലെയും മറ്റും മരണനിരക്ക് ഇന്നലെ ഇവിടെ സൂചിപ്പിച്ചിരുന്നുവല്ലൊ.

കോവിഡുമായി ബന്ധപ്പെട്ട് വരുന്ന വാര്‍ത്തകളെല്ലാം മാധ്യമങ്ങള്‍ ജനങ്ങളിലെത്തിക്കേണ്ടതു തന്നെയാണ്. അതില്‍ സര്‍ക്കാരിനെയോ സംവിധാനങ്ങളെയോ വിമര്‍ശിക്കുന്നതില്‍ ആര്‍ക്കും എതിര്‍പ്പില്ല. പക്ഷെ, മാസങ്ങളായി രാപ്പകല്‍ അധ്വാനിക്കുന്ന ആരോഗ്യപ്രവര്‍ത്തകരുടെ ആത്മവീര്യം തകര്‍ക്കുന്ന തരത്തിലുള്ള ആക്ഷേപങ്ങള്‍ ഒഴിവാക്കണം. തെറ്റായ പ്രചാരണങ്ങള്‍ ഏറ്റെടുക്കരുത്.

നാം ഇപ്പോള്‍ അസാധാരണമായ സാഹചര്യത്തിലാണ്. ആ അസാധാരണത്വം ഏറ്റവും കൂടുതല്‍ നേരിടുന്നത് ആരോഗ്യമേഖലയാണ്. കോവിഡും അതോടൊപ്പം മറ്റു രോഗങ്ങളും ഇപ്പോള്‍ മഴക്കാല രോഗങ്ങളും ചികിത്സിക്കേണ്ടതുണ്ട്. എത്ര വലിയ ആരോഗ്യമേഖലയായാലും ഈ പ്രതിസന്ധി നേരിടാന്‍ പ്രയാസമുണ്ടാകും. പ്രശ്നങ്ങളുമുണ്ടാകും.

അത്തരം ചെറിയ പ്രശ്നങ്ങളെപ്പോലും ഊതിവീര്‍പ്പിച്ച്, ‘മെഡിക്കല്‍ കോളേജുകളില്‍ പ്രതിസന്ധി’ എന്ന സൂപ്പര്‍ലീഡ് വാര്‍ത്ത നല്‍കിയാലോ? മെഡിക്കല്‍ കോളേജുകളില്‍ കഷ്ടപ്പെടുന്ന ആരോഗ്യപ്രവര്‍ത്തകര്‍ക്ക് രോഗബാധയുണ്ടാകാം. അവര്‍ക്ക് ചികിത്സ നല്‍കേണ്ടതുമുണ്ട്. അങ്ങനെ അനുഭവമുണ്ടാകുമ്പോള്‍ മെഡിക്കല്‍ കോളേജുകളിലാകെ പ്രതിസന്ധിയാണ് എന്നു പ്രചരിപ്പിക്കരുത്.

സംസ്ഥാനത്ത് എല്ലാ കേന്ദ്രങ്ങളിലും സര്‍ക്കാര്‍, സ്വകാര്യ, ഐഎംഎ ഉടമസ്ഥതയിലുള്ള ആംബുലന്‍സുകള്‍ കോവിഡ് രോഗികളെ കൊണ്ടുപോകാനായി സജ്ജമാക്കിയിട്ടുണ്ട്. ഒരാള്‍ക്ക് രോഗം സ്ഥിരീകരിച്ചാല്‍ ആ സമയത്തുതന്നെ ആംബുലന്‍സ് എത്താന്‍ കഴിഞ്ഞുവെന്നു വരില്ല. കാരണം, ഓരോ യാത്ര കഴിഞ്ഞും അത് അണുമുക്തമാക്കണം. ഒരേസമയത്ത് ഒന്നിലേറെ സ്ഥലങ്ങളില്‍ കോവിഡ് ബാധ റിപ്പോര്‍ട്ട് ചെയ്യപ്പെട്ടേക്കാം.

ഗുരുതരാവസ്ഥയിലല്ലാത്ത രോഗികളാണെങ്കില്‍ അവര്‍ ഉള്ളിടത്തുതന്നെ അല്‍പനേരം നിരീക്ഷണത്തില്‍ തുടരുന്നതില്‍ അപകടവുമില്ല. കേരളത്തിനു പുറത്ത് പലയിടങ്ങളിലും രോഗബാധയുണ്ടെങ്കിലും അവശതയില്ലാത്ത ആളുകളെ വീട്ടില്‍ തന്നെയാണ് ചികിത്സിക്കുന്നത്. ഇവിടെ നാം ആശുപത്രിയിലെത്തിക്കുന്നു. ആംബുലന്‍സ് അല്‍പം വൈകുന്നത് ഒരു മഹാപരാധമായി എന്തിനാണ് ചിത്രീകരിക്കുന്നത്? അത്തരം തെറ്റായ പ്രചാരണങ്ങള്‍ക്കെതിരെ രോഗികള്‍ തന്നെ പരസ്യമായി പ്രതികരിക്കുന്നത് നാം കണ്ടില്ലേ?

ആശുപത്രികളിലും ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളിലും ചികിത്സയും ഭക്ഷണവും മറ്റു സൗകര്യങ്ങളും സര്‍ക്കാര്‍ ഏര്‍പ്പെടുത്തുന്നുണ്ട്. ഒരുപക്ഷെ എന്തെങ്കിലും പ്രത്യേക കാരണങ്ങളാല്‍ ഭക്ഷണം എത്താന്‍ അല്‍പം വൈകിയേക്കാം. അതിനെ സര്‍ക്കാരിന്‍റെ പരാജയമെന്നു പറഞ്ഞ് ആക്ഷേപിക്കരുത്.

എറണാകുളം മെഡിക്കല്‍ കോളേജില്‍ രോഗികള്‍ക്ക് പീഡനം എന്നാണ് ഒരു ചാനല്‍ ദൃശ്യങ്ങള്‍ സഹിതം റിപ്പോര്‍ട്ട് ചെയ്തത്. അതല്ല എന്ന് വ്യക്തമായപ്പോള്‍ അവര്‍ ഖേദം പ്രകടിപ്പിച്ചു. ഏതോ കുബുദ്ധികള്‍ ചില ദൃശ്യങ്ങള്‍ കൂട്ടിച്ചേര്‍ത്ത് അപവാദ പ്രചാരണത്തിനായി തയ്യാറാക്കിയതാണ്. ഇതില്‍ ആ മാധ്യമവും വഞ്ചിക്കപ്പെടുകയാണുണ്ടായത്. സര്‍ക്കാരിന്‍റെ കോവിഡ് പ്രതിരോധം തകര്‍ക്കാന്‍ കച്ചകെട്ടിയിറങ്ങിയ സംഘങ്ങള്‍ ഇത്തരം വ്യാജ വാര്‍ത്തകള്‍ സൃഷ്ടിക്കുന്നു എന്ന തിരിച്ചറിവുണ്ടാകണം.

കോവിഡിനെതിരായ പോരാട്ടം ഈ നാട്ടിലെ ജനങ്ങളുടെ ജീവനുവേണ്ടിയുള്ള പോരാട്ടം കൂടിയാണ്. തെറ്റിദ്ധാരണകള്‍ പരത്തിയും നുണക്കഥകള്‍ പ്രചരിപ്പിച്ചും അത് തകര്‍ക്കാന്‍ ശ്രമിക്കുന്നവര്‍ തിരുത്താനൊന്നും പോകുന്നില്ല. അവരാണ് കഴിഞ്ഞദിവസം ഒരു പ്രദേശത്ത് ജനങ്ങളെ ആരോഗ്യപ്രവര്‍ത്തകര്‍ക്കു നേരെ തിരിച്ചുവിട്ടത്. അങ്ങനെ സൃഷ്ടിക്കപ്പെട്ട അതൃപ്തി പരിഹരിക്കാന്‍ മുന്നിട്ടിറങ്ങിയവരെ തെറ്റായി ചിത്രീകരിച്ച് ഒരു ചിത്രം പ്രമുഖ മാധ്യമം പ്രസിദ്ധീകരിച്ചത് ഓര്‍മയില്ലേ? തെറ്റിദ്ധാരണ മനസ്സിലാക്കി ജനങ്ങള്‍ ആരോഗ്യപ്രവര്‍ത്തകരോടുള്ള നിലപാടില്‍ മാറ്റം വരുത്തി. പക്ഷെ, തെറ്റായ ചിത്രം പ്രസിദ്ധീകരിച്ച ആ മാധ്യമം തിരുത്തുന്നതായി കണ്ടില്ല.

ഇവിടെ എല്ലാ മാധ്യമങ്ങളെക്കുറിച്ചും അല്ല പറയുന്നത്. ചില പ്രത്യേക ഉദ്ദേശം വെച്ച് സൃഷ്ടിക്കപ്പെടുന്ന വാര്‍ത്തകള്‍ വെള്ളം ചേര്‍ക്കാതെ വിഴുങ്ങുന്ന പ്രവണതയെക്കുറിച്ചാണ്.

കോവിഡ് ആദ്യമായി കേരളത്തില്‍ കണ്ടെത്തിയതു മുതല്‍ മാധ്യമങ്ങള്‍ പൊതുവില്‍ കാണിച്ച ജാഗ്രതയും പ്രതിരോധ പ്രവര്‍ത്തനങ്ങളിലെ പങ്കാളിത്തവും കൂടുതല്‍ ശക്തിയോടെ തുടരേണ്ട ഘട്ടമാണിത്. അതിന് നമ്മുടെ എല്ലാ മാധ്യമങ്ങളും അവരുടെ പ്രത്യേക താല്‍പര്യങ്ങളെ മാറ്റിനിര്‍ത്തി പങ്കാളികളാകണം എന്നാണ് അഭ്യര്‍ത്ഥിക്കാനുള്ളത്.

റിക്കവറി റേറ്റ്
രോഗമുക്തി (റിക്കവറി) നിരക്കില്‍ കേരളം പുറകിലാണെന്നാണ് പ്രതിപക്ഷ നേതാവ് ആരോപണം ഉന്നയിച്ചിരിക്കുന്നത്. എവിടെയൊക്കെ പുറകിലാണെന്ന് കണ്ടെത്താനുള്ള അദ്ദേഹത്തിന്‍റെ ഗവേഷണം നടക്കട്ടെ. എന്നാല്‍, യാഥാര്‍ത്ഥ്യവുമായി പുലബന്ധം പോലുമില്ലാത്ത കാര്യങ്ങള്‍ നിരന്തരം പ്രചരിപ്പിക്കുന്നത് നാടിന് നല്ലതല്ല. കേരളത്തിന്‍റെ പ്രതിരോധ പ്രവര്‍ത്തനങ്ങള്‍ താളം തെറ്റിയെന്ന് വരുത്തിത്തീര്‍ക്കാനുള്ള വ്യഗ്രതയില്‍ പ്രതിപക്ഷ നേതാവിന് കേരളത്തിലെ കോവിഡ് പ്രതിരോധ പ്രവര്‍ത്തനങ്ങളുടെ പ്രത്യേകതകള്‍ മനസ്സിലാക്കാന്‍ സാധിക്കുന്നുണ്ടാകില്ല.

കോവിഡ് 19മായി ബന്ധപ്പെട്ട് കേരളത്തിന്‍റെ ഡിസ്ചാര്‍ജ് പോളിസി ദേശീയ തലത്തിലും മറ്റു സംസ്ഥാനങ്ങളിലും നിലവിലുള്ള പോളിസികളില്‍ നിന്നും വ്യത്യസ്തമാണ്. ദേശീയ പോളിസി അനുസരിച്ച് അഡ്മിറ്റ് ചെയ്ത് 10 ദിവസത്തിനു ശേഷം ചെറിയ രോഗലക്ഷണങ്ങളില്ലെങ്കില്‍ ഡിസ്ചാചാര്‍ജ് ചെയ്യാം. ഭേദമായി എന്ന് രേഖപ്പെടുത്തി ഡിസ്ചാര്‍ജ് ചെയ്തു വിടുകയാണ്. കേരളമൊഴികെ ഭൂരിഭാഗം സംസ്ഥാനങ്ങളും ആ രീതിയാണ് പിന്തുടരുന്നത്. കേരളം അങ്ങനെയല്ല. നാം ആദ്യം സ്വീകരിച്ചിരുന്ന രീതിയനുസരിച്ച് ടെസ്റ്റ് രണ്ടു തവണ നെഗറ്റീവ് ആയതിനു ശേഷമാണ് രോഗിയെ ഡിസ്ചാര്‍ജ് ചെയ്തിരുന്നത്.

ഇംഗ്ലണ്ടില്‍ നിന്നു വന്ന ആറന്മുള സ്വദേശിയെ 22 തവണ ടെസ്റ്റ് നടത്തി, 3 തവണ നെഗറ്റീവായതിനു ശേഷം ഡിസ്ചാര്‍ജ് ചെയ്ത വാര്‍ത്ത മാധ്യമങ്ങളെല്ലാം റിപ്പോര്‍ട്ട് ചെയ്തിരുന്നു. 41 ദിവസങ്ങളാണ് അദ്ദേഹത്തെ നമ്മള്‍ ആശുപത്രിയില്‍ ചികിത്സിച്ചത്. പത്തനംതിട്ട വടശ്ശേരിക്കര സ്വദേശിനിയായ വീട്ടമ്മ കോവിഡ്19 മുക്തയായി വീട്ടിലേക്ക് മടങ്ങിയത് 48 ദിവസങ്ങള്‍ക്ക് ശേഷമാണ്. ഇത്തരത്തില്‍ നിരവധി വാര്‍ത്തകള്‍ വന്നതാണ്. നാം അങ്ങനെയാണ് ചെയ്തത്.

ഇന്നലെ പ്രസിദ്ധീകരിച്ച ആരോഗ്യ വകുപ്പിന്‍റെ പുതുക്കിയ ഗൈഡ്ലൈനിലും ലക്ഷണങ്ങളില്ലാത്ത കേസുകളിലും ടെസ്റ്റുകള്‍ നിര്‍ബന്ധമാക്കിയിട്ടുണ്ട്. ആന്‍റിജന്‍ ടെസ്റ്റ് നെഗറ്റീവ് ആയവര്‍ക്ക് മാത്രമേ ഡിസ്ചാര്‍ജ് അനുവദിക്കുകയുള്ളൂ. പോസിറ്റീവ് ആകുന്നവര്‍ക്ക് ഡിസ്ചാര്‍ജ് ഉണ്ടാകില്ല. നമ്മള്‍ മുന്നിലാണെന്ന് കാണിക്കാന്‍ വേണമെങ്കില്‍ കേന്ദ്രത്തിന്‍റെ ഡിസ്ചാര്‍ജ് പോളിസി നമുക്ക് അതേപടി പിന്തുടരാമായിരുന്നു.

എന്നാല്‍, സമൂഹത്തിന്‍റെ സുരക്ഷ പഴുതടച്ച് ഉറപ്പുവരുത്താനും രോഗവ്യാപനത്തിനുള്ള സാധ്യത അടയ്ക്കാനും ടെസ്റ്റ് നെഗറ്റീവ് ആയവര്‍ക്ക് മാത്രം ഡിസ്ചാര്‍ജ് എന്ന നയമാണ് ഇവിടെ സ്വീകരിച്ചത്. കണക്കുകളില്‍ ഒന്നാം സ്ഥാനത്തെത്തുക എന്നതല്ല, ശാസ്ത്രീയമായി ഈ രോഗാവസ്ഥയെ മറികടക്കുക എന്നതാണ് നമ്മുടെ ലക്ഷ്യം.

രോഗവ്യാപനത്തോത് കേരളത്തില്‍ കൂടുതല്‍ ആണെന്നാണ് പ്രതിപക്ഷ നേതാവ് പറയുന്നത്. കേരളത്തില്‍ രോഗികളുടെ എണ്ണം മിക്ക പ്രദേശങ്ങളേക്കാളും കുറവായിരുന്നു എന്ന് നമ്മളോര്‍ക്കണം. പുതിയ കേസ് റിപ്പോര്‍ട്ട് ചെയ്യപ്പെടാത്ത ദിവസങ്ങള്‍ പോലും നമുക്കുണ്ടായിരുന്നു. അങ്ങനെയുള്ള അവസ്ഥയില്‍ നിന്നും പെട്ടെന്ന് രോഗികളുടെ എണ്ണം കൂടുമ്പോള്‍ നിരക്കും സ്വാഭാവികമായി കൂടും.

ഉദാഹരണമായി പത്ത് ഇരുപതാകുമ്പോള്‍ 100 ശതമാനമാണ് വര്‍ദ്ധനവിന്‍റെ നിരക്ക്. എന്നാല്‍ 1000 രോഗികളുള്ളിടത്ത് 1500 രോഗികളുണ്ടാകുമ്പോള്‍ വര്‍ദ്ധനവിന്‍റെ നിരക്ക് 50 ശതമാനമേയുള്ളൂ. നിരക്ക് മാത്രം നോക്കുകയാണെങ്കില്‍ 200 രോഗികള്‍ ഉള്ള സ്ഥലത്താണ് 1500 രോഗികള്‍ ഉള്ളിടത്തേക്കാള്‍ ഗുരുതരമായ സ്ഥിതിവിശേഷമെന്നു തോന്നും. എന്നാല്‍ യാഥാര്‍ഥ്യമതാണോ? തീര്‍ത്തും ലളിതമായ ഈ യുക്തി മനസ്സിലാകാത്തതു കൊണ്ടാണ് രോഗവ്യാപനത്തോതെടുത്ത് വച്ച് കേരളത്തെ മോശമായി ചിത്രീകരിക്കാന്‍ പലരും ആവേശം കാണിക്കുന്നത്.

ഇന്നലെ 720 പേര്‍ക്കാണ് കേരളത്തില്‍ രോഗം സ്ഥിരീകരിച്ചത്. മഹാരാഷ്ട്രയില്‍ 8336 പേര്‍ക്കും. തൊട്ടടുത്ത സംസ്ഥാനമായ തമിഴ്നാട്ടില്‍ 4965 പേര്‍ക്കും കര്‍ണാടകയില്‍ 3496 പേര്‍ക്കും രോഗം സ്ഥിരീകരിക്കുകയുണ്ടായി. രാജ്യത്താകമാനം 37,724 പേര്‍ക്ക് രോഗം സ്ഥിരീകരിക്കപ്പെട്ടപ്പോള്‍ 720 മാത്രമാണ് കേരളത്തില്‍ നിന്നുണ്ടായത്. കേരളത്തില്‍ മൂന്നാം ഘട്ടത്തില്‍ പടിപടിയായി രോഗികളുടെ എണ്ണം കൂടി വന്നിട്ടുണ്ട്. എന്നാല്‍ ദേശീയ തലത്തിലുള്ള ഏത് കണക്കെടുത്താലും കോവിഡ്-19 സ്ഥിരീകരിക്കപ്പെട്ടതിനു ശേഷമുള്ള വ്യാപനം താരതമ്യേന കുറവാണ്.

സങ്കീര്‍ണമായ സ്ഥിതിവിശേഷമാണ് ഒരു പാന്‍ഡമിക് സൃഷ്ടിക്കുന്നത്. ഒരുപാട് ഘടകങ്ങള്‍ അതില്‍ ഉള്‍പ്പെട്ടിരിക്കുന്നു. നിരവധി സങ്കേതങ്ങളിലൂടെയാണ് വിദഗ്ധര്‍ ഇത്തരം സ്ഥിതി വിശേഷങ്ങളെ വിശദികരിക്കുന്നത്. വിമര്‍ശനങ്ങളുമായി വരുന്നവര്‍ അവ എന്തെന്നു മനസ്സിലാക്കാനുള്ള ആത്മാര്‍ത്ഥമായ ശ്രമം കൂടെ നടത്തണമെന്ന് അഭ്യര്‍ത്ഥിക്കുന്നു.

പൊലീസിന്‍റെ നിയന്ത്രണത്തിലുള്ള തിരുവനന്തപുരത്തെ വട്ടിയൂര്‍ക്കാവ് ഷൂട്ടിങ് റെയ്ഞ്ച് കോവിഡ് ഫസ്റ്റ്ലൈന്‍ ട്രീറ്റ്മെന്‍റ് സെന്‍ററായി ഉപയോഗിക്കാന്‍ വിട്ടുനല്‍കും. കോവിഡ് ബാധിതരാകുന്ന പൊലീസ്, ആരോഗ്യപ്രവര്‍ത്തകര്‍, ശുചീകരണത്തൊഴിലാളികള്‍ എന്നിവര്‍ക്ക് വേണ്ടിയാണ് ഈ കേന്ദ്രം ഉപയോഗിക്കുക. പൊലീസ് വകുപ്പിലെ ഡോക്ടര്‍മാരുടെ സേവനവും ഇവിടെ ലഭ്യമാക്കും. 50 പേര്‍ക്ക് താമസിക്കാനുള്ള സൗകര്യമാണ് ഇവിടെ ഉണ്ടാകുക.

ആരോഗ്യപ്രവര്‍ത്തകര്‍
ജൂലൈ 20 വരെ 267 ആരോഗ്യ പ്രവര്‍ത്തകരാണ് സംസ്ഥാനത്ത് കോവിഡ് രോഗബാധിതരായത്. 62.55 ശതമാനം ആരോഗ്യപ്രവര്‍ത്തകരും ആശുപത്രികളില്‍ രോഗികള്‍ക്ക് ശുശ്രൂഷ നല്‍കിയിരുന്നവരാണ്. 41 ശതമാനം പേര്‍ നേരിട്ട് ശുശ്രൂഷ നല്‍കിയവരും 22 ശതമാനം പേര്‍ ഇന്‍ഡയറക്റ്റ് പേഷ്യന്‍റ് കെയര്‍ നല്‍കിയവരും ആണ്. 23.2 ശതമാനം പേര്‍ ഫീല്‍ഡ് വര്‍ക്കില്‍ ഏര്‍പ്പെട്ടിരുന്നവര്‍ ആണ്. 63 നഴ്സുമാര്‍ക്കും 47 ഡോക്ടര്‍മാര്‍ക്കുമാണ് ഇതുവരെ രോഗം പിടിപെട്ടത്.

ഇന്ത്യയിലെ മൊത്തം സ്ഥിതിവിശേഷം വിലയിരുത്തുമ്പോള്‍ നമ്മുടെ ആരോഗ്യ പ്രവര്‍ത്തകര്‍ക്ക് മെച്ചപ്പെട്ട സുരക്ഷ ഒരുക്കാന്‍ നമുക്കായി എന്നു മനസ്സിലാക്കാന്‍ സാധിക്കും. ഇതിനകം നൂറില്‍പരം ഡോക്ടര്‍മാര്‍ കോവിഡ് ബാധിച്ച് രാജ്യത്ത് മരണമടയുകയുണ്ടായി. കേരളം ഒരുക്കിയ സുരക്ഷയും സൗകര്യങ്ങളും നല്‍കിയ പിന്തുണയും നമ്മുടെ ആരോഗ്യ പ്രവര്‍ത്തകരെ അത്തരമൊരു സാഹചര്യത്തിലേയ്ക്ക് വീഴാതെ കാത്തു. ഇപ്പോള്‍ രോഗങ്ങള്‍ കൂടിയ അവസരത്തില്‍ ആരോഗ്യ പ്രവര്‍ത്തകരുടെ സുരക്ഷ കൂടുതല്‍ ശക്തമാക്കാനുള്ള നടപടികള്‍ സര്‍ക്കാര്‍ സ്വീകരിക്കും.
സാമൂഹിക അകലം പാലിക്കുന്നത് ഉള്‍പ്പെടെയുള്ള സുരക്ഷാ പ്രോട്ടോകോള്‍ അനുസരിക്കുന്നതില്‍ വീഴ്ചവരുത്തുന്ന സ്ഥാപന ഉടമകള്‍ക്കെതിരെ നിയമ നടപടികള്‍ സ്വീകരിക്കുന്നതിന് എല്ലാ ജില്ലകളിലും അഡീഷണല്‍ എസ്പിമാരുടെ നേതൃത്വത്തില്‍ പ്രത്യേക പ്രോസിക്യൂഷന്‍ വിഭാഗത്തിന് രൂപം നല്‍കി. സര്‍ക്കാരിന്‍റെയും പൊലീസിന്‍റെയും നിയമപരമായ നിര്‍ദ്ദേശങ്ങള്‍ അനുസരിക്കാത്ത സ്ഥാപന ഉടമകള്‍ക്കെതിരെ അറസ്റ്റ് ഉള്‍പ്പെടെയുള്ള നടപടികള്‍ സ്വീകരിക്കുമെന്ന് നേരത്തേതന്നെ വ്യക്തമാക്കിയിട്ടുണ്ട്.

വളരെ അത്യാവശ്യമുള്ള മെഡിക്കല്‍ ആവശ്യങ്ങള്‍, മരണം എന്നിവയുമായി ബന്ധപ്പെട്ട് മാത്രമേ സംസ്ഥാന അതിര്‍ത്തി കടന്ന് യാത്ര ചെയ്യാന്‍ അനുവദിക്കുകയുള്ളൂ. ഇങ്ങനെ യാത്ര ചെയ്യുന്നവര്‍ ആവശ്യം വ്യക്തമാക്കി ഇ-ജാഗ്രതാ പോര്‍ട്ടലില്‍ രജിസ്റ്റര്‍ ചെയ്യേണ്ടതാണ്.

മാസ്ക് ധരിക്കാത്ത 5095 സംഭവങ്ങള്‍ സംസ്ഥാനത്ത് ഇന്ന് റിപ്പോര്‍ട്ട് ചെയ്തിട്ടുണ്ട്. ക്വാറന്‍റൈന്‍ ലംഘിച്ച 7 പേര്‍ക്കെതിരെ ഇന്ന് കേസ് രജിസ്റ്റര്‍ ചെയ്തു.

വാക്സിന്‍
ബ്രിട്ടനിലെ ഓക്സ്ഫോര്‍ഡ് സര്‍വകലാശാല വികസിപ്പിച്ചെടുക്കാന്‍ ശ്രമിക്കുന്ന കോവിഡ് വാക്സിന്‍ ഒന്നാംഘട്ട പരീക്ഷണം വിജയകരമായി പൂര്‍ത്തിയാക്കിയിരിക്കുന്നു എന്ന സന്തോഷ വാര്‍ത്ത മാധ്യമങ്ങള്‍ വലിയ പ്രാധാന്യം നല്‍കി പ്രസിദ്ധീകരിച്ചിട്ടുണ്ട്. വസൂരിക്കെതിരെ 1796ല്‍ വാക്സിന്‍ കണ്ടെത്തിയ എഡ്വര്‍ഡ് ജെന്നറിന്‍റെ പേരിലുള്ള ഇന്‍സ്റ്റിറ്റ്യൂട്ടിലാണ് വാക്സിന്‍ ഗവേഷണം നടക്കുന്നത്.

ചിമ്പാന്‍സിയില്‍ രോഗകാരണമാവുന്ന അഡിനോ വൈറസുപയോഗിച്ചാണ് വാക്സിന്‍ നിര്‍മിക്കുന്നത്. ആദ്യഘട്ട മനുഷ്യപരീക്ഷണത്തില്‍ വാക്സിന്‍റെ രോഗപ്രതിരോധ സാധ്യതയും സുരക്ഷിതത്വവുമാണ് വിലയിരുത്തുന്നത്. രണ്ടിലും വാക്സിന്‍ വിജയിച്ചുവെന്നാണ് സൂചന. രണ്ടാമത്തേയും  മൂന്നാമത്തേയും ഘട്ടത്തിലുള്ള പരീക്ഷണം പൂര്‍ത്തിയായാല്‍ ഔഷധ നിയന്ത്രണ ഏജന്‍സികളുടെ അംഗീകാരം തേടേണ്ടിവരും. കാലതാമസം ഒഴിവാക്കാനായി കോടിക്കണക്കിന് ഡോസ് വാക്സിന്‍ ഇതിനകം നിര്‍മിച്ചിട്ടുണ്ട്.

ഇന്ത്യയിലെ സീറം ഇന്‍സ്റ്റിറ്റ്യൂട്ടും ബ്രിട്ടീഷ് സ്വീഡിഷ് കമ്പനിയായ ആസ്ട്ര സെനക്കയുമായി സഹകരിച്ചാണ് സര്‍വകലാശാല ഗവേഷണം നടത്തുന്നത്. ഓക്സ്ഫോര്‍ഡ് വാക്സിനു പുറമേ ചൈനയിയിലും അമേരിക്കയിലും റഷ്യയിലും വാക്സിന്‍ ഗവേഷണം പുരോഗമിക്കുന്നുണ്ട്. ഇവയില്‍ ഒന്നെങ്കിലും ഈ വര്‍ഷം അവസാനമോ അടുത്ത വര്‍ഷം ആദ്യമോ ലഭ്യമാവുമെന്നാണ് വിദഗ്ധര്‍ അവകാശപ്പെടുന്നത്. തീര്‍ച്ചയായും ആശ്വാസം പകരുന്ന വിവരമാണിത്.

കടലാക്രമണം
സംസ്ഥാനത്ത് കടലാക്രമണം ശക്തമാണ്. തീരശോഷണം നേരിടുന്ന 30 തദ്ദേശസ്വയംഭരണ സ്ഥാപനങ്ങള്‍ കണ്ടെയ്ന്‍മെന്‍റ് സോണുകളാണ്.

ബണ്ട് സംരക്ഷണം, കടല്‍തീരത്തെ വീട് സംരക്ഷണം എന്നിവ ആവശ്യമായി വരികയാണെങ്കില്‍ പണം വിനിയോഗിക്കാന്‍ അനുമതി നല്‍കിയിട്ടുണ്ട്. തദ്ദേശ സ്വയംഭരണ സ്ഥാപനത്തിനും ജലസേചന വകുപ്പിനും, കൃഷി വകുപ്പിനും സ്വന്തമായി  ഈ പ്രവൃത്തിക്ക് പണം ലഭ്യമല്ല എങ്കില്‍ മണല്‍നിറച്ച കയര്‍ ചാക്കുകളോ ജിയോ ട്യൂബുകളോ ഇടുന്ന പ്രവര്‍ത്തികള്‍ക്ക് ഒരു പഞ്ചായത്തില്‍ പരമാവധി രണ്ടു ലക്ഷം രൂപ, മുനിസിപ്പാലിറ്റിയില്‍ മൂന്നു ലക്ഷം രൂപ, കോര്‍പ്പറേഷനില്‍ അഞ്ചു ലക്ഷം രൂപ വരെ ദുരന്ത പ്രതികരണ നിധിയില്‍ നിന്നും വഹിക്കും.

ഓണക്കിറ്റ്
കോവിഡ് 19ന്‍റെ പശ്ചാത്തലത്തില്‍ ഓണത്തോടനുബന്ധിച്ച് 88 ലക്ഷത്തോളം വരുന്ന റേഷന്‍ കാര്‍ഡ് ഉടമകള്‍ക്ക് പലവ്യഞ്ജന കിറ്റുകള്‍ സൗജന്യമായി വിതരണം ചെയ്യും. 11 ഇനങ്ങളാണ്  (പഞ്ചസാര, ചെറുപയര്‍/വന്‍പയര്‍, ശര്‍ക്കര, മുളകുപൊടി, മല്ലിപ്പൊടി, മഞ്ഞള്‍പ്പൊടി, സാമ്പാര്‍ പൊടി, വെളിച്ചെണ്ണ/സണ്‍ഫ്ളവര്‍ ഓയില്‍, പപ്പടം, സേമിയ/പാലട, ഗോതമ്പ് നുറുക്ക്) കിറ്റിലുണ്ടാവുക. ആഗസ്ത് അവസാന ആഴ്ചയോടെ വിതരണം തുടങ്ങും. ഇതുകൂടാതെ മതിയായ അളവില്‍ റേഷന്‍ ധാന്യവിഹിതം ലഭിക്കാത്ത മുന്‍ഗണനാ ഇതര വിഭാഗങ്ങള്‍ക്ക് ആഗസ്തില്‍ പത്തുകിലോ അരി വീതം 15 രൂപ നിരക്കില്‍ വിതരണം ചെയ്യും.

സഹായം
കോണ്‍ഫെഡറേഷന്‍ ഓഫ് റിയല്‍ എസ്റ്റേറ്റ്സ് ഡെവലപ്പ്മെന്‍റ് അസോസിയേഷന്‍ ഓഫ് ഇന്ത്യയുടെ നേതൃത്വത്തില്‍ പത്തനംതിട്ട ജില്ലയില്‍ കോവിഡ് റാപ്പിഡ് പരിശോധനക്കായി വാഹനം കൈമാറി.

കോഴിക്കോട് ജില്ലയിലെ ഹയര്‍സെക്കണ്ടറി വിഭാഗം എന്‍എസ്എസ് വളണ്ടിയര്‍മാര്‍ ജില്ലയിലെ കോവിഡ് ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളിലേക്ക് 4,63,200 രൂപ വില വരുന്ന 5790 ബെഡ് ഷീറ്റുകള്‍ കൈമാറി.

ദുരിതാശ്വാസം
കെഎസ്ആര്‍ടിസി പെന്‍ഷനേഴ്സ് ഓര്‍ഗനൈസേഷന്‍, അംഗങ്ങളില്‍ നിന്ന് സ്വരൂപിച്ച 67,82,301 രൂപ. നേരത്തെ 10 ലക്ഷം രൂപ കൈമാറിയിരുന്നു.

എല്‍ഐസി പെന്‍ഷനേഴ്സ് അസോസിയേഷന്‍ കോഴിക്കോട് ജില്ല 4 ലക്ഷം രൂപ.

നാഷണല്‍ ഫെഡറേഷന്‍ ഓഫ് പോസ്റ്റല്‍ എംപ്ലോയീസ്, കണ്ണൂര്‍ ജില്ല 1,50,000 രൂപ.

പിലിക്കോട് നവദമ്പതികളായ ഇ വി മേഘ, സജിന്‍ എന്നിവര്‍ 1 ലക്ഷം രൂപ.

ഓട്ടോറിക്ഷ തൊഴിലാളി യൂണിയന്‍ (സിഐ ടിയു) പാനൂര്‍ ഏരിയാ കമ്മിറ്റി ബിരിയാണി ചലഞ്ചിലൂടെ സമാഹരിച്ച 80,000 രൂപ.

മുംബൈ മലയാളി വി വി ശ്രീനിവാസന്‍ 50,000 രൂപ.

സിപിഐ എം നോര്‍ത്ത് മേനപ്രം ബ്രാഞ്ചും ചെമ്പട വാട്സ്ആപ്പ് ഗ്രൂപ്പും ബിരിയാണി ചലഞ്ചിലൂടെ സമാഹരിച്ച 50,000 രൂപ.

കേരള എക്സൈസ് സ്റ്റാഫ് അസോസിയേഷന്‍ കാസര്‍കോട് ജില്ലാ കമ്മിറ്റി 50,000 രൂപ.

തൃക്കരിപ്പൂര്‍ ഇ കെ നായനാര്‍ അക്കാദമി 50,000 രൂപ.

മുഴക്കോം ചാലക്കാട്ട് മാടം ചെക്കിപ്പാറ ഭഗവതി ക്ഷേത്രം 50,000 രൂപ.

ചലഞ്ചേഴ്സ് ആര്‍ട്സ് ആന്‍റ് സ്പോര്‍ട്സ് ക്ലബ്ബ് മേലൂര്‍ കലാമന്ദിരം, ബിരിയാണി ഫെസ്റ്റിലൂടെ സമാഹരിച്ച 44,444 രൂപ.

എന്‍ ജി കമ്മത്ത് സ്മാരക കലാവേദി, ചായോത്ത് 34,583 രൂപ.

കോസ്മോ ആര്‍ട്സ് ആന്‍റ് സ്പോര്‍ട്സ് ക്ലബ്ബ് തൂവ്വക്കുന്ന്, ചിറക്കര, ബിരിയാണി ചലഞ്ചിലൂടെ സമാഹരിച്ച 26,500 രൂപ.

എസ്എഫ്ഐ കാഞ്ഞങ്ങാട് ഏരിയ കമ്മിറ്റി 25,000 രൂപ.

കയ്യൂര്‍ ഇ കെ നായനാര്‍ ആര്‍സ് ആന്‍റ് സ്പോര്‍ട്ട്സ് ക്ലബ് 25,210 രൂപ.

മുഖ്യമന്ത്രിയുടെ വാര്‍ത്താ സമ്മേളനത്തില്‍ നിന്ന്
സംസ്ഥാനത്ത് 720 പേര്‍ക്കാണ് ഇന്ന് കോവിഡ് സ്ഥിരീകരിച്ചത്. ഇതുവരെ രോഗം സ്ഥിരീകരിച്ചവരുടെ എണ്ണം 13,994 ആണ്. ഇന്ന് 528 പേര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. അതില്‍ 34 പേരുടെ ഉറവിടം വ്യക്തമായിട്ടില്ല. വിദേശത്തുനിന്ന് 82 പേര്‍. മറ്റു സംസ്ഥാനങ്ങളില്‍നിന്ന് 54 പേര്‍. ഹെല്‍ത്ത്വര്‍ക്കര്‍മാര്‍ 17, ഡിഎസ്സി 29, ഐടിബിപി 4, കെഎല്‍എഫ് 1, കെഎസ്സി 4.

ഇന്ന് ഒരു മരണം റിപ്പോര്‍ട്ട് ചെയ്തു. തിരുവനന്തപുരം ജില്ലയിലെ പുല്ലുവിളയില്‍ വിക്ടോറിയ (72)യാണ് മരിച്ചത്. വാര്‍ധക്യസഹജങ്ങളായ അസുഖങ്ങളുണ്ടായിരുന്നു. അവരുടെ നിര്യാണത്തില്‍ അനുശോചനം രേഖപ്പെടുത്തുന്നു.

ഇന്ന് 274 പേര്‍ രോഗമുക്തി നേടി.

പോസിറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 151, കൊല്ലം 85, എറണാകുളം 80, മലപ്പുറം 61, കണ്ണൂര്‍ 57, പാലക്കാട് 46, ആലപ്പുഴ 46, കാസര്‍കോട് 40, പത്തനംതിട്ട 40, കോഴിക്കോട് 39, കോട്ടയം 39, തൃശൂര്‍ 19, വയനാട് 17.

നെഗറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 11, കൊല്ലം 11, ആലപ്പുഴ 70, കോട്ടയം 10, ഇടുക്കി 5, എറണാകുളം 7, തൃശൂര്‍ 6, പാലക്കാട് 34, മലപ്പുറം 51, കോഴിക്കോട് 39, വയനാട് 14, കണ്ണൂര്‍ 10, കാസര്‍കോട് 6.

കഴിഞ്ഞ 24 മണിക്കൂറിനകം 19,524 സാമ്പിളുകള്‍ പരിശോധിച്ചു. 1,62,444 പേരാണ് നിരീക്ഷണത്തിലുള്ളത്. 8277 പേര്‍ ആശുപത്രികളില്‍. ഇന്നു മാത്രം 984 പേരെ ആശുപത്രിയില്‍ പ്രവേശിപ്പിച്ചു. ഇപ്പോള്‍ ചികിത്സയിലുള്ളവര്‍ 8056.

ഇതുവരെ ആകെ 3,08,348 സാമ്പിളുകളാണ് പരിശോധനയ്ക്കായി അയച്ചത്. ഇതില്‍ 7410 സാമ്പിളുകളുടെ ഫലം വരാനുണ്ട്. ഇതുകൂടാതെ സെന്‍റിനല്‍ സര്‍വൈലന്‍സിന്‍റെ ഭാഗമായി മുന്‍ഗണനാ ഗ്രൂപ്പുകളില്‍ നിന്ന് 1,00,942 സാമ്പിളുകള്‍ ശേഖരിച്ചതില്‍ 96,544 സാമ്പിളുകള്‍ നെഗറ്റീവ് ആയി. സംസ്ഥാനത്തെ ഹോട്ട്സ്പോട്ടുകളുടെ എണ്ണം 353 ആയി.

സംസ്ഥാനത്ത് കോവിഡ് രോഗബാധിതരുടെ എണ്ണം കൂടുന്ന സാഹചര്യത്തില്‍ ചികിത്സാ സൗകര്യങ്ങള്‍ ആവശ്യത്തിനുണ്ടോ എന്ന് പലരും ഉല്‍കണ്ഠപ്പെടുന്നുണ്ട്. നിലവില്‍ അത്തരം ആശങ്കകള്‍ ആര്‍ക്കും ഉണ്ടാകേണ്ടതില്ല. തദ്ദേശഭരണ സ്ഥാപനങ്ങളുടെ കീഴില്‍ കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകളുടെ (സിഎഫ്എല്‍ടിസി) സജ്ജീകരണം  ദ്രുതഗതിയില്‍ പുരോഗമിക്കുകയാണ്.

കോവിഡ് ടെസ്റ്റ് റിസള്‍ട്ട് പോസിറ്റീവായ കേസുകളില്‍ പ്രകടമായി രോഗലക്ഷണങ്ങള്‍ ഇല്ലാത്തവരേയും നേരിയ രോഗലക്ഷണങ്ങള്‍ ഉള്ളവരെയുമാണ് സിഎഫ്എല്‍ടിസികളില്‍ കിടത്തി ചികിത്സിക്കുന്നത്.  

ജൂലൈ 19 വരെയുള്ള കണക്കുകള്‍ പ്രകാരം സംസ്ഥാനത്തൊട്ടാകെ 187  സിഎഫ്എല്‍ടിസി കളിലായി 20404 ബെഡുകള്‍ തയ്യാറായിക്കഴിഞ്ഞു. 305 ഡോക്ടര്‍മാരേയും 572 നഴ്സുമാരേയും 62 ഫാര്‍മസിസ്റ്റുകളേയും 27 ലാബ് ടെക്നീഷ്യډാരേയും ജൂലൈ 19നുള്ളില്‍  സിഎഫ്എല്‍ടിസികളുടെ പ്രവര്‍ത്തന ചുമതലയ്ക്കായി ഏര്‍പ്പെടുത്തിയിട്ടുണ്ട്. 742 സിഎഫ്എല്‍ടിസി കളാണ് ജൂലൈ 23നോടകം തയ്യാറാകുമെന്ന് പ്രതീക്ഷിക്കുന്നത്. അതോടെ ബെഡുകളുടെ എണ്ണം 69215 ആയി ഉയരും.

എല്ലാ  സിഎഫ്എല്‍ടിസികളിലും  രാവിലെ മുതല്‍ വൈകുന്നേരം വരെ ഒപി നടത്തുവാനുള്ള സൗകര്യവും ടെലിമെഡിസിന് ആവശ്യമായ ലാന്‍ഡ്ലൈനും ഇന്‍റര്‍നെറ്റ് സൗകര്യങ്ങളും ഉണ്ടായിരിക്കും. ഓരോ  സിഎഫ്എല്‍ടിസിക്കും ആംബുലന്‍സ് സൗകര്യമേര്‍പ്പെടുത്തും. ഐസൊലേഷനിലുള്ളവര്‍ക്ക് ബാത്ത്റൂമോടു കൂടിയ പ്രത്യേക മുറികള്‍ ലഭിക്കും. വെള്ളവും വൈദ്യുതിയും മുടങ്ങാതെ ലഭ്യമാകാനും ഭക്ഷണം എത്തിക്കാനും വേണ്ട ക്രമീകരണങ്ങള്‍ ഉറപ്പു വരുത്തുന്നതുമായിരിക്കും. ഫ്രണ്ട് ഓഫീസ്, ഡോക്ടര്‍മാരുടെ കണ്‍സള്‍ട്ടിങ് റൂം, നഴ്സിങ് സ്റ്റേഷന്‍, ഫാര്‍മസി, സ്റ്റോര്‍, ഒബ്സര്‍വേഷന്‍ റൂം, തുടങ്ങിയ സൗകര്യങ്ങളും എല്ലാ സിഎഫ്എല്‍ടിസികളിലും ഉണ്ടായിരിക്കും. മാലിന്യങ്ങള്‍ ശാസ്ത്രീയമായി സംസ്കരിക്കാന്‍ വേണ്ട സംവിധാനങ്ങളും ഏര്‍പ്പാടാക്കും. ഇവിടങ്ങളില്‍ സെമി പെര്‍മനന്‍റ് ടോയ്ലറ്റുകള്‍ ഏര്‍പ്പെടുത്തും.

ആന്‍റിജന്‍ ടെസ്റ്റ്  പോസിറ്റീവ് ആയവരില്‍  രോഗലക്ഷണങ്ങളില്ലാത്തവരേയും നിലവിലെ സാഹചര്യത്തില്‍ കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകളിലേയ്ക്കു കൊണ്ടുപോകേണ്ടി വരും. രോഗലക്ഷണങ്ങള്‍ ഇല്ലാത്തവരില്‍നിന്നും രോഗം പകരാനുള്ള സാധ്യതയുണ്ട്. ഇതുവഴി  സമൂഹവ്യാപനത്തിന് സാധ്യതയുണ്ട്. ആയതിനാല്‍ രോഗലക്ഷണങ്ങള്‍ ഇല്ലെങ്കിലും പോസിറ്റീവ് ആയവരെ മാറ്റിപ്പര്‍പ്പിക്കുന്നതാണ് ഉചിതം. അവര്‍ ആരോഗ്യ പ്രവര്‍ത്തകരുടെ നിര്‍ദ്ദേശങ്ങള്‍ പാലിച്ചു ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകളിലേക്ക് പോകേണ്ടതാണ്. ടെസ്റ്റ് റിസള്‍ട്ട് നെഗറ്റീവ് ആകുന്ന മുറയ്ക്ക് സര്‍ക്കാര്‍ മാനദണ്ഡപ്രകാരം തിരികെ വീട്ടില്‍ എത്തിക്കും.
 
ടെസ്റ്റിങ്
നമ്മള്‍ ഒറ്റ ടെസ്റ്റിങ് സെന്‍ററിലാണ് തുടങ്ങിയത്. ഇപ്പോള്‍ സര്‍ക്കാര്‍ മേഖലയില്‍ 59ഉം സ്വകാര്യമേഖലയില്‍ 51ഉം ടെസ്റ്റിങ് കേന്ദ്രങ്ങളുണ്ട്. ആദ്യം പിസിആര്‍ ടെസ്റ്റ് മാത്രമാണുണ്ടായിരുന്നത് ഇപ്പോള്‍ ആന്‍റിബോഡി, ആന്‍റിജന്‍, ട്രൂനാറ്റ്, ജീന്‍ എക്സ്പര്‍ട്ട്, ഇമ്യൂണോ അസേ ടെസ്റ്റുകളുണ്ട്. ടെസ്റ്റുകളുടെ എണ്ണവും കേന്ദ്രങ്ങളും ഇനിയും വര്‍ധിപ്പിക്കും.

സ്വകാര്യ ആശുപത്രി പ്രതിനിധികളുമായി രണ്ടു ചര്‍ച്ച നടത്തി കോവിഡ് ചികിത്സാ ഫീസും മറ്റും നിശ്ചയിച്ചു. നിരവധി സ്വകാര്യ ആശുപത്രികള്‍ കോവിഡ് ചികിത്സാ കേന്ദ്രങ്ങള്‍ ആരംഭിച്ചിട്ടുണ്ട്. രണ്ട് സ്വശ്രയ സ്വകാര്യ മെഡിക്കല്‍ കോളേജുകള്‍ കണ്ണൂരും വയനാട്ടിലും കോവിഡ് ചികിത്സക്ക് മാത്രമായി വിട്ടു നല്‍കിയിട്ടുണ്ട്.

കേരളത്തിന്‍റെ കോവിഡ് പ്രതിരോധത്തിലുണ്ടായ പാളിച്ചകളാണ് നിലവില്‍ കേസുകളുടെ എണ്ണം കൂടാന്‍ കാരണമായത് എന്ന തരത്തിലുള്ള പ്രചരണം ചിലര്‍ നടത്തുന്നുണ്ട്. എണ്ണം മനഃപ്പൂര്‍വം കുറച്ചു കാണിക്കുന്നു എന്നായിരുന്നു ആദ്യത്തെ പരാതി. ഇപ്പോള്‍ എണ്ണം കൂടുന്നു എന്നായി. ഇങ്ങനെ പരാതി പറഞ്ഞു നടക്കുന്നവര്‍ യാഥാര്‍ഥ്യമെന്താണെന്നു മനസ്സിലാക്കാന്‍ തയ്യാറാകുന്നില്ല. എത്ര തവണ ആവര്‍ത്തിച്ചാലും കേള്‍ക്കാത്ത മട്ടില്‍ വീണ്ടും പറഞ്ഞതു തന്നെ പറഞ്ഞുകൊണ്ടിരിക്കും. ഉറക്കം നടിക്കുന്നവരെ ഉണര്‍ത്താനാവില്ലല്ലോ.

നിരവധി പ്രത്യേകതകള്‍ കാരണം, കോവിഡ് 19 മഹാമാരി ഏറ്റവുമധികം പടര്‍ന്നു പിടിക്കാന്‍ സാധ്യതയുള്ള ഒരു പ്രദേശമാണ് കേരളം. ദേശീയ ശരാശരിയുടെ ഇരട്ടിയിലുമധികമാണ് നമ്മുടെ ജനസാന്ദ്രത. ജനസംഖ്യാനുപാതികമായി നോക്കിയാല്‍ ഇന്ത്യയില്‍ ഏറ്റവുമധികം വയോജനങ്ങളുള്ള പ്രദേശമാണ് ഇത്. അത്തരത്തില്‍ കോവിഡ് മഹാമാരിയ്ക്ക് വലിയ നാശം വിതയ്ക്കാന്‍ കഴിയുന്ന നിരവധി അനുകൂല ഘടകങ്ങളാണ് സംസ്ഥാനത്തുള്ളത്.

എന്നാല്‍, ലോകത്തു തന്നെ കേസ് ഫറ്റാലിറ്റി റേറ്റ് ഏറ്റവും കുറഞ്ഞ പ്രദേശങ്ങളിലൊന്നാണ് ഇന്ന് കേരളം. കേരളത്തിലെ കേസ് ഫറ്റാലിറ്റി റേറ്റ് 0.33 ശതമാനം ആണ്. അതായത് 100 പേരില്‍ 0.33 പേരാണ് കോവിഡ് ബാധിച്ചു മരിച്ചത്. അതേ സമയം ഡല്‍ഹിയിലെ കേസ് ഫറ്റാലിറ്റി റേറ്റ് 3 ശതമാനവും, തമിഴ്നാട്ടില്‍ 1.5 ശതമാനവും,  മഹാരാഷ്ട്രയില്‍ 3.8 ശതമാനവും. ഗുജറാത്തില്‍ 4.4 ശതമാനവും കര്‍ണാടകയില്‍ 2.1 ശതമാനവും ആണ്.

ഇന്നലെ മാത്രം ഇന്ത്യയില്‍ റിപ്പോര്‍ട്ട് ചെയ്യപ്പെട്ടത് 36,806 കേസുകളും 596 മരണങ്ങളുമാണ്. നമ്മുടെ അയല്‍ സംസ്ഥാനങ്ങളുടെ കാര്യമെടുത്താല്‍, ഇന്നലെ തമിഴ്നാട്ടില്‍ 4,985 കേസുകളും 70 മരണങ്ങളുമാണ് റിപ്പോര്‍ട്ട് ചെയ്യപ്പെട്ടത്. കര്‍ണ്ണാടകത്തിലാകട്ടെ, ഇന്നലെ 3,648 കേസുകളും 72 മരണങ്ങളും റിപ്പോര്‍ട്ട് ചെയ്യപ്പെട്ടു.  ഈ സമയത്തും ജനസാന്ദ്രതയും, വയോജന സാന്ദ്രതയും, ഹൃദ്രോഗം പോലുള്ള രോഗങ്ങളുടെ എണ്ണവുമൊക്കെ വളരെ കൂടുതലുള്ള ഒരു പ്രദേശത്ത് ഇത്ര കുറഞ്ഞ മരണങ്ങള്‍ മാത്രമുണ്ടാകുന്നത് സൂചിപ്പിക്കുന്നത് കേരളം ഉയര്‍ത്തിയ പ്രതിരോധത്തിന്‍റെ മികവാണ്.

ടെസ്റ്റുകള്‍ ചെയ്യുന്നത് നോക്കിയാലും കേരളം ബഹുദൂരം മുന്നിലാണ്. ഒരു പോസിറ്റീവ് കേസിനു 44 ടെസ്റ്റുകളാണ് നമ്മള്‍ നടത്തുന്നത്. മഹാരാഷ്ട്രയില്‍ അത് 5ഉം, ഡല്‍ഹിയില്‍ 7ഉം, തമിഴ്നാടില്‍ 11ഉം കര്‍ണാടകയില്‍ 17ഉം, ഗുജറാത്തില്‍ 11ഉം ആണ്. കേരളം ടെസ്റ്റുകളുടെ കാര്യത്തില്‍ പുറകിലാണെന്നു പറയുന്നവര്‍ നോക്കുന്നത് ടെസ്റ്റുകളുടെ കേവലമായ എണ്ണമാണ്.

അതു ശാസ്ത്രീയമായ രീതിയല്ല. ഒരു പോസിറ്റിവ് കേസിനു ആനുപാതികമായി എത്ര ടെസ്റ്റുകള്‍ ആണ് നടത്തുന്നത് എന്നതാണ് പ്രധാനം. ഐസിഎംആറിലെ പ്രധാന ശാസ്ത്രജ്ഞനായ രാമന്‍ ഗംഗാത്ഖേദ്ഖര്‍ കേരളം കൈക്കൊണ്ട രീതിയെക്കുറിച്ച് എടുത്തുപറയുകയും എന്തുകൊണ്ട് അത് അംഗീകരിക്കപ്പെടേണ്ടതാണെന്ന് വിശദീകരിക്കുകയും ചെയ്തിട്ടുണ്ട്.

കോവിഡ് മഹാമാരിയെ പ്രതിരോധിക്കാന്‍ നമ്മള്‍ കാണിച്ച കരുതലിന്‍റേയും ജാഗ്രതയുടേയും ഗുണഫലമാണ് രാജ്യമൊന്നടങ്കം രോഗം നാശം വിതയ്ക്കുന്ന സന്ദര്‍ഭത്തിലും കേരളത്തിലെ മെച്ചപ്പെട്ട സ്ഥിതിവിശേഷം. ജനുവരി 30നാണ് ലോകാരോഗ്യ സംഘടന ആഗോള തലത്തില്‍ കോവിഡ് 19 പ്രതിരോധത്തിനായി അടിയന്തര മുന്നറിയിപ്പ് നല്‍കിയത്.

എന്നാല്‍, കേരളം ജനുവരി ആദ്യം തന്നെ പ്രശ്ന സാധ്യതകള്‍ മുന്‍കൂട്ടിക്കണ്ട് പ്രതിരോധ പ്രവര്‍ത്തനങ്ങള്‍ ആരംഭിച്ചു. അതുകൊണ്ടാണ് വുഹാനില്‍ നിന്നു വന്ന ആദ്യത്തെ കേസുകള്‍ കണ്ടെത്താനായത്. അതിനെത്തുടര്‍ന്ന് കോണ്ടാക്റ്റുകള്‍ ട്രെയ്സ് ചെയ്യാനും ക്വാറന്‍റൈന്‍ ചെയ്യാനും രോഗത്തെ മെച്ചപ്പെട്ട രീതിയില്‍ തടയിടാനും കേരളത്തിനു സാധിച്ചു. സെക്കണ്ടറി കോണ്ടാക്ടുകള്‍ ട്രെയ്സ് ചെയ്യുന്ന ഇന്ത്യയിലെ ഒരേയൊരു സംസ്ഥാനം കേരളമാണെന്ന് നാം മനസ്സിലാക്കണം.

അത്രമാത്രം ശ്രദ്ധയും അധ്വാനവും രോഗപ്രതിരോധത്തിനായി നമ്മള്‍ അര്‍പ്പിച്ചിട്ടുണ്ട്.  നമ്മള്‍ കാണിച്ച തരത്തിലുള്ള ജാഗ്രതയും തയ്യാറെടുപ്പുകളും ലോകത്തു തന്നെ വളരെ ചുരുക്കം പ്രദേശങ്ങളേ കാണിച്ചുള്ളു. അതുകൊണ്ടാണ് പലയിടത്തും രോഗം പടര്‍ന്നുപിടിച്ചതെന്ന് വിദഗ്ധര്‍ അഭിപ്രായപ്പെടുന്നു.

സംസ്ഥാനത്തിന്‍റെ പൊതുചിത്രം എടുത്താല്‍ 101 ആക്ടീവ് ക്ലസ്റ്ററുകളാണുള്ളത്. അതില്‍ 18 ലാര്‍ജ് കമ്യൂണിറ്റി ക്ലസ്റ്ററുകളാണ്. തിരുവനന്തപുരത്ത് ഇന്ന് സ്ഥിരീകരിച്ച 151ല്‍ 137ഉം സമ്പര്‍ക്കത്തിലൂടെയാണ്. ഉറവിടം അറിയാത്ത ഏഴുപേരുമുണ്ട്. മൂന്ന് തീരദേശ മേഖലകളിലും ഇന്‍സിഡന്‍റ് കമാന്‍ഡര്‍മാരുടെ നേതൃത്വത്തില്‍ പ്രതിരോധ പ്രവര്‍ത്തനങ്ങള്‍ നടക്കുകയാണ്. പൊതുജനങ്ങള്‍ക്ക് കോവിഡുമായി ബന്ധപ്പെട്ട ആവശ്യങ്ങള്‍ക്കും വിവരങ്ങള്‍ കൈമാറുന്നതിനുമായി 24 മണിക്കൂര്‍ കണ്‍ട്രോള്‍ റൂമും പ്രവര്‍ത്തനമാരംഭിച്ചിട്ടുണ്ട്. കോവിഡിന് പുറമെയുള്ള രോഗങ്ങളുടെ ചികിത്സ പരമാവധി വീടുകളില്‍ ലഭ്യമാക്കാന്‍ ടെലിമെഡിസിന്‍ സൗകര്യം ഏര്‍പ്പെടുത്തി.

കൊല്ലം ജില്ലയില്‍ 76 പേര്‍ക്കാണ് ഇന്ന് സമ്പര്‍ക്കത്തിലൂടെ രോഗബാധ. മൂന്ന് കേന്ദ്രങ്ങളില്‍ പ്രാഥമിക ചികിത്സാ കേന്ദ്രങ്ങള്‍ ഇന്ന് തുറന്നു.

പത്തനംതിട്ട 40ല്‍ 20 പേര്‍ക്ക് സമ്പര്‍ക്കത്തിലൂടെയാണ് രോഗബാധ. ജില്ലയില്‍ ഇതുവരെ 1010 റാപ്പിഡ് ആന്‍റിജന്‍ ടെസ്റ്റ് നടത്തിയതില്‍ 76 പേര്‍ക്കാണ് രോഗം സ്ഥിരീകരിച്ചത്. നിലവില്‍ ജില്ലയിലെ വലിയ ക്ലസ്റ്റര്‍ പത്തനംതിട്ട നഗരസഭയാണ്. ഒപ്പം അടൂര്‍, തുകലശേരി എന്നിവിടങ്ങളില്‍ ഇന്‍സ്റ്റിറ്റിയൂഷണല്‍ ക്ലസ്റ്ററുമുണ്ട്. കുമ്പഴ മത്സ്യച്ചന്തയിലെ രോഗികളില്‍ നിന്നും സമ്പര്‍ക്കപ്പട്ടിക ഉയരുന്നു എന്നതും ആശങ്ക ഉണ്ടാക്കുന്നു.  
ആലപ്പുഴ ജില്ലയിലെ 46ല്‍ 30ഉം സമ്പര്‍ക്കത്തിലൂടെയാണ് രോഗബാധയുണ്ടായത്. ചേര്‍ത്തല താലൂക്കും കായംകുളം മുന്‍സിപ്പാലിറ്റിയും മറ്റു 7 തദ്ദേശസ്വയംഭരണ സ്ഥാപനങ്ങളും പൂര്‍ണ്ണമായും കണ്ടെയിന്‍മെന്‍റ് സോണായി പ്രഖ്യാപിച്ചിട്ടുണ്ട്.

കോട്ടയം ജില്ലയില്‍ 39ല്‍ 34ഉം സമ്പര്‍ക്കത്തിലൂടെയാണ് രോധബാധയുണ്ടായത്. ചങ്ങനാശേരി മാര്‍ക്കറ്റ് മേഖലയിലാണ് സമ്പര്‍ക്കം മുഖേനയുള്ള രോഗബാധ കൂടുതലായി കണ്ടെത്തിയിട്ടുള്ളത്. നിലവില്‍ 16 തദ്ദേശഭരണ സ്ഥാപനങ്ങളിലായി 25 കണ്ടെയ്ന്‍മെന്‍റ് സോണുകളാണ് ജില്ലയിലുള്ളത്.

എറണാകുളം ജില്ലയില്‍  സമ്പര്‍ക്കത്തിലൂടെയുള്ള രോഗവ്യാപനം വര്‍ധിക്കുകയാണ്. 80 പേര്‍ക്ക് രോഗം സ്ഥിരീകരിച്ചതില്‍ 63 പേര്‍ക്ക് സമ്പര്‍ക്കത്തിലൂടെയാണ്. മൂന്ന് ഹെല്‍ത്ത്വര്‍ക്കര്‍മാര്‍. ഒമ്പതുപേരുടെ ഉറവിടം അറിയില്ല. ആലുവ, ചെല്ലാനം, കീഴ്മാട് എന്നീ ക്ലസ്റ്ററുകള്‍ കേന്ദ്രീകരിച്ചാണ് കൂടുതല്‍ രോഗവ്യാപനം കണ്ടെത്തിയിട്ടുള്ളത്.

സ്വകാര്യ ആശുപത്രിയിലേതടക്കമുള്ള ആരോഗ്യപ്രവര്‍ത്തകര്‍ സമ്പര്‍ക്കത്തിലൂടെ രോഗബാധിതരായവരുടെ പട്ടികയിലുണ്ട്. കഴിഞ്ഞ ദിവസങ്ങളിലെ കോവിഡ് പോസിറ്റീവായവരുടെ എണ്ണം പരിശോധിക്കുമ്പോള്‍ ആലുവ, കീഴ്മാട് ക്ലസ്റ്ററുകള്‍ സമീപപഞ്ചായത്തുകളായ ചൂര്‍ണിക്കര, ആലങ്ങാട്, കരുമാലൂര്‍, എടത്തല, കടുങ്ങലൂര്‍, ചെങ്ങമനാട് എന്നിവിടങ്ങളിലേക്ക് വ്യാപിക്കുന്നതായാണ് കാണുന്നത്.

ചെല്ലാനം തീരമേഖലയില്‍ ശക്തമായ കടല്‍കയറ്റമാണ് കഴിഞ്ഞ ദിവസങ്ങളില്‍ ഉണ്ടായത്. പ്രദേശത്ത് ക്യാമ്പുകള്‍ ആരംഭിക്കാനുള്ള ക്രമീകരണങ്ങള്‍ നടത്തിയിട്ടുണ്ട്. കോവിഡ് മാനദണ്ഡങ്ങള്‍ പാലിച്ചാണ് ക്യാമ്പുകള്‍ ആരംഭിക്കുന്നത്.

കര്‍ശന നിയന്ത്രണങ്ങള്‍ക്ക് വിധേയമായി എറണാകുളം മാര്‍ക്കറ്റ് പ്രവര്‍ത്തനമാരംഭിച്ചിട്ടുണ്ട്. ഒരു ദിവസം പകുതി കടകള്‍ മാത്രമേ തുറക്കാന്‍ പാടുള്ളു. തൃശൂരില്‍ കൈനൂര്‍ ബിഎസ്എഫ് ക്യാമ്പ്, ഇരിഞ്ഞാലക്കുട കെഎസ്ഇ എന്നിവിടങ്ങളിലെ സമ്പര്‍ക്ക വ്യാപനമാണ് ആശങ്ക സൃഷ്ടിക്കുന്നത്. 485 പേരില്‍ ഇതുവരെ ആന്‍റിജന്‍ പരിശോധന നടത്തി. ഇതില്‍ ഒരാള്‍ മാത്രമാണ് പോസിറ്റീവായത്.

പാലക്കാട് ഇന്ന് രോഗം സ്ഥിരീകരിച്ച 46ല്‍ 36ഉം സമ്പര്‍ക്കത്തിലൂടെയാണ്. പട്ടാമ്പി മത്സ്യ മാര്‍ക്കറ്റിലെ ഒരു തൊഴിലാളിയലൂടെ 100 ഓളം പേര്‍ക്ക് രോഗബാധ ഉണ്ടായ ആശങ്കപ്പെടേണ്ട സാഹചര്യം കണക്കിലെടുത്ത് പട്ടാമ്പി താലൂക്കിലും ഒറ്റപ്പാലം ബ്ലോക്കിലെ നെല്ലായ ഗ്രാമപഞ്ചായത്തിലും രണ്ടാഴ്ചത്തേക്ക് ലോക്ക്ഡൗണ്‍ പ്രഖ്യാപിച്ചിട്ടുണ്ട്.

ആദ്യ ദിവസം (ജൂലൈ 18) 525 പേരില്‍ പരിശോധന നടത്തിയതില്‍ പട്ടാമ്പിയിലും സമീപ പ്രദേശങ്ങളിലുമായി 67 പേര്‍ക്ക് രോഗം സ്ഥിരീകരിച്ചിരുന്നു. രണ്ടാം ദിനം (ജൂലൈ 19) 328 പേരില്‍ പരിശോധന നടത്തിയതില്‍ 39 പേര്‍ക്ക് രോഗം സ്ഥിരീകരിച്ചു. ഇതില്‍ 29 പേര്‍ പട്ടാമ്പിയിലും സമീപ പ്രദേശങ്ങളിലുമുള്ളവരും ഏഴുപേര്‍ തൃശ്ശൂര്‍ ജില്ലക്കാരും മൂന്നുപേര്‍ മലപ്പുറം ജില്ലക്കാരുമാണ്. കഴിഞ്ഞ ദിവസം പട്ടാമ്പിയിലെ 29 പേരുള്‍പ്പെടെ ആകെ 49 പേര്‍ക്കാണ് ജില്ലയില്‍ രോഗം സ്ഥിരീകരിച്ചത്. 20 പേര്‍ വിവിധ രാജ്യങ്ങളില്‍ നിന്നും ഇതര സംസ്ഥാനങ്ങളില്‍ നിന്നും എത്തിയവരാണ്.

മലപ്പുറത്ത് 61 പേര്‍ക്ക് ഇന്ന് രോഗം ബാധിച്ചതില്‍ 23 പേര്‍ സമ്പര്‍ക്കത്തിലൂടെയാണ്. ഉറവിടം വ്യക്തമല്ലാത്തത് 6. കൊണ്ടോട്ടി മത്സ്യ മൊത്ത വിതരണ കേന്ദ്രത്തിലെ ഏഴ്  തൊഴിലാളികള്‍ക്ക് കോവിഡ് 19 സ്ഥിരീകരിച്ച സാഹചര്യത്തില്‍ മലപ്പുറം ജില്ല അതീവ ജാഗ്രതയിലാണ്. കോവിഡ് നിയന്ത്രണങ്ങളുടെ ഭാഗമായി മലപ്പുറത്തു നിന്ന് പാലക്കാട് ജില്ലയിലെ പട്ടാമ്പിയിലേക്കുള്ള എല്ലാ അതിര്‍ത്തികളും അടക്കാന്‍ തീരുമാനിച്ചിട്ടുണ്ട്.

വയനാട് ജില്ലയില്‍ സമ്പര്‍ക്കത്തിലൂടെ രോഗം പകര്‍ന്ന് ചികിത്സയിലുള്ള 19 പേരും തൊണ്ടര്‍നാട് പ്രദേശത്താണ്. കര്‍ണാടകയില്‍ നിന്നെത്തിയവരില്‍ നിന്നാണ് ഇത്രയും പേര്‍ക്ക് രോഗം പടര്‍ന്നത്. തൊണ്ടര്‍നാട് പ്രദേശം ഒരു ലിമിറ്റഡ് കമ്യൂണിറ്റി ക്ലസ്റ്ററായിട്ടുണ്ട്.  സമ്പര്‍ക്കത്തിലൂടെ രോഗം സ്ഥിരീകരിച്ച എല്ലാവരും ബന്ധുക്കളോ വളരെ അടുപ്പക്കാരോ ആണ് എന്നതിനാല്‍ ഒരു പൂര്‍ണ ക്ലസ്റ്റര്‍ എന്ന് പറയാറായിട്ടില്ല. സമ്പര്‍ക്കത്തിലുള്ള എല്ലാവരെയും കണ്ടെത്തി നിരീക്ഷണത്തിലാക്കിയിട്ടുണ്ട്.

രോഗമുക്തരുടെ പ്ലാസ്മ ശേഖരിച്ച് കോവിഡ് രോഗികള്‍ക്ക് നല്‍കുന്നതിന് പ്ലാസ്മ ബാങ്ക് മാനന്തവാടി ജില്ലാ ആശുപത്രിയില്‍ കഴിഞ്ഞ ദിവസം തുടങ്ങി. ജില്ലയില്‍ നിന്ന് ആദ്യമായി കോവിഡ് രോഗമുക്തനായ വ്യക്തി അടക്കം ഏഴ് പേര്‍ ആദ്യ ദിവസം തന്നെ പ്ലാസ്മ നല്‍കുന്നതിനായെത്തി.

കോഴിക്കോട് ഇന്ന് രോഗം സ്ഥിരീകരിച്ച 39ല്‍ 29 സമ്പര്‍ക്കം. ഉറവിടം വ്യക്തമല്ലാത്തത് 4. ജില്ലയില്‍ എല്ലാ ഹോട്ടലുകളിലും റസ്റ്റോറെന്‍റുകളിലും ഇരുന്ന് ഭക്ഷണം കഴിക്കുന്നത് നിരോധിച്ചു. പാഴ്സലുകള്‍ മാത്രമേ അനുവദിക്കുകയുള്ളൂ.

കണ്ണൂര്‍ ഡിഎസ്സി ക്ലസ്റ്ററില്‍ 29 പേര്‍ക്കാണ് രോഗബാധയുണ്ടായത്.  ജില്ലയില്‍ ഹോം ക്വാറന്‍റീന്‍ വ്യവസ്ഥകള്‍ കര്‍ശനമായി പാലിക്കുന്നുവെന്ന് ഉറപ്പുവരുത്തുന്നതിന് പൊലീസിനെ സഹായിക്കാന്‍ വില്ലേജ് ഓഫീസര്‍മാരുടെ നേതൃത്വത്തില്‍ സ്പെഷ്യല്‍ സ്ക്വാഡിനെ നിയോഗിച്ചു. തദ്ദേശസ്ഥാപനങ്ങള്‍ നിശ്ചയിക്കുന്ന രണ്ട് സര്‍ക്കാര്‍ അധ്യാപകര്‍, ബന്ധപ്പെട്ട ഹെല്‍ത്ത് ഇന്‍സ്പെക്ടര്‍ എന്നിവരാണ് ഈ സ്ക്വാഡില്‍ ഉണ്ടാവുക.

ഹോം ക്വാറന്‍റീനില്‍ കഴിയുന്നവരെ സന്ദര്‍ശിച്ച് ക്വാറന്‍റീന്‍ വ്യവസ്ഥകള്‍ ലംഘിക്കുന്നില്ലെന്ന് ഉറപ്പാക്കുകയും പ്രദേശത്ത് വിവാഹം, മരണാനന്തര ചടങ്ങുകള്‍ എന്നിവ കോവിഡ് പ്രോട്ടോക്കോള്‍ പാലിച്ചുകൊണ്ടാണെന്ന് ഉറപ്പുവരുത്തുകയുമാണ് സ്പെഷ്യല്‍ സ്ക്വാഡിന്‍റെ ചുമതല.  ഇതിനായി കടകള്‍, ഷോപ്പിങ് മാളുകള്‍, ആരാധനാലയങ്ങള്‍ എന്നിവ സ്പെഷ്യല്‍ സ്ക്വാഡ് സന്ദര്‍ശിച്ച് പരിശോധന നടത്തും.

കാസര്‍കോട് ജില്ലയില്‍ ഇന്ന് രോഗം സ്ഥിരീകരിച്ച 40 പേരില്‍ 35 പേര്‍ക്ക് സമ്പര്‍ക്കംമൂലമാണ്. കര്‍ണ്ണാടകയുമായി അതിര്‍ത്തി പങ്കിടുന്ന പഞ്ചായത്തുകളിലും രോഗവ്യാപനം രൂക്ഷമാകുന്നത് കാസര്‍കോട് ജില്ലയില്‍ വെല്ലുവിളി ഉയര്‍ത്തുന്നു.

ഇന്ന് ഒരു പ്രചാരണം കണ്ടത് മത്സ്യത്തൊഴിലാളികളെ സര്‍ക്കാര്‍ പ്രതിക്കൂട്ടില്‍ നിര്‍ത്തുന്നു എന്നാണ്. ഇതിനുമുമ്പ് പ്രവാസികളോടും അതാണ് ചെയ്തത് എന്നു പറയാന്‍ പോലും ചിലര്‍ തയ്യാറായി. സംസ്ഥാനത്ത് ഈ ഘട്ടത്തില്‍ രൂപപ്പെട്ട ക്ലസ്റ്ററുകള്‍ പ്രധാനമായും തീരദേശങ്ങളിലാണ്. അത് ആരുടെയെങ്കിലും കുറ്റം കൊണ്ടല്ല.

ആളുകള്‍ കൂടുതല്‍ അടുത്തിടപഴകുന്ന മേഖലയാണ് മത്സ്യബന്ധനത്തിന്‍റേതും വിതരണത്തിന്‍റെയും. കോവിഡ് ഭീഷണി ഉയര്‍ന്ന ഘട്ടത്തില്‍ത്തന്നെ നമ്മളെല്ലാം ആ അപകടം കണ്ടിരുന്നു. അതുകൊണ്ടാണ് തുടക്കത്തില്‍ മത്സ്യലേലത്തിന് നിയന്ത്രണം ഏര്‍പ്പെടുത്തിയത്. മത്സ്യബന്ധനം ലക്ഷകണക്കിന് ജനങ്ങളുടെ ജീവനോപാധിയാണ്. കടലിനോട് മല്ലടിച്ച് അന്നന്നത്തെ അന്നം കണ്ടെത്തുന്നവരാണ് മത്സ്യത്തൊഴിലാളികള്‍.

ഒരുപക്ഷെ കോവിഡ് വ്യാപനത്തെത്തുടര്‍ന്ന് ഏര്‍പ്പെടുത്തിയ ലോക്ക്ഡൗണിന്‍റെ ഏറ്റവും കടുത്ത തിക്തഫലം അനുഭവിക്കുന്ന സമൂഹവുമാണ് തീരദേശത്തേത്. അവിടെ രോഗവ്യാപനമുണ്ടാകുമ്പോള്‍ സാധ്യമായ എല്ലാ ഇടപെടലുകളും നടത്തേണ്ടത് സര്‍ക്കാരിന്‍റെ അനിവാര്യമായ ചുമതലയാണ്. അത് നിര്‍വഹിക്കുന്നതിന്‍റെ ഭാഗമായാണ് തീരദേശങ്ങളില്‍ രൂപപ്പെട്ട ക്ലസ്റ്ററുകളില്‍ നിയന്ത്രണങ്ങള്‍ കടുപ്പിച്ചതും മത്സ്യത്തൊഴിലാളി കുടുംബങ്ങള്‍ക്ക് അടിയന്തര സഹായം ലഭ്യമാക്കിയതും.

തിരുവനന്തപുരത്ത് പൂന്തുറ, മാണിക്യവിളാകം, പുത്തന്‍പള്ളി മേഖലകളില്‍ വര്‍ധിച്ചതോതില്‍ കോവിഡ് ബാധ ഉണ്ടായപ്പോള്‍ സര്‍ക്കാര്‍ വലിയതോതില്‍ ഇടപെട്ടു. അന്ന് പൂന്തുറ എന്ന സ്ഥലപ്പേര് പറഞ്ഞതിനെക്കുറിച്ചായിരുന്നു ആക്ഷേപം. അത് ഒരു പ്രദേശത്തെ അപമാനിക്കലാണ് എന്നു വരെ ചിലര്‍ പ്രചരിപ്പിച്ചു. പക്ഷെ, ആ മേഖലയിലെ ജനങ്ങളെ അതൊന്നും ബാധിച്ചില്ല. അതുകൊണ്ടാണ് കുപ്രചാരണങ്ങളെ തള്ളി ആരോഗ്യപ്രവര്‍ത്തകരെ അവര്‍ പുഷ്പവൃഷ്ടി നടത്തി സ്വീകരിച്ചത്.

പ്രവാസികളുടെ കാര്യത്തിലും ഇതേ സമീപനമായിരുന്നു. കോവിഡ് ബാധ രൂക്ഷമായ സ്ഥലങ്ങളില്‍നിന്ന് വരുന്നവര്‍ സുരക്ഷാ ക്രമീകരണങ്ങള്‍ പാലിക്കണമെന്ന നിര്‍ബന്ധം സര്‍ക്കാര്‍ കാണിച്ചു. പരിശോധന അടക്കമുള്ള മാനദണ്ഡങ്ങള്‍ നിഷ്കര്‍ഷിച്ചു. അന്ന് അതിനെ തകര്‍ക്കാന്‍ ശ്രമിച്ചത് സര്‍ക്കാര്‍ പ്രവാസികളെ ദ്രോഹിക്കുന്നു എന്ന കുപ്രചാരണം നടത്തിയാണ്.

ഇങ്ങോട്ടുവരുന്ന പ്രവാസി സഹോദരങ്ങളെ ഇവിടെ വിലക്കിയിട്ടില്ല. ഒരാള്‍ പോലും സര്‍ക്കാര്‍ അനുമതിയില്ലാത്തതുകൊണ്ട് വരാതിരുന്നിട്ടില്ല. വിമാനങ്ങള്‍ക്ക് അനുമതി നിഷേധിച്ചിട്ടില്ല. എന്നിട്ടും സര്‍ക്കാര്‍ പ്രവാസികള്‍ക്ക് എതിരാണ് എന്ന പ്രചണ്ഡമായ പ്രചാരണം അഴിച്ചുവിട്ടു. ഇപ്പോള്‍ ആരെങ്കിലും അത് പറയുന്നുണ്ടോ? വിമാനത്തില്‍ വരുന്നവര്‍ക്ക് പരിശോധനയോ അതല്ലെങ്കില്‍ പിപിഇ കിറ്റ് ഉള്‍പ്പെടെയുള്ള സുരക്ഷാസംവിധാനങ്ങളോ വേണ്ട എന്ന് ഇക്കൂട്ടര്‍ പറയുമോ?

സംസ്ഥാനത്ത് ലോക്ക്ഡൗണ്‍ ഇളവു വരുത്തിയശേഷം പുറത്തുനിന്ന് ഇതുവരെ 6,20,462 ആളുകള്‍ എത്തിയിട്ടുണ്ട്. വിദേശത്തുനിന്നും വന്നത് 2,35,231 പേരാണ്. വന്നവരില്‍ രോഗലക്ഷണങ്ങള്‍ പ്രകടിപ്പിച്ചവരെയും രോഗസാധ്യതയുള്ളവരെയും നാം കൃത്യമായി ചികിത്സിച്ചിട്ടുണ്ട്. പുറത്തുനിന്നു വന്ന 3225 പേരാണ് കോവിഡ് പരിശോധനയില്‍ പോസിറ്റീവായത്. അതില്‍ 1939 പേര്‍ വിദേശത്തുനിന്നു വന്നവരാണ്.

56 രാജ്യങ്ങളില്‍നിന്നായി 1351 വിമാനങ്ങളാണ് വന്നത്. സൗദി അറേബ്യയില്‍നിന്ന് വിമാനങ്ങള്‍ കുറവാണ് എന്ന പരാതി വന്നിരുന്നു. അവിടെനിന്ന് 34,626 പേരാണ് ഇതുവരെ വന്നത്. രജിസ്റ്റര്‍ ചെയ്ത ആളുകള്‍ ഇനിയും വരാനുണ്ട്. എന്നാല്‍, ഇപ്പോള്‍ വരുന്ന വിമാനങ്ങളില്‍ സീറ്റ് മിക്കതും ഒഴിവാണെന്നും കൂടുതല്‍ ആളുകള്‍ വരാന്‍ താല്‍പര്യപ്പെടുന്നില്ല എന്നുമാണ് റിയാദിലെ എംബസി അധികൃതര്‍ അറിയിച്ചത്. ചാര്‍ട്ടേര്‍ഡ് ഫ്ളൈറ്റുകള്‍ക്കു വേണ്ടിയുള്ള അപേക്ഷകളും കുറഞ്ഞിട്ടുണ്ട്. നിലവില്‍ 46 വിമാനങ്ങള്‍ സൗദിയില്‍നിന്ന് ചാര്‍ട്ടര്‍ ചെയ്തിട്ടുണ്ട്.

നമ്മുടെ നാട്ടില്‍ ഈ രോഗബാധ പിടിച്ചുനിര്‍ത്തണം എന്നതാണ് അന്നും ഇന്നും സര്‍ക്കാരിന്‍റെ നിര്‍ബന്ധം. അതിന് അനുഗുണമായ നടപടികള്‍ മാത്രമേ സ്വീകരിച്ചിട്ടുള്ളു. പുറത്തുനിന്ന് വരുന്നവര്‍ നമ്മുടെ ആരോഗ്യ സംവിധാനങ്ങളുടെ പരിധിയില്‍ വരണം എന്നതുകൊണ്ടാണ് പാസ് നിര്‍ബന്ധമാക്കിയത്. പാസില്ലാതെ ആളുകള്‍ വന്നാല്‍ അവര്‍ എവിടെ എത്തി എന്നോ എവിടെനിന്നും വന്നുവെന്നോ ഉള്ള ധാരണ ഇല്ലാതെപോകും. അതിന്‍റെ ഫലം രോഗവ്യാപനം പിടിച്ചുനിര്‍ത്താനാവില്ല എന്നതുതന്നെയാണ്.

അത് തകര്‍ക്കാന്‍ സംസ്ഥാന അതിര്‍ത്തിയില്‍ പോയി സമരം നടത്തിയത് ഓര്‍മയില്ലേ? അന്ന് അവര്‍ ചോദിച്ചത് കേരളത്തിലേക്ക് വരാന്‍ എന്തിനാണ് പാസ് എന്നാണ്? എന്തായിരുന്നു അതിന്‍റെ അര്‍ത്ഥം. ഇവിടെ ഒരു നിയന്ത്രണവുമില്ലാതെ രോഗം വ്യാപിച്ചോട്ടേ എന്നല്ലേ? അത്തരക്കാര്‍ തന്നെയാണ് ഇപ്പോള്‍ മത്സ്യത്തൊഴിലാളികള്‍ക്ക് എതിരാണ് സര്‍ക്കാര്‍ എന്ന ഹീനമായ പ്രചാരണം ഏറ്റെടുത്തിരിക്കുന്നത്.

ഇവിടെ അവരോട് ചോദിക്കാന്‍ ഒന്നേ ഉള്ളു. ഈ കോവിഡ് കാലത്ത് നിങ്ങളുടെ ഭാഗത്തുനിന്ന് ക്രിയാത്മകമായ എന്തെങ്കിലും ഒരു നിലപാട് ഉണ്ടായോ? രോഗവ്യാപനം തടഞ്ഞുനിര്‍ത്താന്‍ എന്തെങ്കിലും ഒരു സംഭാവന നിങ്ങള്‍ നല്‍കിയോ? മറിച്ച്, രോഗം പടര്‍ത്താന്‍ ബോധപൂര്‍വം നിങ്ങള്‍ നടത്തിയ അനേകം ശ്രമങ്ങള്‍ ചൂണ്ടിക്കാണിക്കാന്‍ കഴിയും.

കോവിഡ് പ്രോട്ടോകോള്‍ ലംഘിച്ചും സമരം നടത്തും എന്ന് പ്രഖ്യാപിച്ചവരും ഇവിടെത്തന്നെയില്ലേ? ആരോടായിരുന്നു വെല്ലുവിളി? ബഹുമാനപ്പെട്ട ഹൈക്കോടതിയോടോ? അതോ ഇന്നാട്ടിലെ സാധാരണ ജനങ്ങളോടോ? നിങ്ങള്‍ കോവിഡ് പ്രോട്ടോകോള്‍ ലംഘിച്ചാല്‍ നിങ്ങള്‍ക്കു മാത്രമല്ലല്ലോ അപകടം? അത് ഈ നാട്ടിലാകെ വരുമല്ലോ? നിങ്ങള്‍ നല്‍കുന്ന സന്ദേശമതല്ലേ. അത് മനസ്സിലാവാത്തതു കൊണ്ടാണോ ഈ നീചമായ രാഷ്ട്രീയകളിക്ക് തയ്യാറാകുന്നത്.

കേരളത്തില്‍ ഏറ്റവും മികച്ച നിലയിലാണ് കോവിഡ് പ്രതിരോധ പ്രവര്‍ത്തനങ്ങള്‍ നടക്കുന്നത്. ഈ രോഗബാധ അപകടമാണ് എന്ന് തിരിച്ചറിഞ്ഞ നിമിഷം മുതല്‍ പ്രതിരോധിക്കാനുള്ള ശ്രമങ്ങള്‍ നാം ആരംഭിച്ചിട്ടുണ്ട്. അതിന്‍റെ ഫലമായിട്ടു തന്നെയാണ് ആദ്യഘട്ടത്തില്‍ ഇവിടെ വന്ന ആളുകളില്‍നിന്ന് മറ്റുള്ളവരിലേക്ക് പകരാതെ നോക്കാനും നമുക്കു കഴിഞ്ഞു. അതാണ് ഇനിയും തുടരേണ്ടത്. അതിന് ഇടങ്കോലിടാന്‍ ശ്രമിക്കരുത്. ഇക്കാര്യത്തില്‍ അത്തരക്കാര്‍ക്ക് ഒരു പുനഃശ്ചിന്തനം ഉണ്ടാകുന്നത് നല്ലതാണ്.

എല്ലാറ്റിനും നെഗറ്റീവായ സമീപനം എടുക്കുക മാത്രമല്ല, സര്‍ക്കാരും ആരോഗ്യപ്രവര്‍ത്തകരും പറയുന്നത് പ്രാധാന്യത്തില്‍ എടുക്കേണ്ടതില്ല എന്ന ബോധം കൂടിയാണ് അവര്‍ പ്രചരിപ്പിച്ചത്. അതിന് ഉത്തരവാദപ്പെട്ട ചിലര്‍ തന്നെ നേതൃത്വം നല്‍കിയിട്ടുണ്ട്. അങ്ങനെ സൃഷ്ടിക്കപ്പെട്ട പൊതുബോധം നമ്മുടെ പ്രതിരോധത്തിന് പ്രതിബന്ധം സൃഷ്ടിച്ചിട്ടുണ്ടോ എന്ന് അവര്‍ തന്നെ സ്വയം ചിന്തിക്കട്ടെ. സര്‍ക്കാരിന് ഇക്കാര്യത്തില്‍ ഒറ്റ ലക്ഷ്യമേയുള്ളു. യോജിച്ച് ഈ മഹാമാരിയെ പ്രതിരോധിക്കണം എന്നതാണ് അത്.

കോവിഡ് ബാധ രൂക്ഷമായ പശ്ചാത്തലത്തില്‍ സംസ്ഥാന അതിര്‍ത്തികള്‍ അടച്ച് കര്‍ശനമായ നിയന്ത്രണം ഏര്‍പ്പെടുത്തിയിട്ടുണ്ട്. വളരെ ഗുരുതരമായ മെഡിക്കല്‍ ആവശ്യങ്ങള്‍, മരണം എന്നിവയുമായി ബന്ധപ്പെട്ടു മാത്രമേ അതിര്‍ത്തി കടന്നുള്ള യാത്രയ്ക്ക് അനുമതി നല്‍കൂ.

കടലാക്രമണം പലയിടത്തും രൂക്ഷമാണ്. അവിടങ്ങളില്‍ ആളുകള്‍ക്ക് പ്രത്യേക പരിഗണനയോടെ സഹായം ലഭ്യമാക്കും. അവിടങ്ങളില്‍ ഹോം ക്വാറന്‍റൈനില്‍ കഴിയുന്നവരുണ്ടെങ്കില്‍ സുരക്ഷാ മാനദണ്ഡങ്ങള്‍ പാലിച്ച് അവരെ സൗകര്യപ്രദമായി മാറ്റണം എന്ന് നിര്‍ദേശിച്ചിട്ടുണ്ട്. ഭക്ഷ്യകിറ്റുകള്‍ നല്‍കിത്തുടങ്ങിയിട്ടുണ്ട്. അതോടൊപ്പം ഭക്ഷണം പാകം ചെയ്യാനാകാത്തവര്‍ക്ക് തദ്ദേശസ്വയംഭരണ സ്ഥാപനങ്ങള്‍ മുഖേന ഭക്ഷണം എത്തിച്ചുനല്‍കാനും നിര്‍ദേശം നല്‍കിയിട്ടുണ്ട്.

സംസ്ഥാനത്ത് നടക്കുന്ന തൊഴില്‍ അഭിമുഖങ്ങളും മറ്റും സാമൂഹിക അകലം പാലിച്ചുവേണം എന്ന് ചില അനുഭവങ്ങളുടെ അടിസ്ഥാനത്തില്‍ നിര്‍ദേശം നല്‍കിയിട്ടുണ്ട്.

മാര്‍ക്കറ്റുകളില്‍ പ്രത്യേകം ശ്രദ്ധിക്കാന്‍ നിര്‍ദേശം നല്‍കിയിട്ടുണ്ട്. ഹോള്‍സെയില്‍, റീട്ടെയില്‍ മാര്‍ക്കറ്റുകളില്‍ ക്രമീകരണങ്ങളും നിയന്ത്രണങ്ങളും ഏര്‍പ്പെടുത്തും.

സംസ്ഥാനത്തെ വിവിധ മാര്‍ക്കറ്റുകളില്‍ കട ഉടമകള്‍ സര്‍ക്കാരിന്‍റെയും പൊലീസിന്‍റെയും നിര്‍ദ്ദേശങ്ങള്‍ അനുസരിക്കാത്തത് ശ്രദ്ധയില്‍പ്പെട്ടിട്ടുണ്ട്. ഇവര്‍ക്കെതിരെ ബന്ധപ്പെട്ട തദ്ദേശ സ്വയംഭരണ സ്ഥാപനങ്ങളുടെ സഹായത്തോടെ അറസ്റ്റും പ്രോസിക്യൂഷനും ഉള്‍പ്പെടെയുള്ള നിയമനടപടികള്‍ സ്വീകരിക്കും. നിയമലംഘനം നടത്തുന്ന കടകള്‍ അടച്ചുപൂട്ടാനും നടപടിയെടുക്കും.

കോവിഡ് ബാധിതരാകുന്ന പൊലീസ് ഉദ്യോഗസ്ഥരുടെ എണ്ണം വര്‍ധിക്കുന്ന സാഹചര്യത്തില്‍ അവര്‍ക്ക് ആവശ്യമായ അടിയന്തരചികിത്സ നല്‍കുന്നതിന് ആരോഗ്യ വകുപ്പ് അധികൃതര്‍ക്കും സംസ്ഥാന പൊലീസ് മേധാവിക്കും നിര്‍ദ്ദേശം നല്‍കി.

മാസ്ക് ധരിക്കാത്ത 5022 സംഭവങ്ങള്‍ സംസ്ഥാനത്ത് ഇന്ന് റിപ്പോര്‍ട്ട് ചെയ്തിട്ടുണ്ട്. ക്വാറന്‍റൈന്‍ ലംഘിച്ച 9 പേര്‍ക്കെതിരെ ഇന്ന് കേസ് രജിസ്റ്റര്‍ ചെയ്തു.

ദുരിതാശ്വാസനിധി
കേരളാ സ്റ്റേറ്റ് സിവില്‍ സപ്ലൈസ് കോര്‍പ്പറേഷന്‍ 2 കോടി രൂപ.

മാംഗോ ഫാര്‍മേഴ്സ് ആന്‍റ് മര്‍ച്ചന്‍സ് അസോസിയേഷന്‍ മുതലമട, പാലക്കാട് 3 ലക്ഷം രൂപ.

ഉറുകുന്ന് സര്‍വ്വീസ് സഹകരണ ബാങ്ക്, തെډല 1 ലക്ഷം രൂപ.

എഐവൈഎഫ് വാഴൂര്‍ മേഖല കമ്മിറ്റി പായസ മേളയിലൂടെ സമാഹരിച്ച 87,861 രൂപ.

ഡിവൈഎഫ്ഐ മഠത്തും ഭാഗം, ലക്ഷംവീട്, കോറോത്ത് യൂണിറ്റുകള്‍ ബിരിയാണി ചലഞ്ചിലൂടെ സമാഹരിച്ച 45,107 രൂപ.

ഫ്രണ്ട്സ് യൂണിയന്‍ ക്ലബ് കുന്നരു ബിരിയാണി ഫെസ്റ്റ് നടത്തി സമാഹരിച്ച 35,000 രൂപ.

പാട്യം ഗോപാലന്‍ സ്മാരക വായനശാല ഊരാങ്കോട്ട്, തലശ്ശേരി ബിരിയാണി ചലഞ്ചിലൂടെ സമാഹരിച്ച 35,011 രൂപ.

സെന്‍ട്രല്‍ മറൈന്‍ ഫിഷറീസ് റിസര്‍ച്ച് ഇന്‍സ്റ്റിറ്റ്യൂട്ട്, കൊച്ചി 21,677 രൂപ.

മുഖ്യമന്ത്രിയുടെ വാര്‍ത്താ സമ്മേളനത്തില്‍ നിന്ന്
സംസ്ഥാനത്ത് 593 പേര്‍ക്കാണ് ഇന്ന് കോവിഡ് സ്ഥിരീകരിച്ചത്. ഇതുവരെ രോഗം സ്ഥിരീകരിച്ചവരുടെ എണ്ണം 11,659 ആണ്. ഇന്ന് 364 പേര്‍ക്കാണ് സമ്പര്‍ക്കത്തിലൂടെ രോഗം ബാധിച്ചത്. അതില്‍ 36 പേരുടെ ഉറവിടം വ്യക്തമായിട്ടില്ല. വിദേശത്തുനിന്ന് 116 പേര്‍. മറ്റു സംസ്ഥാനങ്ങളില്‍നിന്ന് 90 പേര്‍. ഹെല്‍ത്ത് വര്‍ക്കര്‍മാര്‍ 19, ഡിഎസ്സി 1, ഫയര്‍ഫോഴ്സ് 1.

ഇന്ന് രണ്ടു മരണം റിപ്പോര്‍ട്ട് ചെയ്തു. തിരുവനന്തപുരം ജില്ലയില്‍ അരുള്‍ദാസ് (70), ബാബുരാജ് (60) എന്നിവരാണ് മരണമടഞ്ഞത്. ഇവരുടെ നിര്യാണത്തില്‍ അനുശോചനം രേഖപ്പെടുത്തുന്നു.

204 പേര്‍ രോഗമുക്തി നേടി.

പോസിറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 173, കൊല്ലം 53, പാലക്കാട് 49, എറണാകുളം 44, ആലപ്പുഴ 42, കണ്ണൂര്‍ 39, കാസര്‍കോട് 29, പത്തനംതിട്ട 28, ഇടുക്കി 28, വയാട് 26, കോഴിക്കോട് 26, തൃശൂര്‍ 21, മലപ്പുറം 19, കോട്ടയം 16.

നെഗറ്റീവായവരുടെ ജില്ല തിരിച്ചുള്ള കണക്ക്
തിരുവനന്തപുരം 7, പത്തനംതിട്ട 18, ആലപ്പുഴ 36, കോട്ടയം 6, ഇടുക്കി 6, എറണാകുളം 9, തൃശൂര്‍ 11, പാലക്കാട് 25, മലപ്പുറം 26, കോഴിക്കോട് 9, വയനാട് 4, കണ്ണൂര്‍ 38, കാസര്‍കോട് 9.

കഴിഞ്ഞ 24 മണിക്കൂറിനകം 18,967 സാമ്പിളുകള്‍ പരിശോധിച്ചു. 1,73,932 പേരാണ് നിരീക്ഷണത്തിലുള്ളത്. 6841 പേര്‍ ആശുപത്രികളില്‍. ഇന്നു മാത്രം 1053 പേരെ ആശുപത്രിയില്‍ പ്രവേശിപ്പിച്ചു. ഇപ്പോള്‍ ചികിത്സയിലുള്ളവര്‍ 6416.

ഇതുവരെ ആകെ 2,85,158 സാമ്പിളുകളാണ് പരിശോധനയ്ക്കായി അയച്ചത്. ഇതില്‍ 7016 സാമ്പിളുകളുടെ ഫലം വരാനുണ്ട്. ഇതുകൂടാതെ സെന്‍റിനല്‍ സര്‍വൈലന്‍സിന്‍റെ ഭാഗമായി മുന്‍ഗണനാ ഗ്രൂപ്പുകളില്‍ നിന്ന് 92,312 സാമ്പിളുകള്‍ ശേഖരിച്ചതില്‍ 87,653 സാമ്പിളുകള്‍ നെഗറ്റീവ് ആയി. ഹോട്ട്സ്പോട്ടുകളുടെ എണ്ണം 299 ആയി.

സംസ്ഥാനത്ത് കോവിഡ് രോഗവ്യാപനം മൂന്നാം ഘട്ടത്തിന്‍റെ രണ്ടാം പാദത്തിലെത്തി എന്ന് ഇന്നലെ സൂചിപ്പിച്ചിരുന്നു. മെയ് 4ന് 499 രോഗികളും 3 മരണങ്ങളുമാണ് കേരളത്തിലുണ്ടായത്. ലോക്ക്ഡൗണിന് മുന്‍പ് മറ്റ് രാജ്യങ്ങളിലും സംസ്ഥാനങ്ങളിലും രോഗവ്യാപനം ശക്തമായിരുന്നില്ല. അത് കൊണ്ടുതന്നെ കേരളത്തിലെത്തിയവരില്‍ രോഗികളുടെ എണ്ണം കുറവുമായിരുന്നു. മാത്രമല്ല ബ്രേക്ക് ദി ചെയിന്‍ ജീവിതരീതികള്‍ ജനങ്ങളെല്ലാം പിന്തുടരുകയും ചെയ്തിരുന്നു.
 
ഇപ്പോള്‍ രോഗികളുടെ എണ്ണം പതിനായിരം കടന്നു. മരണമടയുന്നവരുടെ എണ്ണത്തില്‍ കാര്യമായ വര്‍ധനയില്ല. നമ്മുടെ സംരക്ഷണ സമ്പര്‍ക്ക വിലക്ക് വിജയിച്ചത് കൊണ്ട് മരണനിരക്ക് കുറക്കാന്‍ കഴിഞ്ഞതില്‍ ആശ്വസിക്കാം. എന്നാല്‍, സമ്പര്‍ക്കത്തിലൂടെയുള്ള രോഗവ്യാപനം അറുപത് ശതമാനത്തിന് മുകളിലാണിപ്പോള്‍. ഉറവിടമറിയാന്‍ കഴിയാത്ത രോഗികളുടെ എണ്ണത്തിലും നല്ല വര്‍ധനയുണ്ട്.  

നിരവധി ജില്ലകളില്‍ രോഗികളുടെ ക്ലസ്റ്ററുകള്‍ രൂപപ്പെട്ട് കഴിഞ്ഞിട്ടുണ്ട്. ലോകാരോഗ്യ സംഘടനയുടെ അഭിപ്രായത്തില്‍ രോഗവ്യാപനത്തിന് നാലു ഘട്ടങ്ങളാണുള്ളത്. രോഗികളില്ലാത്ത സ്ഥിതി, പുറമേനിന്നും ഒരു സമൂഹത്തില്‍ രോഗികളെത്തി ചിലരിലേക്ക് രോഗം പകരുന്ന ഘട്ടം (സ്പൊറാഡിക്), ചില ജനവിഭാഗങ്ങളിലും പ്രദേശങ്ങളിലും കേന്ദ്രീകരിച്ചുള്ള (ക്ലസ്റ്ററുകള്‍) രോഗവ്യാപനം, വ്യാപകമായ സമൂഹവ്യാപനം.  

തലസ്ഥാന ജില്ലയിലെ രണ്ടു പ്രദേശങ്ങള്‍ സമൂഹവ്യാപനത്തിലേക്ക് പോയി എന്നാണു കാണുന്നത്. ഈ സാഹചര്യത്തില്‍ സമചിത്തതയോടെ ശാസ്തീയമായ പരിഹാരമാര്‍ഗങ്ങളിലേക്ക് നാം പോയേ തീരൂ. ബ്രേക്ക് ദി ചെയിന്‍ ജീവിതരീതി സുപ്രധാനമാണ്. അതില്‍ തന്നെ ചില കാര്യങ്ങള്‍ പ്രത്യേകം ശ്രദ്ധിക്കണം. വീട്ടില്‍ നിന്നും പുറത്തേക്ക് പോകുന്നവര്‍ തിരികെ വീട്ടിലെത്തിയാല്‍ മാസ്ക് ധരിക്കാനും ശരീരിക അകലം പാലിക്കാനും തയ്യാറാകണം.

ക്ലസ്റ്ററുകളില്‍ രോഗവ്യാപന പഠനം നടത്തി രോഗവ്യാപന കാരണങ്ങള്‍ കണ്ടെത്തിയും വിപുലമായ തോതില്‍ ടെസ്റ്റിങ് നടത്തിയും വ്യാപനം തടയാന്‍ നടത്തുന്ന ശ്രമങ്ങള്‍ പൊന്നാനി പോലുള്ള ആദ്യ ക്ലസ്റ്ററുകളില്‍ വിജയിച്ചിട്ടുണ്ട്.

ഗുരുതരമായ രോഗമുള്ളവരെ വെന്‍റിലേറ്റര്‍-ഐസിയു സംവിധാനമുള്ള കോവിഡ് ആശുപത്രികളിലും അത്ര ഗുരുതരാവസ്ഥയിലല്ലാത്തവരെ  പ്രഥമതല കോവിഡ് ചികിത്സാകേന്ദ്രങ്ങളിലുമാണ് (കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകള്‍) പരിചരിക്കുക. ജില്ലകളില്‍ രണ്ടു വീതം കോവിഡ് ആശുപത്രികളും പ്രഥമതല കോവിഡ് ചികിത്സാകേന്ദ്രങ്ങളും സ്ഥാപിച്ച് കഴിഞ്ഞിട്ടുണ്ട്.

സ്വകാര്യ ആശുപത്രികള്‍ക്കും കോവിഡ് രോഗികളെ ചികിത്സിക്കാന്‍ അനുവാദം നല്‍കിയിട്ടുണ്ട്. ആരോഗ്യ, തദ്ദേശ സ്വയംഭരണ, ദുരന്തനിവാരണ വകുപ്പുകള്‍ സംയുക്തമായി 50,000 കിടക്കകളോടെ കൂടുതല്‍ ചികിത്സാകേന്ദ്രങ്ങള്‍ സ്ഥാപിക്കുകയാണ്. ചെറുകിട ഇടത്തരം സ്വകാര്യ ആശുപത്രികള്‍ക്ക്  പ്രഥമതല കോവിഡ് ചികിത്സാകേന്ദ്രങ്ങള്‍ നടത്താന്‍ അനുമതി നല്‍കും.

സംസ്ഥാനത്തുള്ള രോഗികളില്‍ അറുപത് ശതമാനത്തിലേറെ രോഗലക്ഷണമൊന്നും പ്രകടിപ്പിക്കാത്തവരാണ്. ഇവരെ വീടുകളില്‍ തന്നെ താമസിച്ച് പരിചരിച്ചാല്‍ മതിയെന്ന് വിഗഗ്ധര്‍ ഉപാധികളോടെ നിര്‍ദ്ദേശിച്ചിട്ടുണ്ട്. അപകടസാധ്യത വിഭാഗത്തില്‍ പെടാത്തവരായ രോഗലക്ഷണമില്ലാത്തവരെ താമസസ്ഥാലത്തിന് തൊട്ടടുത്ത് ചികിത്സാകേന്ദ്രങ്ങളുണ്ടെന്ന് ഉറപ്പുണ്ടെങ്കില്‍ വീട്ടില്‍ തന്നെ കഴിയാന്‍ അനുവദിക്കാവുന്നതാണെന്നാണ് മറ്റു ചില രാജ്യങ്ങളിലേയും അനുഭവം. രോഗികളുടെ എണ്ണം അമിതമായി വര്‍ധിച്ചാല്‍ ഇത്തരം നിര്‍ദ്ദേശങ്ങള്‍ പരിഗണിക്കേണ്ടി വന്നേക്കാം.

വിദേശത്തു നിന്നും മറ്റ് സംസ്ഥാനങ്ങളില്‍നിന്നും വരുന്നവരുടെ എണ്ണം കുറഞ്ഞ് തുടങ്ങിയിട്ടുണ്ട്. സംസ്ഥാനത്തിനുള്ളിലെ രോഗവ്യാപനം നിയന്ത്രിക്കാന്‍ സര്‍ക്കാരും ജനങ്ങളും ഒത്തുശ്രമിച്ചാല്‍ തീര്‍ച്ചയായും കഴിയും. ഈ ഗുരുതരമായ സാഹചര്യം കണക്കിലെടുത്താണ് ബ്രേക്ക് ദി ചെയിന്‍ കാമ്പയിന്‍റെ അടുത്ത ഘട്ടമായി ‘ജീവന്‍റെ വിലയുള്ള ജാഗ്രത’ എന്ന ആശയം രൂപപ്പെടുത്തിയത്.

നിപയും പ്രളയവും ഒരുമാസക്കാലം വീതം നീണ്ടുനിന്ന പ്രതിസന്ധികളായിരുന്നു. കോവിഡിനെ നാം നേരിടാന്‍ തുടങ്ങിയിട്ട് ആറുമാസത്തിലേറെയാവുന്നു. അതിന്‍റെ ക്ഷീണവും ആലസ്യവും മടുപ്പും പലരേയും ബാധിച്ചിട്ടുണ്ട്. പക്ഷേ നമുക്ക് നിരന്തര ജാഗ്രത പുലര്‍ത്തിയേ പറ്റൂ. ലോകമാകെ വ്യാപിച്ചിരിക്കുന്ന ഒരു മഹാമാരിയെയാണ് നേരിടാനുള്ളതെന്നത് മറക്കരുത്.  

തീര്‍ച്ചയായും നമുക്ക് കോവിഡിനേയും  അതിജീവിക്കാന്‍ കഴിയും. അതിനുള്ള ജനകീയ ഐക്യത്തിന്‍റെയും സാമൂഹ്യ ഒരുമയുടെയുമായ ആന്തരിക കരുത്ത് കേരള സമൂഹത്തിനുണ്ട്. അത് നാം പലവട്ടം തെളിയിച്ചിട്ടുള്ളതാണ്. ഒത്തൊരുമിച്ചുള്ള മുന്നേറ്റത്തില്‍ ആരും മാറിനില്‍ക്കരുത് എന്ന് ഒരിക്കല്‍ക്കൂടി അഭ്യര്‍ത്ഥിക്കുന്നു.

തിരുവനന്തപുരം ജില്ലയില്‍ സമ്പര്‍ക്കത്തിലൂടെ രോഗം ബാധിക്കുന്നവരുടെ എണ്ണം തുടര്‍ച്ചയായിവര്‍ധിക്കുകയാണ്. ഇന്ന് 152 ആണ് സമ്പര്‍ക്കംമൂലമുള്ള രോഗബാധ. നാലുപേരുടെ ഉറവിടം മനസ്സിലായിട്ടില്ല.

സമൂഹവ്യാപനമുണ്ടായതായി പ്രഖ്യാപിച്ച പുല്ലുവിള, പൂന്തുറ പ്രദേശങ്ങളില്‍ പൊലീസ്, ആരോഗ്യം, റവന്യു, തദ്ദേശസ്വയംഭരണം ഉള്‍പ്പടെയുള്ള വകുപ്പുകള്‍ 24 മണിക്കൂറും നിതാന്ത ജാഗ്രതയോടെ പ്രവര്‍ത്തിക്കുന്നു. സമ്പര്‍ക്കത്തിലൂടെ പുതിയ രോഗികളുണ്ടാകാതിരിക്കാനുള്ള എല്ലാ നടപടികളും സ്വീകരിച്ചിട്ടുണ്ട്. അനാവശ്യമായി പുറത്തിറങ്ങുന്നത് തടയുന്നതിന് നടപടികള്‍ പൊലീസ് ഉറപ്പുവരുത്തുന്നുണ്ട്. പ്രദേശവാസികള്‍ക്ക് കൂടുതല്‍ ബോധവല്‍കരണം നല്‍കുന്നതിനായി ആരോഗ്യപ്രവര്‍ത്തകരും സജീവമാണ്.

നഗരസഭയുടെ നേതൃത്വത്തിലും കാര്യക്ഷമമായ ഇടപെടല്‍ നടത്തുന്നുണ്ട്. തിരുവനന്തപുരം നഗരത്തിലെ പ്രധാന സ്ഥലങ്ങളായ സ്റ്റാച്യു, പേട്ട, അട്ടക്കുളങ്ങര, പേരൂര്‍ക്കട, കുടപ്പനക്കുന്ന് അടക്കമുള്ള സ്ഥലങ്ങളിലും സമ്പര്‍ക്കത്തിലൂടെ രോഗം ബാധിച്ചവരും ഉറവിടം വ്യക്തമല്ലാത്തവരുമുണ്ട്. ഇത് ആശങ്കയുണ്ടാക്കുന്നതാണ്.

ജില്ലയിലെ തീരപ്രദേശങ്ങള്‍ ക്രിട്ടിക്കല്‍ കണ്ടെയിന്‍മെന്‍റ് സോണായി പ്രഖ്യാപിച്ചിട്ടുണ്ട്. ഇന്ന് അര്‍ദ്ധരാത്രി മുതല്‍ ജൂലൈ 28 അര്‍ദ്ധരാത്രി വരെ 10 ദിവസത്തേക്കാണ്  നിയന്ത്രണം. ഈ ദിവസങ്ങളില്‍ ഒരുതരത്തിലുള്ള ലോക്ക്ഡൗണ്‍ ഇളവുകളും ഈ പ്രദേശങ്ങളില്‍ ഉണ്ടാകില്ല. ഇന്നലെ പറഞ്ഞതുപോലെ തീരപ്രദേശങ്ങളെ മൂന്നു സോണുകളായി തിരിച്ചാണ് നിയന്ത്രണം.

ഇടവ, വെട്ടൂര്‍, അഞ്ചുതെങ്ങ്, കടയ്ക്കാവൂര്‍, വക്കം ഗ്രാമപഞ്ചായത്ത്, വര്‍ക്കല മുന്‍സിപ്പാലിറ്റി എന്നിവിടങ്ങളിലെ തീരപ്രദേശങ്ങള്‍ സോണ്‍ ഒന്നിലും ചിറയിന്‍കീഴ്, കഠിനംകുളം ഗ്രാമപഞ്ചായത്ത്, തിരുവനന്തപുരം കോര്‍പ്പറേഷന്‍ എന്നിവിടങ്ങളിലെ തീരപ്രദേശങ്ങള്‍ സോണ്‍ രണ്ടിലും കോട്ടുകാല്‍, കരിംകുളം, പൂവാര്‍, കുളത്തൂര്‍ ഗ്രാമപഞ്ചായത്ത് എന്നിവിടങ്ങളിലെ തീരപ്രദേശങ്ങള്‍ സോണ്‍ മൂന്നിലും ഉള്‍പ്പെടും.

മുന്‍ നിശ്ചയപ്രകാരം നടത്താനിരുന്ന പരീക്ഷകള്‍ എല്ലാം ഈ സോണുകളില്‍ മാറ്റിവയ്ക്കും. അവശ്യ സര്‍വീസുകളില്‍ ഉള്‍പ്പെടാത്ത കേന്ദ്ര-സംസ്ഥാന സര്‍ക്കാരിനു കീഴിലുള്ളതും മറ്റ് അനുബന്ധ ഓഫീസുകളും പ്രവര്‍ത്തിക്കില്ല. ആവശ്യമെങ്കില്‍ വര്‍ക്ക് ഫ്രം ഹോം സംവിധാനം ഉപയോഗപ്പെടുത്തണം. ആശുപത്രികള്‍, മെഡിക്കല്‍ അനുബന്ധ സ്ഥാപനങ്ങള്‍ എന്നിവയ്ക്ക് പ്രവര്‍ത്തന അനുമതിയുണ്ട്. ക്രിട്ടിക്കല്‍ കണ്ടെയിന്‍മെന്‍റ് സോണുകളിലെ ദേശീയപാതയിലൂടെ ഗതാഗതം അനുവദിക്കും. എന്നാല്‍ ഈ പ്രദേശങ്ങളില്‍ വാഹനം നിര്‍ത്താന്‍ പാടില്ല.

പാല്‍, പച്ചക്കറി, പലചരക്ക് കടകള്‍ ഇറച്ചികടകള്‍ എന്നിവയ്ക്ക് രാവിലെ ഏഴുമണി മുതല്‍ വൈകിട്ട് നാലുമണിവരെ പ്രവര്‍ത്തിക്കാം. ഓരോ കുടുംബത്തിനും അഞ്ച് കിലോ അരി, ഒരുകിലോ ധാന്യം എന്നിവ സിവില്‍ സപ്ലൈസിന്‍റെ നേതൃത്വത്തില്‍ നല്‍കും. പ്രദേശങ്ങളില്‍ ഹോര്‍ട്ടികോര്‍പ്പ്, സപ്ലൈകോ, കെപ്കോ എന്നിവയുടെ മൊബൈല്‍ വാഹനങ്ങള്‍ എത്തിച്ച് വില്‍പ്പന നടത്തും. ലീഡ് ബാങ്കിന്‍റെ നേതൃത്വത്തില്‍ മൊബൈല്‍ എടിഎം സൗകര്യവും ഒരുക്കും.

സംസ്ഥാനത്തെ ആദ്യത്തെ പ്ലാസ്മ ബാങ്ക് മലപ്പുറം ജില്ലയിലെ മഞ്ചേരി മെഡിക്കല്‍ കോളേജില്‍ പ്രവര്‍ത്തനമാരംഭിച്ചിട്ടുണ്ട്. കോവിഡ് രോഗാണുവിനെ ചെറുക്കാനുള്ള ആന്‍റിബോഡി, കോവിഡ് ഭേദമായവരുടെ പ്ലാസ്മയില്‍നിന്ന് വേര്‍തിരിച്ചെടുത്ത് ലഭ്യമാക്കുകയാണ് ബാങ്ക് ചെയ്യുക. ഇത് കോവിഡ് ബാധിതരെ ചികിത്സിക്കാന്‍ ഉപയോഗിക്കും.

കോവിഡ് ബാധിച്ച് അതീവ ഗുരുതരാവസ്ഥയിലായിരുന്ന  രണ്ടു പേര്‍ കൂടി പ്ലാസ്മ തെറാപ്പിയിലൂടെ രോഗമുക്തരായി ഇന്നലെ വീട്ടിലേക്ക് മടങ്ങിയിട്ടുണ്ട്. അവര്‍ക്ക് പ്ലാസ്മ നല്‍കാനായി കോവിഡ് രോഗമുക്തരായ 22പേരാണ് മഞ്ചേരി മെഡിക്കല്‍ കോളേജില്‍ ഇന്നലെ എത്തിയത്. ഇതുവരെ അന്‍പതിലധികം രോഗവിമുക്തരാണ് പ്ലാസ്മ നല്‍കിയത്. ഇനിയും ഇരുനൂറോളം പേര്‍ പ്ലാസ്മ നല്‍കാന്‍ സന്നദ്ധത അറിയിച്ചിട്ടുണ്ട്. ആലപ്പുഴ മെഡിക്കല്‍ കോളജില്‍ ചികിത്സയില്‍ കഴിയുന്ന അത്യാസന്ന നിലയിലുള്ള കോവിഡ് രോഗിക്ക് കഴിഞ്ഞ ദിവസം മഞ്ചേരിയില്‍നിന്ന് പ്ലാസ്മ എത്തിച്ച് നല്‍കിയിരുന്നു.

കണ്ണൂര്‍ ജില്ലയില്‍ സമ്പര്‍ക്കംമൂലം രോഗബാധ ഉണ്ടായ 11 തദ്ദേശ സ്ഥാപനപരിധിയിലെ 18 വാര്‍ഡുകളും കണ്ണൂര്‍ കന്‍റോണ്‍മെന്‍റ് ബോര്‍ഡ് പരിധിയിലെ മുഴുവന്‍ പ്രദേശങ്ങളും പൂര്‍ണമായി അടച്ചിട്ടു.

കാസര്‍കോട് അതിര്‍ത്തിയില്‍ കര്‍ണാടക സംസ്ഥാനത്തെ ദക്ഷിണ കന്നഡയില്‍ രോഗവ്യാപനം രൂക്ഷമാണ്. ഇത് ജില്ലയിലും രോഗസ്ഥിതി രൂക്ഷമാകുമെന്ന ആശങ്ക വര്‍ധിച്ചിട്ടുണ്ട്. കാസര്‍കോട് നഗരസഭയില്‍ രോഗവ്യാപനം തടയാന്‍ മത്സ്യ-പച്ചക്കറി മാര്‍ക്കറ്റ് കണ്ടെയിന്‍മെന്‍റ് സോണായി പ്രഖ്യാപിച്ചു. ഇവിടങ്ങളില്‍ ഒന്നിടവിട്ടുള്ള ദിവസങ്ങളില്‍ മാത്രമേ കടകള്‍ തുറക്കാന്‍ അനുവദിക്കൂ.

പത്തനംതിട്ട ജില്ലയില്‍ ഇന്ന് സ്ഥിരീകരിച്ച 28 രോഗബാധിതരില്‍ 12 പേര്‍ക്കും സമ്പര്‍ക്കത്തിലൂടെയാണ് രോഗം വന്നത്. തിരുവല്ല തുകലശേരിയിലെ ഹോളി സ്പിരിറ്റ് കോണ്‍വെറ്റില്‍ സമ്പര്‍ക്കംമൂലം 29 പേര്‍ക്ക് രോഗം സ്ഥിരീകരിച്ചു. കോഴഞ്ചേരി ജില്ലാ ആശുപത്രിയിലെ പബ്ലിക് ഹെല്‍ത്ത് ലാബില്‍ ആര്‍ടിപിസിആര്‍ ടെസ്റ്റ് നടത്തുന്നതിനുള്ള പ്രവര്‍ത്തനം പൂര്‍ത്തിയായിവരുന്നു.

വയനാട് ജില്ലയില്‍ ഇന്ന് സ്ഥിരീകരിച്ച 26ല്‍ 11 സമ്പര്‍ക്കംമൂലം. പുല്‍പ്പള്ളി, കാട്ടിക്കുളം, കോട്ടത്തറ തുടങ്ങിയ പഞ്ചായത്തുകളിലും ക്ലസ്റ്റര്‍ സാധ്യത മുന്നില്‍ കണ്ടുള്ള ജാഗ്രത തുടരുന്നുണ്ട്. ജില്ലയില്‍ പുല്‍പ്പള്ളി, മുള്ളന്‍കൊല്ലി, തിരുനെല്ലി പഞ്ചായത്തുകളിലെ മുഴുവന്‍ വാര്‍ഡുകളും മാനന്തവാടി നഗരസഭയിലെ നാല് വാര്‍ഡുകളും എടവക, പൂതാടി, തൊണ്ടര്‍നാട്, മീനങ്ങാടി, കോട്ടത്തറ, കണിയാമ്പറ്റ, മേപ്പാടി പഞ്ചായത്തുകളിലെ ഏതാനും വാര്‍ഡുകളും കണ്ടെയ്ന്‍മെന്‍റ് സോണുകളാണ്. കല്‍പ്പറ്റ നഗരസഭയിലെ റാട്ടക്കല്ലി പട്ടികവര്‍ഗ കോളനി മൈക്രോ കണ്ടെയ്ന്‍മെന്‍റ് സോണായും പ്രഖ്യാപിച്ചിട്ടുണ്ട്. ആദിവാസി മേഖലയില്‍ അതീവ ജാഗ്രത പുലര്‍ത്തുന്നു.

ആലപ്പുഴ ജില്ലയില്‍ സമ്പര്‍ക്കത്തിലുള്ള രോഗബാധിതരുടെ എണ്ണം വര്‍ദ്ധിക്കുന്നുണ്ട്. ഇന്ന് അത് 23 ആണ്. എഴുപുന്ന, പള്ളിത്തോട്, കായംകുളം, കുറത്തികാട്, നൂറനാട് എന്നീ പ്രദേശങ്ങളിലാണ് രോഗികള്‍ അധികവും. തീരദേശമേഖലയില്‍ മാത്രം കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകളില്‍ ആയിരം കിടക്കകള്‍ സജ്ജമാക്കാനാണ് പദ്ധതി.
 
തൃശൂരില്‍ അഞ്ച് തദ്ദേശ സ്ഥാപന പ്രദേശങ്ങള്‍ കൂടി കണ്ടെയ്ന്‍മെന്‍റ് സോണ്‍ ആയി. തൃശൂര്‍ മെഡിക്കല്‍ കോളേജില്‍ പ്ളാസ്മാ തെറാപ്പി ചികിത്സയിലൂടെ ഒരു കോവിഡ് രോഗി കൂടി നെഗറ്റീവായി. ഇതുവരെ 4 പേര്‍ക്ക് പ്ളാസ്മാ ചികിത്സ നല്‍കി.

എറണാകുളം ജില്ലയില്‍ ഇന്ന് സ്ഥിരീകരിച്ച 44ല്‍ 32ഉം സമ്പര്‍ക്കം. നാല് ആരോഗ്യപ്രവര്‍ത്തകര്‍. രണ്ട് ഉറവിടമറിയില്ല. കൂടുതല്‍ ശ്രദ്ധവേണ്ട അവസ്ഥയിലേക്കാണ് എറണാകുളം ജില്ല പോകുന്നത്. മൂന്ന് ആക്റ്റീവ് ക്ലസ്റ്ററുകള്‍ ആണുള്ളത്, ചെല്ലാനം, ആലുവ കീഴ്മാട് എന്നിവ. ആലുവ മാര്‍ക്കറ്റിലെ മൊത്തവ്യാപാരികള്‍ക്ക്  ആഴ്ചയിലൊരു ദിവസം ചരക്കു ലോറികളില്‍ അവശ്യ സാധനങ്ങള്‍ ഇറക്കാന്‍ അനുമതി നല്‍കി. വ്യാപാരികള്‍ക്ക് സാധനങ്ങള്‍ കണ്ടെയ്ന്‍മെന്‍റ് സോണിനു പുറത്തേക്ക് വില്‍ക്കാന്‍ അനുവാദമില്ല.

ചെല്ലാനം പഞ്ചായത്തില്‍ സ്പെഷ്യല്‍ ടെസ്റ്റിങ് ടീമിനെ ചുമതലപെടുത്തി. പ്രദേശത്ത് ആരംഭിച്ച  കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററിനോട് ചേര്‍ന്നും പരിശോധനക്ക് ആവശ്യമായ സൗകര്യവും ഒരുക്കിയിട്ടുണ്ട്.

കോഴിക്കോട് ജില്ലയില്‍ സമ്പര്‍ക്ക രോഗവ്യാപനം സ്ഥിരീകരിച്ച ഏഴ് ക്ലസ്റ്ററുകളാണുള്ളത്.  

ഇടുക്കി ജില്ലയില്‍ സമ്പര്‍ക്കംമൂലം വാഴത്തോപ്പില്‍ ഏഴ് പേര്‍ക്ക് രോഗബാധ ഉണ്ടായിട്ടുണ്ട്. ഇന്ന് സ്ഥിരീകരിച്ച 28ല്‍ പത്തും സമ്പര്‍ക്കംമൂലമാണ്. ഹെല്‍ത്ത്വര്‍ക്കര്‍മാര്‍ 4, ഉറവിടമറിയാത്തത് 7.

കൊല്ലം ജില്ലയില്‍ ഇന്ന് രോഗം സ്ഥിരീകരിച്ച 53 പേരില്‍ 33ഉം സമ്പര്‍ക്കംമൂലമാണ്. ഒമ്പതുപേരുടെ ഉറവിടം വ്യക്തമായിട്ടില്ല. കൊല്ലം ഹോക്കി സ്റ്റേഡിയത്തില്‍ പ്രഥമ ചികിത്സക്കായി തയ്യാറാക്കിയ കേന്ദ്രം ഉദ്ഘാടനം ചെയ്തു. പതിമൂന്ന് പഞ്ചായത്തുകളില്‍ ആഡിറ്റോറിയം കണ്ടെത്തി കോവിഡ് ട്രീറ്റ്മെന്‍റ് കേന്ദ്രങ്ങളാക്കാനുള്ള പ്രാഥമിക നടപടികള്‍ ആരംഭിച്ചു. ചവറ, പډന ഗ്രാമപഞ്ചായത്തുകള്‍ പൂര്‍ണ്ണമായും തീവ്ര നിയന്ത്രണ പ്രദേശങ്ങളാണ്.

ഫസ്റ്റ്ലൈന്‍ ട്രീറ്റ്മെന്‍റ് സെന്‍റര്‍
കോവിഡ് വ്യാപനത്തെ നേരിടുന്നതിനു വേണ്ടി പ്രത്യേകമായി തയ്യാറാക്കുന്ന ജനകീയ ആരോഗ്യ പരിപാലന കേന്ദ്രങ്ങളാണ് കോവിഡ് ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകള്‍. സമൂഹവ്യാപനമുണ്ടായാല്‍ നിലവിലുള്ള പൊതുജനാരോഗ്യ സംവിധാനത്തിന്‍റെ പ്രവര്‍ത്തനങ്ങളെ ബാധിക്കാത്ത തരത്തില്‍ അവശ്യ സൗകര്യങ്ങളുള്ള പ്രാദേശിക കേന്ദ്രങ്ങളായാണ് ഇവയെ ഉപയോഗിക്കുന്നത്.

ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകള്‍ക്കായി ഹോട്ടലുകള്‍, ഹാളുകള്‍, കോളേജുകള്‍ തുടങ്ങിയവ തദ്ദേശസ്വയംഭരണ സ്ഥാപനങ്ങള്‍ കണ്ടെത്തിയിട്ടുണ്ട്. അതാതു തദ്ദേശസ്വയംഭരണ സ്ഥാപനങ്ങള്‍ക്ക് കീഴില്‍ പ്രവര്‍ത്തിക്കുന്ന ഈ സ്ഥാപനങ്ങളുടെ മേല്‍നോട്ടം ബന്ധപ്പെട്ട പിഎച്ച്സി/എഫ്എച്ച്സി/സിഎച്ച്സി/താലൂക്ക് ആശുപത്രികള്‍ക്കായിരിക്കും. മരുന്നുകള്‍, പള്‍സ് ഓക്സിമീറ്ററുകള്‍, ബിപി അപ്പാരറ്റസ് തുടങ്ങി വിവിധ സംവിധാനങ്ങള്‍ ഇവിടെ സജ്ജമാക്കിയിട്ടുണ്ട്. പ്രവര്‍ത്തനങ്ങള്‍ക്ക് വിദഗ്ധരായ ആരോഗ്യപ്രവര്‍ത്തകര്‍ നേതൃത്വം കൊടുക്കുന്നു.

ഒരേതരം രോഗലക്ഷണങ്ങളുള്ള ടെസ്റ്റ് റിസള്‍ട്ട് പോസിറ്റീവ് ആയവരെയും ഒരേ ലിംഗത്തിലുള്ളവരെയും ഒരുമിച്ചു ഒരു ഹാളില്‍/ഒരു വാര്‍ഡില്‍ കിടത്തുന്നതില്‍ പ്രത്യേകിച്ചു പ്രശ്നങ്ങള്‍ ഇല്ല. പക്ഷെ, കിടക്കകള്‍ തമ്മില്‍ കൃത്യമായ അകലം അതായത് കുറഞ്ഞത് 1.2 മീറ്റര്‍ (4 മുതല്‍ 6 അടി വരെ) ഉണ്ടായിരിക്കും.

ജില്ലാ കണ്‍ട്രോള്‍ റൂമില്‍ നിന്നോ ബന്ധപ്പെട്ട ആരോഗ്യ സ്ഥാപനത്തില്‍ നിന്നോ ടെസ്റ്റ് റിസള്‍ട്ട് അറിയിച്ച് കഴിഞ്ഞാല്‍ കോവിഡ് ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളിലേക്ക് പോകുന്നതിനു തയ്യാറാകേണ്ടാതാണ്. ഇതിന് പ്രത്യേകം സജ്ജീകരിച്ച ആംബുലന്‍സില്‍ മാറ്റും.

ആന്‍റിജന്‍ ടെസ്റ്റ്  പോസിറ്റീവ് ആയവരില്‍  രോഗലക്ഷണങ്ങളില്ലാത്തവരേയും നിലവിലെ സാഹചര്യത്തില്‍ കോവിഡ് ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളിലേയ്ക്കു  കൊണ്ടുപോകേണ്ടിവരും. രോഗലക്ഷണങ്ങള്‍ ഇല്ലാത്തവരില്‍ നിന്നും രോഗം പകരാനുള്ള സാധ്യതയുണ്ട്. ഇതുവഴി  സമൂഹവ്യാപനത്തിന് സാധ്യതയുണ്ട്. രോഗലക്ഷണങ്ങള്‍ ഇല്ലെങ്കിലും പോസിറ്റീവ് ആയവരെ മാറ്റിപ്പാര്‍പ്പിക്കുന്നതാണ് ഉചിതം. അത്തരമാളുകള്‍ യാതൊരുവിധ എതിര്‍പ്പും പ്രകടിപ്പിക്കാതെ ആരോഗ്യ പ്രവര്‍ത്തകരുടെ നിര്‍ദ്ദേശങ്ങള്‍ പാലിച്ചു ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളിലേക്ക് പോകേണ്ടതാണ്.

ടെസ്റ്റ് റിസള്‍ട്ട് നെഗറ്റീവ് ആകുന്ന മുറയ്ക്ക് സര്‍ക്കാര്‍ മാനദണ്ഡപ്രകാരം കോവിഡ് ഫസ്റ്റ്ലൈന്‍ ട്രീറ്റ്മെന്‍റ് സെന്‍ററുകളില്‍ നിന്നും തിരികെ വീട്ടില്‍ എത്തിക്കും.

നഗരങ്ങളില്‍ പ്രവര്‍ത്തിക്കുന്ന ഹൈപ്പര്‍ മാര്‍ക്കറ്റുകള്‍ ലോക്ക്ഡൗണ്‍ സംബന്ധിച്ച സര്‍ക്കാരിന്‍റെയും പൊലീസിന്‍റെയും നിയമപരമായ നിര്‍ദ്ദേശങ്ങളും മുന്നറിയിപ്പുകളും അവഗണിക്കുന്നതായി ശ്രദ്ധയില്‍പ്പെട്ടിട്ടുണ്ട്. ഇത്തരം നിരുത്തരവാദിത്തപരമായ നടപടികള്‍മൂലം കോവിഡ് കേസുകളില്‍ വര്‍ധന വരികയാണ്.

ഇത്തരം സ്ഥാപനങ്ങളില്‍ ജോലിചെയ്യുന്ന ജീവനക്കാരുടേയും അവിടെയെത്തുന്ന ഉപഭോക്താക്കളുടേയും ആരോഗ്യം സംരക്ഷിക്കുന്നതിനായി സാമൂഹിക അകലം പാലിക്കല്‍ ഉള്‍പ്പെടെയുള്ള സുരക്ഷാ പ്രോട്ടോക്കോള്‍ കര്‍ശനമായി നടപ്പാക്കാന്‍ സ്ഥാപന ഉടമകള്‍ക്ക് ഉത്തരവാദിത്തമുണ്ട്. ഇതിനു വിരുദ്ധമായി പ്രവര്‍ത്തിക്കുന്ന സ്ഥാപനങ്ങളുടെ ഉടമകള്‍ക്കും നടത്തിപ്പുകാര്‍ക്കുമെതിരെ കേരള പകര്‍ച്ചവ്യാധി ഓര്‍ഡിനന്‍സ് ഉള്‍പ്പെടെയുള്ള നിയമങ്ങളുടെ അടിസ്ഥാനത്തില്‍ കര്‍ശന നടപടി സ്വീകരിക്കാന്‍ പൊലീസിന് നിര്‍ദ്ദേശം നല്‍കി.

സംസ്ഥാനത്ത് എല്ലാ പൊലീസ് സ്റ്റേഷനുകളിലും ഒരു ഓക്സിജന്‍ സിലിണ്ടര്‍ വീതം വാങ്ങി സൂക്ഷിക്കാന്‍ നിര്‍ദ്ദേശം നല്‍കി. അത്യാവശ്യ സമയങ്ങളില്‍ പൊലീസ് ഉദ്യോഗസ്ഥര്‍ക്കും പൊതുജനങ്ങള്‍ക്കും ഇത് ഉപയോഗിക്കാന്‍ കഴിയും.

മാസ്ക് ധരിക്കാത്ത 5386 സംഭവങ്ങള്‍ സംസ്ഥാനത്ത് ഇന്ന് റിപ്പോര്‍ട്ട് ചെയ്തിട്ടുണ്ട്. ക്വാറന്‍റൈന്‍ ലംഘിച്ച 14 പേര്‍ക്കെതിരെ ഇന്ന് കേസ് രജിസ്റ്റര്‍ ചെയ്തു.

മണ്‍സൂണ്‍
2020 മണ്‍സൂണ്‍ സീസണില്‍ ഇത് വരെ (ജൂണ്‍ 1 മുതല്‍ ജൂലൈ 17 വരെ) കേരളത്തില്‍ ആകെ ലഭിച്ചത് 823.2 മില്ലിമീറ്റര്‍ മഴയാണ്. ഇത് ഈ കാലയളവില്‍ ലഭിക്കേണ്ട സാധാരണ മഴയുടെ ദീര്‍ഘകാല ശരാശരിയേക്കാള്‍ 23 ശതമാനം കുറവാണ്.

കേന്ദ്ര കാലാവസ്ഥ വകുപ്പ് ജൂലൈ 17ന് സംസ്ഥാന ദുരന്ത നിവാരണ അതോറിറ്റിക്ക് നല്‍കിയ അടുത്ത രണ്ടാഴ്ചയിലേക്കുള്ള (ജൂലൈ 17 മുതല്‍ ജൂലൈ 30 വരെ) ദ്വൈവാര മഴ പ്രവചനത്തില്‍ കേരളത്തില്‍ സാധാരണ മഴക്കുള്ള സാധ്യതയാണ് പ്രവചിച്ചിരിക്കുന്നത്. വടക്കന്‍ ജില്ലകളില്‍ സാധാരണയില്‍ കുറഞ്ഞ മഴയും തെക്കന്‍ ജില്ലകളില്‍ സാധാരണ മഴയുമാണ് പ്രവചിക്കുന്നത്. ജൂലൈ രണ്ടാം പാദത്തിലെ സാധാരണ മഴ തന്നെ വലിയ മഴയാണ്. അതിനാല്‍ തന്നെ അടുത്ത രണ്ടാഴ്ച കേരളത്തില്‍ വ്യാപകമായി മഴ ലഭിക്കുമെന്നാണ് പ്രതീക്ഷിക്കേണ്ടത്. ഇതില്‍ ഒറ്റപ്പെട്ടയിടങ്ങളില്‍ പെയ്യുന്ന ശക്തമായ മഴ അപകടങ്ങള്‍ സൃഷ്ടിക്കാനും സാധ്യതയുണ്ട്.

ജില്ലാ ദുരന്ത നിവാരണ അതോറിറ്റികളും പ്രാദേശിക ഭരണസംവിധാനവുമൊക്കെ മണ്‍സൂണ്‍ മുന്നൊരുക്ക യോഗങ്ങള്‍ നടത്തി തയ്യാറെടുപ്പുകള്‍ അവലോകനം ചെയ്തിട്ടുണ്ട്.

സഹായം
കണ്ണൂര്‍ ജില്ലയിലെ കേരള മുസ്ലിം ജമാഅത്തും എസ് വൈ എസും ചേര്‍ന്ന് കോവിഡ് ഫസ്റ്റ്ലൈന്‍ ട്രീറ്റ്മെന്‍റ് സെന്‍ററിനുവേണ്ടി 10,000 കിടക്കകള്‍ നല്‍കാന്‍ തയ്യാറായിട്ടുണ്ട്.

കൊവിഡ് 19 പ്രതിസന്ധിമൂലം കടലില്‍ പോകാന്‍ സാധിക്കാത്ത മത്സ്യത്തൊഴിലാളികള്‍ക്കായി കൊല്ലം ജില്ലയിലെ ഹയര്‍ സെക്കന്‍ററി എന്‍ എസ്എസ് യൂണിറ്റ് ഭക്ഷ്യ കിറ്റുകള്‍ വിതരണം ചെയ്തു. തീരത്തിനൊപ്പം എന്ന് പേരിട്ടിരിക്കുന്ന പദ്ധതിയിലൂടെ വാടി, പരവൂര്‍, കുഴിത്തുറ പ്രദേശങ്ങളിലെ 900 കുടുംബങ്ങള്‍ക്കാണ് ഭക്ഷ്യ കിറ്റ് കൈമാറിയത്.

ദുരിതാശ്വാസ നിധി
കേരള ഗ്രാമീണ്‍ബാങ്ക് റിട്ടയറീസ് ഫോറം 8,06,947 രൂപ, നേരത്തെ 32 ലക്ഷം രൂപ കൈമാറിയിരുന്നു.

കയ്യൂര്‍ ചീമേനി ഗ്രാമപഞ്ചായത്തിലെ കുടുംബശ്രീ അയല്‍ക്കൂട്ടം അംഗങ്ങളുടെ ഒരു ദിവസത്തെ നിക്ഷേപം 1,75,000 രൂപ.

സിപിഐ എം കാട്ടാക്കട ലോക്കല്‍ കമ്മിറ്റി ബിരിയാണി ചലഞ്ചിലൂടെ സമാഹരിച്ച 1,50,000 രൂപ

പാരലല്‍ കോളേജ് അസോസിയേഷന്‍ സംസ്ഥാന കമ്മിറ്റി 65,000 രൂപ

കോഴിക്കോട് കാളാണ്ടിത്താഴം ദര്‍ശനം സാംസ്കാരിക വേദി ഗ്രന്ഥാലയം വാട്ട്സ് ആപ്പ് ചലഞ്ചിലൂടെ സമാഹരിച്ച 52,974 രൂപ

വടകരയിലെ ബാലസംഘം കുട്ടികള്‍ ബിരിയാണി ചലഞ്ചിലൂടെ സമാഹരിച്ച 1,14,380 രൂപ

അസോസിയേഷന്‍ ഓഫ് പെന്‍ഷനേഴ്സ് ട്രാന്‍സ്പോര്‍ട്ട് ചീഫ് ഓഫീസ് 1 ലക്ഷം രൂപ.

ബാലസംഘം ചെറുവത്തൂര്‍ ഏരിയാ കമ്മിറ്റി 78,688 രൂപ

പിലിക്കോട് ഗ്രാമപഞ്ചായത്തിലെ 12,13,14 വര്‍ഡുകളിലെ കുടുംബശ്രീ അംഗങ്ങളുടെ ഒരു ദിവസത്തെ നിക്ഷേപം 62,600 രൂപ

കാഞ്ഞങ്ങാട് ചിത്താരി ബാലസംഘം വില്ലേജ് കമ്മിറ്റി ബിരിയാണി ചലഞ്ചിലൂടെ സമാഹരിച്ച 51,325 രൂപ

പിലിക്കോട് പിസികെആര്‍ അടിയോടി സ്മാരക കലാസമിതി ആന്‍റ് ഗ്രന്ഥാലയം 50,000 രൂപ

നവധ്വനി കലാ സാംസ്ക്കാരിക വേദി പഴങ്കാവ്, വടകര, ബിരിയാണി ചലഞ്ചിലൂടെ സമാഹരിച്ച 42,431 രൂപ.

കോഴിക്കോട് വടകര സമദര്‍ശി കലാകായികവേദി ബിരിയാണി ചലഞ്ചിലൂടെ സമാഹരിച്ച 41,200 രൂപ.